Apotelesmatica

ὀθνείων στοργῇσι κεκασμένα φίλτρα φέροντας,

μοιχείας τ᾿ ἀγαπῶντας, ἑν αἷς ὕβρις, οὐ κύπρις ἄρχει.

Ζεὺς δʼ ὁπότʼ ἂν φαέθων ὡροσκόπον ὄμμα τιταίνῃ,

εὐμόρφους τε τίθησι καὶ εὐτυχέας καὶ ἐπόλβους,

ἔν τʼ ἀρχαῖς πλειστῇσι πάτρης τὰ βέβαια φρονοῦντας.

τούτῳ δʼ εὖτʼ ἂν Ἄρης μίγδηνἰκέλῃσι πορείαις

σχηματίσῃ κατὰ κόσμον, ἰχνοβλαβέας, φθινοκώλους,

νευρονόσους, ποδαγρούς, ἀχθήμονας ἄνδρας ἀυτεῖ

ἔσσεσθαι, κατὰ μικρὰ νεκρούμενα δάκτυλʼ ἔχοντας.

θηλυγενεῖς δὲ γυναῖκες, ἐπὴν Κρόνος ὡρονομήσῃ,

φύσονται λαμπραί, βαθυχρήμονες, ὀλβομέλαθροι,

ἀξιοπιστοσύνῃ μεμελημέναι, ἀλλὰ πρὸς ἄνδρας

παγκοίνως ζήσουσιν ἐπίψογα, νύκτας ἄγουσαι

ἀλλοτρίοις θαλάμοις, κέρδει βίον ἰθύνουσαι.

Ἠέλιος δʼ ἀκάμας, πυρόεν σέλας, ἡνίκʼ ἂν ἔλθῃ

ἀρσενικοῖς ζώοισι κατʼ αἰθέρος ἠερόπλαγκτον

ζωφορίην, θήλεια δʼ ἔχῃ νεολαμπέα Μήνην,

τῆμος ὅσοι φύσονται, ἐν ἀνθρώποισι κράτιστοι

ἄνδρες, ἀριστοπονῆες, ἐλεύθερα λήματʼ ἔχοντες,

εὔσημοι γενεήν, ἀγαθοὶ φύσιν, ἀξιόμορφοι,

δοξοφόροι, πάτρης κηδέστορες ἰθυδίκαιοι.

ἢν δέ τʼ ἐναλλάξωσι, Σεληναίη μὲν ἐπʼ ἄρσεν,

Ἠέλιος δʼ ἐπὶ θῆλυ πολυζώοισιν ἐν ἄστροις,

νωχελέες τε πέλουσι, καὶ ἄπρηκτοι καὶ ἄτολμοι,

πηρώσει ψυχῆς νενεφωμένα βουλεύοντες.

αὐτὰρ ἐπὴν εἰς θῆλυ καταντήσωσιν ἰόντες

ἀμφότεροι, Μήνης τετελεσμένα τερμοδρομούσης,

πουλυπλανεῖς, ξενῖης, ἐπιβήτορας ἄνδρας ἔσεσθαι

αὐδῶσιν, χαίροντας ἀεὶ μεταβλήμασι χώρης,

καὶ πόλιος σπουδαῖα πρὸς ὀθνείους φορέοντας

ἤθεα, καὶ τιμῇ μεμετρημένα πράγματʼ ἔχοντας,

εἰς ἰδίην δὲ πάτρην ψογερὸν βίον ἰθύνοντας,

οἰκείων ἔργων ἐπιλήσμονας, οὐχὶ θυραίων.

ὁππότε δʼ ἀρσενικοῖς δισσοὶ μίγα φεγγοβολῶσιν

ζωιδίοις κατὰ χῶρον ἀνάστερον, οἱ τότʼ ἔσονται

τολμηροί, θρασύθυμα μεμηνότες, ἐχθροὶ ἑταίρων,

πιστοτάτης φιλίης λυμάντορες, ἀκριτόβουλοι,

οὐ μίαν εἰς ἀτραπὸν βιότου δρόμον ἐκνεύοντες,

ἄλλοτε δʼ ἀλλοίην ζωὴν εὔτρεπτον ἔχοντες,

πρήξιας ἀλλάσσοντες ἀεὶ μεθόδους τε πορισμῶν,

ἐκ δʼ ἐνύδρων μόχθων τε καὶ ἐκ παράλοιο διαίτης

δώματα ποιμαίνουσι καὶ ἐκ λιμένων τελέοντες,

δημοσίων τελέων ἐμπείραμον ἦθος ἔχοντες.

Μήνης δʼ ελίῳ σύνοδον κατὰ κόσμον ἐχούσης

ζωιδίῳ δύνοντι, βροτῶν γένος ἔσσετʼ ἀμυδρόν,

ἢ καὶ λυσσαλέῃ μανίῃ δεδαμασμένον αἰεί,

φαρμακτόν, νοσόθυμον, ἀεὶ θανάτοιο πάρεδρον·

πᾶσα βροτῶν ψυχὴ γάρ, ἐπὴν τάγε κοινὰ βίοιο

μὴ φρονέῃ κατὰ θυμὸν ἀναισθήτῳ τε παλαίῃ

δυσκρασίῃ, προτέθνηκε, καὶ ἢν φάος ὄμμασιλεύσσῃ·

ψυχὴ γὰρ μερόπων ἀμαθὴς νεκύεσσιν ὁμοίη.

ἢν δὲ Σεληναίη κατέχῃ πάμμηνα κέλευθα

σύνδεσμόν τε Κρόνοιο, σεληνιόωντα φανείη

φῦλα βροτῶν τάδε πάμπαν, ἰδ᾿ εἰδώλοισιν ὅμοια,

καὶ κραδίῃ θεόληπτα, καὶ ἀκρατέοντι λογισμῷ

ἔνσοφα, πάντα δʼ ἄβουλα κατʼ ἀνθρώπους προλέγοντα

φοιβητοῖς μύθοισιν ἀποφθεγκτήρια κρυπτὰ

ἐσσομένων ἔργων τε βίου ζωῆς τε κελεύθων.

ἢν δὲ καὶ αἰθαλόεις ἀστὴρ σὺν τοῖσι φανείη

Ἄρεος ἐν κύκλοισι θοοῦ δινήματι κόσμου,

φάσμασι δαιμονίοισι συναντήσουσιν ἐκεῖνοι,

ψυχῇ δερκόμενοι νεκροειδῆ, νερτερόμορφα,

ἔν τε καταγγελίῃσι θεῶν μηνύμασί τʼ αἰεὶ

ὀξύφοβοι λυπρὸν βιότου τέλος ἀθρήσουσιν,

εἰδώλων στονόεντα τύπον διὰ παντὸς ὁρῶντες,

ὧν πλάστειρα θέα πικροῦ θαμβήματος ἄρχει.

Ἄρεϊ δυομένῳ μέσον οὐρανὸν ἢν Κρόνος ἔλθῃ,

ἔσται μισέλλην γενέθλῃ, τιμήν τε θεοῖσιν

οὐχὶ νέμων, ἄνομός τε φρεσίν, πλήθοντι λογισμῷ

ἀλλόφρων, δύσμικτος, ἀμετροεπής, ἀτράπεζος,

αὐτόνομος, κακόθυμος, ἀθεσμοφάγος, δολοεργός,

ὀθνείων κτεάνων ἐπιθύμιος, ὃν διὰ παντὸς

δῆμοι μισήσουσι διʼ ἀφροσύνην ἀλόγιστον.

Μήνης ἐρχομένης μέσον οὐρανὸν ἐν γενέθλῃσιν,

Ἑρμείας δύνων τε καὶ ὡρονομῶν Κρόνος ἄνδρας

εὐξοάνους παλάμῃσιν ἀγαλμοτυπεῖς, θεοπλάστας,

χαλκοτύποις τέχνῃσι κολοσσοπόνους παναρίστους

Ζεὺς δʼ ὑψοῦ φοράδην νέον ἀστέρα φεγγοβολήσας,

ὥρην Ἠελίου βιοτοσκόπον αὐγάζοντος,

ἐκφαίνει γενεῆς βασιληίδος ἄνδρας ἔσεσθαι

κοινωνοὺς μετόχους τε, καὶ ἐκ σοφίης κλέος ἕξειν,

ῥητορικοῖς τε λόγοισι μέγʼ εὐτυχίης μετέχοντας

ὄλβον καὶ βιοτὴν εὐδαίμονα καρπώσεσθαι.

Ἑρμης δʼ εἰς ὥρην μεροποσπόρον ἡνίκʼ ἢν ἔλθῃ,

δυνούσης Μήνης ὑπὸ λοίσθια τέρματα γαίης,

ἀνέρες ἔσσονται βαθυχρήμονες, ἔν τε τραπέζαις

πιστόφρονες πόλιος ταμιεύτορες, ἔν τε τοκισμοῖς

καὶ χρείαις ζήσουσι βίον πολὺν ὀλβονομοῦντες.

ἢν δὲ Κύπρις κατὰ γῆς ἕλκῃ δρόμον ἀστερόεντα,

καὶ Κρόνος οὐρανίην ἀτραπὸν μεσοδερκέα βαίνῃ,

στείρας τοι δείξει καὶ ἀτέκμονας ἀνδράσι νύμφας

ἀσπορίῃ τε τόκοιο λέχη λιπόπαιδα φερούσας.

Ζηνὸς δʼ αἰθροπλανὴς ἐπὶ τούτοις μάρτυρος ἀστὴρ

δερχθείς, ἀλλοτρίων τέκνων ὑπόβλητα γένεθλα

ἀνδράσιν ἠδὲ γυναιξὶν ὑπὸ στοργῇσι θυραίους

ἢν δʼ ἰσόμοιρος Ἄρης κατὰ σήματα τοιάδε λάμψῃ,

φύσονται μάχλοι, διδυμόστροφοι, ἀρσενομίκται,

μεμφόμενοι φύσεως ὀρθὴν ὁδόν, ἔν τε πόλεσσιν

ἀλλοτρίαις ζήσουσιν ἀλώμενοι αἰσχεόφημοι.

ὁππότε δʼ ἂν γενέθλην ἐφέπῃ Κρόνος ὡρονομεύων,