← All works

Peshitta Chronicles 2

Peshitta (Syriac Old Testament) · 768 sections

1. Chronicles 2 21:7

   ܘܠܐ ܨܒܐ ܡܪܝܐ ܠܡܚܒܠܘ ܒܝܬܗ ܕܕܘܝܕ ܡܛܠ ܡܘܡܬܐ ܕܝܡܐ ܠܕܘܝܕ ܠܡܬܠ ܠܗ ܫܪܓܐ ܢܗܝܪܐ ܘܠܒܢܘ̈ܗܝ ܟܠܗܘܢ ܝܘܡ̈ܬܐ

2. Chronicles 2 21:8

   ܒܝܘܡ̈ܬܗ ܡܪܕܘ ܐܕܘܡ̈ܝܐ ܡܢ ܬܚܝܬ ܐܝܕܐ ܕܝܗܘܕܐ ܘܐܩܝܡܘ ܥܠܝܗܘܢ ܡܠܟܐ

3. Chronicles 2 21:9

   ܘܥܒܪ ܝܗܘܪܡ ܥܡ ܪ̈ܘܪܒܢܘܗܝ ܘܟܠܗܘܢ ܙܘܓ̈ܘܗܝ ܥܡܗ ܘܗܘܐ ܕܟܕ ܩܡ ܒܠܠܝܐ ܚܪܒܘ ܠܐܕܘ̈ܡܝܐ ܘܐܬܘ ܠܘܬܗ ܪ̈ܘܪܒܢܐ ܕܙܘܓ̈ܐ

4. Chronicles 2 21:10

   ܘܡܪܕܘ ܐܕܘܡ̈ܝܐ ܡܢ ܬܚܝܬ ܐܝܕܐ ܕܝܗܘܕܐ ܥܕܡܐ ܠܝܘܡܢܐ ܗܝܕܝܢ ܡܪܕܘ ܐܕܘܡ̈ܝܐ ܕܝܬ̇ܒܝܢ ܒܠܒܢܐ ܒܙܒܢܐ ܗ̇ܘ ܡܢ ܬܚܝܬ ܐܝܕܗ ܡܛܠ ܕܫܒܩ ܠܡܪܝܐ ܐܠܗܐ ܕܐܒܗ̈ܬܗ

5. Chronicles 2 21:11

   ܘܐܦ ܗܘ ܥܒܕ ܥܠܘ̈ܬܐ ܒܛܘܪܐ ܕܝܗܘܕܐ ܘܚܡܪܐ ܐܫܩܝ ܠܢܙܝܪ̈ܝܗ̇ ܕܐܘܪܫܠܡ ܘܒܕܪ ܠܕܒܝܬ ܝܗܘܕܐ

6. Chronicles 2 21:12

   ܘܐܝܬܝ ܠܘܬܗ ܡܢ ܦܬܓ̈ܡܐ ܕܐܠܝܐ ܢܒܝܐ ܕܐܡܪ ܠܗ ܗܟܢܐ ܐܡ̇ܪ ܡܪܝܐ ܐܠܗܗ ܕܕܘܝܕ ܐܒܘܟ ܚܠܦ ܕܠܐ ܗܠܟܬ ܒܐܘܪ̈ܚܬܗ ܕܝܗܘܫܦܛ ܐܒܘܟ ܘܒܐܘܪ̈ܚܬܗ ܕܐܣܐ ܡܠܟܐ ܕܝܗܘܕܐ

7. Chronicles 2 21:13

   ܘܗܠܟܬ ܠܟ ܒܐܘܪ̈ܚܬܐ ܕܡ̈ܠܟܐ ܕܐܝܣܪܝܠ ܘܐܛܥܝܬ ܠܝܗܘܕܐ ܘܠܥܡܘܪ̈ܝܗ̇ ܕܐܘܪܫܠܡ ܒܙܢܝܘܬܐ ܕܒܝܬ ܐܚܒ ܘܐܦ ܠܐܚܝ̈ܟ ܒܢ̈ܝ ܐܒܘܟ ܕܛܒܝܢ ܡܢܟ ܩܛܠܬ

8. Chronicles 2 21:14

   ܗܐ ܡܪܝܐ ܡܚ̇ܐ ܠܟ ܡܚܘܬܐ ܪܒܬܐ ܘܠܥܡܟ ܘܠܒܢ̈ܝܟ ܘܠܢܫ̈ܝܟ ܘܠܟܠܗܘܢ ܢܟܣܝ̈ܟ

9. Chronicles 2 21:15

   ܘܐܢܬ ܒܟܘܪܗܢܐ ܣܓܝܐܐ ܬܡܘܬ ܘܒܬܫܢܝܩܐ ܪܒܐ ܬܐܒܕ ܥܕܡܐ ܠܐܝܟܐ ܕܢܦܩܘܢ ܡܥ̈ܝܟ ܡܢ ܟܘܪܗܢܟ ܘܫܢ̈ܝܢ ܣܓܝܐ̈ܢ ܒܬܫܢܝܩܐ ܬܦܠ

10. Chronicles 2 21:16

    ܘܢܥܝܪ ܡܪܝܐ ܥܠ ܝܘܪܡ ܪܘܚܐ ܕܦܠܫ̈ܬܝܐ ܘܕܥܪ̈ܒܝܐ ܕܫܪܝܢ ܒܝܬ ܗܢܕܘ̈ܝܐ

11. Chronicles 2 21:17

    ܘܢܣܩܘܢ ܥܠ ܝܗܘܕܐ ܘܢܚܪܒܘܢ ܐܢܘܢ ܘܢܗܦܟܘܢ ܟܘܠܗ̇ ܫܒܝܬܐ ܕܐܫܬܟܚܬ ܠܒܝܬ ܡܠܟܐ ܘܐܦ ܒܢܘ̈ܗܝ ܘܢܫܘ̈ܗܝ ܘܠܐ ܢܫܬܒܩ ܠܗ ܒܪܐ ܕܟܪܐ ܐܠܐ ܐܢ ܐܚܙܝܐ ܒܪܗ ܙܥܘܪܐ

12. Chronicles 2 21:18

    ܡܢ ܒܬܪ ܟܘܠܗܝܢ ܗܠܝܢ ܡܚܘܬܐ ܬܗܘܐ ܒܡܥ̈ܘܗܝ ܘܒܟܘܪܗܢܐ ܣܓܝܐܐ ܢܡܘܬ ܘܐܣܝܘܬܐ ܠܐ ܬܗܘܐ ܠܗ

13. Chronicles 2 21:19

    ܘܗܘܐ ܡܢ ܒܬܪ ܝܘ̈ܡܬܐ ܣܓ̈ܝܐܐ ܟܕ ܫܠܡܬ ܡܠܬܗ ܕܢܒܝܐ ܠܫܢ̈ܝܢ ܬܪ̈ܬܝܢ ܢܦܩܘ ܡܥܘ̈ܗܝ ܡܢ ܟܘܪܗܢܗ ܘܡܝܬ ܒܟܘܪܗܢܐ ܒܝ̣ܫܐ ܘܠܐ ܥܒܕܘ ܠܗ ܐܝܩܪܐ ܥܡܐ ܐܝܟܢܐ ܕܥܒܕܘ ܠܐܒܗ̈ܬܗ

14. Chronicles 2 21:20

    ܒܪ ܬܠܬܝܢ ܗܘܐ ܘܬܪܬܝܢ ܫܢ̈ܝܢ ܟܕ ܩܡ ܒܡܠܟܘܬܐ ܘܬܡܢܐ ܫܢ̈ܝܢ ܐܡܠܟ ܒܐܘܪܫܠܡ ܘܐܙܠ ܕܠܐ ܪܓܬܐ ܘܐܬܩܒܪ ܒܩܪܝܬܗ ܕܕܘܝܕ ܐܒܘܗܝ ܘܠܐ ܒܩܒܘܪܬܐ ܕܡܠܟ̈ܐ

15. Chronicles 2 22:1

    ܘܐܡܠܟܘ ܥܡܘܪ̈ܝܗ̇ ܕܐܪܫܠܡ ܠܐܚܙܝܐ ܒܪܗ ܒܬܪܗ ܡܛܠ ܕܟܘܠܗܘܢ ܩܕܡ̈ܝܐ ܚܪܒ ܐܢܘܢ ܓܝܣܐ ܡܛܠ ܕܐܬܘ ܥܪ̈ܒܝܐ ܘܚܪܒܘ ܡܫܪ̈ܝܬܐ ܘܐܡܠܟ ܐܚܙܝܐ ܒܪ ܝܗܘܪܡ ܡܠܟܐ ܕܝܗܘܕܐ

16. Chronicles 2 22:2

    ܒܪ ܥܣܪܝܢ ܗܘܐ ܘܬܪܬܝܢ ܫܢ̈ܝܢ ܐܚܙܝܐ ܟܕ ܩܡ ܒܡܠܟܘܬܐ ܘܫܢܬܐ ܚܕܐ ܐܡܠܟ ܒܐܘܪܫܠܡ ܘܫܡܗ̇ ܕܐܡܗ ܥܬܠܝܐ ܒܪܬ ܥܡܪܝ

17. Chronicles 2 22:3

    ܘܗܠܟ ܒܐܘܪ̈ܚܬܐ ܕܒܝܬ ܐܚܒ ܡܛܘܠ ܕܒܪ ܚܬܗ ܗܘܐ ܕܐܚܒ ܘܐܦ ܗܘ ܐܣܓܝ ܠܡܚܛܐ

18. Chronicles 2 22:4

    ܘܥܒܕ ܒܝ̣ܫ̈ܬܐ ܩܕܡ ܡܪܝܐ ܐܝܟ ܒܝܬܗ ܕܐܚܒ ܡܛܠ ܕܗܢܘܢ ܗܘܘ ܠܗ ܡܠܘ̈ܟܐ ܡܢ ܒܬܪ ܕܡܝܬ ܐܒܘܗܝ ܠܡܚܒܠܘܬܗ

19. Chronicles 2 22:5

    ܡܛܘܠ ܕܒܡ̣ܠܟ̈ܝܗܘܢ ܡܗܠܟ ܗܘܐ ܘܐܙܠ ܥܡ ܝܘܪܡ ܒܪ ܐܚܒ ܡܠܟܐ ܕܐܝܣܪܝܠ ܠܡܥܒܕ ܩܪܒܐ ܥܡ ܚܙܐܝܠ ܡܠܟܐ ܕܐܕܘܡ ܒܪܡܬ ܓܠܥܕ ܘܡܚܘ ܐܕܘܡ̈ܝܐ ܠܝܘܪܡ

20. Chronicles 2 22:6

    ܘܗܦܟ ܠܡܬܐܣܝܘ ܒܐܝܙܪܥܝܠ ܡܢ ܡܚܘܬܐ ܕܡܚܐܘܗܝ ܒܪܡܬܐ ܟܕ ܡܬܟܬܫ ܥܡ ܚܙܐܝܠ ܡܠܟܐ ܕܐܕܘܡ ܘܐܚܙܝܐ ܢܚܬ ܠܡܚܙܐ ܠܝܘܪܡ ܒܪ ܐܚܒ ܒܐܝܙܪܥܝܠ ܡܛܠ ܕܟܪܝܗ ܗܘܐ

21. Chronicles 2 22:7

    ܘܡܢ ܩܕܡ ܡܪܝܐ ܗܘܬ ܗܦܝܟܬܐ ܕܐܚܙܝܐ ܠܡܐܬܐ ܠܘܬ ܝܘܪܡ ܘܟܕ ܐܬܐ ܢܦܩ ܥܡ ܝܘܪܡ ܠܘܬ ܝܗܘ ܒܪ ܝܡܫܝ ܕܐܬܡܫܚ ܡܢ ܩܕܡ ܡܪܝܐ ܠܡܘܒܕܘ ܒܝܬܗ ܕܐܚܒ

22. Chronicles 2 22:8

    ܗܝܕܝܢ ܟܕ ܕܢ ܗܘܐ ܝܗܘ ܥܡ ܕܒܝܬ ܐܚܒ ܐܫܟܚ ܠܪ̈ܘܪܒܢܐ ܕܝܗܘܕܐ ܘܒܢ̈ܝ ܐܚܘ̈ܗܝ ܕܐܚܙܝܐ ܕܡܫܡܫܝܢ ܗܘܘ ܠܐܚܙܝܐ ܘܩܛܠ ܐܢܘܢ

23. Chronicles 2 22:9

    ܘܒܥܐ ܠܐܚܙܝܐ ܘܐܚܕܗ ܘܗܘ ܛܫܐ ܗܘܐ ܒܫܡܪܝܢ ܘܐܝܬܝܗ ܠܘܬܗ ܘܩܛܠܗ ܘܩܒܪܗ ܡܛܠ ܕܐܡܪ ܕܒܪ ܝܗܘܫܦܛ ܗܘ ܗ̇ܘ ܕܨܠܝ ܠܡܪܝܐ ܒܟܠܗ ܠܒܗ ܘܠܐ ܐܝܬ ܗܘܐ ܠܒܝܬ ܐܚܙܝܐ ܠܡܥܕܪܘ ܚܝܠܐ ܕܡܠܟܘܬܐ

24. Chronicles 2 22:10

    ܘܥܬܠܝܐ ܐܡܗ ܕܐܚܙܝܐ ܚܙܬ ܕܡܝܬ ܒܪܗ̇ ܘܩܡܬ ܘܐܘܒܕܬ ܠܟܠܗܘܢ ܒܢ̈ܝ ܡܠܟܐ ܕܒܝܬ ܝܗܘܕܐ

25. Chronicles 2 22:11

    ܘܕܒܪܬ ܝܗܘܫܒܥ ܒܪܬܗ ܕܡܠܟܐ ܠܝܘܐܫ ܒܪ ܐܚܙܝܐ ܘܓܢܒܬܗ ܡܢ ܓܘ ܒܢ̈ܝ ܡܠܟܐ ܕܡܬܩܛܠܝܢ ܗܘܘ ܘܛܫܝܬܗ ܘܠܡܝܢܩܬܗ ܒܩܝܛܘܢܐ ܕܡܫܟܒܗ̇ ܘܛܫܝܬܗ ܝܗܘܫܒܥ ܒܪܬ ܡܠܟܐ ܝܘܪܡ ܐܢܬܬܗ ܕܝܘܝܕܥ ܟܗܢܐ ܡܛܠ ܕܗܝ ܗܘܬ ܚܬܗ ܕܐܚܙܝܐ ܡܢ ܩܕܡ ܥܬܠܝܐ ܘܠܐ ܩܛܠܘܗܝ

26. Chronicles 2 22:12

    ܘܗܘܐ ܛܫܐ ܥܡܗ̇ ܒܒܝܬܗ ܕܡܪܝܐ ܫܬ ܫܢ̈ܝܢ ܘܥܬܠܝܐ ܐܡܠܟܬ ܥܠ ܐܪܥܐ

27. Chronicles 2 23:1

    ܘܒܫܢܬܐ ܫܒܝܥܝܬܐ ܐܬܓܒܪ ܝܘܝܕܥ ܘܕܒܪ ܠܪ̈ܘܪܒܢܐ ܕܡܐ̈ܘܬܐ ܠܥܙܪܝܐ ܒܪ ܝܪܚܘܡ ܘܠܐܝܫܡܥܝܠ ܒܪ ܝܘܚܢܢ ܘܠܥܙܪܝܐ ܒܪ ܥܘܒܝܕ ܘܠܫܡܥܝܐ ܒܪ ܥܕܘ ܘܠܐܠܝܫܦܛ ܒܪ ܙܟܪܝ ܘܥܠܘ ܗܠܝܢ ܟܠܗܘܢ ܒܡܘܡܬܐ

28. Chronicles 2 23:2

    ܕܢܬܟܪܟܘܢ ܒܝܗܘܕܐ ܘܟܢܫ ܐܢܘܢ ܠܠܘ̈ܝܐ ܡܢ ܟܠܗܝܢ ܩܘܪ̈ܝܐ ܕܝܗܘܕܐ ܘܪ̈ܫܐ ܕܐܒܗ̈ܬܐ ܕܐܝܣܪܝܠ ܘܐܬܘ ܠܐܘܪܫܠܡ

29. Chronicles 2 23:3

    ܘܝܡܘ ܟܠܗ ܥܡܐ ܡܘܡܬܐ ܒܒܝܬܗ ܕܡܪܝܐ ܩܕܡ ܡܠܟܐ ܘܐܡܪ ܠܗܘܢ ܗܐ ܒܪ ܡܠܟܐ ܗܘ ܢܩܘܡ ܥܠܝܟܘܢ ܐܝܟܢܐ ܕܡܠܠ ܡܪܝܐ ܥܡ ܕܘܝܕ ܥܒ̣ܕܗ

30. Chronicles 2 23:4

    ܗܢܐ ܦܬܓܡܐ ܕܬܥܒܕܘܢ ܦܠܓܐ ܡܢܟܘܢ ܒܡܥ̈ܠܝ ܫܒܬܐ ܕܟܗ̈ܢܐ ܘܕܠܘ̈ܝܐ ܘܕܢ̇ܛܪ̈ܝ ܬܪܥܐ

31. Chronicles 2 23:5

    ܘܬܘܠܬܐ ܒܝܬ ܡܠܟܐ ܘܬܘܠܬܐ ܒܬܪܥܐ ܕܛܒ̈ܚܐ ܘܟܠܗ ܥܡܐ ܢܛ̇ܪܝܢ ܒܕܪܬܐ ܕܒܝܬ ܡܪܝܐ

32. Chronicles 2 23:6

    ܘܠܐ ܢܗܘܐ ܐܢܫ ܥܐ̇ܠ ܠܒܝܬܗ ܕܡܪܝܐ ܐܠܐ ܟܗ̈ܢܐ ܘܠܘ̈ܝܐ ܗܢܘܢ ܢܥܠܘܢ ܡܛܠ ܕܩܕܝܫܝܢ ܐܢܘܢ ܘܟܠܗ ܥܡܐ ܢܛ̇ܪܝܢ ܡܛܪܬܐ ܕܒܝܬܗ ܕܡܪܝܐ

33. Chronicles 2 23:7

    ܘܢܦܩܘܢ ܠܘ̈ܝܐ ܠܡܠܟܐ ܟܕ ܚܕܝܪܝܢ ܠܗ ܓܒܪ ܘܡܐ̈ܢܝ ܙܝܢܗ ܒܐܝܕܗ ܘܕܢܥܘܠ ܠܒܝܬܐ ܓܘܝܐ ܢܡܘܬ ܘܗܘܘ ܠܘܬ ܡܠܟܐ ܒܡܥܠܗ ܘܒܡܦܩܗ

34. Chronicles 2 23:8

    ܘܥܒܕܘ ܠܘ̈ܝܐ ܘܟܘܠܗܘܢ ܕܒܝܬ ܝܗܘܕܐ ܐܝܟܢܐ ܕܦܩܕ ܐܢܘܢ ܝܘܝܕܥ ܟܗܢܐ ܘܕܒܪܘ ܓܒܪܐ ܠܚܒܪܗ ܐܝܠܝܢ ܕܢ̇ܛܪܝܢ ܗܘܘ ܒܡܥ̈ܠܝ ܫܒܬܐ ܥܡ ܐܝܠܝܢ ܕܢܛ̇ܪܝܢ ܗܘܘ ܒܡ̈ܦܩܝ ܫܒܬܐ ܡܛܠ ܕܫܪܐ ܗܘܐ ܐܢܘܢ ܝܘܝܕܥ ܟܗܢܐ ܡܢ ܡܛܪ̈ܬܗܘܢ

35. Chronicles 2 23:9

    ܘܝܗܒ ܝܘܝܕܥ ܟܗܢܐ ܠܪ̈ܘܪܒܢܐ ܕܡܐܘ̈ܬܐ ܪ̈ܘܡܚܐ ܘܣܟܪ̈ܐ ܘܫܠܛ̈ܐ ܕܡܠܟܐ ܕܘܝܕ ܕܐܝܬ ܗܘܐ ܒܒܝܬܗ ܕܡܪܝܐ

36. Chronicles 2 23:10

    ܘܩܡ ܟܠܗ ܥܡܐ ܓܒܪ ܠܓܒܗ ܕܒܝܬܐ ܕܣܡܠܐ ܘܠܡܕܒܚܐ ܘܠܒܝܬܐ ܘܚܕܪܘܗܝ ܠܡܠܟܐ

37. Chronicles 2 23:11

    ܘܐܦܩܘ ܠܒܪ ܡܠܟܐ ܘܝܗܒܘ ܒܪܫܗ ܬܓܐ ܘܚܘܕܐ ܘܐܩܝܡܘܗܝ ܒܡܠܟܘܬܐ ܘܡܫܚܘܗܝ ܝܘܝܕܥ ܘܒܢ̈ܘܗܝ ܘܐܡ̇ܪܝܢ ܢܚܐ ܡܠܟܐ

38. Chronicles 2 23:12

    ܘܫܡܥܬ ܥܬܠܝܐ ܩܠܐ ܕܥܡܐ ܕܚ̇ܕܝܢ ܘܡܫܒܚܝܢ ܠܡܠܟܐ ܘܐܬܬ ܠܘܬ ܡܠܟܐ ܠܒܝܬܗ ܕܡܪܝܐ

39. Chronicles 2 23:13

    ܘܚ̇ܙܝܐ ܘܗܐ ܡܠܟܐ ܩܐ̇ܡ ܥܠ ܐܣܛܘܢܐ ܐܝܟ ܢܡܘܣܐ ܕܡܠܟ̈ܐ ܘܩܪ̈ܢܬܐ ܟܦܝ̈ܦܬܐ ܘܦܫܝ̈ܛܬܐ ܩ̇ܪ̈ܝܢ ܩܕܡ ܡܠܟܐ ܘܟܠܗ ܥܡܐ ܚ̇ܕܝܢ ܘܡܝܒܒܝܢ ܒܩܪ̈ܢܬܐ ܘܡܫܒܚܝܢ ܒܬܫܒ̈ܚܬܐ ܘܣܕܩܬ ܥܬܠܝܐ ܢܚ̈ܬܝܗ̇ ܘܐܡ̇ܪܐ ܟܕܒܘܬܐ ܟܕܒܘܬܐ

40. Chronicles 2 23:14

    ܘܦܩܕ ܝܘܝܕܥ ܟܗܢܐ ܠܪ̈ܘܪܒܢܝ ܡܐ̈ܘܬܐ ܕܫܠܝܛܝܢ ܥܠ ܚܝܠܐ ܘܐܡܪ ܠܗܘܢ ܐܦܩܘܗ̇ ܠܒܪ ܡܢ ܣܕܪ̈ܐ ܘܡ̇ܢ ܕܥܐ̇ܠ ܒܬܪܗ̇ ܢܬܩܛܠ ܒܚܪܒܐ ܡܛܠ ܕܐܡܪ ܟܗܢܐ ܠܐ ܬܡܘܬ ܒܒܝܬܗ ܕܡܪܝܐ

41. Chronicles 2 23:15

    ܘܥܒܕܘ ܠܗ̇ ܕܘܟܬܐ ܘܥܠܬ ܒܐܘܪܚܐ ܕܡܥܠܢܐ ܕܪ̈ܟܫܐ ܘܡܝܬܬ ܬܡܢ

42. Chronicles 2 23:16

    ܘܝܡܐ ܝܘܝܕܥ ܡܘܡܬܐ ܒܝܢܘܗܝ ܠܒܝܬ ܟܠ ܥܡܐ ܘܒܝܬ ܡܠܟܐ ܠܡܗܘܐ ܥܡܐ ܠܡܪܝܐ

43. Chronicles 2 23:17

    ܘܥܠܘ ܟܠܗ ܥܡܐ ܕܐܝܣܪܝܠ ܠܒܝܬ ܒܥܠܐ ܘܥܩܪܘܗܝ ܘܥܠܘ̈ܬܗ ܬܒܪܘ ܫܦܝܪ ܘܨܠܡܘ̈ܗܝ ܕܩܩܘ ܘܟܘܡܪܐ ܕܒܥܠܐ ܩܛܠܘܗܝ ܩܕܡ ܡܕܒܚܐ

44. Chronicles 2 23:18

    ܘܥܒܕ ܝܘܝܕܥ ܫܠܝ̈ܛܢܐ ܒܒܝܬܗ ܕܡܪܝܐ ܘܟܗ̈ܢܐ ܘܠܘ̈ܝܐ ܕܦܠܓ ܕܘܝܕ ܕܢܗܘܘܢ ܢܛܘܪ̈ܐ ܥܠ ܒܝܬܗ ܕܡܪܝܐ ܠܡܣܩܘ ܥܠܘ̈ܬܐ ܐܝܟ ܕܟܬܝܒ ܒܐܘܪܝܬܗ ܕܡܘܫܐ ܒܚܕܘܬܐ ܘܒܬܫܒܚ̈ܬܐ ܥܠ ܐܝܕܘ̈ܗܝ ܕܕܘܝܕ

45. Chronicles 2 23:19

    ܘܢܩܘܡܘܢ ܢ̇ܛܪ̈ܝ ܬܪ̈ܥܐ ܥܠ ܬܪ̈ܥܐ ܕܒܝܬܗ ܕܡܪܝܐ ܘܠܐ ܢܥܠܘܢ ܠܬܡܢ ܡܣܝ̈ܒܐ

46. Chronicles 2 23:20

    ܘܢܣܒܘ ܪ̈ܝܫܝ ܡܐܘ̈ܬܐ ܫܠܝ̈ܛܐ ܕܥܡܐ ܘܟܘܠܗ ܥܡܐ ܕܐܪܥܐ ܘܐܬܘ ܒܓܘ ܬܪܥܐ ܥܠܝܐ ܕܒܝܬ ܡܠܟܐ ܘܐܘܬܒܘ ܠܡܠܟܐ ܥܠ ܟܘܪܣܝܐ ܕܡܠܟܘܬܐ

47. Chronicles 2 23:21

    ܘܚ̇ܕܝܢ ܟܠܗ ܥܡܐ ܕܐܪܥܐ ܘܒܩܪ̈ܢܬܐ ܡܫܒܚܝܢ ܘܠܥܬܠܝܐ ܩܛܠܘ ܒܚܪܒܐ

48. Chronicles 2 24:1

    ܒܪ ܫܒܥ ܗܘܐ ܫܢ̈ܝܢ ܝܘܐܫ ܟܕ ܩܡ ܒܡܠܟܘܬܐ ܘܐܪܒܥܝܢ ܫܢ̈ܝܢ ܐܡܠܟ ܒܐܘܪܫܠܡ ܘܫܡܐ ܕܐܡܗ ܨܒܝܐ ܡܢ ܒܪܫܒܥ ܡܕܝܢܬܐ

49. Chronicles 2 24:2

    ܘܥܒܕ ܝܘܐܫ ܕܫܦܝܪ ܩܕܡ ܡܪܝܐ ܟܠ ܝܘ̈ܡܬܐ ܕܚܝܘ̈ܗܝ ܕܝܘܝܕܥ ܟܗܢܐ

50. Chronicles 2 24:3

    ܘܢܣܒ ܠܗ ܝܘܝܕܥ ܢܫ̈ܐ ܬܪܬܝܢ ܘܐܘܠܕ ܠܗ ܒܢ̈ܝܐ ܘܒܢ̈ܬܐ

51. Chronicles 2 24:4

    ܘܗܘܐ ܡܢ ܒܬܪ ܗܠܝܢ ܗܘܐ ܠܒܗ ܥܡ ܝܘܐܫ ܒܪܐܙܐ ܠܡܚܕܬܘ ܒܝܬܗ ܕܡܪܝܐ ܘܠܡܒܕܩ ܒܗ ܟܠܡܕܡ ܕܡܬܒܥܐ

52. Chronicles 2 24:5

    ܘܟܢܫ ܝܘܝܕܥ ܠܟܗ̈ܢܐ ܘܠܠܘ̈ܝܐ ܘܐܡܪ ܠܗܘܢ ܦܘܩܘ ܠܩܘܪ̈ܝܐ ܕܒܝܬ ܝܗܘܕܐ ܘܟܢܫܘ ܡܢ ܟܠܗܝܢ ܩܘܪ̈ܝܐ ܕܐܝܣܪܝܠ ܟܣܦܐ ܘܕܗܒܐ ܘܒܕܘܩܘ ܒܝܬܗ ܕܐܠܗܟܘܢ ܐܝܟ ܕܟܠ ܫܢܐ ܒܫܢܐ ܘܐܢܬܘܢ ܬܣܬܪܗܒܘܢ ܠܡܡܠܝܘ

53. Chronicles 2 24:6

    ܘܩܪܐ ܡܠܟܐ ܠܝܘܝܕܥ ܩܫܝܫܐ ܘܐܡܪ ܠܗ ܡܛܠ ܡܢܐ ܠܐ ܬ̇ܒܥ ܐܢܬ ܠܠܘ̈ܝܐ ܕܢܐܙܠܘܢ ܘܢܝܬܘܢ ܡܢ ܝܗܘܕܐ ܘܡܢ ܐܘܪܫܠܡ ܡܘܗ̈ܒܬܐ ܕܡܘܫܐ ܥܒ̣ܕܗ ܕܡܪܝܐ ܘܟܢܫܘ ܠܐܝܣܪܝܠ ܠܡܫܟܢܐ ܕܥܐܕܐ

54. Chronicles 2 24:7

    ܘܥܬܠܝܐ ܡܠܦܐ ܗܘܬ ܒܢ̈ܝܢ ܥܘ̣ܠܐ ܘܬܪܥܬ ܠܒܝܬܗ ܕܡܪܝܐ ܘܐܦ ܠܟܠ ܩܕܝ̈ܫܐ ܕܐܝܬ ܗܘܘ ܒܒܝܬܗ ܕܡܪܝܐ ܥܒܕܬ ܐܢܘܢ ܕ̇ܚ̈ܠܝ ܦܬܟܪ̈ܐ

55. Chronicles 2 24:8

    ܘܐܡܪ ܡܠܟܐ ܘܥܒܕܘ ܩܐܒܘܬܐ ܚܕܐ ܘܣܡܘܗ̇ ܒܬܪܥܐ ܕܒܝܬܗ ܕܡܪܝܐ ܡܢ ܠܒܪ

56. Chronicles 2 24:9

    ܘܝܗܒܘ ܩܠܐ ܒܝܗܘܕܐ ܘܒܐܘܪܫܠܡ ܕܢܝܬܘܢ ܠܡܪܝܐ ܡܢܬܐ ܕܡܘܫܐ ܥܒ̣ܕܗ ܕܡܪܝܐ ܕܦܩܕ ܒܡܕܒܪܐ

57. Chronicles 2 24:10

    ܘܚܕܝܘ ܟܠܗܘܢ ܪ̈ܘܪܒܢܐ ܘܟܘܠܗ ܥܡܐ ܘܐܝܬܝܘ ܘܥܒܕܘ ܩܒܘܬܐ ܚܕܐ ܘܣܡܘܗ̇ ܘܐܪܡܝܘ ܥܕܡܐ ܕܡܠܬ

58. Chronicles 2 24:11

    ܘܟܕ ܚܙܘ ܕܣܓܝ ܟܣܦܐ ܒܗ̇ ܒܩܐܒܘܬܐ ܥܠ ܣ̇ܦܪܐ ܕܡܠܟܐ ܘܪܒ ܒܝܬܗ ܕܟܗܢܐ ܪܒܐ ܘܡܢܘ ܘܨܪܘ ܟܣܦܐ

59. Chronicles 2 24:12

    ܘܝܗܒܘܗܝ ܠܥ̇ܒ̈ܕܝ ܥܒܝ̈ܕܬܐ ܕܒܝܬܗ ܕܡܪܝܐ ܘܗܘܘ ܐ̇ܓܪܝܢ ܠܗܘܢ ܦܣܘ̈ܠܐ ܘܢܓܪ̈ܐ ܘܒ̇ܕܩܝܢ ܒܝܬܗ ܕܡܪܝܐ ܘܐܦ ܥ̇ܒ̈ܕܝ ܦܪܙܠܐ ܘܢܚܫܐ ܠܡܒܕܩ ܒܝܬܗ ܕܡܪܝܐ

60. Chronicles 2 24:15

    ܘܩܫ ܝܘܝܕܥ ܘܣܒܥ ܝܘܡ̈ܬܗ ܘܡܝܬ ܒܪ ܡܐܐ ܘܬܠܬܝܢ ܫܢ̈ܝܢ

61. Chronicles 2 24:16

    ܘܩܒܪܘܗܝ ܒܩܪܝܬܗ ܕܕܘܝܕ ܒܩܒܘܪܬܐ ܕܡܠܟ̈ܐ ܘܐܡܪܘ ܗܟܢܐ ܢܬܦܪܥ ܡ̇ܢ ܕܥ̇ܒܕ ܛܒ̈ܬܐ ܒܝܣܪܝܠ ܘܐܦ ܥܡ ܒܝܬܗ ܕܡܪܝܐ ܡܪ̈ܗܛܐ ܪ̈ܘܪܒܐ ܪܗܛ

62. Chronicles 2 24:17

    ܘܡܢ ܒܬܪ ܕܡܝܬ ܝܘܝܕܥ ܐܬܘ ܪ̈ܘܪܒܢܐ ܕܝܗܘܕܐ ܣܓܕܘ ܠܡܠܟܐ ܡܛܠ ܕܫܡܥ ܐܢܘܢ

63. Chronicles 2 24:18

    ܘܫܒܩܘ ܠܒܝܬܗ ܕܡܪܝܐ ܐܠܗܐ ܕܐܒܗ̈ܝܗܘܢ ܘܐܙܠܘ ܦܠܚܘ ܠܨܠܡ̈ܐ ܘܠܦܬܟܪ̈ܐ ܘܗܘܐ ܪܘܓܙܐ ܥܠ ܝܗܘܕܐ ܘܥܠ ܐܘܪܫܠܡ ܥܠ ܕܚܛܘ ܚܛܝܬܐ ܗܕܐ

64. Chronicles 2 24:19

    ܘܫܕܪ ܠܘܬܗܘܢ ܒܝܕ ܢܒ̈ܝܐ ܠܡܗܦܟܘ ܐܢܘܢ ܡܢ ܐܘܪ̈ܚܬܗܘܢ ܘܠܐ ܫܡܥܘ ܘܐܣܗܕ ܒܗܘܢ ܘܠܐ ܩܒܠܘ

65. Chronicles 2 24:20

    ܘܪܘܚܗ ܕܡܪܝܐ ܠܒܫܬ ܠܙܟܪܝܐ ܒܪ ܝܘܝܕܥ ܟܗܢܐ ܘܣܠܩ ܘܩܡ ܠܥܠ ܡܢ ܥܡܐ ܘܐܡܪ ܠܗܘܢ ܗܟܢܐ ܐܡ̇ܪ ܡܪܝܐ ܠܡܢܐ ܥܒܪܬܘܢ ܥܠ ܦܘܩܕ̈ܢܘܗܝ ܕܡܪܝܐ ܠܐ ܬܟܫܪܘܢ ܡܛܠ ܕܫܒܩܬܘܢ ܐܘܪܚܝ ܘܐܦ ܐܢܐ ܫ̇ܒܩ ܐܢܐ ܠܟܘܢ

66. Chronicles 2 24:21

    ܘܡܪܕܘ ܥܠܘܗܝ ܘܪܓܡܘܗܝ ܒܟܐ̈ܦܐ ܒܦܘܩܕܢܐ ܕܡܠܟܐ ܒܕܪܬܐ ܕܒܝܬܗ ܕܡܪܝܐ

67. Chronicles 2 24:22

    ܘܠܐ ܐܪܓܫ ܝܘܐܫ ܡܠܟܐ ܛܝܒܘܬܐ ܕܥܒܕ ܒܗ ܝܘܝܕܥ ܟܗܢܐ ܐܒܘܗܝ ܘܩܛܠ ܠܒܢܘ̈ܗܝ ܡܢ ܒܬܪܗ ܘܒܢܘ̈ܗܝ ܟܕ ܡܬܩܛܠܝܢ ܗܘܘ ܐܡ̇ܪܝܢ ܢܚܙܐ ܡܪܝܐ ܘܢܬܒܥ

68. Chronicles 2 24:23

    ܘܗܘܐ ܠܚܪܬܗ̇ ܕܫܢܬܐ ܣܠܩ ܥܠܘܗܝ ܚܝܠܐ ܕܐܕܘܡ ܘܐܬܐ ܥܠ ܝܗܘܕܐ ܘܥܠ ܐܘܪܫܠܡ ܘܚܒܠܘ ܟܠܗܘܢ ܪ̈ܘܪܒܢܘܗܝ ܕܥܡܐ ܘܟܠ ܫܒܝܬܗܘܢ ܫܕܪܘ ܠܡܠܟܐ ܠܕܪܡܣܘܩ

69. Chronicles 2 24:24

    ܡܛܠ ܕܙܥܘܪܝܢ ܗܘܘ ܓܒܪ̈ܐ ܕܐܬܘ ܥܡ ܚܝܠܐ ܕܐܕܘܡ ܘܡܪܝܐ ܐܫܠܡ ܠܗܘܢ ܚܝܠܐ ܕܣܓܝ ܛܒ ܡܛܠ ܕܫܒܩܘ ܠܡܪܝܐ ܐܠܗܐ ܕܐܒܗ̈ܬܗܘܢ ܘܠܡܕܡ ܕܥܒܕ ܝܘܐܫ ܐܣܠܝܘ ܕܝ̈ܢ̇ܐ

70. Chronicles 2 24:25

    ܘܟܕ ܐܙܠܘ ܠܗܘܢ ܡܢ ܠܘܬܗ ܡܛܠ ܕܫܒܩܘܗܝ ܗܘܘ ܒܟܘܪܗܢܐ ܣܓܝܐܐ ܘܐܬܢܟܠܘ ܥܠܘܗܝ ܥܒ̣ܕܘ̈ܗܝ ܒܕܡܐ ܕܒܢܘ̈ܗܝ ܕܝܘܝܕܥ ܟܗܢܐ ܘܩܛܠܘܗܝ ܥܠ ܥܪܣܗ ܘܡܝܬ ܘܩܒܪܘܗܝ ܒܩܪܝܬܗ ܕܕܘܝܕ ܐܒܘܗܝ ܘܠܐ ܩܒܪܘܗܝ ܒܩܒܘܪܬܐ ܕܡ̈ܠܟܐ

71. Chronicles 2 24:26

    ܘܗܠܝܢ ܫܡܗ̈ܐ ܕܐܢܫܐ ܕܐܬܢܟܠܘ ܥܠܘܗܝ ܙܒܘܪ ܒܪ ܫܡܥܬ ܥܡܘܢܝܬܐ ܝܗܘܙܒܪ ܒܪ ܢܛܪܬ ܡܘܐܒܝܬܐ

72. Chronicles 2 24:27

    ܘܒܢܘ̈ܗܝ ܘܣܘܓܐܐ ܕܐܢܫܐ ܕܐܬܢܟܠܘ ܥܠܘܗܝ ܘܫܪܟܐ ܕܚܛܗ̈ܐ ܕܥܒܕ ܒܒܝܬܗ ܕܡܪܝܐ ܗܐ ܗܢܘܢ ܟܬܝܒܝܢ ܥܠ ܡܕܪ̈ܫܐ ܕܣܦܪ ܡ̈ܠܟܐ ܘܐܡܠܟ ܐܡܘܨܝܐ ܒܪܗ ܒܬܪܗ

73. Chronicles 2 25:1

    ܒܪ ܥܣܪܝܢ ܗܘܐ ܘܚܡܫ ܫܢ̈ܝܢ ܐܡܘܨܝܐ ܟܕ ܩܡ ܒܡܠܟܘܬܐ ܘܥܣܪܝܢ ܘܬܫܥ ܫܢ̈ܝܢ ܐܡܠܟ ܒܐܘܪܫܠܡ ܘܫܡܐ ܕܐܡܗ ܝܗܘܥܕܢ ܡܢ ܐܘܪܫܠܡ

74. Chronicles 2 25:2

    ܘܥܒܕ ܕܫܦܝܪ ܩܕܡ ܡܪܝܐ ܒܠܚܘܕ ܠܐ ܒܠܒܐ ܫܠܡܐ

75. Chronicles 2 25:3

    ܘܗܘܐ ܕܟܕ ܥܫܢܬ ܡܠܟܘܬܐ ܒܐܝܕܗ ܩܛܠ ܠܥܒ̣̈ܕܘܗܝ ܕܩܛܠܘ ܠܡܠܟܐ ܐܒܘܗܝ

76. Chronicles 2 25:4

    ܘܠܒܢ̈ܝܗܘܢ ܕܩܛܘ̈ܠܐ ܠܐ ܩܛܠ ܡܛܠ ܕܗܟܢܐ ܟܬܝܒ ܒܣ̣ܦܪܐ ܕܢܡܘܣܗ ܕܡܘܫܐ ܕܦܩܕ ܡܪܝܐ ܘܐܡܪ ܕܠܐ ܢܡܘܬܘܢ ܐܒܗ̈ܐ ܥܠ ܐ̈ܦܝ ܒܢ̈ܝܐ ܘܒܢ̈ܝܐ ܠܐ ܢܡܘܬܘܢ ܥܠ ܐ̈ܦܝ ܐܒܗ̈ܐ ܐܢܫ ܒܚܛܗ̈ܘܗܝ ܢܡܘܬ

77. Chronicles 2 25:5

    ܘܟܢܫ ܐܡܘܨܝܐ ܠܕܒܝܬ ܝܗܘܕܐ ܘܐܩܝܡ ܐܢܘܢ ܠܒܝܬ ܐܒܗ̈ܝܗܘܢ ܠܪ̈ܘܪܒܢܝ ܐ̈ܠܦܐ ܘܠܪ̈ܘܪܒܢܝ ܡܐܘ̈ܬܐ ܘܠܟܠܗ ܝܗܘܕܐ ܘܒܢܝܡܝܢ ܘܡܢܐ ܐܢܘܢ ܡܢ ܒܪ ܥܣܪܝܢ ܫܢ̈ܝܢ ܘܠܥܠ ܘܐܫܟܚ ܐܢܘܢ ܬܠܬܡܐܐ ܐܠܦܝ̈ܢ ܓܒܪ̈ܐ ܥܠܝ̈ܡܐ ܢ̇ܦܩ̈ܝ ܠܩܪܒܐ ܫ̇ܡ̈ܛܝ ܣܝ̈ܦܐ ܘܐ̇ܚ̈ܕܝ ܣܟܪ̈ܐ

78. Chronicles 2 25:6

    ܘܐܓܪ ܡܢ ܐܝܣܪܝܠ ܡܐܐ ܐܠܦܝ̈ܢ ܓܒܪ̈ܐ ܓܢܒܪ̈ܝ ܚܝܠܐ ܒܡܐܐ ܟܟܪ̈ܝܢ ܕܟܣܦܐ

79. Chronicles 2 25:7

    ܘܢܒܝܗ ܕܡܪܝܐ ܐܬܐ ܠܘܬܗ ܘܐܡܪ ܠܗ ܠܡܠܟܐ ܠܐ ܢܥܘܠ ܥܡܟ ܟܠܗ ܚܝܠܐ ܕܐܝܣܪܝܠ ܡܛܠ ܕܠܐ ܐܝܬ ܡܪܝܐ ܥܡ ܟܠܗ ܐܝܣܪܝܠ ܘܠܐ ܥܡ ܟܠܗܘܢ ܕܒܝܬ ܐܦܪܝܡ

80. Chronicles 2 25:8

    ܡܛܠ ܕܐܢܬ ܥ̇ܐܠ ܠܡܥܒܕ ܩܪܒܐ ܪܘܪܒܐ ܪܡ̇ܐ ܠܟ ܡܪܝܐ ܩܕܡ ܒܥܠܕ̈ܒܒܝܟ ܡܛܠ ܕܠܐ ܫܒܚܬ ܠܡܪܝܐ ܕܗܘܝܘ ܥܕܘܪܐ ܘܡܪܝܡܢܐ

81. Chronicles 2 25:9

    ܘܐܡܪ ܐܡܘܨܝܐ ܠܢܒܝܗ ܕܡܪܝܐ ܡܢܐ ܥܒܕܬ ܣܟܠܘܬܐ ܕܗܠܝܢ ܡܐܐ ܟܟܪ̈ܝܢ ܝܗܒܬ ܠܓܒܪ̈ܐ ܕܐܝܣܪܝܠ ܘܐܡܪ ܠܗ ܢܒܝܗ ܕܐܠܗܐ ܐܝܬ ܠܡܪܟ ܐܠܗܟ ܠܡܬܠ ܠܟ ܣܓܝ ܡܢ ܗܢܐ ܐܥܦܐ ܥܠ ܡܕܡ ܕܝܗܒܬ

82. Chronicles 2 25:10

    ܘܦܪܫ ܐܢܘܢ ܐܡܘܨܝܐ ܠܓܒܪ̈ܐ ܕܐܬܘ ܠܘܬܗ ܡܢ ܕܒܝܬ ܐܦܪܝܡ ܠܡܐܙܠ ܠܕܘܟܬܗܘܢ ܘܐܬܬܩܦܬ ܚܡܬܗ ܛܒ ܒܕܒܝܬ ܐܝܣܪܝܠ ܘܐܗܦܟ ܐܢܘܢ ܠܕܘܟܬܗܘܢ ܒܚܡܬܐ ܕܪܘܓܙܗ

83. Chronicles 2 25:11

    ܘܐܡܘܨܝܐ ܐܬܓܒܪ ܘܕܒܪ ܥܡܗ ܘܐܙܠ ܠܢܚܠܐ ܕܡܠܚܐ ܘܩܛܠ ܘܚܪܒ ܠܒܢ̈ܝ ܛܘܪܐ ܕܓܒܠ ܥܣܪܐ ܐܠܦܝ̈ܢ

84. Chronicles 2 25:12

    ܘܥܣܪܐ ܐܠܦܝ̈ܢ ܟܕ ܚܝܝܢ ܐܚܕܘ ܐܢܘܢ ܒܢ̈ܝ ܝܗܘܕܐ ܘܐܝܬܝ ܐܢܘܢ ܠܪܝܫ ܟܐܦܐ ܘܟܠܗܘܢ ܐܬܘ ܟܕ ܐܣܝܪܝܢ ܒܫ̈ܫܠܬܐ

85. Chronicles 2 25:13

    ܘܒܢ̈ܝ ܓܢܒܪ̈ܐ ܕܫܒܐ ܐܡܘܨܝܐ ܟܕ ܐܙܠ ܠܩܪܒܐ ܐܫܠܛ ܐܢܘܢ ܒܩܘܪ̈ܝܐ ܕܝܗܘܕܐ ܘܒܫܡܪ̈ܝܐ ܘܒܩܘܪ̈ܝܐ ܕܥܡ̈ܡܐ ܘܚܪܒܘ ܡܢܗܝܢ ܡܢ ܩܘܪ̈ܝܐ ܬܠܬܐ ܐܠܦܝ̈ܢ ܘܒܙܘ ܒܙܬܐ ܣܓܝܐܬܐ

86. Chronicles 2 25:14

    ܘܗܘܐ ܡܢ ܒܬܪ ܕܐܬܐ ܐܡܘܨܝܐ ܟܕ ܗܦܟ ܠܡܚܪܒ ܠܐܕܘܡ̈ܝܐ ܐܝܬܝܘ ܠܗ ܐܠܗ̈ܐ ܕܒܢ̈ܝ ܛܘܪܐ ܕܓܒܠ ܘܐܩܝܡ ܐܢܘܢ ܩܕܡܘܗܝ ܘܩܕܡܝܗܘܢ ܣܓܕ ܘܠܗܘܢ ܐܣܩ ܩܛܪ̈ܘܩܐ ܕܒܣ̈ܡܐ

87. Chronicles 2 25:15

    ܘܐܬܚܡܬ ܡܪܝܐ ܥܠ ܐܡܘܨܝܐ ܘܫܕܪ ܠܘܬܗ ܢܒܝܐ ܘܐܡܪ ܠܗ ܠܡܢܐ ܨܠܝܬ ܩܕܡ ܐܠܗ̈ܐ ܕܥܡ̈ܡܐ ܕܠܐ ܐܫܟܚܘ ܠܡܦܨܝܘ ܕܚܠܝ̈ܗܘܢ ܡܢ ܐܝܕ̈ܝܟ

88. Chronicles 2 25:16

    ܘܗܘܐ ܕܟܕ ܡܠܠ ܥܡܗ ܢܒܝܐ ܐܡܪ ܠܗ ܣܓܕܬܐ ܕܩܝ̈ܣܐ ܠܡܠܟܐ ܐܬܝܗܒܬ ܘܦܪܩ ܠܗ ܢܒܝܐ ܡܢܗ ܘܐܡܪ ܠܗ ܘܝ ܠܟ ܕܗܐ ܐܬܡܠܟ ܥܠܝܟ ܡܪܝܐ ܡ̣ܠܟܐ ܒܝ̣ܫܐ ܠܡܘܒܕܘܬܟ ܘܠܐ ܫܡܥܬ ܒܩܠܝ

89. Chronicles 2 25:17

    ܘܐܬܡܠܟ ܡܠܟܐ ܐܡܘܨܝܐ ܕܒܝܬ ܝܗܘܕܐ ܘܫܕܪ ܠܘܬ ܝܘܐܫ ܒܪ ܝܗܘܐܚܙ ܒܪ ܝܗܘ ܡܠܟܐ ܕܐܝܣܪܝܠ ܘܐܡܪ ܠܗ ܬܐ ܢܚܙܐ ܐ̈ܦܐ ܚܕ ܕܚܕ

90. Chronicles 2 25:18

    ܘܫܕܪ ܝܗܘܐܫ ܡܠܟܐ ܕܐܝܣܪܝܠ ܠܘܬ ܐܡܘܨܝܐ ܡܠܟܐ ܕܝܗܘܕܐ ܘܐܡܪ ܠܗ ܚܘܚܐ ܕܐܝܬ ܒܠܒܢܢ ܫܕܪ ܠܘܬ ܐܪܙܐ ܕܐܝܬ ܒܠܒܢܢ ܘܐܡܪ ܠܗ ܗܒ ܒܪܬܟ ܠܒܪܝ ܐܢܬܬܐ ܘܥܒܪܬ ܚܝܘܬܐ ܕܐܝܬ ܒܠܒܢܢ ܘܕܫܬܗ ܠܚܘܚܐ

91. Chronicles 2 25:19

    ܡܚܪܒ ܚܪܒܬ ܠܐܕܘܡ̈ܝܐ ܡܛܠ ܗܢܐ ܝܪܒ ܠܒܟ ܐܬܝܩܪ ܘܬܒ ܒܒܝܬܟ ܘܠܡܢܐ ܡܬܓܪܓ ܐܢܬ ܥܠ ܒܝ̣ܫܬܐ ܘܬܦܠ ܐܢܬ ܘܕܒܝܬ ܝܗܘܕܐ ܥܡܟ

92. Chronicles 2 25:20

    ܘܠܐ ܫܡܥ ܐܡܘܨܝܐ

93. Chronicles 2 25:21

    ܘܣܠܩ ܝܘܐܫ ܡܠܟܐ ܕܐܝܣܪܝܠ ܘܣܠܩܘ ܘܚܙܘ ܐ̈ܦܐ ܚܕ ܕܚܕ ܒܒܝܬ ܫܡܫ ܩܪܝܬܐ ܕܐܝܬ ܒܬܚܘܡ ܐܪܥܐ ܕܒܝܬ ܝܗܘܕܐ

94. Chronicles 2 25:23

    ܘܐܚܕ ܝܗܘܐܫ ܡܠܟܐ ܕܐܝܣܪܝܠ ܠܐܡܘܨܝܐ ܡܠܟܐ ܕܝܗܘܕܐ ܒܒܝܬ ܫܡܫ ܩܪܝܬܐ ܘܐܝܬܝܘܗܝ ܠܐܘܪܫܠܡ ܘܬܪܥ ܒܫܘܪܐ ܕܐܘܪܫܠܡ ܡܢ ܬܪܥܐ ܕܐܦܪܝܡ ܥܕܡܐ ܠܬܪܥܐ ܕܙܘܝܬܐ ܐܪ̈ܒܥܡܐܐ ܐܡܝ̈ܢ

95. Chronicles 2 25:24

    ܘܢܣܒ ܟܣܦܐ ܘܕܗܒܐ ܘܡܐ̈ܢܐ ܕܐܫܬܟܚܘ ܒܒܝܬܗ ܕܡܪܝܐ ܥܡ ܡܐܢ̈ܘܗܝ ܕܥܘܒܪ ܐܕܘܡ ܘܠܐܘܨܪ̈ܐ ܕܒܝܬ ܡܠܟܐ ܘܠܡܐ̈ܢܐ ܕܒܝܬ ܡܠܟܐ ܘܠܡܐ̈ܢܐ ܕܕܗܒܐ ܘܗܦܟ ܠܫܡܪܝܢ

96. Chronicles 2 25:25

    ܘܚܝܐ ܐܡܘܨܝܐ ܒܪ ܝܘܐܫ ܡܠܟܐ ܕܝܗܘܕܐ ܡܢ ܒܬܪ ܕܡܝܬ ܝܗܘܐܫ ܒܪ ܝܗܘܐܚܙ ܡܠܟܐ ܕܐܝܣܪܝܠ ܚܡܫܥܣܪ̈ܐ ܫܢ̈ܝܢ

97. Chronicles 2 25:26

    ܘܫܪܟܐ ܕܦܬܓܡ̈ܘܗܝ ܕܐܡܘܨܝܐ ܩܕܡ̈ܝܐ ܘܐܚܪ̈ܝܐ ܗܐ ܗܢܘܢ ܟܬܝܒܝܢ ܥܠ ܣ̣ܦܪܐ ܕܡ̈ܠܟܐ ܕܝܗܘܕܐ ܘܕܐܝܣܪܝܠ

98. Chronicles 2 25:27

    ܘܡܢ ܒܬܪ ܕܥܒܪ ܐܡܘܨܝܐ ܡܢ ܕܚܠܬܗ ܕܡܪܝܐ ܐܬܢܟܠܘ ܥܠܘܗܝ ܥܒ̣̈ܕܘܗܝ ܢܟܠܐ ܒܐܘܪܫܠܡ ܘܥܪܩ ܠܠܟܝܫ ܘܫܕܪܘ ܒܬܪܗ ܠܠܟܝܫ ܘܩܛܠܘܗܝ ܬܡܢ

99. Chronicles 2 25:28

    ܘܫܩܠܘܗܝ ܥܒ̣̈ܕܘܗܝ ܥܠ ܪ̈ܟܫܐ ܘܩܒܪܘܗܝ ܥܡ ܐܒܗ̈ܬܗ ܒܩܪܝܬܐ ܕܕܘܝܕ

100. Chronicles 2 26:1

     ܘܕܒܪܘ ܟܠܗ ܥܡܐ ܕܝܗܘܕܐ ܠܥܘܙܝܐ ܒܪܗ ܒܪ ܫܬܬܥܣܪܐ ܗܘܐ ܫܢ̈ܝܢ ܘܐܩܝܡܘܗܝ ܒܡܠܟܘܬܐ ܒܬܪ ܐܒܘܗܝ ܐܡܘܨܝܐ

← Previous · Next → — showing 401–500 of 768

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.