Epistularum

Perseus Latin · Perseus Latin · 1,489 sections

15.18
vel quot habet iunctos Vasatica raeda caballos.
15.19
Quod si figuras fabulis adumbratas
15.20
numerumque doctis involutum ambagibus
15.21
ignorat alto mens obesa viscere,
15.22
numerare saltim more vulgi ut noveris,
15.23
in se retortas explicabo summulas.
15.24
Ter denas puto quinquiesve senas,
15.25
vel bis quinque, dehinc decem decemque,
15.26
vel senas quater et bis adde ternas;
15.27
septenis quater adde et unum et unum,
15.29
aut ter quattuor adde bis novenis;
15.28
duc binas decies semelque denas;
15.30
octonas quater, hinc duae recedant;
15.31
binas ter decies, semel quaternas,
15.32
et sex adde novem vel octo septem,
15.33
aut septem geminis bis octo iunge,
15.34
aut — ne sim tibi pluribus molestus,
15.35
triginta numero fuere cunctae.
15.36
Iunctus limicolis musculus ostreis
15.37
primo conposuit fereula prandio,
15.38
gratus deliciis nobilium cibus
15.39
et sumptu modicus pauperibus focis,
15.40
non hic navifrago quaeritur aequore,
15.41
ut crescat pretium grande periculis;
15.42
set primore vado post refugum mare
15.43
algoso legitur litore concolor,
15.44
nam testae duplicis conditur in specu,
15.45
quae ferventis aquae lota vaporibus
15.46
carnem lacteoli visceris indicat.
15.47
Set damnosa nimis panditur area.
15.48
fac campum replices, Musa, papyrium
15.49
nec iam fissipedis per calami vias
15.50
grassetur Gnidiae sulcus harundinis,
15.51
pingens aridulae subdita paginae
15.52
Cadmi filiolis atricoloribus.
15.53
aut cunctis pariter versibus oblinat
15.54
furvam lacticolor sphongia sepiam.
15.55
Pareamus vitio Dumnitonae domus,
15.56
ne sit charta mihi carior ostreis.
16.1
AUSONIUS salve caro mihi dico Theoni,
16.2
versibus expediens, quod volo quodve queror.
16.3
Tertia fissipedes renovavit Luna iuvencas,
16.4
ut fugitas nostram, dulcis amice, domum,
16.5
nonaginta dies sine te, carissime, traxi;
16.6
huc adde aestivos: hoc mihi paene duplum est.
16.7
vis novies denos dicam deciesque novenos
16.8
isse dies? anni portio quarta abiit,
16.9
sexaginta horas super et duo milia centum
16.10
te sine consumpsi, quo sine et hora gravis.
16.11
milia bis nongenta iubet demensio legum
16.12
adnumerata reos per tot obire dies.
16.13
iam potui Romam pedes ire pedesque reverti,
16.14
ex quo te dirimunt milia pauca mihi.
16.15
scirpea Dumnitoni tanti est habitatio vati?
16.16
Pauliacos tanti non mihi villa foret,
16.17
an quia per tabulam dicto pangente notatam
16.18
debita summa mihi est, ne repetamus, abes?
16.19
bis septem rutilos regale nomisma Philippos,
16.20
nec tanti fuerint, perdere malo, Theon,
16.21
implicitum quam te nostris interne medullis
16.22
defore tam longi temporis in spatio,
16.23
ergo aut praedictos iam nunc rescribe Darios
16.24
et redime, ut mora sit libera desidiae,
16.25
aut alios a me totidem dabo, dum modo cari
16.26
conspicer ora viri. pauperis usque licet.
16.27
Puppe citus propera sinuosaque lintea veli
16.28
pande: Medullini te feret aura 1 noti
16.29
expositum subter paradas lectoque iacentem,
16.30
corporis ut tanti non moveatur onus.
16.31
unus Dumnitoni te litore perferet aestus
16.32
Condatem ad portum, si modo deproperes
16.33
inque vicem veli, quotiens tua flamina cessant,
16.34
remipedem iubeas protinus ire ratem,
16.35
invenies praesto subiuncta petorrita mulis:
16.36
villa Lucani- mox potieris -aco.
16.37
rescisso disces conponere nomine versum:
16.38
Lucili vatis sic imitator eris.
17.1
AUSONIUS consul vatem resaluto Theonem.
17.2
Aurea mala, Theon, set plumbea carmina mittis;
17.3
unius massae quis putet has species?
17.4
unum nomen utrisque, set est discrimen utrisque:
17.5
poma ut mala voces, carmina verte mala.
17.6
Vale beatis nomen a divis Theon,
17.7
metoche set ista saepe currentem indicat.
18.1
QUALIS Picenae populator turdus olivae
18.2
clunes opimat cereas
18.3
vel qui lucentcs rapuit de vitibus uvas,
18.4
pendetque nexus retibus,
18.5
quae vespertinis fluitant nebulosa sub horis
18.6
vel mane tenta roscido:
18.7
tales hibernis ad te de saepibus, ipsos
18.8
capi volentes, misimus
18.9
bis denos; tot enim crepero sub lucis eoae
18.10
praeceps volatus intulit.
18.11
tum, quas vicinae suggessit praeda lacunae,
18.12
anites maritas iunximus,
18.13
remipedes, lato populantes caerula rostro
18.14
et crure rubras Punico,
18.15
iricolor vario pinxit quas pluma colore,
18.16
collum columbis aemulas,

Perseus Latin. CTS URN stoa0045.stoa011.perseus-lat2. Via the Perseus Digital Library / Open Greek and Latin TEI corpora. Licence: CC BY-SA 4.0. Source.