← Library

KTU 1.19

Ugaritic (Copenhagen Ugaritic Corpus) · KTU 1 - Literary and religious texts · 224 sections

1. IV:39

   𐎐𐎔𐎌 𐎅𐎊 𐎎𐎃 𐎚𐎎𐎃𐎕 𐎎𐎃𐎕 𐎀𐎃𐎅

   npš hy mḫ tmḫṣ mḫṣ aḫh

2. IV:40

   𐎚𐎋𐎍 𐎎𐎋𐎍𐎊 𐎓𐎍 𐎜𐎎𐎚𐎟 xxx

   tkl mkly ʿl umt. xxx

3. IV:41

   𐎄 𐎚xx𐎍 𐎁 𐎊𐎎 𐎚𐎗𐎚𐎈𐎕

   d txxl b ym trtḥṣ

4. IV:42

   𐎆 𐎚𐎀𐎄𐎎 𐎚𐎛𐎄𐎎 𐎁 𐎙𐎍𐎔 𐎊𐎎

   w tadm tidm b ġlp ym

5. IV:43

   𐎄 𐎀𐎍𐎔 𐎌𐎄 𐎑𐎜𐎅 𐎁 𐎊𐎎 𐎚𐎈𐎚

   d alp šd ẓuh b ym tḥt

6. IV:44

   𐎚𐎍𐎁𐎌 𐎐𐎔𐎕 𐎙𐎇𐎗 𐎚𐎌𐎚 𐎃𐎍𐎔𐎐 𐎁

   tlbš npṣ ġzr tšt ḫlpn b

7. IV:45

   𐎐𐎌𐎂𐎅 𐎈𐎗𐎁 𐎚𐎌𐎚 𐎁 𐎚𐎓𐎗𐎚𐎅

   nšgh ḥrb tšt b tʿrth

8. IV:46

   𐎆 𐎓𐎍 𐎚𐎍𐎁𐎌 𐎐𐎔𐎕 𐎀𐎘𐎚 𐎍𐎎

   w ʿl tlbš npṣ aṯt lm

9. IV:47

   𐎕𐎁𐎛 𐎐𐎗𐎚 𐎛𐎍𐎎 𐎌𐎔𐎌 𐎓𐎗𐎁𐎚

   ṣbi nrt ilm špš ʿrbt

10. IV:48

    𐎔𐎙𐎚 𐎎𐎛𐎐𐎌 𐎌𐎄𐎎 𐎍 𐎎𐎓𐎗𐎁

    pġt minš šdm l mʿrb

11. IV:49

    𐎐𐎗𐎚 𐎛𐎍𐎎 𐎌𐎔𐎌 𐎎𐎙𐎊𐎚

    nrt ilm špš mġyt

12. IV:50

    𐎔𐎙𐎚 𐎍 𐎀𐎅𐎍𐎎 𐎗𐎂𐎎 𐎍 𐎊𐎉𐎔𐎐 𐎊

    pġt l ahlm rgm l yṭpn y

13. IV:51

    𐎁𐎍 𐎀𐎂𐎗𐎚𐎐 𐎁𐎀𐎚 𐎁 𐎏𐎄𐎋 𐎔𐎙𐎚

    bl agrtn bat b ḏdk pġt

14. IV:52

    𐎁𐎀𐎚 𐎁 𐎀𐎅𐎍𐎎 𐎆 𐎊𐎓𐎐 𐎊𐎉𐎔𐎐 𐎎𐎅𐎗

    bat b ahlm w yʿn yṭpn mhr

15. IV:53

    𐎌𐎚 𐎖𐎈𐎐 𐎆 𐎚𐎌𐎖𐎊𐎐 𐎊𐎐 𐎖𐎈

    št qḥn w tšqyn yn qḥ

16. IV:54

    𐎋𐎒 𐎁𐎄𐎊 𐎖𐎁𐎓𐎚 𐎁 𐎊𐎎𐎐𐎊 𐎚𐎖

    ks bdy qbʿt b ymny tq

17. IV:55

    𐎈 𐎔𐎙𐎚 𐎆 𐎚𐎌𐎖𐎊𐎐𐎅 𐎚𐎖𐎈 𐎋𐎒 𐎟 𐎁𐎄𐎅

    ḥ pġt w tšqynh tqḥ ks . bdh

18. IV:56

    𐎖𐎁𐎓𐎚 𐎁 𐎊𐎎𐎐𐎅 𐎆 𐎊𐎓𐎐 𐎊𐎉𐎔𐎐 𐎎𐎅𐎗

    qbʿt b ymnh w yʿn yṭpn mhr

19. IV:57

    𐎌𐎚 𐎁 𐎊𐎐 𐎟𐎊 𐎌𐎚 𐎛𐎍𐎀 𐎛𐎍𐎌𐎐𐎐 𐎛𐎍

    št b yn .y št ila ilšnn il

20. IV:58

    𐎄 𐎊𐎖𐎐𐎊 𐎏𐎄𐎎 𐎊𐎄 𐎎𐎃𐎕𐎚 𐎀𐎖𐎅𐎚 𐎙

    d yqny ḏdm yd mḫṣt aqht ġ

21. IV:59

    𐎇𐎗 𐎚𐎎𐎃𐎕 𐎀𐎍𐎔𐎎 𐎛𐎁 𐎌𐎚 𐎚𐎌𐎚

    zr tmḫṣ alpm ib št tšt

22. IV:60

    𐎈𐎗𐎌𐎎 𐎍 𐎀𐎅𐎍𐎎 𐎔 xx 𐎈𐎋𐎎

    ḥršm l ahlm p xx ḥkm

23. IV:61

    𐎊𐎁𐎍 𐎍𐎁𐎅 𐎋𐎎 𐎁𐎘𐎐 𐎊𐎐 𐎚𐎎𐎍𐎀𐎅 𐎘𐎐𐎎 𐎚𐎌𐎖𐎊 𐎎𐎒𐎋 𐎅𐎆𐎚 𐎚𐎌𐎖𐎊

    ybl lbh km bṯn yn tmlah ṯnm tšqy msk hwt tšqy

24. IV:62

    𐎆 𐎅𐎐𐎄𐎚 𐎊𐎘𐎁 𐎍 𐎎𐎒𐎔𐎗

    w hndt yṯb l mspr

← Previous — showing 201–224 of 224

Copenhagen Ugaritic Corpus (CUC), CACCHT project, Department of Theology, University of Copenhagen; encoded by Christian Canu Højgaard and Martijn Naaijer. Licence: CC BY-NC 4.0. Source.