Bacchides

Perseus Latin · Perseus Latin · 1,556 sections

1.0.1
quíbus ingenium in animo utibilest, modicum et sine vernilitate
1.0.2
víncla, virgaé, molae: saévitudo mala fit peior
1.0.3
convérrite scópis, agite strénue
1.0.4
ecquis évocat
1.0.5
cum nassiterna et cum aqua istum impurissimum?
1.0.6
sícut lacte lactis similest
1.0.7
ílla mi cognominis fuit
1.0.8
(latro) suam qui auro vitam venditat
1.0.9
sció spiritum éius maiórem esse multo
1.0.10
quam folles taurini habént, cum liquescunt
1.0.11
petraé, ferrum ubí fit.
1.0.11b
Cuiatis tibi visust?
1.0.12
Praenéstinum opino esse, ita erat gloriosus.
1.0.13
néque id haud subditiva glória oppidum arbitror.
1.0.14
ne a quóquam acciperes alio mercedem annuam,
1.0.15
nisi ab sése, nec cum quiquam limares caput.
1.0.16
limaces viri
1.0.17
cór meum, spés mea,
1.0.18
mél meum, suávitudó, cibus, gaúdium.
1.0.19
síne te amem
1.0.20
Cupidon tecum saevust anne Amor?
1.0.21
Vlíxem audivi fuisse aerumnosissimum,
1.0.22
qui annis viginti errans a patria afuit;
1.0.23
verum hic adulescens multo Vlixem anteit
1.0.24
qui ílico errat intra muros civicos.
1.0.25
quidquid est nomen sibi
1.0.26
quaé sodalem átque me exércitos habet
1.0.27
nam crédo cuivis excantare cor potes.
1.0.28
sin lénocinium forte collibitum est tibi,
1.0.29
videas mercedis quid tibi est aecum dari,
1.0.30
ne istac aetate me sectere gratiis.
1.0.31
Arabus
1.1.35
Quíd si hoc potis est út tu taceas, égo loquar?
1.1.35b
Lepidé, licet.
1.1.36
Vbi me fugiet memoria, ibi tu facito ut subvenias, soror.
1.1.37
Pol magis metuo, ne defuerit mi in monendo oratio.
1.1.38
Pol ego metuo, lusciniolae ne defuerit cantio.
1.1.39
sequere hac.
1.1.39b
Quid agunt duae germanae meretrices cognomines?
1.1.40
quid in consilio consuluistis?
1.1.40b
Bene.
1.1.40c
Pol haud meretricium est.
1.1.41
Miserius nihil est quam mulier.
1.1.41b
Quid esse dices dignius?
1.1.42
Haec ita me orat, sibi qui caveat aliquem ut hominem reperiam,
1.1.43
ut istunc militem—ut, ubi emeritum sibi sit, se revehat domum.
1.1.44
id, amabo te, huic caveas.
1.1.44b
Quid isti caveam?
1.1.44c
Vt revehatur domum,
1.1.45
ubi ei dediderit operas, ne hanc ille habeat pro ancilla sibi;
1.1.46
nam si haec habeat aurum quod illi renumeret, faciat lubens.
1.1.47
Vbi nunc is homost?
1.1.47b
Iam hic credo aderit. sed hoc idem apud nos rectius
1.1.48
poteris agere; atque is dum veniat, sedens ibi opperibere.
1.1.49
eadem biberis, eadem dedero tibi, ubi biberis, savium.
1.1.50
Viscus merus vostrast blanditia.
1.1.50b
Quid iam?
1.1.50c
Quia enim intellego,
1.1.51
duae unum éxpetitis palumbem, † perii harundo alas verberat.
1.1.52
non ego istúc facinus mihi, mulier, conducibile esse arbitror.
1.1.53
Quí, amabo?
1.1.53b
Quia, Bacchis, bacchas metuo et bacchanal tuom.
1.1.54
Quid est? quid metuis? ne tibi lectus malitiam apud me suadeat?
1.1.55
Magis illectum tuom quam lectum metuo. mala tu es bestia.
1.1.56
nam huic aetati non conducit, mulier, latebrosus locus.
1.1.57
Egomet, apud me si quid stulte facere cupias, prohibeam.
1.1.58
sed ego apud me te esse ob eam rem, miles cum veniat, volo,
1.1.59
quia, cum tu aderis, huic mihique haud faciet quisquam iniuriam:
1.1.60
tu prohibebis, et eadem opera tuo sodali operam dabis;
1.1.61
et ille adveniens tuam med esse amicam suspicabitur.
1.1.62
quid, amabo, opticuisti?
1.1.62b
Quia istaec lepida sunt memoratui:
1.1.63
eadem in usu atque ubi periclum facias, aculeata sunt,
1.1.64
animum fodicant, bona distimulant, facta et famam sauciant.
1.1.65
Quid ab hac metuis?
1.1.65b
Quid ego metuam rogitas? adulescens homo
1.1.66
penetrem me huius modi in palaestram, ubi damnis desudascitur?
1.1.67
ubi pro disco damnum capiam, pro cursura dedecus?
1.1.68
Lepide memoras.
1.1.68b
Vbi ego capiam pro machaera turturem,
1.1.69
ubique imponat in manum alius mihi pro cestu cantharum
1.1.70
pro galea scaphium, pro insigni sit corolla plectilis,
1.1.71
pro hasta talos, pro lorica malacum capiam pallium,
1.1.72
ubi mihi pró equo lectus detur, scortum pro scuto accubet?
1.1.73
apage a me, apage.
1.1.73b
Ah, nimium ferus es.
1.1.73c
Mihi sum.
1.1.73d
Malacissandus es.
1.1.74
equidem tibi do hanc operam.
1.1.74b
Ah, nimium pretiosa es operaria.
1.1.75
Simulato me amare.
1.1.75b
Vtrum égo istuc iócon adsimulem an serio?
1.1.76
Heia, hoc agere meliust. miles quom huc adveniat, te volo
1.1.77
me amplexari.
1.1.77b
Quid eo mi opus est?
1.1.77c
Vt ille te videat volo.
1.1.78
scio quid ago.
1.1.78b
Et pol égo scio quid metuo. sed quid ais?
1.1.78c
Quid est?
1.1.79
Quid si apud te eveniát desubito prandium aut potatio

Perseus Latin. CTS URN phi0119.phi004.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.