Hymnus II. (A solis ortus cardine)
- 1
A solis ortus cardine Adusque terrae limitem Christum canamus principem, Natum Maria uirgine. Beatus auctor saeculi Seruile corpus induit, Vt carne carnem liberans Non perderet quod condidit. Clausae parentis uiscera Caelestis intrat gratia, Venter puellae baiulat Secreta quae non nouerat. Domus pudici pectoris Templum repente fit Dei, Intacta nesciens uirum Verbo creauit filium. Enixa. est puerpera Quem Gabrihel praedixerat, Quem matris aluo gestiens Clausus Iohannes senserat. Faeno iacere pertulit, Praesepe non abhorruit,. Paruoque lacte pastus est, Per quem nec ales esurit. Gaudet chorus caelestium, Et angeli canunt Deum, Palamque fit pastoribus Pastor creatorque omnium. Hostis Herodes impie, Christum uenire quid times? Non eripit mortalia Qui regna dat caelestia. Ibant magi qua uenerant, Stellam sequentes praeuiam; Lumen requirunt lumine, Deum fatentur munere. Katerua matrum personat, Conlisa deflens pignora, Quorum tyrannus milia Christo sacrauit uictimam. Lauacra puri gurgitis Caelestis agnus attigit, Peccata qui mundi tulit Nos abluendo sustulit. Miraculis dedit fidem, Habere se Deum patrem, Infirma sanans corpora Et suscitans cadauera. Nonum genus potentiae: Aquae rubescunt hydriae, Vinumque iussa fundere Mutauit unda originem. Orat salutem seruulo Nixus genu centurio, Credentis ardor plurimus Extinxit ignes febrium. Petrus per undas ambulat Christi leuatus dextera: Natura quam negauerat Fides parauit semitam. Quarta die iam fetidus Vitam recepit Lazarus, Mortisque liber uinculis Factus superstes est sibi. Riuos cruoris torridi Contacta uestis obstruit, Fletu rigante supplicis Arent fluenta sanguinis. Solutus omni corpore, Iussus repente surgere, Suis uicissim gressibus Aeger uehebat lectulum. Tunc ille ludas carnifex Ausus magistrum tradere, Pacem ferebat osculo, Quam non habebat pectore. Verax datur fallacibus, Pium flagellat impius, Crucique fixus innocens Coniunctus est latronibus. Xeromyrrham post sabbatum Quaedam uehebant compares, Quas adlocutus angelus Viuum sepulchro non tegi. Ymnis uenite dulcibus, Omnes canamus subditum Christi triumpho tartarum, Qui nos redemit uenditus. Zelum draconis inuidi Et os leonis pessimi Calcauit unicus Dei Seseque caelis reddidit.
Corpus Scriptorum Ecclesiasticorum Latinorum. CTS URN stoa0252.stoa001.opp-lat1. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.