← All works

Peshitta Bel and the Dragon

Peshitta (Syriac Old Testament) · 42 sections

1. Bel and the Dragon 1:1

   ܘܡܠܟܐ ܐܣܛܝܓܘܣ ܐܬܬܘܣܦ ܥܠ ܐܒܗ̈ܬܗ ܘܩ̇ܒܠ ܟܘܪܫ ܦܪܣܝܐ ܡܠܟܘܬܗ

2. Bel and the Dragon 1:2

   ܘܕܢܝܐܝܠ ܐܝܬܘܗܝ ܗܘܐ ܐܝܩܪܗ ܥܡ ܕܡ̇ܠܟܐ ܘܥ̇ܡܪ ܗܘܐ ܥܡ ܡ̇ܠܟܐ ܘܡܫܒܚ ܗܘܐ ܡܢ ܟܠܗܘܢ ܪ̈ܚܡܘܗܝ ܕܡ̇ܠܟܐ

3. Bel and the Dragon 1:3

   ܐܝܬ ܗܘܐ ܕܝܢ ܦܬܟܪܐ ܠܒܒ̈ܠܝܐ ܘܫܡܗ ܗܘܐ ܒܝܠ ܘܡܦܩܝܢ ܗܘܘ ܥܠܘܗܝ ܢܦܩܬܐ ܟܠܝܘܡ ܣܡܝܕܐ ܬܪܥܣܪ ܐܪ̈ܕܒܝܢ ܘܕܟܪ̈ܐ ܐܪܒܥܝܢ ܘܚܡܪܐ ܫܬ ܡܬܪ̈ܝܢ

4. Bel and the Dragon 1:4

   ܘܗܘ ܡ̇ܠܟܐ ܕܚ̇ܠ ܗܘܐ ܠܗ ܘܐ̇ܙܠ ܗܘܐ ܟܠܝܘܡ ܘܣ̇ܓܕ ܗܘܐ ܠܗ ܘܕܢܝܐܝܠ ܣ̇ܓܕ ܗܘܐ ܠܐܠܗܐ ܘܐܡ̣ܪ ܡ̇ܠܟܐ ܠܕܢܝܐܝܠ ܡܛܠ ܡܢܐ ܠܐ ܣ̇ܓܕ ܐܢܬ ܠܒܝܠ ܐܠܗܝ

5. Bel and the Dragon 1:5

   ܘܐܡ̣ܪ ܠܗ ܕܢܝܐܝܠ ܠܐ ܣ̇ܓܕ ܐܢܐ ܠܨܠܡܐ ܘܠܦܬܟܪܐ ܘܠܓܠܝܦܐ ܡܛܠ ܕܥܒܕ ܐܝܕ̈ܝܐ ܗܘ ܕܒܢܝ̈ܢܫܐ ܐܠܐ ܐܢܐ ܕܚ̇ܠ ܐܢܐ ܠܐܠܗܐ ܚܝܐ ܗ̇ܘ ܕܥܒ̣ܕ ܫܡܝܐ ܘܐܪܥܐ ܘܐܝܬܘܗܝ ܡܪܝܐ ܥܠ ܟܘܠ ܒܣܪ ܠܗ ܗܘ ܣ̇ܓܕܢܐ

6. Bel and the Dragon 1:6

   ܘܐܡ̣ܪ ܡ̇ܠܟܐ ܠܕܢܝܐܝܠ ܠܐ ܡܬܚܙܐ ܠܟ ܕܒܝܠ ܚܝ ܗܘ ܐܘ ܠܐ ܚ̇ܙܐ ܐܢܬ ܕܗܐ ܐ̇ܟܠ ܘܫܬ̇ܐ ܟܠ ܝܘܡ

7. Bel and the Dragon 1:7

   ܗܝܕܝܢ ܕܢܝܐܝܠ ܓܚܟ ܘܐܡ̣ܪ ܠܡ̇ܠܟܐ ܠܐ ܬܛܥܐ ܡ̇ܠܟܐ ܗܢܐ ܓܝܪ ܡܢ ܠܓܘ ܕܛܝܢܐ ܗܘ ܘܡܢ ܠܒܪ ܕܢܚܫܐ ܘܡܕܡ ܡܢ ܝܘܡ̈ܘܗܝ ܠܐ ܐܟ̣ܠ ܘܠܐ ܐܫܬܝ

8. Bel and the Dragon 1:8

   ܗܝܕܝܢ ܐܬܚܡܬ ܡ̇ܠܟܐ ܘܩ̣ܪܐ ܠܟܘܡܪ̈ܘܗܝ ܕܒܝܠ ܘܐܡ̣ܪ ܠܗܘܢ ܐܢ ܠܐ ܬܐܡܪܘܢ ܠܝ ܕܡܢܘ̣ ܐ̇ܟܠ ܢܦܩܬܐ ܗܕܐ ܟܠܗ̇ ܬܡܘܬܘܢ

9. Bel and the Dragon 1:9

   ܐܢ ܕܝܢ ܬܚܘܘܢܢܝ ܕܒܝܠ ܗܘ ܐ̇ܟܠ ܢܡܘܬ ܕܢܝܐܝܠ ܕܓ̇ܕܦ ܥܠ ܒܝܠ ܘܐܡ̣ܪ ܕܢܝܐܝܠ ܠܡ̇ܠܟܐ ܢܗܘܐ ܐܝܟ ܡܠܬܟ ܡ̇ܠܟܐ

10. Bel and the Dragon 1:10

    ܗܘ̇ܝܢ ܗܘܘ ܕܝܢ ܟܘܡܪ̈ܘܗܝ ܕܒܝܠ ܫܒܥܝܢ ܣܛܪ ܡܢ ܢܫܝ̈ܗܘܢ ܘܒܢܝ̈ܗܘܢ ܘܐܬ̣ܐ ܡ̇ܠܟܐ ܗܘ ܘܕܢܝܐܝܠ ܠܒܝܬܗ ܕܒܝܠ

11. Bel and the Dragon 1:11

    ܘܐܡ̇ܪܝܢ ܟܘܡܪ̈ܐ ܠܡ̇ܠܟܐ ܗܐ ܚܢܢ ܢܦܩ̇ܝܢܢ ܠܒܪ ܐܢܬ ܕܝܢ ܡ̇ܠܟܐ ܣܝܡ ܡܐܟ̈ܠܬܐ ܠܒܝܠ ܘܡܙܘܓ ܚܡ̣ܪܐ ܘܣܝܡ ܘܐܚܘܕ ܬܪܥܐ ܘܚܬܘܡ ܒܥܙܩܬܟ

12. Bel and the Dragon 1:12

    ܘܩ̇ܕܡ ܘܬܐ ܒܨܦܪܐ ܐܢ ܠܐ ܬܫܟܚ ܟܠܗܝܢ ܡܐܟ̈ܠܬܐ ܕܐܟ̣ܠ ܐܢܝܢ ܒܝܠ ܢܡܘܬ ܚܢܢ ܘܐܢ ܗܘ ܕܐܟ̣ܠ ܐܢܝܢ ܒܝܠ ܢܡܘܬ ܕܢܝܐܝܠ ܗ̇ܘ ܕܓ̇ܕܦ ܥܠܝܢ

13. Bel and the Dragon 1:13

    ܗ̣ܢܘܢ ܕܝܢ ܡܛܠ ܕܬܟܝܠܝܢ ܗܘܘ ܕܥܒܝܕ ܗܘܐ ܠܗܘܢ ܡܥܠܢܐ ܒܛܘܫܝܐ ܬܚܝܬ ܦܬܘܪܐ ܘܒܗ ܥܐ̇ܠܝܢ ܗܘܘ ܘܢ̇ܦܩܝܢ ܘܐ̇ܟܠܝܢ ܗܘܘ ܟܠܡܕܡ ܕܡܬܬܣܝܡ ܗܘܐ ܠܗ ܠܒܝܠ ܘܫܩ̇ܠܝܢ ܗܘܘ ܡܕܡ ܕܝܬ̇ܪ

14. Bel and the Dragon 1:14

    ܟܕ ܕܝܢ ܢܦܩܘ ܟܘܡܪ̈ܐ ܕܒܝܠ ܐܝܬܝ ܡ̇ܠܟܐ ܡܐܟ̈ܠܬܐ ܘܡܠ̣ܐ ܦܬܘܪܐ ܘܣܡ ܩܕܡ ܒܝܠ ܘܡܠ̣ܐ ܚܡܪܐ ܡܐܢ̈ܐ ܐܝܟ ܥܝܕܗܘܢ ܘܢܦ̣ܩ ܘܐܡ̣ܪ ܕܢܝܐܝܠ ܠܛܠܘ̈ܗܝ ܐܝܬܘ ܠܝ ܩܛܡܐ ܘܐܝܬܝܘ ܠܗ ܩܛܡܐ ܘܥܪܒܗ ܒܥܪܒܠܐ ܩܕܡܘܗܝ ܕܡ̇ܠܟܐ ܒܟܘܠܗ ܒܝܬܐ ܕܒܝܠ ܘܚ̣ܙܐ ܡ̇ܠܟܐ ܘܢܦ̣ܩ ܘܐܚ̣ܕ ܬܪܥܐ ܘܚܬܡܗ ܡ̇ܠܟܐ ܒܥܙܩܬܗ ܘܒܥܙܩܬ ܕܢܝܐܝܠ

15. Bel and the Dragon 1:15

    ܘܟܘܡܪ̈ܐ ܐܙܠܘ ܒܠܠܝܐ ܐܝܟ ܕܡܥܕܝܢ ܗܘܘ ܗܢܘܢ ܘܢܫ̈ܝܗܘܢ ܘܒܢܝ̈ܗܘܢ ܘܐܟܠܘ ܗܘܘ ܟܠܡܕܡ ܕܣܝܡ ܗܘܐ ܠܒܝܠ ܘܐܫܬܝܘ ܚܡܪܐ

16. Bel and the Dragon 1:16

    ܘܩ̇ܕܡ ܡ̇ܠܟܐ ܒܨܦܪܐ ܘܕܢܝܐܝܠ ܥܡܗ ܘܐܙܠܘ ܠܬܡܢ

17. Bel and the Dragon 1:17

    ܘܐܡ̣ܪ ܡ̇ܠܟܐ ܠܕܢܝܐܝܠ ܩܝܡܝܢ ܚܬܡ̈ܐ ܕܢܝܐܝܠ ܘܐܡܪ ܕܢܝܐܝܠ ܩܝܡܝܢ ܡܪܝ ܡ̇ܠܟܐ

18. Bel and the Dragon 1:18

    ܘܗܘܐ ܕܟܕ ܦܬ̣ܚ ܬܪܥܐ ܐܕܝܩ ܡ̇ܠܟܐ ܥܠ ܦܬܘܪܐ ܘܚ̣ܙܐ ܕܐܟܝܠ ܟܠܡܕܡ ܕܐܬܬܣܝܡ ܗܘܐ ܠܒܝܠ ܘܝܗ̣ܒ ܩܠܐ ܪܡܐ ܥܠ ܬܪܥܐ ܡܢ ܠܒܪ ܘܐܡ̣ܪ ܪܒ ܐܢܬ ܒܝܠ ܘܠܝܬ ܠܘܬܟ ܢܟܠܐ ܐܦܠܐ ܩܠܝܠ

19. Bel and the Dragon 1:19

    ܗܝܕܝܢ ܕܢܝܐܝܠ ܓܚ̣ܟ ܘܐܚܕܗ ܠܡ̇ܠܟܐ ܕܠܐ ܢܥܘܠ ܠܓܘ ܥܕ ܫܥܬܐ ܘܐܡ̣ܪ ܕܢܝܐܝܠ ܠܡ̇ܠܟܐ ܚܘܪ ܡܪܝ ܡ̇ܠܟܐ ܘܐܬܒܩܐ ܒܐܪܥܐ ܥܩܒ̈ܬܐ ܗܠܝܢ ܕܡ̇ܢ ܐܝܬܝܗܝܢ

20. Bel and the Dragon 1:20

    ܘܐܡ̣ܪ ܡ̇ܠܟܐ ܚ̇ܙܐ ܐܢܐ ܒܐܪܥܐ ܥܩܒ̈ܬܐ ܕܓܒܪ̈ܐ ܘܕܢ̈ܫܐ ܘܕܛ̈ܠܝܐ

21. Bel and the Dragon 1:21

    ܗܝܕܝܢ ܐܬܚܡܬ ܡ̇ܠܟܐ ܘܐܚ̣ܕ ܐܢܘܢ ܠܟܘܡܪ̈ܐ ܘܠܢܫܝ̈ܗܘܢ ܘܠܒܢ̈ܝܗܘܢ ܘܚܘܝܘܗܝ ܠܡ̇ܠܟܐ ܡܥܠܢܐ ܕܐܝܬ ܗܘܐ ܠܗܘܢ ܒܛܘܫܝܐ ܗ̇ܘ ܕܒܗ ܥܐ̇ܠܝܢ ܗܘܘ ܘܢܦܩ̇ܝܢ ܘܐܟܠܝܢ ܟܠܡܕܡ ܕܡܬܬܣܝܡ ܗܘܐ ܠܒܝܠ ܥܠ ܦܬܘܪܐ

22. Bel and the Dragon 1:22

    ܘܩ̇ܛܠ ܐܢܘܢ ܡ̇ܠܟܐ ܠܟܠܗܘܢ ܘܠܒܝܠ ܝܗܒܗ ܡܘܗܒܬܐ ܠܕܢܝܐܝܠ ܘܬܒܪܗ ܕܢܝܐܝܠ ܘܣܚܦ ܗܝܟܠܗ

23. Bel and the Dragon 1:23

    ܐܝܬ ܗܘܐ ܕܝܢ ܬܘܒ ܬܡܢ ܬܢܝܢܐ ܪܒܐ ܘܣ̇ܓܕܝܢ ܗܘܘ ܠܗ ܒܒ̈ܠܝܐ

24. Bel and the Dragon 1:24

    ܘܐܡ̣ܪ ܡ̇ܠܟܐ ܠܕܢܝܐܝܠ ܗܫܐ ܥܠ ܗܢܐ ܠܐ ܡܫܟܚ ܐܢܬ ܕܬܐܡܪ ܥܠܘܗܝ ܕܠܐ ܗܘܐ ܐܠܗܐ ܣܓܘܕ ܠܗ ܡܛܘܠ ܕܐܠܗܐ ܗܘ ܚ̇ܝܐ

25. Bel and the Dragon 1:25

    ܘܐܡ̣ܪ ܕܢܝܐܝܠ ܠܡ̇ܠܟܐ ܐܢܐ ܠܡܪܝܐ ܗܘ ܐܠܗܐ ܣ̇ܓܕ ܐܢܐ ܡܛܠ ܕܗܘܝܘ ܐܠܗܐ ܚ̇ܝܐ

26. Bel and the Dragon 1:26

    ܐܢܬ ܕܝܢ ܡ̇ܠܟܐ ܗܒ ܠܝ ܫܘܠܛܢܐ ܥܠܘܗܝ ܘܐܢܐ ܩ̇ܛܠ ܐܢܐ ܠܗ ܠܬܢܝܢܐ ܗܢܐ ܕܠܐ ܣܝܦܐ ܘܕܠܐ ܚܘܛܪܐ ܘܐܡ̣ܪ ܠܗ ܡ̇ܠܟܐ ܝܗܝܒ ܠܟ

27. Bel and the Dragon 1:27

    ܘܫܩ̣ܠ ܕܢܝܐܝܠ ܙܦܬܐ ܘܣܥܪܐ ܘܬܪܒܐ ܘܒܫܠ ܐܢܘܢ ܐܟܚܕܐ ܘܥ̣ܒܕ ܡܢܗܘܢ ܐܣ̈ܦܪܐ ܘܫ̣ܕܐ ܐܢܝܢ ܒܦܘܡܗ ܕܬܢܝܢܐ ܘܒܠܥ̣ ܐܢܝܢ ܬܢܝܢܐ ܘܐܬܒܙܥ ܘܡܝܬ ܘܐܡ̣ܪ ܕܢܝܐܝܠ ܗܐ ܚܙܘ ܕܚܠܬܟܘܢ ܒܒ̈ܠܝܐ

28. Bel and the Dragon 1:28

    ܘܗܘ̣ܐ ܕܟܕ ܫܡ̇ܥܘ ܒܒ̈ܠܝܐ ܐܬܒܐܫ ܠܗܘܢ ܛܒ ܘܐܬܟܢܫܘ ܥܠ ܡ̇ܠܟܐ ܘܐܬܗܦܟܘ ܥܠܘܗܝ ܘܐܡ̇ܪܝܢ ܚܕ ܠܚܕ ܝܗܘܕܝܐ ܗ̣ܘܐ ܠܗ ܡ̇ܠܟܐ ܠܒܝܠ ܬܒ̇ܪ ܘܠܬܢܝܢܐ ܗܐ ܩܛ̣ܠ ܘܠܟܘܡܪ̈ܐ ܩ̇ܛܠ ܐܢܘܢ

29. Bel and the Dragon 1:29

    ܘܐܬܘ ܠܘܬ ܡ̇ܠܟܐ ܘܐܡ̇ܪܝܢ ܠܗ ܐܘ ܐܫܠܡ ܠܢ ܠܕܢܝܐܝܠ ܘܐܠܐ ܩ̇ܛܠܝܢܢ ܠܟ ܘܠܒܝܬܟ

30. Bel and the Dragon 1:30

    ܘܚ̣ܙܐ ܡ̇ܠܟܐ ܕܩܡܘ ܠܗܘܢ ܥܠܘܗܝ ܟܠܗܘܢ ܐܟܚܕܐ ܘܐܬܐܠܨ ܠܗ ܘܐܠܨܐܝܬ ܐܫܠܡܗ ܠܗܘܢ ܠܕܢܝܐܝܠ

31. Bel and the Dragon 1:31

    ܗ̣ܢܘܢ ܕܝܢ ܕܒܪܘܗܝ ܠܕܢܝܐܝܠ ܘܐܙܠܘ ܐܪܡܝܘܗܝ ܒܓܘܒܐ ܕܐܪ̈ܝܘܬܐ ܘܗ̣ܘܐ ܬܡܢ ܫܬܐ ܝܘܡ̈ܝܢ ܕܢܟܦܢܘܢ ܐܪ̈ܝܘܬܐ ܘܢܐܟܠܘܢܗ

32. Bel and the Dragon 1:32

    ܐܝܬ ܗܘܐ ܕܝܢ ܒܗ ܒܓܘܒܐ ܗ̇ܘ ܐܪ̈ܝܘܬܐ ܫܒܥܐ ܘܝܗ̇ܒܝܢ ܗܘܘ ܠܗܘܢ ܬܪܝܢ ܦܓܪ̈ܝܢ ܒܝܘܡܐ ܘܬܪܝܢ ܕܟܪ̈ܝܢ ܘܒܗ̇ܢܘܢ ܝܘܡ̈ܬܐ ܠܐ ܝܗ̣ܒܘ ܠܗܘܢ ܡܕܡ ܕܢܐܟܠܘܢ ܕܢܟܦܢܘܢ ܘܢܐܟܠܘܢܗ ܠܕܢܝܐܝܠ

33. Bel and the Dragon 1:33

    ܐܝܬ ܗܘܐ ܕܝܢ ܚܒܩܘܩ ܢܒܝܐ ܒܝܗܘܕ ܘܒ̇ܫܠ ܗܘܐ ܒܘܫܠܐ ܘܦܬ ܦܬ̈ܐ ܒܥܪܒܐ ܘܐܪܡܝ ܒܗ̇ ܘܐܙ̣ܠ ܕܢܘܒܠ ܠܚܩܠܐ ܠܚܨܘ̈ܕܐ

34. Bel and the Dragon 1:34

    ܘܐܡ̣ܪ ܠܗ ܡܠܐܟܗ ܕܡܪܝܐ ܙܠ ܐܘܒܠ ܡܐܟܘܠܬܐ ܗܕܐ ܕܥܠܝܟ ܠܕܢܝܐܝܠ ܕܪܡ̣ܐ ܒܓܘܒܐ ܕܐܪ̈ܝܘܬܐ ܒܒܒܠ

35. Bel and the Dragon 1:35

    ܘܐܡ̣ܪ ܚܒܩܘܩ ܡܪܝ ܠܐ ܚ̣ܙܝܐ ܠܝ ܒܒܠ ܘܠܓܘܒܐ ܠܐ ܝܕ̇ܥ ܐܢܐ ܠܗ

36. Bel and the Dragon 1:36

    ܘܐܪܡܝ ܡܠܐܟܐ ܐܝܕܗ ܥܠ ܪܝܫܗ ܕܚܒܩܘܩ ܘܫܩܠܗ ܒܣܥܪܐ ܕܪܫܗ ܘܣܡܗ ܒܒܒܠ ܠܥܠ ܡܢ ܓܘܒܐ ܒܥܘܙܐ ܕܪܘܚܐ ܕܩܘܕܫܐ

37. Bel and the Dragon 1:37

    ܘܩ̣ܪܐ ܚܒܩܘܩ ܘܐܡ̣ܪ ܕܢܝܐܝܠ ܕܢܝܐܝܠ ܩܘܡ ܫܩܘܠ ܫܪܘܬܐ ܗܕܐ ܕܫܕܪ ܠܟ ܐܠܗܐ

38. Bel and the Dragon 1:38

    ܘܐܡ̣ܪ ܕܢܝܐܝܠ ܐܬܕܟܪܢܝ ܐܠܗܐ ܘܠܐ ܫܒ̣ܩ ܪ̈ܚܡܘܗܝ ܡܢܝ ܝ̇ܕܥ ܐܢܐ ܓܝܪ ܕܠܐ ܫܒ̇ܩ ܐܢܬ ܠܐܝܠܝܢ ܕܪ̈ܚܡܝܢ ܠܟ

39. Bel and the Dragon 1:39

    ܘܩܡ ܕܢܝܐܝܠ ܘܐܟ̣ܠ ܘܫܩܠܗ ܡܠܐܟܐ ܠܚܒܩܘܩ ܒܗ̇ ܒܫܥܬܐ ܘܐܩܝܡܗ ܒܐܬܪܐ ܕܫܩܠܗ ܗܘܐ ܡܢ ܩܕܝܡ

40. Bel and the Dragon 1:40

    ܘܐ̣ܬܐ ܡ̇ܠܟܐ ܠܝܘܡܐ ܫܒܝܥܝܐ ܠܡܒܟܐ ܥܠ ܕܢܝܐܝܠ ܡܛܠ ܕܟܪܝܬ ܗܘܬ ܠܗ ܥܠ ܕܢܝܐܝܠ ܘܐ̣ܬܐ ܠܘܬ ܓܘܒܐ ܘܐܕܝܩ ܒܓܘܒܐ ܘܚܙܝܗܝ ܠܕܢܝܐܝܠ ܟܕ ܝܬ̇ܒ

41. Bel and the Dragon 1:41

    ܘܝܗ̣ܒ ܩܠܐ ܪܡܐ ܘܐܡ̣ܪ ܪܒ ܗܘ ܐܠܗܗ ܕܕܢܝܐܝܠ

42. Bel and the Dragon 1:42

    ܘܐܣܩܗ ܡܢ ܓܘܒܐ ܘܠܒܥܠܕܒ̈ܒܘܗܝ ܕܕܢܝܐܝܠ ܗ̇ܢܘܢ ܕܐܟ̣ܠܘ ܩܪ̈ܨܘܗܝ ܘܒܥ̇ܝܢ ܗܘܘ ܠܡܩܛܠܗ ܐܪܡܝ ܐܢܘܢ ܒܓܘܒܐ ܘܒܗ̇ ܒܫܥܬܐ ܐܟ̣ܠܘ ܐܢܘܢ ܐܪ̈ܝܘܬܐ ܩܕܡܘܗܝ ܕܡ̇ܠܟܐ ܘܩܕܡ ܕܢܝܐܝܠ

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.