Adelphi

Perseus Latin · Perseus Latin · 1,407 sections

4.1.525
Prius nox oppressisset illic quam huc reverti posset iterum.
4.1.526
Nunc ubi me illic non videbit iam huc recurret, sat scio.
4.1.527
Rogitabit me ubi fuerim; quem ego hodie toto non vidi die.
4.1.528
Quid dicam?
4.1.528b
Nihilne in mentem?
4.1.528c
Nunquam quicquam.
4.1.528d
Tanto nequior.
4.1.529
Cliens, amicus, hospes, nemo est vobis?
4.1.529b
Sunt: quid postea ?
4.1.530
Hisce opera ut data sit.
4.1.530b
Quae non data sit? non potest fieri.
4.1.530c
Potest.
4.1.531
Interdiu: sed si hic pernocto, causae quid dicam, Syre?
4.1.532
Vah, quam vellem etiam noctu amicis operam mos esset dari.
4.1.533
Quin tu otiosus es: ego illius sensum pulchre calleo.
4.1.534
Quum fervit maxime tam placidum quam ovem reddo.
4.1.534b
Quo modo?
4.1.535
Laudarier te audit libenter: facio te apud illum Deum:
4.1.536
Virtutes narro.
4.1.536b
Meas?
4.1.536c
Tuas: homini ilico lacrimae cadunt
4.1.537
Quasi puero gaudio. Hem tibi autem.
4.1.537b
Quidnam est?
4.1.537c
Lupus in fabula.
4.1.538
Pater est?
4.1.538b
Ipsus est.
4.1.538c
Syre, quid agimus?
4.1.538d
Fuge modo intro: ego videro.
4.1.539
Si quid rogabit, nusquam tu me: audistin?
4.1.539b
Potin ut desinas?
4.2.540
Nae ego homo sum infelix: primum fratrem nusquam invenio gentium:
4.2.541
Praeterea autem dum illum quaero a villa mercenarium
4.2.542
Vidi: is filium negat esse ruri: nec quid agam scio.
4.2.543
Syre.
4.2.543b
Quid est?
4.2.543c
Men quaerit?
4.2.543d
Verum.
4.2.543e
Perii!
4.2.543f
Quin tu animo bono es.
4.2.544
Quid hoc, malum, infelicitatis? nequeo satis decernere;
4.2.545
Nisi me credo huic esse natum rei, ferendis miseriis.
4.2.546
Primus sentio mala nostra; primus rescisco omnia;
4.2.547
Primus porro obnuntio: aegre solus si quid fit fero.
4.2.548
Rideo hunc: primum ait se scire; is solus nescit omnia.
4.2.549
Nunc redeo: si forte frater redierit viso.
4.2.549b
Syre,
4.2.550
Obsecro vide ne ille huc prorsus se irruat.
4.2.550b
Etiam taces?
4.2.551
Ego cavebo.
4.2.551b
Nunquam hercle hodie ego istuc committam tibi;
4.2.552
Nam me iam in cellam aliquam cum illa concludam: id tutissimum est.
4.2.553
Age, tamen ego hunc amovebo.
4.2.553b
Sed eccum sceleratum Syrum.
4.2.554
Non hercle hic quidem durare quisquam, si sic fit, potest.
4.2.555
Scire equidem volo quot mihi sint domini: quae haec est miseria?
4.2.556
Quid ille gannit? quid vult? quid ais bone vir? est frater domi?
4.2.557
Quid, malum, Bone vir, mihi narras? Equidem perii.
4.2.557b
Quid tibi est?
4.2.558
Rogitas? Ctesipho me pugnis miserum et istam psaltriam
4.2.559
Usque occidit.
4.2.559b
Hem, quid narras?
4.2.559c
Hem! vide, ut discidit labrum.
4.2.560
Quamobrem?
4.2.560b
Me impulsore hanc emtam esse ait.
4.2.560c
Non tu eum rus hinc modo
4.2.561
Produxe aibas?
4.2.561b
Factum: verum venit post insaniens:
4.2.562
Nihil pepercit. Non puduisse verberare hominem senem,
4.2.563
Quem ego modo puerum tantillum in manibus gestavi meis?
4.2.564
Laudo, Ctesipho; patrissas: abi, virum te iudico.
4.2.565
Laudas? Nae ille continebit posthac si sapiet manus.
4.2.566
Fortiter.
4.2.566b
Perquam! quia miseram mulierem, et me servulum
4.2.567
Qui referire non audebam, vicit: hui, perfortiter!
4.2.568
Non potuit melius: idem quod ego sensit te esse huic rei caput.
4.2.569
Sed estne frater intus?
4.2.569b
Non est.
4.2.569c
Ubi illum quaeram cogito.
4.2.570
Scio ubi sit; verum hodie nunquam monstrabo.
4.2.570b
Hem, quid ais?
4.2.570c
Ita.
4.2.571
Diminuetur tibi quidem iam cerebrum.
4.2.571b
At nomen nescio
4.2.572
Illius hominis; sed locum novi ubi sit.
4.2.572b
Dic ergo locum.
4.2.573
Nostin porticum apud macellum hanc deorsum?
4.2.573b
Quidni noverim?
4.2.574
Praeterito hac recta platea sursum: ubi eo veneris,
4.2.575
Clivus deorsum versus est: hac te praecipitato: postea
4.2.576
Est ad hanc manum sacellum; ibi angiportum propter est.
4.2.577
Quonam?
4.2.577b
Illic ubi etiam caprificus magna est: nostin?
4.2.577c
Novi.
4.2.577d
Hac pergito.
4.2.578
Id quidem angiportum non est pervium.
4.2.578b
Verum hercle. Vah,
4.2.579
Censen hominem me esse? erravi. In porticum rursum redi:
4.2.580
Sane hac multo propius ibis, et minor est erratio.
4.2.581
Scin Cratini huius ditis aedes?
4.2.581b
Scio.

Perseus Latin. CTS URN phi0134.phi006.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.