Carmina

crucifixe uictor, expiator criminum,

in morte uita praepotens,

fac, cum supremo seuocabor tempore,

ab obruto malis chao

traducat ista me tibi benedictio,

quod utile interim dato,

neu se inquieta mentis excruciet mora,

faetente uincta carcere.

CARMEN III.

Sancte deus, lucis lumen, concordia rerum,

aeterni uerbo conditor imperii,

expers principii nec fini obnoxius, ex quo

totum quod nunc est, quod fuit et quod erit;

corporis ignote oculis, uix cognite menti,

nec linguis facilis nec capiende animis,

indulgens, sanctus, iustus, patiens, miserator,

plenus, perfectus, maximus, omnipotens,

solus nec solus terque unus et in tribus unus,

hoc semper maior, quo fide es uberior!

uiderit an ueniam speret, si dicere laudes

hinc tibi quis dubitat, quod minor esse timet.

ignosci certe merito fas nouerit ille

atque reus stolidae simplicitatis erit.

innumeras qui res temptet numerare paretque,

nirtutes possit pernumerare tuas.

et quod sentimus plus est quam lingua loquatur

et quod sentimus, cum loquimur, minus est.

omnia quae dudum uariis elementa figuris

credimus audimus tangimus aspicimus,

lata mari, terris grauia, splendentia caelo,

aere mobilia, tristia nocte nigra,

frondosis insel\'ta iugis, sidentia planis,

consita uinetis, omnibus apta satis,

inuia desertis, concreta frigore pigro,

ignea sideribus, uiuida fluminibus,

ut primum placuit, uerbi uirtute creasti;

quodque aliis facere est, hoc tibi uelle sat est.

nil rerum natura parit non iussa, tibique,

principio, debent omnia principium:

officium praebens obscuris luna tenebris

et iussus claro sol radiare die,

saecula saeclorum, menses dies annus et horae,

quodue agimus cuncto tempore quoue agimus,

angelicus populus, patriarchae et turba piorum,

quam caelo asciuit religiosa fides,

qua Romanus agit, saeuit qua barbarus orbis,

infusus quicquid summouet oceanus,\'

quae nexis constant membris, quae membra recusant,

uerbis respondent, indiga uocis hiant,

quaeue metus cursu seruat uirtusue tuetur,

antra tegunt, uoluunt flumina, penna leuat,

unum discretis referunt tibi uocibus hymnum

et quod non possunt explicuisse uolunt.

ipsa etiam te bruta tremunt, tibi muta loquuntur;

quoue modo id faciant, nescia mens hominis.

quae scimus, (scimus) occultis omnia causis,

nec rationis egens quod facis esse potest.

me solum e cunctis male conscia pectora terrent,

indigno laudes ne loquar ore tuas,

ne peccata premant, grauior ne sarcina plumbo

imis captiuum detineat tenebris.

sed mihi dum uariis curarum ambagibus erro,

occurrit trepido quod sequeremur iter.

si defendo, reus; fateor si crimina, saluus;

spero tuam potius quam merear ueniam.

quicquid commisi scelerum sine teste, probasti;

nam facienda uidens, facta uidere potes.

si caelum tibi, sancte, thronus, si terra tuorum

scamnellum merito creditur esse pedum;

crimina non dubia ei, totum qui penetrat orbem,

qua patet accessu uel pede uel pelago.

quicquid in occasu zephyrus uidet, eurus in ortu,

austro si qua tepent, si qua aquilone rigent,

sunt oculis subiecta tuis, licet arbiter absit

et scelus admissum nox sibi fida tegat,

antris claudatur, mergatur flumine, montis

desuper inmissi ponderibus lateat,

ueletur denso tectorum culmine; solus

testem uitabit qui male non faciet.

Lyncei fertur felicis acumine uisus

intentos paries non tenuisse oculos.

uisibus humanis (hoc si) licuisse putatur,

ignotum quicquam credimus esse tibi,

qui mare qui caelum terrasque et quicquid in his est

omnibus immistis extra uel intra regis?

nec miror; proprio parent elementa parenti

et penetrata suo cuncta patent domino.

si quisquam sine se poterit peccare, latebit;

nam si peccabit, testis adest animus.

ergo ego sum primis semper lasciuus ab annis,

cuius amor licitis miscuit illicita,

audax, periurus, simulator, dissimulator,

ambitor, uarius, inuidus, inpatiens,

crudelis, rationis egens, furiosus, auarus,

profusor proprii, plus aliena petens.

et quicquid scelerum molitur perficit audet

. pollutum corpus, mens rea, lingua loquax,

totum placato quamuis sub iudice feci;

non habet in tanto crimine poena locum.

sed tibi laus, tibi, sancte pater, laus tempore in omni,