← Library

KTU 1.18

Ugaritic (Copenhagen Ugaritic Corpus) · KTU 1 - Literary and religious texts · 76 sections

1. I:1

   xxxxxxxxxxxxxxxxxxx

   xxxxxxxxxxxxxxxxxxx

2. I:2

   xxxxxxxxxxxxxxxxxxx

   xxxxxxxxxxxxxxxxxxx

3. I:3

   xxxxxxxxxxxxxxxxxxx

   xxxxxxxxxxxxxxxxxxx

4. I:4

   xxxxx𐎅 𐎀𐎘𐎁𐎗 xxxxxxx

   xxxxxh aṯbr xxxxxxx

5. I:5

   xxxxx 𐎀𐎁𐎅 𐎀𐎔 𐎖xxxxxxx

   xxxxx abh ap qxxxxxxx

6. I:6

   xxxxxx 𐎆 𐎚𐎓𐎐 𐎟 xxxxxxxx

   xxxxxx w tʿn . xxxxxxxx

7. I:7

   xxxxxx𐎚𐎋 𐎊 𐎛𐎍𐎎 xxxxxxxx

   xxxxxxtk y ilm xxxxxxxx

8. I:8

   xxxxxx 𐎀𐎍 𐎚𐎌𐎎𐎃 xxxxxxxxx

   xxxxxx al tšmḫ xxxxxxxxx

9. I:9

   xxxxx 𐎀𐎃𐎄𐎅𐎎 xxxxxxxxxx

   xxxxx aḫdhm xxxxxxxxxx

10. I:10

    xxxx 𐎁 𐎂𐎄𐎍𐎚 𐎀𐎗𐎋𐎚𐎊 xxxxx

    xxxx b gdlt arkty xxxxx

11. I:11

    x 𐎍 𐎖𐎄𐎖𐎄𐎋 𐎀𐎌𐎅𐎍𐎋 𐎌𐎁𐎚𐎋 𐎄𐎎𐎎

    x l qdqdk ašhlk šbtk dmm

12. I:12

    𐎌𐎁𐎚 𐎄𐎖𐎐𐎋 𐎎𐎎𐎓𐎎 𐎆 xxxxxxx

    šbt dqnk mmʿm w xxxxxxx

13. I:13

    𐎀𐎖𐎅𐎚 𐎆 𐎊𐎔𐎍𐎉𐎋 𐎁𐎐 𐎄𐎐𐎛𐎍 xxxx

    aqht w yplṭk bn dnil xxxx

14. I:14

    𐎆 𐎊𐎓𐎏𐎗𐎋 𐎁 𐎊𐎄 𐎁𐎚𐎍𐎚 𐎓𐎐𐎚 xxx

    w yʿḏrk b yd btlt ʿnt xxx

15. I:15

    𐎆 𐎊𐎓𐎐 𐎍𐎉𐎔𐎐 𐎛𐎍 𐎄 𐎔𐎛𐎄

    w yʿn lṭpn il d pid

16. I:16

    𐎊𐎄𐎓𐎚𐎋 𐎁𐎚 𐎆 𐎀𐎐𐎌𐎚 𐎆 𐎛𐎐 𐎁 𐎛𐎍𐎅𐎚

    ydʿtk bt w anšt w in b ilht

17. I:17

    𐎖𐎍𐎕xx𐎋 𐎚𐎁𐎓 𐎁𐎚 𐎃𐎐𐎔 𐎍𐎁𐎋 𐎀𐎌𐎛 𐎀

    qlṣxxk tbʿ bt ḫnp lbk aši a

18. I:18

    𐎃𐎄 𐎄 𐎛𐎌𐎘 𐎁 𐎋𐎁𐎄𐎅𐎋 𐎚𐎌𐎚 𐎄 𐎛𐎘 𐎁

    ḫd d išṯ b kbdhk tšt d iṯ b

19. I:19

    𐎛𐎗𐎚𐎋 𐎄𐎘 𐎊𐎄𐎘 𐎎𐎓𐎖𐎁𐎋 xxx

    irtk dṯ ydṯ mʿqbk xxx

20. I:20

    𐎁𐎚𐎍𐎚 𐎓𐎐𐎚 𐎛𐎄𐎋 𐎍 𐎚𐎚𐎐 𐎟 𐎔𐎐𐎎

    btlt ʿnt idk l ttn . pnm

21. I:21

    𐎓𐎎 𐎀𐎖𐎅𐎚 𐎙𐎇𐎗 𐎁 𐎀𐎍𐎔 𐎌𐎄

    ʿm aqht ġzr b alp šd

22. I:22

    𐎗𐎁𐎚 𐎋𐎎𐎐 𐎆 𐎕𐎈𐎖 𐎁𐎚𐎍𐎚 𐎓𐎐𐎚

    rbt kmn w ṣḥq btlt ʿnt

23. I:23

    𐎚𐎌𐎜 𐎂𐎅 𐎆 𐎚𐎕𐎈 𐎌𐎎𐎓 𐎎𐎓 𐎍 𐎀

    tšu gh w tṣḥ šmʿ mʿ l a

24. I:24

    𐎖𐎅𐎚 𐎙𐎇𐎗 𐎀𐎚 𐎀𐎃 𐎆 𐎀𐎐 xxxx

    qht ġzr at aḫ w an xxxx

25. I:25

    xxx 𐎖𐎗𐎁 𐎌𐎁𐎓 𐎘𐎛𐎗𐎋 𐎍xxxxx

    xxx qrb šbʿ ṯirk lxxxxx

26. I:26

    xxxxx 𐎀𐎁𐎊 𐎐𐎄𐎚 𐎀𐎐𐎋 xxx

    xxxxx aby ndt ank xxx

27. I:27

    xxxx 𐎖𐎍𐎚 𐎍𐎋 𐎚𐎍𐎋 𐎁 𐎕𐎄xxx

    xxxx qlt lk tlk b ṣdxxx

28. I:28

    xxxxxxx𐎎𐎚 𐎛𐎌𐎗𐎊𐎚 xxxx

    xxxxxxxmt išryt xxxx

29. I:29

    xxxxxx𐎗 𐎀𐎍𐎎𐎄𐎋 𐎕𐎄 xxx

    xxxxxxr almdk ṣd xxx

30. I:30

    xxxxxx 𐎍 𐎖𐎗𐎚 𐎀𐎁𐎍𐎎 𐎀𐎁𐎍𐎎

    xxxxxx l qrt ablm ablm

31. I:31

    𐎖𐎗𐎚 𐎇𐎁𐎍 𐎟 𐎊𐎗𐎃 𐎄 𐎎𐎂𐎄𐎍 𐎌xxx

    qrt zbl . yrḫ d mgdl šxxx

32. I:32

    xxxxxxx 𐎋𐎎𐎐 𐎓𐎗𐎅𐎎 xxxx

    xxxxxxx kmn ʿrhm xxxx

33. I:33

    xxxxxxx𐎚 𐎛𐎚𐎔𐎔 xxxxxxx

    xxxxxxxt itpp xxxxxxx

34. I:34

    xxxxxxxx𐎓𐎔xxxxxxxxx

    xxxxxxxxʿpxxxxxxxxx

35. IV:1

    xxxx𐎚𐎔𐎒xxxxxxxxxxxx

    xxxxtpsxxxxxxxxxxxx

36. IV:2

    xxxx 𐎊𐎘𐎁𐎗 𐎟 xxxxxxxxxxxx

    xxxx yṯbr . xxxxxxxxxxxx

37. IV:3

    xxxx 𐎜𐎉𐎎 𐎏𐎗𐎖𐎎 xxxxxxxxx

    xxxx uṭm ḏrqm xxxxxxxxx

38. IV:4

    𐎁𐎚𐎍𐎚 𐎓𐎐𐎚 𐎍 𐎋𐎍 𐎊xxxxxxxxxx

    btlt ʿnt l kl yxxxxxxxxxx

39. IV:5

    𐎚𐎚𐎁𐎓 𐎁𐎚𐎍𐎚 𐎓𐎐𐎚 𐎛𐎄𐎋 𐎍 𐎚𐎚𐎐 𐎔𐎐𐎎

    ttbʿ btlt ʿnt idk l ttn pnm

40. IV:6

    𐎓𐎎 𐎊𐎉𐎔𐎐 𐎎𐎅𐎗 𐎌𐎚 𐎚𐎌𐎜 𐎂𐎅

    ʿm yṭpn mhr št tšu gh

41. IV:7

    𐎆 𐎚𐎕𐎈 𐎊𐎘𐎁 𐎊𐎉𐎔 xxxxxxxxxxx

    w tṣḥ yṯb yṭp xxxxxxxxxxx

42. IV:8

    𐎖𐎗𐎚 𐎀𐎁𐎍𐎎 𐎀𐎁𐎍𐎎 𐎖𐎗𐎚 𐎇𐎁𐎍 𐎊𐎗𐎃

    qrt ablm ablm qrt zbl yrḫ

43. IV:9

    𐎛𐎋 𐎀𐎍 𐎊𐎈𐎄𐎘 𐎊𐎗𐎃 𐎁 𐎖𐎗𐎐 𐎌𐎎𐎀𐎍𐎅

    ik al yḥdṯ yrḫ b qrn šmalh

44. IV:10

    𐎁 𐎖𐎗𐎐 𐎊𐎎𐎐𐎅 𐎁 𐎀𐎐𐎌𐎚 xxxxxxxxx

    b qrn ymnh b anšt xxxxxxxxx

45. IV:11

    𐎖𐎄𐎖𐎄𐎅 𐎆 𐎊𐎓𐎐 𐎊𐎉𐎔𐎐 𐎎𐎅𐎗 𐎌𐎚

    qdqdh w yʿn yṭpn mhr št

46. IV:12

    𐎌𐎎𐎓 𐎍 𐎁𐎚𐎍𐎚 𐎓𐎐𐎚 𐎀𐎚 𐎓𐎍 𐎖𐎌𐎚𐎅

    šmʿ l btlt ʿnt at ʿl qšth

47. IV:13

    𐎚𐎎𐎃𐎕𐎅 𐎖𐎕𐎓𐎚𐎅 𐎅𐎆𐎚 𐎍 𐎚𐎈𐎆𐎊 xxx

    tmḫṣh qṣʿth hwt l tḥwy xxx

48. IV:14

    𐎐𐎓𐎎𐎐 𐎙𐎇𐎗 𐎌𐎚 𐎘𐎗𐎎 𐎆 xxxxx

    nʿmn ġzr št ṯrm w xxxxx

49. IV:15

    𐎛𐎌𐎚𐎛𐎗 𐎁 𐎏𐎄𐎎 𐎆 𐎐𐎓𐎗𐎒 xxxx

    ištir b ḏdm w nʿrs xxxx

50. IV:16

    𐎆 𐎚𐎓𐎐 𐎁𐎚𐎍𐎚 𐎓𐎐𐎚 𐎘𐎁 𐎊𐎉𐎔 𐎆 xxx

    w tʿn btlt ʿnt ṯb yṭp w xxx

51. IV:17

    𐎍𐎋 𐎀𐎌𐎚𐎋 𐎋𐎎 𐎐𐎌𐎗 𐎁 𐎈𐎁𐎌𐎊

    lk aštk km nšr b ḥbšy

52. IV:18

    𐎋𐎎 𐎄𐎛𐎊 𐎁 𐎚𐎓𐎗𐎚𐎊 𐎀𐎖𐎅𐎚 𐎋𐎎 𐎊𐎘𐎁

    km diy b tʿrty aqht km yṯb

53. IV:19

    𐎍 𐎍𐎈𐎎 𐎁𐎆 𐎁𐎐 𐎄𐎐𐎛𐎍 𐎍 𐎘𐎗𐎎 𐎓𐎍𐎅

    l lḥm bw bn dnil l ṯrm ʿlh

54. IV:20

    𐎐𐎌𐎗𐎎 𐎚𐎗𐎃𐎔𐎐 𐎊𐎁𐎕𐎗 𐎈𐎁𐎍 𐎄

    nšrm trḫpn ybṣr ḥbl d

55. IV:21

    𐎛𐎊𐎎 𐎁𐎐 𐎐𐎌𐎗𐎎 𐎀𐎗𐎃𐎔 𐎀𐎐𐎋 𐎓𐎍

    iym bn nšrm arḫp ank ʿl

56. IV:22

    𐎀𐎖𐎅𐎚 𐎓𐎄𐎁𐎋 𐎅𐎍𐎎𐎐 𐎘𐎐𐎎 𐎖𐎄𐎖𐎄

    aqht ʿdbk hlmn ṯnm qdqd

57. IV:23

    𐎘𐎍𐎘𐎛𐎄 𐎓𐎍 𐎜𐎄𐎐 𐎌𐎔𐎋 𐎋𐎎 𐎌𐎛𐎊

    ṯlṯid ʿl udn špk km šiy

58. IV:24

    𐎄𐎎 𐎋𐎎 𐎌𐎃𐎉 𐎍 𐎁𐎗𐎋𐎅 𐎚𐎕𐎛 𐎋𐎎

    dm km šḫṭ l brkh tṣi km

59. IV:25

    𐎗𐎈 𐎐𐎔𐎌𐎅 𐎋𐎎 𐎛𐎘𐎍 𐎁𐎗𐎍𐎚𐎅 𐎋𐎎

    rḥ npšh km iṯl brlth km

60. IV:26

    𐎖𐎉𐎗 𐎁 𐎀𐎔𐎅 𐎜 𐎀𐎔 𐎎𐎔𐎗𐎅 𐎀𐎐𐎋

    qṭr b aph u ap mprh ank

61. IV:27

    𐎍 𐎀𐎈𐎆𐎊 𐎚𐎖𐎈 𐎊𐎉𐎔𐎐 𐎎𐎅𐎗 𐎌𐎚

    l aḥwy tqḥ yṭpn mhr št

62. IV:28

    𐎚𐎌𐎚𐎐 𐎋 𐎐𐎌𐎗 𐎁 𐎈𐎁𐎌𐎅 𐎋𐎎 𐎄𐎛𐎊

    tštn k nšr b ḥbšh km diy

63. IV:29

    𐎁 𐎚𐎓𐎗𐎚𐎅 𐎀𐎖𐎅𐎚 𐎋𐎎 𐎊𐎘𐎁 𐎍 𐎍𐎈𐎎

    b tʿrth aqht km yṯb l lḥm

64. IV:30

    𐎁𐎐 𐎄𐎐𐎛𐎍 𐎍 𐎘𐎗𐎎 𐎓𐎍𐎅 𐎐𐎌𐎗𐎎

    bn dnil l ṯrm ʿlh nšrm

65. IV:31

    𐎚𐎗𐎃𐎔𐎐 𐎊𐎁𐎕𐎗 𐎈𐎁𐎍 𐎄𐎛𐎊𐎎 𐎁𐎐

    trḫpn ybṣr ḥbl diym bn

66. IV:32

    𐎐𐎌𐎗𐎎 𐎚𐎗𐎃𐎔 x𐎓𐎐𐎚 𐎓𐎍 𐎀𐎖𐎅𐎚

    nšrm trḫp xʿnt ʿl aqht

67. IV:33

    𐎚𐎓𐎄𐎁𐎐𐎅 𐎅𐎍𐎎𐎐 𐎘𐎐𐎎 𐎖𐎄𐎖𐎄

    tʿdbnh hlmn ṯnm qdqd

68. IV:34

    𐎘𐎍𐎘𐎛𐎄 𐎓𐎍 𐎜𐎄𐎐 𐎌𐎔𐎋 𐎋𐎎

    ṯlṯid ʿl udn špk km

69. IV:35

    𐎌𐎛𐎊 𐎄𐎎𐎅 𐎋𐎎 𐎌𐎃𐎉 𐎍 𐎁𐎗𐎋𐎅

    šiy dmh km šḫṭ l brkh

70. IV:36

    𐎊𐎕𐎀𐎚 𐎋𐎎 𐎗𐎈 𐎐𐎔𐎌𐎅 𐎋𐎎 𐎛𐎘𐎍

    yṣat km rḥ npšh km iṯl

71. IV:37

    𐎁𐎗𐎍𐎚𐎅 𐎋𐎎 𐎖𐎉𐎗 𐎁 𐎀𐎔𐎅 xxxxxx

    brlth km qṭr b aph xxxxxx

72. IV:38

    𐎓𐎐𐎚 𐎁 𐎕𐎎𐎚 𐎎𐎅𐎗𐎅 xxxxx

    ʿnt b ṣmt mhrh xxxxx

73. IV:39

    𐎀𐎖𐎅𐎚 𐎆 𐎚𐎁𐎋 𐎊𐎍𐎄 𐎄𐎐𐎛𐎍 xxx

    aqht w tbk yld dnil xxx

74. IV:40

    𐎀𐎁𐎐 𐎀𐎐𐎋 𐎆 𐎓𐎍 𐎖𐎌𐎚𐎋 𐎎𐎃𐎕𐎚𐎋 𐎓𐎍

    abn ank w ʿl qštk mḫṣtk ʿl

75. IV:41

    𐎖𐎕𐎓𐎚𐎋 𐎀𐎚 𐎍 𐎈𐎊𐎚𐎋 xxxxxx

    qṣʿtk at l ḥytk xxxxxx

76. IV:42

    𐎆 𐎃𐎍𐎖 𐎓𐎔𐎚 𐎎𐎃𐎕𐎋 xxxxx

    w ḫlq ʿpt mḫṣk xxxxx

Copenhagen Ugaritic Corpus (CUC), CACCHT project, Department of Theology, University of Copenhagen; encoded by Christian Canu Højgaard and Martijn Naaijer. Licence: CC BY-NC 4.0. Source.