Argonautica

Perseus Greek · Perseus Greek · 5,834 sections

1.1
ἀρχόμενος σέο, Φοῖβε, παλαιγενέων κλέα φωτῶν
1.2
μνήσομαι, οἳ Πόντοιο κατὰ στόμα καὶ διὰ πέτρας
1.3
Κυανέας βασιλῆος ἐφημοσύνῃ Πελίαο
1.4
χρύσειον μετὰ κῶας ἐύζυγον ἤλασαν Ἀργώ.
1.5
τοίην γὰρ Πελίης φάτιν ἔκλυεν, ὥς μιν ὀπίσσω
1.6
μοῖρα μένει στυγερή, τοῦδʼ ἀνέρος, ὅντινʼ ἴδοιτο
1.7
δημόθεν οἰοπέδιλον, ὑπʼ ἐννεσίῃσι δαμῆναι.
1.8
δηρὸν δʼ οὐ μετέπειτα τεὴν κατὰ βάξιν Ἰήσων
1.9
χειμερίοιο ῥέεθρα κιὼν διὰ ποσσὶν Ἀναύρου
1.10
ἄλλο μὲν ἐξεσάωσεν ὑπʼ ἰλύος, ἄλλο δʼ ἔνερθεν
1.11
κάλλιπεν αὖθι πέδιλον ἐνισχόμενον προχοῇσιν.
1.12
ἵκετο δʼ ἐς Πελίην αὐτοσχεδὸν ἀντιβολήσων
1.13
εἰλαπίνης, ἣν πατρὶ Ποσειδάωνι καὶ ἄλλοις
1.14
ῥέζε θεοῖς, Ἥρης δὲ Πελασγίδος οὐκ ἀλέγιζεν.
1.15
αἶψα δὲ τόνγʼ ἐσιδὼν ἐφράσσατο, καί οἱ ἄεθλον
1.16
ἔντυε ναυτιλίης πολυκηδέος, ὄφρʼ ἐνὶ πόντῳ
1.17
ἠὲ καὶ ἀλλοδαποῖσι μετʼ ἀνδράσι νόστον ὀλέσσῃ.
1.18
νῆα μὲν οὖν οἱ πρόσθεν ἐπικλείουσιν ἀοιδοὶ
1.19
Ἄργον Ἀθηναίης καμέειν ὑποθημοσύνῃσιν.
1.20
νῦν δʼ ἂν ἐγὼ γενεήν τε καὶ οὔνομα μυθησαίμην
1.21
ἡρώων, δολιχῆς τε πόρους ἁλός, ὅσσα τʼ ἔρεξαν
1.22
πλαζόμενοι· Μοῦσαι δʼ ὑποφήτορες εἶεν ἀοιδῆς.
1.23
πρῶτά νυν Ὀρφῆος μνησώμεθα, τόν ῥά ποτʼ αὐτὴ
1.24
Καλλιόπη Θρήικι φατίζεται εὐνηθεῖσα
1.25
Οἰάγρῳ σκοπιῆς Πιμπληίδος ἄγχι τεκέσθαι
1.26
αὐτὰρ τόνγʼ ἐνέπουσιν ἀτειρέας οὔρεσι πέτρας
1.27
θέλξαι ἀοιδάων ἐνοπῇ ποταμῶν τε ῥέεθρα.
1.28
φηγοὶ δʼ ἀγριάδες, κείνης ἔτι σήματα μολπῆς,
1.29
ἀκτῆς Θρηικίης Ζώνης ἔπι τηλεθόωσαι
1.30
ἑξείης στιχόωσιν ἐπήτριμοι, ἃς ὅγʼ ἐπιπρὸ
1.31
θελγομένας φόρμιγγι κατήγαγε Πιερίηθεν.
1.32
Ὀρφέα μὲν δὴ τοῖον ἑῶν ἐπαρωγὸν ἀέθλων
1.33
Αἰσονίδης Χείρωνος ἐφημοσύνῃσι πιθήσας
1.34
δέξατο, Πιερίῃ Βιστωνίδι κοιρανέοντα.
1.35
ἤλυθε δʼ Ἀστερίων αὐτοσχεδόν, ὅν ῥα Κομήτης
1.36
γείνατο δινήεντος ἐφʼ ὕδασιν Ἀπιδανοῖο,
1.37
Πειρεσιὰς ὄρεος Φυλληίου ἀγχόθι ναίων,
1.38
ἔνθα μὲν Ἀπιδανός τε μέγας καὶ δῖος Ἐνιπεὺς
1.39
ἄμφω συμφορέονται, ἀπόπροθεν εἰς ἓν ἰόντες.
1.40
Λάρισαν δʼ ἐπὶ τοῖσι λιπὼν Πολύφημος ἵκανεν
1.41
Εἰλατίδης, ὃς πρὶν μὲν ἐρισθενέων Λαπιθάων,
1.42
ὁππότε Κενταύροις Λαπίθαι ἐπὶ θωρήσσοντο,
1.43
ὁπλότερος πολέμιζε· τότʼ αὖ βαρύθεσκέ οἱ ἤδη
1.44
γυῖα, μένεν δʼ ἔτι θυμὸς ἀρήιος, ὡς τὸ πάρος περ.
1.45
οὐδὲ μὲν Ἴφικλος Φυλάκῃ ἔνι δηρὸν ἔλειπτο,
1.46
μήτρως Αἰσονίδαο· κασιγνήτην γὰρ ὄπυιεν
1.47
Αἴσων Ἀλκιμέδην Φυλακηίδα· τῆς μιν ἀνώγει
1.48
πηοσύνη καὶ κῆδος ἐνικρινθῆναι ὁμίλῳ.
1.49
οὐδὲ Φεραῖς Ἄδμητος ἐυρρήνεσσιν ἀνάσσων
1.50
μίμνεν ὑπὸ σκοπιὴν ὄρεος Χαλκωδονίοιο.
1.51
οὐδʼ Ἀλόπῃ μίμνον πολυλήιοι Ἑρμείαο
1.52
υἱέες εὖ δεδαῶτε δόλους, Ἔρυτος καὶ Ἐχίων,
1.53
τοῖσι δʼ ἐπὶ τρίτατος γνωτὸς κίε νισσομένοισιν
1.54
Αἰθαλίδης· καὶ τὸν μὲν ἐπʼ Ἀμφρυσσοῖο ῥοῇσιν
1.55
Μυρμιδόνος κούρη Φθιὰς τέκεν Εὐπολέμεια·
1.56
τὼ δʼ αὖτʼ ἐκγεγάτην Μενετηίδος Ἀντιανείρης.
1.57
ἤλυθε δʼ ἀφνειὴν προλιπὼν Γυρτῶνα Κόρωνος
1.58
Καινεΐδης, ἐσθλὸς μέν, ἑοῦ δʼ οὐ πατρὸς ἀμείνων.
1.59
Καινέα γὰρ ζῶόν περ ἔτι κλείουσιν ἀοιδοὶ
1.60
Κενταύροισιν ὀλέσθαι, ὅτε σφέας οἶος ἀπʼ ἄλλων
1.61
ἤλασʼ ἀριστήων· οἱ δʼ ἔμπαλιν ὁρμηθέντες
1.62
οὔτε μιν ἐγκλῖναι προτέρω σθένον, οὔτε δαΐξαι·
1.63
ἀλλʼ ἄρρηκτος ἄκαμπτος ἐδύσετο νειόθι γαίης,
1.64
θεινόμενος στιβαρῇσι καταΐγδην ἐλάτῃσιν.
1.65
ἤλυθε δʼ αὖ Μόψος Τιταρήσιος, ὃν περὶ πάντων
1.66
Λητοΐδης ἐδίδαξε θεοπροπίας οἰωνῶν·
1.67
ἠδὲ καὶ Εὐρυδάμας Κτιμένου πάις· ἄγχι δὲ λίμνης
1.68
Ξυνιάδος Κτιμένην Δολοπηίδα ναιετάασκεν.
1.69
καὶ μὴν Ἄκτωρ υἷα Μενοίτιον ἐξ Ὀπόεντος
1.70
ὦρσεν, ἀριστήεσσι σὺν ἀνδράσιν ὄφρα νέοιτο.
1.71
εἵπετο δʼ Εὐρυτίων τε καὶ ἀλκήεις Ἐρυβώτης,
1.72
υἷες ὁ μὲν Τελέοντος, ὁ δʼ Ἴρου Ἀκτορίδαο·
1.73
ἤτοι ὁ μὲν Τελέοντος ἐυκλειὴς Ἐρυβώτης,
1.74
Ἴρου δʼ Εὐρυτίων. σὺν καὶ τρίτος ἦεν Ὀιλεύς,
1.75
ἔξοχος ἠνορέην καὶ ἐπαΐξαι μετόπισθεν
1.76
εὖ δεδαὼς δῄοισιν, ὅτε κλίνωσι φάλαγγας.
1.77
αὐτὰρ ἀπʼ Εὐβοίης Κάνθος κίε, τόν ῥα Κάνηθος
1.78
πέμπεν Ἀβαντιάδης λελιημένον· οὐ μὲν ἔμελλεν
1.79
νοστήσειν Κήρινθον ὑπότροπος. αισα γὰρ ἦεν
1.80
αὐτὸν ὁμῶς Μόψον τε δαήμονα μαντοσυνάων
1.81
πλαγχθέντας Λιβύης ἐνὶ πείρασι δῃωθῆναι,
1.82
ὡς οὐκ ἀνθρώποισι κακὸν μήκιστον ἐπαυρεῖν,
1.83
ὁππότε κἀκείνους Λιβύῃ ἔνι ταρχύσαντο,
1.84
τόσσον ἑκὰς Κόλχων, ὅσσον τέ περ ἠελίοιο
1.85
μεσσηγὺς δύσιές τε καὶ ἀντολαὶ εἰσορόωνται.
1.86
τῷ δʼ ἄρʼ ἐπὶ Κλυτίος τε καὶ Ἴφιτος ἠγερέθοντο,
1.87
Οἰχαλίης ἐπίουροι, ἀπηνέος Εὐρύτου υἷες,
1.88
Εὐρύτου, ᾧ πόρε τόξον Ἑκηβόλος· οὐδʼ ἀπόνητο
1.89
δωτίνης· αὐτῷ γὰρ ἑκὼν ἐρίδηνε δοτῆρι.
1.90
τοῖσι δʼ ἐπʼ Αἰακίδαι μετεκίαθον· οὐ μὲν ἅμʼ ἄμφω,
1.91
οὐδʼ ὁμόθεν· νόσφιν γὰρ ἀλευάμενοι κατένασθεν
1.92
Αἰγίνης, ὅτε Φῶκον ἀδελφεὸν ἐξενάριξαν
1.93
ἀφραδίῃ. Τελαμὼν μὲν ἐν Ἀτθίδι νάσσατο νήσῳ·
1.94
Πηλεὺς δὲ Φθίῃ ἐνὶ δώματα ναῖε λιασθείς.
1.95
τοῖς δʼ ἐπὶ Κεκροπίηθεν ἀρήιος ἤλυθε Βούτης,
1.96
παῖς ἀγαθοῦ Τελέοντος, ἐυμμελίης τε Φάληρος.
1.97
Ἄλκων μιν προέηκε πατὴρ ἑός· οὐ μὲν ἔτʼ ἄλλους
1.98
γήραος υἷας ἔχεν βιότοιό τε κηδεμονῆας.
1.99
ἀλλά ἑ τηλύγετόν περ ὁμῶς καὶ μοῦνον ἐόντα
1.100
πέμπεν, ἵνα θρασέεσσι μεταπρέποι ἡρώεσσιν.

Perseus Greek. CTS URN tlg0001.tlg001.perseus-grc2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.