← All works

Peshitta Chronicles 2

Peshitta (Syriac Old Testament) · 768 sections

1. Chronicles 2 10:16

   ܘܚܙܘ ܟܠܗ ܐܝܣܪܝܠ ܕܠܐ ܫܡ̇ܥ ܠܗܘܢ ܡܠܟܐ ܘܐܬܝܒܘܗܝ ܥܡܐ ܦܬܓܡܐ ܠܡܠܟܐ ܘܐ̇ܡܪܝܢ ܠܗ ܠܝܬ ܠܢ ܡܢܬܐ ܒܕܘܝܕ ܘܐܦ ܠܐ ܝܪܬܘܬܐ ܒܒܪܗ ܕܐܝܫܝ ܐܢܫ ܠܒܝܬܗ ܙܠܘ ܐܝܣܪܝܠ ܡܟܝܠ ܚܙܝ ܒܝܬܟ ܕܘܝܕ ܘܐܙܠܘ ܐܝܣܪܝܠ ܠܒܬܝ̈ܗܘܢ

2. Chronicles 2 10:17

   ܘܒܢ̈ܝ ܐܝܣܪܝܠ ܕܝܬ̇ܒܝܢ ܒܩܘܪ̈ܝܐ ܕܝܗܘܕܐ ܐܡܠܟܘ ܥܠܝܗܘܢ ܠܪܚܒܥܡ

3. Chronicles 2 10:18

   ܘܫܕܪ ܥܠܝܗܘܢ ܡܠܟܐ ܪܚܒܥܡ ܠܐܕܘܢܝܪܡ ܕܫܠܝܛ ܗܘܐ ܥܠ ܡܣܩ̈ܝ ܡܕܐܬܐ ܘܪܓܡܘܗܝ ܟܠܗ ܐܝܣܪܝܠ ܒܟ̈ܐܦܐ ܘܡܝܬ ܘܡܠܟܐ ܪܚܒܥܡ ܣܠܩ ܘܝܬܒ ܠܗ ܒܙܘܓܐ ܠܡܥܪܩ ܠܐܘܪܫܠܡ

4. Chronicles 2 10:19

   ܘܡܪܕܘ ܒ̈ܢܝ ܐܝܣܪܝܠ ܥܠ ܒܝܬܗ ܕܕܘܝܕ ܥܕܡܐ ܠܝܘܡܢܐ

5. Chronicles 2 10:21

   ܘܐܬܐ ܪܚܒܥܡ ܠܐܘܪܫܠܡ ܘܟܢܫ ܠܕܒܝܬ ܝܗܘܕܐ ܘܠܫܒܛܐ ܕܒܢܝܡܝܢ ܡܐܐ ܘܬܡܢܐܝܢ ܐ̈ܠܦܝܢ ܓܒܪ̈ܐ ܫ̇ܡ̈ܛܝ ܣܝܦܐ ܘܥ̇ܒ̈ܕܝ ܩܪܒܐ ܠܡܬܟܬܫܘ ܥܡ ܐܝܣܪܝܠ ܠܡܗܦܟܘ ܡܠܟܘܬܐ ܠܪܚܒܥܡ ܒܪܗ ܕܫܠܝܡܘܢ

6. Chronicles 2 10:22

   ܘܗܘܐ ܦܬܓܡܗ ܕܡܪܝܐ ܥܠ ܫܡܥܝܐ ܘܐܡܪ ܠܗ

7. Chronicles 2 10:23

   ܐܡܪ ܠܪܚܒܥܡ ܒܪܗ ܕܫܠܝܡܘܢ ܡܠܟܐ ܕܝܗܘܕܐ ܘܥܠ ܒܝܬ ܒܢܝܡܝܢ ܘܥܠ ܟܠܗ ܐܝܣܪܝܠ ܘܥܠ ܫܪܟܐ ܕܥܡܐ ܐܡܪ ܠܗܘܢ

8. Chronicles 2 10:24

   ܗܟܢܐ ܐܡ̇ܪ ܡܪܝܐ ܠܐ ܬܣܩܘܢ ܘܠܐ ܬܬܟܬܫܘܢ ܗܦܘܟܘ ܓܒܪ ܠܒܝܬܗ ܡܛܠ ܕܡܢ ܩܕܡܝ ܗܘܐ ܦܬܓܡܐ ܗܢܐ ܘܫܡܥܘ ܡܠܬܗ ܕܡܪܝܐ ܘܗܦܟܘ ܠܡܐܙܠ ܐܢܫ ܠܒܝܬܗ

9. Chronicles 2 10:25

   ܘܒܢܐ ܝܘܪܒܥܡ ܠܫܟܝܡ ܒܛܘܪܐ ܕܫܒܛܐ ܕܒܝܬ ܐܦܪܝܡ ܘܝܬܒ ܒܗ̇ ܘܢܦܩ ܡܢ ܬܡܢ ܘܒܢܐ ܠܦܢܘܐܝܠ

10. Chronicles 2 10:26

    ܘܐܡܪ ܝܘܪܒܥܡ ܒܠܒܗ ܗ̇ܦܟܐ ܠܗ̇ ܡܠܟܘܬܐ ܠܒܝܬ ܕܘܝܕ

11. Chronicles 2 10:27

    ܐܢܗܘ ܕܣ̇ܠܩܝܢ ܥܡܐ ܗܢܐ ܠܡܥܒܕ ܕܒܚ̈ܐ ܒܒܝܬܗ ܕܡܪܝܐ ܒܐܘܪܫܠܡ ܘܗ̇ܦܟ ܠܒܗ ܕܥܡܐ ܗܢܐ ܠܘܬ ܡܪܗܘܢ ܘܩ̇ܛܠܝܢ ܠܝ ܘܡܗܦܟܝܢ ܠܗ̇ ܡܠܟܘܬܐ ܠܪܚܒܥܡ ܒܪ ܫܠܝܡܘܢ

12. Chronicles 2 10:28

    ܘܐܬܪܥܝ ܡܠܟܐ ܘܥܒܕ ܬܪܝܢ ܥܓ̈ܠܐ ܕܕܗܒܐ ܘܐܡܪ ܠܗܘܢ ܣܓܝ ܠܟܘܢ ܠܡܣܩ ܠܡܢܐ ܣ̇ܠܩܝܢ ܐܢܬܘܢ ܘܢܚ̇ܬܝܢ ܠܐܘܪܫܠܡ ܗܠܝܢ ܐܢܘܢ ܐܠܗ̈ܝܟ ܐܝܣܪܝܠ ܕܐܣܩܘܟ ܡܢ ܐܪܥܐ ܕܡܨܪܝܢ

13. Chronicles 2 10:29

    ܘܣܡ ܚܕ ܒܒܝܬ ܐܝܠ ܘܐܚܪܢܐ ܣܡ ܒܕܢ

14. Chronicles 2 10:30

    ܘܗܘܬ ܡܠܬܐ ܗܕܐ ܠܚܛܝܬܐ ܘܐܙܠܘ ܥܡܐ ܩܕܡ ܥܓܠܐ ܚܕ ܥܕܡܐ ܠܕܢ

15. Chronicles 2 10:34

    ܘܗܘܐ ܦܬܓܡܐ ܗܢܐ ܠܚܛܝܬܐ ܠܟܠ ܒܝܬ ܝܘܪܒܥܡ ܠܡܥܩܪ ܘܠܡܘܒܕܘ ܡܢ ܐܪܥܐ

16. Chronicles 2 11:1

    ܒܗ ܒܙܒܢܐ ܗ̇ܘ ܐܬܟܪܗ ܐܒܝܡ ܒܪܗ ܕܝܘܪܒܥܡ

17. Chronicles 2 11:2

    ܘܐܡܪ ܝܘܪܒܥܡ ܠܐܢܬܬܗ ܩܘܡܝ ܢܐ ܘܐܫܬܓܢܝ ܐܝܟ ܐܢܬܬܐ ܗܕܝܘܛܬܐ ܘܠܐ ܢܕܥܘܢ ܕܐܢܬܝ ܗܝ ܐܢܬܬܗ ܕܝܘܪܒܥܡ ܘܬܐܙܠܝܢ ܠܫܝܠܘ ܗܐ ܐܝܬ ܬܡܢ ܐܚܝܐ ܢܒܝܐ ܕܗܘ ܐܡܪ ܠܝ ܟܕ ܩܐ̇ܡ ܗܘܝܬ ܡܠܟܐ ܥܠ ܥܡܐ ܗܢܐ

18. Chronicles 2 11:3

    ܘܬܐܙܠܝܢ ܠܘܬܗ ܓ̇ܠܐ ܠܟܝ ܡܕܡ ܕܗ̇ܘܐ ܠܗ ܠܛܠܝܐ ܗܢܐ

19. Chronicles 2 11:5

    ܘܡܢ ܩܕܡ ܡܪܝܐ ܐܬܐܡܪ ܠܐܚܝܐ ܕܗܐ ܐܢܬܬܗ ܕܝܘܪܒܥܡ ܐܬ̇ܝܐ ܠܡܫܐܠ ܦܬܓܡܐ ܡܢܟ ܥܠ ܒܪܗ̇ ܕܟܪܝܗ ܗܘ ܗܟܢܐ ܘܗܟܢܐ ܬܐܡܪ ܠܗ̇ ܘܢܗܘܐ ܒܡܥܠܗ̇ ܘܗܝ ܡܫܬܓܢܝܐ

20. Chronicles 2 11:6

    ܘܗܘܐ ܕܟܕ ܫܡܥ ܐܚܝܐ ܩܠܐ ܕܪ̈ܓܠܝܗ̇ ܟܕ ܥܐ̇ܠܐ ܒܬܪܥܐ ܐܡܪ ܠܗ̇ ܥܘܠܝ ܐܢܬܬܗ ܕܝܘܪܒܥܡ ܠܡܢܐ ܡܫܬܓܢܝܐ ܐܢܬܝ ܘܐܢܐ ܡܫܕܪ ܐܢܐ ܕܐܡܪ ܠܟܝ ܡ̈ܠܐ ܩܫܝ̈ܬܐ

21. Chronicles 2 11:7

    ܙܠܝ ܐܡܪܝ ܠܝܘܪܒܥܡ ܗܟܢܐ ܐܡ̇ܪ ܡܪܐ ܡܪ̈ܘܬܐ ܕܐܝܣܪܝܠ ܐܢܐ ܐܪܝܡܬܟ ܡܢ ܥܡܐ ܘܝܗܒܬܟ ܡܠܟܐ ܥܠ ܥܡܝ ܐܝܣܪܝܠ

22. Chronicles 2 11:8

    ܘܢܣܒܬܗ̇ ܡܠܟܘܬܐ ܡܢ ܕܒܝܬ ܕܘܝܕ ܘܝܗܒܬܗ̇ ܠܟ ܘܠܐ ܗܘܝܬ ܐܝܟ ܕܘܝܕ ܥܒ̣ܕܝ ܕܢܛܪ ܦܘܩ̈ܕܢܝ ܘܗܠܟ ܒܢܡܘ̈ܣܝ ܒܟܠܗ ܠܒܗ ܠܡܥܒܕ ܕܫܦܝܪ ܩܕܡܝ

23. Chronicles 2 11:9

    ܘܐܢܬ ܐܒܐܫܬ ܠܡܥܒܕ ܡܢ ܟܘܠ ܡܠܟ̈ܐ ܕܗܘܘ ܩܕܡܝܟ ܘܐܙܠܬ ܥܒܕܬ ܠܟ ܦܬܟܪ̈ܐ ܕܥܡ̈ܡܐ ܘܨܠܡ̈ܐ ܠܡܓܕܦܘ ܩܕܡܝ ܘܕܚܠܬܝ ܫܕܝܬ ܒܣܬܪ ܨܘܪܟ

24. Chronicles 2 12:13

    ܘܐܬܥܫܢ ܪܚܒܥܡ ܡܠܟܐ ܒܪ ܫܠܝܡܘܢ ܒܐܘܪܫܠܡ ܘܐܡܠܟ ܒܪ ܐܪܒܥܝܢ ܘܚܕܐ ܫܢ̈ܝܢ ܪܚܒܥܡ ܟܕ ܩܡ ܒܡܠܟܘܬܐ ܘܫܒܥܣܪܐ ܫܢ̈ܝܢ ܐܡܠܟ ܒܐܘܪܫܠܡ ܩܪܝܬܐ ܕܓܒܐ ܠܗ ܡܪܝܐ ܡܢ ܟܠܗܘܢ ܫܒ̈ܛܐ ܕܝܣܪܝܠ ܠܡܫܪܝܘ ܫܟܝܢܬܗ ܬܡܢ ܘܫܡܐ ܕܐܡܗ ܢܥܡܐ ܕܡܢ ܥܡܘܢ

25. Chronicles 2 12:14

    ܘܥܒܕ ܕܒܝ̣ܫ ܩܕܡ ܡܪܝܐ ܘܠܐ ܐܬܩܢ ܠܒܗ ܠܕܚܠܬܗ ܕܡܪܝܐ ܠܡܬܒܥܗ ܒܟܠܗ ܠܒܗ

26. Chronicles 2 12:15

    ܘܗܠܝܢ ܦܬܓܡ̈ܘܗܝ ܕܪܚܒܥܡ ܩܕܡ̈ܝܐ ܘܐܚܪ̈ܝܐ ܠܡܥܒܕ ܒܝ̣ܫܬܐ ܩܕܡ ܡܪܝܐ ܐܠܗܐ ܕܐܝܣܪܝܠ ܘܩܪܒܐ ܗܘܐ ܒܝܬ ܪܚܒܥܡ ܒܪܗ ܕܫܠܝܡܘܢ ܘܒܝܬ ܝܘܪܒܥܡ ܒܪ ܢܒܛ ܟܠܗܘܢ ܝܘܡ̈ܝ ܚܝܘ̈ܗܝ

27. Chronicles 2 12:16

    ܘܫܟܒ ܪܚܒܥܡ ܥܡ ܐܒܗ̈ܬܗ ܘܐܬܩܒܪ ܒܩܪܝܬܐ ܕܕܘܝܕ ܘܩܡ ܒܡܠܟܘܬܐ ܐܒܝܐ ܒܪܗ ܒܬܪܗ

28. Chronicles 2 13:1

    ܒܫܢܬ ܬܡܢܥܣܪܐ ܠܡܠܟܘܬܗ ܕܝܘܪܒܥܡ ܒܪ ܢܒܛ ܩܡ ܒܡܠܟܘܬܐ ܐܒܝܐ ܥܠ ܫܒܛܐ ܕܒܝܬ ܝܗܘܕܐ

29. Chronicles 2 13:2

    ܘܬܠܬ ܫܢ̈ܝܢ ܐܡܠܟ ܒܐܘܪܫܠܡ ܘܫܡܐ ܕܐܡܗ ܡܥܟܐ ܒܪܬ ܐܘܪܝܠ ܡܢ ܪܡܬܐ

30. Chronicles 2 13:3

    ܘܐܣܪ ܐܒܝܐ ܓܒܪ̈ܐ ܥ̇ܒܕ̈ܝ ܩܪܒܐ ܐܪܒܥܡܐܐ ܐ̈ܠܦܝܢ ܓܒܪ̈ܐ ܥܠܝ̈ܡܐ ܥܕܡܐ ܕܩܒܠܘ ܥܠܝܗܘܢ ܕܢܐܙܠܘܢ ܘܢܥܒܕܘܢ ܩܪܒܐ ܥܡ ܝܘܪܒܥܡ ܒܪ ܢܒܛ ܘܝܘܪܒܥܡ ܒܪ ܢܒܛ ܟܢܫ ܠܗ ܚܝܠܐ ܘܐܬܐ ܕܢܥܒܕ ܩܪܒܐ ܒܬܡܢܡܐܐ ܐ̈ܠܦܝܢ ܓܒܪ̈ܐ ܥܠܝܡ̈ܐ ܓܢܒܪ̈ܝ ܚܝܠܐ

31. Chronicles 2 13:4

    ܘܩܡ ܐܒܝܐ ܥܠ ܛܘܪܐ ܕܨܡܪܝܡ ܕܐܝܬ ܒܬܚܘܡܐ ܕܛܘܪܐ ܕܐܦܪܝܡ ܘܐܡܪ ܫܡܥ ܝܘܪܒܥܡ ܒܪ ܢܒܛ ܘܟܠܗ ܐܝܣܪܝܠ

32. Chronicles 2 13:5

    ܟܒܪ ܝܕ̇ܥܝܢ ܗܘܝܬܘܢ ܕܡܪܝܐ ܐܠܗܐ ܕܐܝܣܪܝܠ ܝܗܒ ܡܠܟܘܬܐ ܠܕܘܝܕ ܥܠ ܐܝܣܪܝܠ ܠܥܠܡ ܠܗ ܘܠܒܢ̈ܘܗܝ ܩܝܡܐ ܕܡܠܟܐ

33. Chronicles 2 13:6

    ܘܩܡ ܝܘܪܒܥܡ ܒܪ ܢܒܛ ܥܒ̣ܕܗ ܕܫܠܝܡܘܢ ܒܪܗ ܕܕܘܝܕ ܘܡܪܕ ܥܠ ܡܪܗ

34. Chronicles 2 13:7

    ܘܟܢܫ ܠܘܬܗ ܓܒܪ̈ܐ ܪ̈ܫܝܥܐ ܒܢ̈ܝ ܥܘ̣ܠܐ ܘܐܬܥܫܢ ܥܠ ܪܚܒܥܡ ܒܪܗ ܕܫܠܝܡܘܢ ܘܪܚܒܥܡ ܛܠܝܐ ܗܘܐ ܘܛܠܐ ܝܘܡ̈ܝܢ ܘܠܐ ܝ̇ܕܥ ܗܘܐ ܡܕܡ ܠܡܐܡܪ ܘܠܐ ܒܝܐܗ ܠܥܡܐ ܥܠ ܫܘܥܒܕܐ ܕܫܥܒܕ ܗܘܐ ܐܢܘܢ ܫܠܝܡܘܢ ܐܒܘܗܝ

35. Chronicles 2 13:8

    ܘܐܦ ܗܫܐ ܡܢܐ ܐܡ̇ܪܝܢ ܐܢܬܘܢ ܐܙܠܬܘܢ ܐܦܪܩܬܘܢ ܡܢܟܘܢ ܡܠܟܘܬܐ ܕܒܝܬ ܕܘܝܕ ܘܐܙܠܬܘܢ ܘܦܠܚܬܘܢ ܠܐܠܗ̈ܐ ܡܝ̈ܬܐ ܘܐܢܐ ܥܠ ܫܒܛܐ ܚܕ ܩܐ̇ܡ ܐܢܐ ܒܡܠܟܘܬܐ ܘܐܢܬܘܢ ܫܒ̈ܛܐ ܣ̈ܓܝܐܐ ܘܒܝܢܬܟܘܢ ܐܝܬ ܥܓ̈ܠܐ ܕܕܗܒܐ ܕܥܒܕ ܠܟܘܢ ܝܘܪܒܥܡ ܒܪ ܢܒܛ

36. Chronicles 2 13:9

    ܘܐܢܬܘܢ ܐܦܪܩܬܘܢ ܠܟܗ̈ܢܐ ܒܢܘ̈ܗܝ ܕܐܗܪܘܢ ܘܠܠܘ̈ܝܐ ܘܥܒܕܬܘܢ ܠܟܘܢ ܟܘܡܪ̈ܐ ܡܢ ܥܡܐ ܕܐܪܥܐ ܟܠ ܡ̇ܢ ܕܥܐ̇ܠ ܠܡܩܪܒܘ ܩܘܪܒܢܐ ܫܩ̇ܠܝܢ ܗܘܝܬܘܢ ܡܢܗ ܬܘܪܐ ܒܪ ܒܩܪܐ ܘܕܟܪ̈ܐ ܫܒܥܐ ܘܗܘܐ ܗܘܐ ܟܘܡܪܐ ܠܕܠܐ ܐܠܗ̈ܝܢ

37. Chronicles 2 13:10

    ܘܚܢܢ ܠܡܪܝܐ ܐܠܗܢ ܠܐ ܫܒܩܢ ܘܟܗ̈ܢܐ ܕܡܫܡܫܝܢ ܠܡܪܝܐ ܒܢܘ̈ܗܝ ܐܢܘܢ ܕܐܗܪܘܢ ܘܠܘ̈ܝܐ ܒܥܒܝܕ̈ܬܗܘܢ

38. Chronicles 2 13:11

    ܘܡܣܩܝܢ ܗܘܘ ܠܡܪܝܐ ܕܒ̈ܚܐ ܒܟܠ ܨܦܪ ܘܨܦܪ ܘܒܟܠ ܪܡܫ ܘܪܡܫ ܘܩܛܪ̈ܘܩܐ ܕܒܣ̈ܡܐ ܘܣܕܪ̈ܐ ܕܠܚܡܐ ܥܠ ܦܬܘܪ̈ܐ ܕܟ̈ܝܐ ܘܡܢܪ̈ܬܐ ܕܕܗܒܐ ܘܫܪ̈ܓܝܗܝܢ ܘܛܠܝܐ ܫܪܓܬܢܐ ܡܢܗܪ ܠܗܝܢ ܒܟܠ ܪܡܫ ܘܪܡܫ ܘܚܢܢ ܢܛ̇ܪܝܢ ܢܛܘܪ̈ܬܐ ܕܡܪܝܐ ܐܠܗܢ ܘܐܢܬܘܢ ܕܝܢ ܫܒܩܬܘܢܝܗܝ ܘܐܙܠܬܘܢ ܒܬܪ ܐܠܗ̈ܐ ܡܝ̈ܬܐ ܘܦܠܚܬܘܢ ܐܢܘܢ ܘܣܓܕܬܘܢ ܠܗܘܢ ܘܫܒܩܬܘܢ ܠܡܪܝܐ

39. Chronicles 2 13:12

    ܐܠܗܐ ܕܐܒܗܝ̈ܟܘܢ ܘܐܦ ܐܢܬܘܢ ܠܐ ܬܟܫܪܘܢ ܒܥܠܡܐ

40. Chronicles 2 13:15

    ܘܗܘܐ ܕܟܕ ܐܪܝܡܘ ܩܠܗܘܢ ܓܒܪ̈ܐ ܕܒܝܬ ܝܗܘܕܐ ܘܡܪܝܐ ܬܒܪ ܠܝܘܪܒܥܡ ܒܪ ܢܒܛ ܘܠܐܝܣܪܝܠ ܩܕܡ ܝܗܘܕܐ ܘܩܕܡ ܐܒܝܐ

41. Chronicles 2 13:16

    ܘܥܪܩܘ ܒܢ̈ܝ ܐܝܣܪܝܠ ܡܢ ܩܕܡ ܒܢ̈ܝ ܝܗܘܕܐ

42. Chronicles 2 13:17

    ܘܚܪܒ ܐܢܘܢ ܐܒܝܐ ܚܪܒܐ ܪܒܬܐ ܘܢܦܠܘ ܓܒܪ̈ܐ ܡܢ ܐܝܣܪܝܠ ܚܡܫܡܐܐ ܐ̈ܠܦܝܢ ܓܒܪ̈ܐ ܥܠܝ̈ܡܐ

43. Chronicles 2 13:18

    ܘܐܬܬܒܪܘ ܒܢ̈ܝ ܐܝܣܪܝܠ ܒܙܒܢܐ ܗ̇ܘ ܘܐܬܓܒܪܘ ܒܢ̈ܝ ܝܗܘܕܐ ܡܛܘܠ ܕܐܡ̇ܪܝܢ ܣܘܡܟܢܢ ܥܠ ܡܪܝܐ ܗܘ ܐܠܗܐ ܕܐܒܗ̈ܬܢ

44. Chronicles 2 13:19

    ܘܪܕܦ ܐܒܝܐ ܒܬܪ ܝܘܪܒܥܡ ܘܟܒܫ ܡܢܗ ܩܘܪ̈ܝܐ ܪ̈ܘܪܒܬܐ ܒܝܬ ܐܝܠ ܘܡܐܟ̈ܠܬܗ̇ ܫܠܐ ܘܡܐ̈ܟܠܬܗ̇ ܘܥܦܪܘܢ ܘܡܐ̈ܟܠܬܗ̇

45. Chronicles 2 13:20

    ܘܙܥܪ ܠܗ ܚܝܠܐ ܠܝܘܪܒܥܡ ܬܘܒ ܒܝܘܡ̈ܬܗ ܕܐܒܝܐ ܘܡܚܝܗܝ ܡܪܝܐ ܠܝܘܪܒܥܡ ܘܡܝܬ

46. Chronicles 2 13:21

    ܘܐܬܓܒܪ ܐܒܝܐ ܘܢܣܒ ܠܗ ܢܫ̈ܐ ܐܪ̈ܒܥܣܪܐ ܘܐܬܝܠܕܘ ܠܗ ܒܢ̈ܝܐ ܕܟܪ̈ܐ ܥܣܪ̈ܝܢ ܘܫܬܐ ܘܒܢ̈ܬܐ ܢܩܒ̈ܬܐ ܫܬܬܥܣܪܐ

47. Chronicles 2 13:22

    ܘܫܪܟܐ ܕܦܬܓ̈ܡܘܗܝ ܕܐܒܝܐ ܘܐܘܪ̈ܚܬܗ ܗܢܘܢ ܟܬܝܒܝܢ ܒܡܕܪ̈ܫܐ ܕܥܕܘ ܢܒܝܐ

48. Chronicles 2 13:23

    ܘܫܟܒ ܐܒܝܐ ܥܡ ܐܒܗ̈ܬܗ ܘܩܒܪܘܗܝ ܒܩܪܝܬܐ ܕܕܘܝܕ ܘܩܡ ܒܡܠܟܘܬܐ ܐܣܐ ܒܪܗ ܒܬܪܗ ܒܝܘܡ̈ܘܗܝ ܐܬܢܝܚܬ ܐܪܥܐ ܡܢ ܩܐܪܣܐ ܥܣܪ̈ܝܢ ܫܢ̈ܝܢ

49. Chronicles 2 14:1

    ܘܥܒܕ ܐܣܐ ܕܛܒ ܘܕܫܦܝܪ ܩܕܡ ܡܪܝܐ ܐܠܗܗ

50. Chronicles 2 14:2

    ܘܥܩܪ ܡܕ̈ܒܚܐ ܕܐܠܗ̈ܐ ܢܘܟܪ̈ܝܐ ܘܒܘܡ̈ܣܐ ܘܬܒܪ ܩܝܡ̈ܬܐ ܘܦܣܩ ܐܢܕܪ̈ܝܢܛܐ

51. Chronicles 2 14:3

    ܘܐܡܪ ܠܝܗܘܕܐ ܬܘ ܢܨܠܐ ܩܕܡ ܡܪܝܐ ܐܠܗܐ ܕܐܒܗ̈ܬܢ

52. Chronicles 2 14:4

    ܘܥܩܪ ܡܢ ܟܠܗܝܢ ܩܘܪ̈ܝܐ ܕܒܝܬ ܝܗܘܕܐ ܥܠܘ̈ܬܐ ܘܦܬܟܪ̈ܐ ܘܐܬܢܝܚܬ ܡܠܟܘܬܗ ܒܝܘܡ̈ܬܗ ܘܒܥܠܕܒܒܐ ܠܐ ܗܘܐ ܠܗ ܡܢ ܟܠܗܘܢ ܒܥ̈ܠܝ ܬܚܘܡܗ

53. Chronicles 2 14:5

    ܘܒܢܐ ܩܘܪ̈ܝܐ ܥܫܝ̈ܢܬܐ ܒܐܪܥܐ ܕܝܗܘܕܐ ܡܛܠ ܕܐܬܢܝܚܬ ܐܪܥܐ ܘܠܐ ܐܝܬ ܗܘܐ ܐܢܫ ܕܥܒܕ ܥܡܗܘܢ ܩܪܒܐ ܫܢ̈ܝܐ ܗܠܝܢ ܡܛܘܠ ܕܐܢܝܚܗ ܗܘܐ ܡܪܝܐ

54. Chronicles 2 14:6

    ܘܐܡܪ ܠܕܒܝܬ ܝܗܘܕܐ ܬܘ ܢܒܢܐ ܩܘܪ̈ܝܐ ܗܠܝܢ ܘܢܟܪܟ ܐܢܝܢ ܫܘܪ̈ܐ ܘܡܓ̈ܕܠܐ ܘܬܪ̈ܥܐ ܘܣܘܟܪ̈ܐ ܥܕ ܫܠܝܐ ܐܪܥܐ ܡܢ ܩܐܪܣܐ ܡܛܠ ܕܒܥܝܢ ܠܡܪܝܐ ܐܠܗܢ ܘܐܦ ܗܘ ܒܥܢ ܘܐܢܝܚܢ ܡܢ ܟܠܗܘܢ ܕܚܕܪ̈ܝܢ ܘܒܝܐܢ ܘܦܨܝܢ

55. Chronicles 2 14:7

    ܘܗܘܘ ܠܐܣܐ ܓܒܪ̈ܐ ܓܢܒܪ̈ܝ ܚܝܠܐ ܫ̇ܩ̈ܠܝ ܣܟܪ̈ܐ ܘܪ̈ܘܡܚܐ ܡܢ ܒܝܬ ܝܗܘܕܐ ܬܠܬܡܐܐ ܐܠܦܝ̈ܢ ܘܡܢ ܕܒܝܬ ܒܢܝܡܝܢ ܠܒܝ̈ܫܝ ܫܪܝܢܐ ܘܡܬܚ̈ܝ ܩܫܬܐ ܡܐܬܝܢ ܘܬܡܢܐܝܢ ܐܠܦܝ̈ܢ ܟܠܗܘܢ ܗܠܝܢ ܓܢܒܪ̈ܝ ܚܝܠܐ

56. Chronicles 2 14:8

    ܘܢܦܩ ܠܘܬܗܘܢ ܙܪܚ ܗܢܕܘܝܐ ܒܚܝܠܐ ܣܓܝܐܐ ܐܠܦ ܐܠܦܝ̈ܢ ܘܒܙܘ̈ܓܐ ܬܠܬܝܢ ܐܠܦܝ̈ܢ ܘܐܬܘ ܘܡܛܘ ܥܕܡܐ ܠܡܐܪܫܐ

57. Chronicles 2 14:9

    ܘܢܦܩ ܐܣܐ ܠܩܘܒܠܗ ܘܥܒܕ ܥܡܗ ܩܪܒܐ ܒܢܚܠܐ ܕܡܐܪܫܐ

58. Chronicles 2 14:10

    ܘܨܠܝ ܐܣܐ ܩܕܡ ܡܪܝܐ ܐܠܗܗ ܘܐܡܪ ܐܢܬ ܗܘ ܡܪܢ ܥܕܘܪܗ ܕܥܡܟ ܟܕ ܬܫܠܡ ܚܝܠܐ ܣܓܝܐܐ ܒܐܝ̈ܕܝ ܙܥܘܪ̈ܐ ܗܝܕܝܢ ܢܕܥܘܢ ܟܠܗܘܢ ܥܡܘܪ̈ܘܗܝ ܕܥܠܡܐ ܕܫܦܝܪ ܡܬܬܟܠܝܢ ܚܢܢ ܥܠܝܟ ܥܕܪܝܢ ܡܪܝܐ ܐܠܗܢ ܡܛܠ ܕܒܫܡܟ ܐܬܝܢ ܥܠ ܚܝܠܐ ܗܢܐ ܪܒܐ ܡܪܝܐ ܐܠܗܐ ܠܐ ܬܫܘܚܪ ܓܢܒܪܘܬܟ ܡܢܢ ܘܗܝܕܝܢ ܟܕ ܓܡܪ ܐܣܐ ܠܡܨܠܝܘ ܨܠܘܬܗ

59. Chronicles 2 14:11

    ܬܒܪ ܡܠܐܟܗ ܕܡܪܝܐ ܠܗܢܕ̈ܘܝܐ ܩܕܡ ܐܣܐ ܘܩܕܡ ܝܗܘܕܐ ܘܥܪܩܘ ܗܢܕܘ̈ܝܐ

60. Chronicles 2 14:12

    ܘܪܕܦ ܐܢܘܢ ܐܣܐ ܘܥܡܐ ܕܥܡܗ ܥܕܡܐ ܠܓܕܪ ܘܢܦܠܘ ܡܢ ܗܢܕܘ̈ܝܐ ܕܠܐ ܡܢܝܢ ܡܛܠ ܕܐܬܬܒܪܘ ܩܕܡ ܡܪܝܐ ܘܩܕܡ ܚܝܠܘ̈ܬܗ ܘܢܣܒܘ ܘܫܒܘ ܫܒܝܬܐ ܣܘܓܐܐ ܕܛܒ

61. Chronicles 2 14:13

    ܘܚܪܒܘ ܟܠܗܝܢ ܩܘܪ̈ܝܐ ܕܐܝܬ ܚܕܪ̈ܝ ܓܕܪ ܡܛܘܠ ܕܗܘܬ ܕܚܠܬܗ ܕܡܪܝܐ ܥܠܝܗܘܢ ܘܒܙܘ ܟܠܗܝܢ ܩܘܪ̈ܝܐ ܡܛܠ ܕܒܙܬܐ ܣܓܝܐܬܐ ܗܘܬ ܒܗܝܢ

62. Chronicles 2 14:14

    ܘܐܦ ܡܫܟ̈ܢܐ ܕܥܪ̈ܒܝܐ ܐܝܬܝܘ ܘܫܒܘ ܥ̈ܢܐ ܣܘܓܐܐ ܕܛܒ ܘܓܡ̈ܠܐ ܘܐܘܒܠܘ ܠܐܘܪܫܠܡ

63. Chronicles 2 15:1

    ܘܥܙܪܝܐ ܒܪ ܥܙܘܪ ܫܪܬ ܥܠܘܗܝ ܪܘܚܐ ܡܢ ܩܕܡ ܡܪܝܐ

64. Chronicles 2 15:2

    ܘܢܦܩ ܩܕܡ ܐܣܐ ܘܐܡܪ ܠܗ ܫܡܥܝܢܝ ܐܣܐ ܘܟܠܗ ܝܗܘܕܐ ܘܒܢܝܡܝܢ ܡܪܝܐ ܥܡܟܘܢ ܗܘ ܠܥܠܡ ܥܠܡܝܢ ܐܢ ܬܒܥܘܢܝܗܝ ܢܫܬܟܚ ܠܟܘܢ ܘܐܢ ܬܫܒܩܘܢܗ ܢܫܒܘܩܟܘܢ

65. Chronicles 2 15:3

    ܝܘܡ̈ܬܐ ܣܓ̈ܝܐܐ ܠܐܝܣܪܝܠ ܕܠܐ ܦܠܚܘ ܠܐܠܗܗܘܢ ܒܩܘܫܬܐ ܘܠܐ ܩܒܠܘ ܡܢ ܟܗܢܝ̈ܗܘܢ ܘܠܐ ܫܡܥܘ ܢܡܘ̈ܣܝܗܘܢ ܘܐܫܬܠܡܘ ܠܐܝܕܐ ܕܒܥܠܕ̈ܒܒܐ

66. Chronicles 2 15:4

    ܘܟܕ ܥܩܬ ܠܗܘܢ ܨܠܝܘ ܩܕܡ ܡܪܝܐ ܐܠܗܐ ܕܐܝܣܪܝܠ ܘܒܥܐܘܗܝ ܘܐܫܬܟܚ ܠܗܘܢ

67. Chronicles 2 15:5

    ܘܒܙ̈ܒܢܬܐ ܗܠܝܢ ܩܕܡܝ̈ܬܐ ܟܕ ܠܐܠܗܢ ܠܐ ܕܚ̇ܠܝܢ ܗܘܝܢ ܠܐ ܐܝܬ ܗܘܐ ܫܠܡ ܠܐ ܠܡ̇ܢ ܕܢ̇ܦܩ ܘܠܐ ܠܡ̇ܢ ܕܥ̇ܐܠ ܡܛܠ ܕܒܝ̣ܫܬܐ ܪܒܬܐ ܐܬܬ ܗܘܬ ܥܠ ܟܠܗܘܢ ܥܡܘܪ̈ܝܗ̇ ܕܐܪܥܐ

68. Chronicles 2 15:6

    ܘܐܬܒܕܪܢ ܒܟܠ ܥܡ ܘܥܡ ܘܒܝܢܬ ܩܘܪ̈ܝܐ ܘܒܝܢܬ ܡܕܝ̈ܢܬܐ ܡܛܠ ܕܫܒܩܢ ܗܘܝܢ ܠܡܪܝܐ ܐܠܗܢ ܘܠܐ ܨ̇ܒܝܢ ܗܘܝܢ ܠܡܫܡܥ ܒܩܠܐ ܕܥܒ̣ܕܘ̈ܗܝ ܢܒ̈ܝܐ

69. Chronicles 2 15:7

    ܘܐܦ ܗܘ ܦܪܥܢ ܐܓܪܐ ܕܥܒ̇ܕ̈ܝܢ

70. Chronicles 2 15:8

    ܘܟܕ ܫܡܥ ܐܣܐ ܦܬܓ̈ܡܐ ܗܠܝܢ ܕܥܙܪܝܐ ܒܪ ܥܙܘܪ ܢܒܝܐ ܐܬܥܫܢ ܘܐܥܒܪ ܨܠܡ̈ܐ ܡܢ ܟܠܗ̇ ܐܪܥܐ ܕܝܗܘܕܐ ܘܕܒܢܝܡܝܢ ܘܡܢ ܩܘܪ̈ܝܐ ܕܐܚܕ ܒܐܪܥܐ ܕܐܦܪܝܡ ܘܚܕܬ ܡܕܒܚܐ ܕܡܪܝܐ ܕܗܘܐ ܩܕܡ ܣܪܘܓܐ

71. Chronicles 2 15:9

    ܘܟܢܫ ܟܠܗܘܢ ܕܒܝܬ ܝܗܘܕܐ ܘܒܢ̈ܝ ܒܢܝܡܝܢ ܘܡܢ ܩܘܪ̈ܝܐ ܕܐܚܕ ܒܐܪܥܐ ܕܐܦܪܝܡ ܘܓܝܘܪ̈ܐ ܕܒܗܘܢ ܡܢ ܕܒܝܬ ܐܦܪܝܡ ܘܡܢ ܕܒܝܬ ܡܢܫܐ ܘܡܢ ܕܒܝܬ ܫܡܥܘܢ ܡܛܠ ܕܐܬܟܢܫܘ ܘܐܬܘ ܠܘܬܗ ܡܢ ܕܒܝܬ ܐܝܣܪܝܠ ܣܘܓܐܐ ܟܕ ܚܙܘ ܕܡܪܝܐ ܐܠܗܗ ܥܡܗ

72. Chronicles 2 15:10

    ܘܐܬܟܢܫܘ ܒܐܘܪܫܠܡ ܒܝܪܚܐ ܬܠܝܬܝܐ ܒܫܢܬ ܚܡܫܥܣܪܐ ܕܡܠܟܘܬܗ ܕܐܣܐ

73. Chronicles 2 15:11

    ܘܕܒܚܘ ܠܡܪܝܐ ܕܒܚ̈ܐ ܒܝܘܡܐ ܗ̇ܘ ܡܢ ܒܙܬܐ ܕܐܝܬܝܘ ܬܘܪ̈ܐ ܫܒܥܡܐܐ ܘܥ̈ܢܐ ܫܬܐ ܐܠܦܝ̈ܢ

74. Chronicles 2 15:12

    ܘܐܝܡܘ ܡܘܡ̈ܬܐ ܕܢܨܠܘܢ ܩܕܡ ܡܪܝܐ ܐܠܗܐ ܕܐܒܗ̈ܝܗܘܢ ܒܟܠܗ ܠܒܗܘܢ ܘܒܟܠܗ̇ ܢܦܫܗܘܢ

75. Chronicles 2 15:13

    ܘܟܠ ܡ̇ܢ ܕܠܐ ܢܨܠܐ ܩܕܡ ܡܪܝܐ ܐܠܗܐ ܕܐܝܣܪܝܠ ܢܡܘܬ ܡܢ ܙܥܘܪܐ ܘܥܕܡܐ ܠܪܒܐ ܘܡܢ ܓܒܪ̈ܐ ܘܥܕܡܐ ܠܢܫ̈ܐ

76. Chronicles 2 15:14

    ܘܐܝܡܘ ܠܡܪܝܐ ܒܩܠܐ ܪܡܐ ܒܩܪ̈ܢܬܐ ܟܦܝ̈ܦܬܐ ܘܦܫܝ̈ܛܬܐ

77. Chronicles 2 15:15

    ܘܚܕܝܘ ܟܠܗܘܢ ܕܒܝܬ ܝܗܘܕܐ ܥܠ ܛܒܐ ܗܢܐ ܕܫܡܥܘ ܡܛܠ ܕܡܢ ܟܠܗ ܠܒܗܘܢ ܒܥܐܘܗܝ ܘܡܢ ܟܠܗ̇ ܢܦܫܗܘܢ ܨܠܝܘ ܩܕܡܘܗܝ ܘܐܫܬܟܚ ܠܗܘܢ ܘܦܨܝ ܐܢܘܢ ܡܢ ܟܠ ܒܥ̈ܠܝ ܬܚ̈ܘܡܝܗܘܢ

78. Chronicles 2 15:16

    ܘܐܦ ܠܡܥܟܐ ܐܡܗ ܕܐܣܐ ܐܥܒܪܗ̇ ܡܢ ܡܠܟܘܬܗ̇ ܥܠ ܕܥܒܕܬ ܥܐܕܐ ܠܨܠܡ̈ܝܗ̇ ܘܦܣܩ ܐܣܐ ܠܨܠܡ̈ܝܗ̇ ܘܐܘܩܕ ܐܢܘܢ ܒܢܚܠܐ ܕܩܕܪܘܢ

79. Chronicles 2 15:17

    ܘܡܕܒ̈ܚܐ ܠܐ ܦܪܩܘ ܡܢ ܐܝܣܪܝܠ ܒܪܡ ܠܒܗ ܕܐܣܐ ܫܠܡ ܗܘܐ ܠܕܚܠܬܗ ܕܡܪܝܐ ܐܠܗܗ ܟܠܗܘܢ ܝܘܡ̈ܬܐ ܕܚܝܘ̈ܗܝ

80. Chronicles 2 15:18

    ܘܐܝܬܝ ܩܘܕ̈ܫܐ ܕܐܒܘܗܝ ܘܩܘ̈ܕܫܘܗܝ ܠܒܝܬܗ ܕܡܪܝܐ ܟܣܦܐ ܘܕܗܒܐ ܘܡܐ̈ܢܐ

81. Chronicles 2 15:19

    ܘܩܪܒܐ ܗܘܐ ܒܫܢܬ ܬܠܬܝܢ ܘܚܡܫ ܕܡܠܟܘܬܗ ܕܐܣܐ

82. Chronicles 2 16:1

    ܘܒܫܢܬ ܬܠܬܝܢ ܘܫܬ ܫ̈ܢܝܢ ܠܡܠܟܘܬܗ ܕܐܣܐ ܣܠܩ ܒܥܫܐ ܡܠܟܐ ܕܐܝܣܪܝܠ ܥܠ ܕܒܝܬ ܝܗܘܕܐ ܘܒܢܐ ܠܪܡܬܐ ܡܛܠ ܕܠܐ ܫ̇ܒܩܝܢ ܗܘܘ ܠܡܥܠ ܘܠܡܦܩ ܠܐܣܐ ܡܠܟܐ ܕܝܗܘܕܐ

83. Chronicles 2 16:2

    ܘܐܦܩ ܐܣܐ ܟܣܦܐ ܘܕܗܒܐ ܡܢ ܒܝܬ ܓܙܐ ܕܡܪܝܐ ܘܡܢ ܒܝܬ ܡܠܟܐ ܘܫܕܪ ܠܒܪܗܕܕ ܡܠܟܐ ܕܐܕܘܡ ܕܝܬ̇ܒ ܒܕܪܡܣܘܩ ܘܐܡܪ ܠܗ

84. Chronicles 2 16:3

    ܡܘܡ̈ܬܐ ܐܝܬ ܒܝܢܝ ܘܠܟ ܘܒܝܬ ܐܒܝ ܘܒܝܬ ܐܒܘܟ ܗܐ ܫܕܪܬ ܠܟ ܟܣܦܐ ܘܕܗܒܐ ܙܠ ܒܛܠ ܡܘܡ̈ܬܐ ܕܝܡܝܬ ܥܡ ܒܥܫܐ ܡܠܟܐ ܕܐܝܣܪܝܠ ܡܬܥܠܐ ܡܢܝ

85. Chronicles 2 16:4

    ܘܫܡܥ ܒܪܗܕܕ ܠܡܠܟܐ ܐܣܐ ܘܫܕܪ ܠܪ̈ܘܪܒܢܝ ܚܝܠܐ ܕܐܝܬ ܠܗ ܘܐܬܘ ܘܫܪܘ ܥܠ ܩܘܪ̈ܝܐ ܕܐܝܣܪܝܠ ܘܐܚܕܘ ܠܥܝܘܢ ܘܠܐܒܠ ܒܝܬ ܡܥܟܐ ܘܠܟܠܗܘܢ ܐܘܨܪ̈ܐ ܕܩܘܪ̈ܝܐ ܕܒܝܬ ܢܦܬܠܝ

86. Chronicles 2 16:5

    ܗܝܕܝܢ ܟܕ ܫܡܥ ܒܥܫܐ ܦܪܩ ܗܘܐ ܡܢ ܕܠܡܒܢܐ ܠܪܡܬܐ ܘܒܛܠܗ ܗܘܐ ܟܠܗ ܒܢܝܢܗ

87. Chronicles 2 16:6

    ܘܐܣܐ ܡܠܟܐ ܟܢܫ ܗܘܐ ܠܟܠܗܘܢ ܕܒܝܬ ܝܗܘܕܐ ܘܢܣܒܘ ܠܟܐ̈ܦܝܗ̇ ܕܪܡܬܐ ܘܠܩܝ̈ܣܝܗ̇ ܕܡܛܝܒܝܢ ܗܘܘ ܕܢܒܢܘܢܗ̇ ܠܒܥܫܐ ܘܒܢܐ ܒܗܘܢ ܡܠܟܐ ܐܣܐ ܪܡܬܐ ܕܒܢܝܡܝܢ ܘܡܨܦܝܐ ܩܪܝܬܐ

88. Chronicles 2 16:7

    ܘܒܗ ܒܙܒܢܐ ܗ̇ܘ ܐܬܐ ܚܢܢ ܢܒܝܐ ܠܘܬ ܐܣܐ ܡܠܟܐ ܕܝܗܘܕܐ ܘܐܡܪ ܠܗ ܚܠܦ ܕܐܬܬܟܠܬ ܥܠ ܡܠܟܐ ܕܐܕܘܡ ܘܠܐ ܐܬܬܟܠܬ ܥܠ ܡܪܝܐ ܐܠܗܟ ܡܛܠ ܗܢܐ ܢܥܪܘܩ ܚܝܠܐ ܕܐܕܘܡ ܡܢܟ

89. Chronicles 2 16:8

    ܘܢܐܙܠܘܢ ܘܢܬܚܝܠܘܢ ܗܢܘܢ ܘܗܢܕ̈ܘܝܐ ܘܡܠܟ̈ܐ ܕܐܝܬ ܥܡܗܘܢ ܘܢܗܘܘܢ ܠܚܝ̈ܠܐ ܘܠܙܘ̈ܓܐ ܘܠܦܪ̈ܫܐ ܣܘܓܐܐ ܕܛܒ ܘܟܕ ܬܒܥܐ ܡܢ ܡܪܝܐ ܐܠܗܐ ܢܫܠܡ ܐܢܘܢ ܒܐܝܕ̈ܝܟ

90. Chronicles 2 16:9

    ܡܛܠ ܕܥܝܢ̈ܘܗܝ ܕܡܪܝܐ ܚܝܪ̈ܢ ܒܟܠܗ̇ ܐܪܥܐ ܘܐܬܥܫܢܘ ܘܢܗܘܐ ܠܒܟܘܢ ܫܠܡ ܠܕܚܠܬܗ ܘܐܣܬܟܠܘ ܒܟܘܠܗܝܢ ܬܕܡܪ̈ܬܗ ܡܛܘܠ ܕܡܪܝܐ ܐܠܗܟܘܢ ܥܒ̇ܕ ܠܟܘܢ ܩܪܒܐ

91. Chronicles 2 16:10

    ܘܪܓܙ ܐܣܐ ܥܠ ܕܘܩܐ ܘܝܗܒܗ ܒܝܬ ܐܣܝܪ̈ܐ ܡܛܠ ܕܡܕܡ ܕܠܐ ܚ̇ܙܐ ܗܘܐ ܡܫܬܥܐ ܗܘܐ ܘܡܙܝܥ ܗܘܐ ܠܒܗ ܕܥܡܐ ܡܛܠ ܗܢܐ ܪܗܛ ܐܣܐ ܒܙܒܢܐ ܗ̇ܘ ܡܢ ܥܡܐ

92. Chronicles 2 16:11

    ܘܗܐ ܦܬܓ̈ܡܘܗܝ ܕܐܣܐ ܩܕܡ̈ܝܐ ܘܐܚܪ̈ܝܐ ܗܐ ܗܢܘܢ ܟܬܝܒܝܢ ܥܠ ܣ̣ܦܪܐ ܕܡܠܟ̈ܐ ܕܝܗܘܕܐ ܘܕܐܝܣܪܝܠ

93. Chronicles 2 16:12

    ܘܐܬܟܬܫ ܐܣܐ ܒܫܢܬ ܬܠܬܝܢ ܘܬܫܥ ܠܡܠܟܘܬܗ ܘܐܬܟܪܗ ܡܢ ܪ̈ܓܠܘܗܝ ܘܢܦܠ ܒܓܘ ܒܝܬܗ

94. Chronicles 2 16:13

    ܘܫܟܒ ܐܣܐ ܥܡ ܐܒܗ̈ܬܗ ܘܐܬܩܒܪ ܒܩܒܘܪܬܗ ܘܡܝܬ ܒܫܢܬ ܐܪ̈ܒܥܝܢ ܘܚܕܐ ܠܡܠܟܘܬܗ

95. Chronicles 2 16:14

    ܘܐܬܩܒܪ ܒܩܒܪܗ ܕܕܘܝܕ ܘܐܪܡܝܘܗܝ ܒܥܪܣܐ ܕܡܠܝܐ ܒܣܡ̈ܐ ܘܐܘܩܕܘ ܝܩܕܐ ܪܒܐ ܕܛܒ

96. Chronicles 2 17:1

    ܘܩܡ ܒܡܠܟܘܬܐ ܝܗܘܫܦܛ ܒܪܗ ܒܬܪܗ ܘܐܬܥܫܢ ܥܠ ܐܝܣܪܝܠ

97. Chronicles 2 17:2

    ܘܐܫܠܛ ܓܒܪ̈ܐ ܓܢܒܪ̈ܝ ܚܝܠܐ ܒܟܠܗܝܢ ܩܘܪ̈ܝܐ ܕܒܝܬ ܝܗܘܕܐ ܥܫܝ̈ܢܬܐ ܘܐܩܝܡ ܫܠܝ̈ܛܐ ܒܐܪܥܐ ܕܝܗܘܕܐ ܘܒܐܪܥܐ ܕܐܦܪܝܡ ܕܐܚܕ ܐܣܐ ܐܒܘܗܝ

98. Chronicles 2 17:3

    ܘܗܘܐ ܡܪܝܐ ܥܡ ܝܗܘܫܦܛ ܡܛܠ ܕܗܠܟ ܒܐܘܪ̈ܚܬܗ ܕܕܘܝܕ ܐܒܘܗܝ ܩܕܡܝ̈ܬܐ ܘܠܐ ܨܠܝ ܠܨܠܡ̈ܐ

99. Chronicles 2 17:4

    ܡܛܠ ܕܠܡܪܝܐ ܐܠܗܐ ܕܐܒܘܗܝ ܨܠܝ ܘܒܦܘܩܕ̈ܢܘܗܝ ܗܠܟ ܘܢܡܘܣ̈ܘܗܝ ܢܛܪ ܘܠܐ ܥܒܕ ܐܝܟ ܥ̇ܒ̈ܕܐ ܕܐܝܣܪܝܠ

100. Chronicles 2 17:5

     ܘܐܬܩܢ ܡܪܝܐ ܡܠܟܘܬܐ ܒܐܝܕܗ ܘܝܗܒܘ ܠܗ ܟܠܗܘܢ ܕܒܝܬ ܝܗܘܕܐ ܩܘܪ̈ܒܢܐ ܠܝܗܘܫܦܛ ܘܗܘܐ ܠܗ ܥܘܬܪܐ ܘܐܝܩܪܐ ܣܘܓܐܐ ܕܛܒ

← Previous · Next → — showing 201–300 of 768

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.