Pseudo Cyril Alexandria
- pscyril.alexandria.mary:1
ⲟⲩⲗⲟⲅⲟⲥ · ⲉⲁϥⲧⲁⲩⲟϥ · ⲛϭⲓⲡⲉⲛⲡⲉⲧⲟⲩⲁⲁⲃ ⲛⲉⲓⲱⲧ ⲉⲧⲧⲁⲉⲓⲏⲩ ⲕⲁⲧⲁⲥⲙⲟⲧ ⲛⲓⲙ · ⲁⲡⲁⲕⲩⲣⲓⲗⲗⲟⲥ · ⲡⲁⲣⲭⲏⲉⲡⲓⲥⲕⲟⲡⲟⲥ ⲛⲣⲁⲕⲟⲧⲉ · ⲉⲁϥⲧⲁⲩⲟϥ ⲉⲡⲧⲁⲉⲓⲟ ⲛⲧⲉⲧⲟ ⲙⲡⲁⲣⲑⲉⲛⲟⲥ ⲛⲟⲩⲟⲉⲓϣ ⲛⲓⲙ · ⲧϩⲁⲅⲓⲁ ⲙⲁⲣⲓⲁ · ⲧⲣⲉϥϫⲡⲉⲡⲛⲟⲩⲧⲉ · ϩⲛⲟⲩⲙⲉ · ⲉϥⲟⲩⲱⲛϩ ⲉⲃⲟⲗ ⲙⲡⲉⲥⲛⲟϭ ⲛⲉⲟⲟⲩ · ⲙⲛⲡⲧⲁⲉⲓⲟ ⲛⲧⲁⲥϫⲓⲧϥ ⲉⲃⲟⲗ ϩⲓⲧⲙⲡⲛⲟⲩⲧⲉ . ϩⲛⲟⲩⲉⲓⲣⲏⲛⲏ ⲛⲧⲉⲡⲛⲟⲩⲧⲉ ϩⲁⲙⲏⲛ ⁖ⲻ
- pscyril.alexandria.mary:2
ⲱ ⲛⲁⲙⲉⲣⲁⲧⲉ ⲡⲗⲁⲟⲥ ⲙⲙⲁⲓⲛⲟⲩⲧⲉ · ⲁⲟⲩⲱⲛ ⲛⲙⲙⲁⲁϫⲉ ⲙⲡⲉⲧⲛϩⲏⲧ ⲛⲧⲉⲧⲛⲥⲱⲧⲙ ⲉⲡⲧⲁⲉⲓⲟ ⲛⲧⲙⲁⲁⲩ ⲙⲡⲛⲟⲩⲧⲉ · ⲧⲣⲣⲱ ⲛⲛⲉϩⲓⲟⲙⲉ ⲧⲏⲣⲟⲩ ⲁⲩⲱ ⲧϣⲉⲗⲉⲉⲧ ⲙⲙⲉ ·
- pscyril.alexandria.mary:3
ⲧⲉⲛⲧⲁⲡϣⲏⲣⲉ ⲙⲡⲛⲟⲩⲧⲉ ⲕⲁⲧⲁⲝⲓⲟⲩ ⲙⲙⲟϥ · ⲁϥⲉⲓ ⲁϥⲟⲩⲱϩ ϩⲛⲧⲉⲥⲕⲁⲗⲁϩⲏ ⲙⲯⲓⲥ ⲛⲉⲃⲟⲧ ⲁⲥϫⲡⲟϥ ⲛⲁⲛ ϩⲛⲃⲏⲑⲗⲉⲉⲙ · ⲁⲥϭⲟⲟⲗⲉϥ ⲛϩⲉⲛⲧⲟⲉⲓⲥ · ⲁⲥⲕⲱ ⲙⲙⲟϥ ϩⲛⲟⲩⲟⲙϥ ⲛⲧⲃⲛⲏ · ⲁϩⲉⲛⲍⲱⲟⲛ ⲛⲁⲩ ⲉⲣⲟϥ ⲁⲩⲥⲟⲩⲱⲛϥ · ⲁⲩⲱ ⲁⲩⲣ ϩⲁⲓⲃⲉⲥ ⲉⲣⲟϥ ·
- pscyril.alexandria.mary:4
ⲁⲣⲥⲟⲟⲩⲧⲛ ⲉⲃⲟⲗ ⲙⲡⲟⲩϭⲃⲟⲓ ⲛⲟⲩⲛⲁⲙ · ⲁⲣⲁⲙⲁϩⲧⲉ ⲙⲙⲟϥ ⲁⲣϫⲧⲟϥ ϩⲙⲡⲟⲩϭⲃⲟⲓ ⲛϩⲃⲟⲩⲣ ·
- pscyril.alexandria.mary:5
ⲁⲣⲣⲓⲕⲉ ⲙⲡⲟⲩⲙⲁⲕϩ ⲙⲛⲡⲟⲩⲃⲱ ⲉⲧⲟⲗⲙ ⲉⲡⲉⲥⲏⲧ ⲉϫⲱϥ · ⲁⲣϯⲡⲓ ⲉⲣⲱϥ ⲙⲡⲉⲧⲉⲣⲉⲡⲉⲓⲱⲧ ϯⲡⲓ ⲉⲣⲱϥ ϩⲛⲙⲡⲏⲩⲉ · ⲁⲣⲕⲁⲁϥ ϩⲓϫⲛⲛⲟⲩⲡⲁⲧ · ⲁϥϥⲓ ⲛⲛⲉϥⲃⲁⲗ ⲉϩⲣⲁⲓ ϩⲁⲡⲟⲩϩⲟ ·
- pscyril.alexandria.mary:6
ⲁϥⲥⲟⲟⲩⲧⲛ ⲉⲃⲟⲗ ⲛⲧⲉϥϭⲓϫ · ⲁϥϭⲱⲡⲉ ⲛⲧⲟⲩⲉⲕⲓⲃⲉ · ⲁϥⲱϥ ⲉϩⲟⲩⲛ ⲉⲣⲱϥ ⲙⲡⲉⲣⲱⲧⲉ ⲉⲧϩⲟⲗϭ ⲉϩⲟⲩⲉ ⲟⲩⲙⲁⲛⲛⲁ ·
- pscyril.alexandria.mary:7
ⲁⲡⲉⲥⲧⲟⲓ ⲛⲧⲟⲩⲑⲩⲥⲓⲁ ϩⲗⲟϭ ⲛⲁϥ · ⲉϩⲟⲩⲉ ⲡⲉⲥϯ ⲛⲟⲩϥⲉ ⲛⲧⲉⲑⲩⲥⲓⲁ ⲛⲛⲱϩⲉ ·
- pscyril.alexandria.mary:8
ⲛⲧⲉⲣⲉϥⲥⲱ ϩⲛⲛⲟⲩⲉⲕⲓⲃⲉ ⲛⲉⲓⲁⲧ ⲧⲱⲗⲙ ⲁϥⲙⲟⲩⲧⲉ ⲉⲣⲟ · ϫⲉⲧⲁⲙⲁⲁⲩ ·
- pscyril.alexandria.mary:9
ⲁⲙⲏⲓⲧⲛ · ⲛⲧⲉⲧⲛⲛⲁⲩ ⲉⲡⲛⲟⲩⲧⲉ ⲉϥⲙⲟⲩⲧⲉ ⲉⲙⲁⲣⲓⲁ ϫⲉⲧⲁⲙⲁⲁⲩ ⲉϥϯⲡⲓ ⲉⲣⲱⲥ ·
- pscyril.alexandria.mary:10
ⲁⲩⲱ ⲉⲛⲉⲥϯⲡⲓ ⲉⲣⲱϥ ϩⲱⲱⲥ ⲉⲥⲙⲟⲩⲧⲉ ⲉⲣⲟϥ ⲛⲛⲁⲩ ⲛⲓⲙ ϫⲉⲡⲁϫⲟⲉⲓⲥ ⲁⲩⲱ ⲡⲁϣⲏⲣⲉ ⲉⲥⲟⲩⲱϣⲧ ⲛⲁϥ :
- pscyril.alexandria.mary:11
ⲙⲡⲛⲁⲩ ⲅⲁⲣ ⲉϣⲁⲥϯ ⲉⲕⲓⲃⲉ ⲛⲁϥ · ⲛⲉϣⲁⲥⲣⲓⲕⲉ ⲙⲡⲉⲥⲙⲁⲕϩ ⲉⲡⲉⲥⲏⲧ ⲛⲁϥ ⲉϥⲁϩⲉ ⲣⲁⲧϥ · ⲛⲧϩⲉ ⲛⲟⲩⲡⲩⲣⲅⲟⲥ ·
- pscyril.alexandria.mary:12
ⲙⲛⲛⲥⲱⲥ ⲟⲛ ϣⲁⲥⲟⲩⲱϣⲧ ⲛⲁϥ · ⲉⲥϫⲱ ⲙⲙⲟⲥ · ϫⲉⲡⲁϫⲟⲉⲓⲥ · ⲁⲩⲱ ⲡⲁϣⲏⲣⲉ ·
- pscyril.alexandria.mary:13
ⲉⲓⲧⲁ ⲙⲛⲛⲥⲁⲛⲁⲓ · ⲁⲥⲁⲙⲁϩⲧⲉ ⲛⲧⲉϥϭⲓϫ · ⲁⲥⲥⲱⲕ ⲙⲙⲟϥ ϩⲛⲛⲉϩⲓⲟⲟⲩⲉ · ⲉⲥϫⲱ ⲙⲙⲟⲥ ϫⲉ · ⲡⲁϣⲏⲣⲉ ⲉⲧϩⲟⲗϭ · ⲙⲟⲟϣⲉ ⲕⲟⲩⲓ · ⲕⲟⲩⲓ ⲛⲧϩⲉ ⲛⲛϣⲏⲣⲉ ⲕⲟⲩⲓ ⲧⲏⲣⲟⲩ ⲉⲩⲧⲥⲁⲃⲟ ⲙⲙⲟⲟⲩ ⲉⲙⲟⲟϣⲉ ·
- pscyril.alexandria.mary:14
ⲛⲧⲟϥ ⲇⲉ ϩⲱⲱϥ ⲡⲛⲟⲩⲧⲉ ⲙⲙⲉ ⲓⲏⲥⲟⲩⲥ · ⲁϥⲟⲩⲁϩϥ ⲛⲥⲱⲥ · ⲛϥϣⲧⲣⲧⲱⲣ ⲁⲛ · ⲉϥⲧⲟϭⲥ ⲉⲛⲉϥⲕⲟⲩⲓ ⲛϭⲟⲡ · ⲉϥϥⲓ ⲟⲩⲱϩ · ⲟⲩⲱϩ · ⲉϥⲁϣⲉ ϩⲛⲛⲉϩⲟⲓⲧⲉ ⲙⲙⲁⲣⲓⲁ ⲧⲉϥⲙⲁⲁⲩ ⲛϭⲓⲡⲉⲧⲉⲣⲉⲡⲧⲏⲣϥ · ⲁϣⲉ ⲙⲙⲟϥ ·
- pscyril.alexandria.mary:15
ⲉⲛⲉϣⲁϥϥⲓ ⲛⲛⲉϥⲃⲁⲗ ⲉϩⲣⲁⲓ ϩⲁⲡⲉⲥϩⲟ · ⲛϭⲓⲡⲉⲧⲉⲣⲉⲡⲧⲏⲣϥ ⲁϣⲉ ⲙⲙⲟϥ · ⲁⲩⲱ ⲉϥⲥⲙⲟⲛⲧ ⲉⲧⲃⲏⲏⲧϥ ·
- pscyril.alexandria.mary:16
ⲉⲛⲉϣⲁⲥϫⲓⲧϥ ⲟⲛ ⲛⲥⲧⲁⲗⲟϥ · ⲛⲥⲙⲟⲟϣⲉ ⲛⲙⲙⲁϥ ·
- pscyril.alexandria.mary:17
ⲁⲙⲏⲓⲧⲛ · ⲱ ⲛⲉϩⲓⲟⲙⲉ ⲧⲏⲣⲟⲩ ⲛⲧⲉⲧⲛⲛⲁⲩ ⲉⲙⲁⲣⲓⲁ · ⲉⲣⲉⲡⲛⲟⲩⲧⲉ ⲡⲟⲣϫ ⲉⲡⲉⲥⲥⲡⲓⲣ ⲉϥϥⲓ ⲙⲡⲉϥϩⲟ ⲉϩⲣⲁⲓ · ⲉϥϯⲡⲓ ⲉⲣⲱⲥ ·
- pscyril.alexandria.mary:18
ⲙⲟⲟϣⲉ · ⲙⲟⲟϣⲉ ⲧϣⲉⲉⲣⲉ ⲛⲥⲓⲱⲛ · ⲉⲓϣⲁϫⲉ ⲉⲣⲟ ⲱ ⲙⲁⲣⲓⲁ · ⲉⲓⲥ ⲡⲣⲣⲟ ⲡⲉⲭⲣⲓⲥⲧⲟⲥ ϩⲓϫⲱ ·
- pscyril.alexandria.mary:19
ⲁϥϣⲱⲡⲉ ⲅⲁⲣ ⲛⲉ ⲛϭⲓⲡⲣⲣⲟ ⲡⲉⲭⲣⲓⲥⲧⲟⲥ · ⲁϥϩⲙⲟⲟⲥ ϩⲓϫⲱ ·
- pscyril.alexandria.mary:20
ⲁϥⲣ ϣⲃⲏⲣ ⲣϩⲱⲃ ⲛⲙⲙⲉ ⲛϭⲓⲡⲉⲓⲱⲧ ·
- pscyril.alexandria.mary:21
ⲁϥⲣ ⲥⲩⲅⲅⲉⲛⲏⲥ ⲛⲙⲙⲉ ⲛϭⲓⲡϣⲏⲣⲉ ·
- pscyril.alexandria.mary:22
ⲁϥⲣ ⲉⲓⲁⲧ ⲡⲱⲣϫ ⲉⲣⲟ ⲛϭⲓⲡⲉⲡⲛⲉⲩⲙⲁ ⲉⲧⲟⲩⲁⲁⲃ ·
- pscyril.alexandria.mary:23
ⲛⲁⲅⲅⲉⲗⲟⲥ ϩⲩⲡⲟⲧⲁⲥⲥⲉ ⲛⲉ ϫⲉⲁϥⲙⲉⲣⲓⲧⲉ · ⲁϥϭⲟⲓⲗⲉ ⲉⲣⲟ ⲉⲧⲃⲉ ⲡⲟⲩⲧⲃⲃⲟ ·
- pscyril.alexandria.mary:24
ⲛⲧⲟ ⲅⲁⲣ ⲙⲁⲩⲁⲁⲧⲉ ⲡⲉⲛⲧⲁⲣϭⲛ ϩⲙⲟⲧ ⲛⲛⲁϩⲣⲙⲡⲛⲟⲩⲧⲉ · ϩⲛⲛⲉϩⲓⲟⲙⲉ ⲧⲏⲣⲟⲩ · ϫⲉⲡϫⲟⲉⲓⲥ ϣⲟⲟⲡ ⲛⲙⲙⲉ ·
- pscyril.alexandria.mary:25
ⲁⲣϥⲓ ⲛⲛⲟⲩϭⲓϫ ⲉϩⲣⲁⲓ · ⲙⲛⲛⲟⲩϭⲃⲟⲓ ⲉⲧϫⲟⲥⲉ · ⲁⲣϫⲓ ⲛⲧⲙⲡⲛⲟⲩⲧⲉ ⲡⲉⲓⲱⲧ · ⲛⲧϩⲓⲕⲱⲛ ⲙⲡⲉϥϣⲏⲣⲉ · ⲁⲣⲧⲁⲗⲟⲥ ϩⲓϫⲛⲧⲟⲩⲁⲡⲉ · ⲉⲣⲉⲡⲉⲡⲛⲉⲩⲙⲁ ⲉⲧⲟⲩⲁⲁⲃ ϫⲓ ⲙⲟⲉⲓⲧ ϩⲏⲧⲉ · ⲉⲣⲙⲟⲟϣⲉ ⲉⲃⲟⲗ ϩⲛⲧⲟⲓⲕⲟⲩⲙⲉⲛⲏ ⲧⲏⲣⲥ · ⲉⲣⲧⲁϣⲉⲟⲉⲓϣ · ⲉⲣϫⲱ ⲙⲙⲟⲥ ·
- pscyril.alexandria.mary:26
ϫⲉⲥⲟⲩⲱⲛϥ ⲛⲏⲧⲛ · ϫⲉⲛⲧⲟϥ · ⲡⲉ ⲡϣⲏⲣⲉ · ⲛⲟⲩⲱⲧ ⲛⲧⲉⲡⲛⲟⲩⲧⲉ · ⲛⲧⲁⲓϫⲡⲟϥ · ⲱ ⲙⲁⲣⲓⲁ · ⲁⲓⲉⲓⲙⲉ · ϫⲉⲉⲣⲧⲏⲕ ⲛϩⲏⲧ ⲉϫⲛⲛⲟⲩⲥⲙⲟⲧ ·
- pscyril.alexandria.mary:27
ϫⲉⲥϩⲓⲙⲉ ⲛⲓⲙ ⲛⲧⲁϥⲁⲓⲧⲉⲓ ⲙⲡⲛⲟⲩⲧⲉ ⲛⲧⲁϥϯ ⲛⲁϥ ⲙⲡϣⲓ ⲛⲧⲙⲛⲧⲣⲱⲙⲉ ·
- pscyril.alexandria.mary:28
ⲛⲧⲟ ⲇⲉ ⲛⲧⲁⲣⲁⲓⲧⲉⲓ ⲙⲙⲟϥ ⲛⲟⲩⲙⲛⲧⲥⲁⲃⲉ · ⲁϥϯ ⲛⲉ ⲙⲡⲉϥⲇⲱⲣⲟⲛ ⲉⲧⲉⲡⲉϥϣⲏⲣⲉ ⲡⲉ · ⲁⲣϩⲕⲟ · ⲁϥϯ ⲛⲉ ⲙⲡⲉⲣⲱⲧⲉ ⲛⲛⲟⲩⲉⲕⲓⲃⲉ ϩⲛⲙⲡⲏⲩⲉ ·
- pscyril.alexandria.mary:29
ⲛⲧⲁⲩϫⲡⲟ ϩⲓⲧⲛⲉⲩϩⲁ · ⲛⲧⲟ ϩⲱⲱⲧⲉ ⲁⲣϫⲡⲟ ⲙⲡⲛⲟⲩⲧⲉ ⲡⲣⲣⲟ ⲛⲛⲁⲧⲡⲉ · ⲙⲛⲛⲁⲡⲕⲁϩ ·
- pscyril.alexandria.mary:30
ⲛⲧⲁⲣⲁⲡⲟⲧⲁⲥⲥⲉ ⲙⲡⲕⲟⲥⲙⲟⲥ ⲙⲛⲧⲉϥϩⲩⲗⲏ · ⲁⲡⲛⲟⲩⲧⲉ ϩⲱⲱϥ ⲭⲁⲣⲓⲍⲉ ⲛⲉ ⲛⲧⲡⲉ · ⲙⲛⲡⲕⲁϩ ·
- pscyril.alexandria.mary:31
ⲉⲛⲉϣⲁⲣⲕⲱⲗϫ ⲛⲛⲟⲩⲡⲁⲧ · ⲙⲡⲟⲩϣⲏⲣⲉ · ⲛⲧⲉⲟⲩⲱϣⲧ ⲛⲁϥ · ⲁⲩⲱ ⲛⲧⲉⲩⲛⲟⲩ ϣⲁⲣⲉⲛⲁⲅⲅⲉⲗⲟⲥ · ⲟⲩⲱϣⲧ ⲛⲉ ϩⲱⲟⲩ ·
- pscyril.alexandria.mary:32
ⲱ ⲙⲁⲣⲓⲁ · ⲙⲁⲁⲃⲉ · ⲙⲛⲯⲓⲧⲉ ⲛⲣⲟⲙⲡⲉ · ⲁⲣϫⲟⲕⲟⲩ ⲉⲃⲟⲗ ⲉⲣⲉⲡⲛⲟⲩⲧⲉ ϯⲉⲟⲟⲩ ⲛⲉ · ⲧⲁⲩⲉ ⲛⲟⲩⲙⲩⲥⲧⲏⲣⲓⲟⲛ ⲉⲣⲟⲓ ⲱ ⲙⲁⲣⲓⲁ ·
- pscyril.alexandria.mary:33
ⲥⲱⲧⲙ ⲡⲉϫⲁⲥ ⲁⲛⲟⲕ ϯⲛⲁⲧⲁⲙⲟⲕ ·
- pscyril.alexandria.mary:34
ⲁⲓⲉⲥⲩⲭⲁⲍⲉ ⲙⲙⲟⲓ ϫⲓⲛⲧⲁⲙⲛⲧⲕⲟⲩⲓ · ⲁⲓⲁⲡⲟⲧⲁⲥⲥⲉ ⲙⲡⲕⲟⲥⲙⲟⲥ ⲙⲛⲧⲉϥϩⲩⲗⲏ ·
- pscyril.alexandria.mary:35
ⲁⲧⲁⲕⲁⲗⲁϩⲏ ⲙⲟⲟϣⲉ ⲉⲃⲟⲗ ⲁϫⲛϩⲟⲟⲩⲧ · ⲁⲛⲁⲉⲕⲓⲃⲉ ⲣⲥⲁⲓⲣⲉ ·
- pscyril.alexandria.mary:36
ⲙⲡⲉⲓϣⲁϫⲉ ⲙⲛϩⲣϣⲓⲣⲉ · ⲙⲡⲓϯⲧⲕⲁⲥ ⲉⲓⲙⲓⲥⲉ · ⲙⲡⲓϣⲗⲁϩ · ⲉⲓⲛⲁⲩ ⲉⲡⲁϣⲏⲣⲉ · ⲙⲡⲓⲉⲓⲙⲉ · ϫⲉⲛⲧⲁⲓⲱⲱ ⲙⲙⲟϥ ⲉⲃⲟⲗ ⲧⲱⲛ · ⲁⲓⲉⲓⲙⲉ ⲇⲉ ⲛⲧⲟϥ ϫⲉⲟⲩⲛⲟⲩⲧⲉ ⲡⲉ ⲛⲧⲁⲓϫⲡⲟϥ ·
- pscyril.alexandria.mary:37
ⲁⲅⲁⲃⲣⲓⲏⲗ ⲡⲁⲣⲭⲁⲅⲅⲉⲗⲟⲥ ⲣϩⲟⲧⲉ · ⲉϥⲧⲁϣⲉⲟⲉⲓϣ ⲛⲁⲓ ⲛⲛⲁⲓ · ⲉϥⲥⲟⲟⲩⲛ ϫⲉⲟⲩϩⲱⲃ ⲛⲃⲣⲣⲉ ⲡⲉ ·
- pscyril.alexandria.mary:38
ⲁⲛⲟⲕ ⲇⲉ ⲙⲡⲓⲣϩⲟⲧⲉ · ⲁⲗⲗⲁ ⲁⲓⲧⲉⲗⲏⲗ · ⲉⲓⲥⲟⲟⲩⲛ ⲙⲡⲣⲁϣⲉ · ⲛⲧⲉⲣⲉϥⲁⲥⲡⲁⲍⲉ ⲙⲙⲟⲓ · ⲉϥⲥⲧⲱⲧ · ⲁⲩⲱ ⲁⲓⲙⲟⲩϩ ⲛⲟⲩⲛⲟϥ ·
- pscyril.alexandria.mary:39
ⲁϥⲉⲓ ⲡⲉϫⲁⲥ ⲛϭⲓⲙⲁⲣⲓⲁ · ⲁϥⲟⲩⲱⲛ ⲛⲧⲁⲧⲁⲡⲣⲟ · ⲁϥⲡⲱⲧ ⲉⲡⲉⲥⲏⲧ ⲉⲧⲁⲕⲁⲗⲁϩⲏ · ⲁⲩⲱ ⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ · ⲅⲁⲃⲣⲓⲏⲗ · ⲉⲛϥⲗⲟϫⲧ ⲉⲣⲟⲓ ⲡⲉ · ⲉϥⲣ ϩⲙⲙⲉ ⲙⲙⲟⲓ · ⲁⲩⲱ ⲉϥϩⲩⲡⲉⲣⲏⲧⲉⲓ · ⲙⲡⲉⲧϩⲙⲡⲁⲥⲁ ⲛϩⲟⲩⲛ ·
- pscyril.alexandria.mary:40
ⲉⲛⲉϣⲁⲓϩⲩⲙⲛⲉⲩⲉ ⲉⲡⲛⲟⲩⲧⲉ · ⲛⲧⲉⲩϣⲏ · ϣⲁⲣⲉⲛⲁⲅⲅⲉⲗⲟⲥ ϩⲩⲙⲛⲉⲩⲉ ⲛⲙⲙⲁⲓ · ⲙⲡⲛⲁⲩ ⲟⲛ ⲉϣⲁⲓⲕⲱⲗϫ ⲛⲛⲁⲡⲁⲧ ⲛϣⲱⲣⲡ · ϣⲁⲣⲉⲛϭⲟⲙ ⲛⲙⲡⲏⲩⲉ · ⲟⲩⲱϣⲧ ⲙⲡⲉⲧϩⲙⲡⲁⲥⲁ ⲛϩⲟⲩⲛ ·
- pscyril.alexandria.mary:41
ⲙⲡⲛⲁⲩ ⲛϫⲡ ϣⲟⲙⲧⲉ · ϣⲁⲣⲉⲧⲉⲧⲣⲓⲁⲥ · ϯⲛⲁⲓ ⲛⲟⲩϭⲟⲙ · ϣⲁϫⲡⲥⲟ ⲙⲡⲉϩⲟⲟⲩ · ⲟⲩⲧⲉⲗⲏⲗ ⲙⲛⲟⲩⲟⲩⲛⲟϥ · ⲛⲉⲧϣⲟⲟⲡ ⲛⲁⲓ ·
- pscyril.alexandria.mary:42
ⲙⲡⲛⲁⲩ ⲉⲓⲛⲁⲟⲩⲱⲙ · ⲟⲩⲙⲁⲛⲛⲁ ⲙⲙⲁⲣⲕⲁⲣⲓⲧⲏⲥ ⲛⲉⲧⲛⲏⲩ ⲛⲁⲓ · ϩⲙⲡⲣⲏ ⲟⲛ ⲉϥⲛⲁϩⲱⲧⲡ · ⲟⲩⲙⲁⲛⲛⲁ ⲛⲥϯ ⲛⲟⲩϥⲉ ⲡⲉ ·
- pscyril.alexandria.mary:43
ⲙⲡⲓⲉⲓⲙⲉ · ϫⲉⲡⲉ ϯϩⲩⲙⲛⲉⲩⲉ ⲉⲣⲟϥ · ⲡⲕⲟⲥⲙⲟⲥ ⲧⲏⲣϥ ϯⲉⲟⲟⲩ ⲛⲁϥ · ⲁⲩⲱ ⲛⲁⲓ ⲧⲏⲣⲟⲩ ⲁⲓⲉⲓⲙⲉ ⲉⲣⲟⲟⲩ ⲁⲩⲱ ⲁⲓⲙⲉⲧⲉⲭⲉ ⲉⲣⲟⲟⲩ ·
- pscyril.alexandria.mary:44
ⲁⲩⲱ ⲁⲡⲕⲟⲥⲙⲟⲥ ⲧⲏⲣϥ ϯⲉⲟⲟⲩ ⲛⲁⲓ · ⲁⲩⲱϣ ⲉⲃⲟⲗ · ϫⲉⲕⲁⲗⲱⲥ · ⲧⲡⲁⲣⲑⲉⲛⲟⲥ ⲁⲣϫⲱ ⲉⲣⲟⲛ ⲛⲧϭⲓⲛⲉⲓ ϣⲁⲣⲟⲛ ⲙⲡⲉⲛⲥⲱⲧⲏⲣ ⲡⲉⲭⲣⲓⲥⲧⲟⲥ ·
- pscyril.alexandria.mary:45
ⲕⲁⲗⲱⲥ ⲧⲉⲛⲧ ⲁⲥⲙⲡϣⲁ ⲛϣⲱⲡ ⲉⲣⲟⲥ ⲙⲡⲉⲑⲣⲟⲛⲟⲥ ⲙⲡⲛⲟⲩⲧⲉ ·
- pscyril.alexandria.mary:46
ⲕⲁⲗⲱⲥ ⲧⲉⲛⲧ ⲁⲥⲧⲟⲩϫⲟ ⲙⲡⲕⲟⲥⲙⲟⲥ ⲧⲏⲣϥ · ϩⲓⲧⲛⲧⲉⲥϭⲓⲛϫⲡⲟ ·
- pscyril.alexandria.mary:47
ⲕⲁⲗⲱⲥ ⲧϣⲉⲉⲣⲉ ϣⲏⲙ ⲙⲡⲁⲣⲑⲉⲛⲟⲥ · ⲉⲣⲉⲡⲛⲟⲩⲧⲉ ⲟⲩⲏϩ ⲛⲙⲙⲁⲥ ·
- pscyril.alexandria.mary:48
ⲕⲁⲗⲱⲥ ⲧⲙⲁⲁⲩ ⲛⲙⲙⲟⲛⲁⲭⲟⲥ ⲧⲏⲣⲟⲩ ⲙⲛⲙⲙⲟⲛⲁⲭⲏ ⲧⲏⲣⲟⲩ ·
- pscyril.alexandria.mary:49
ⲁⲣⲃⲉⲗⲧⲙⲛⲧⲣⲱⲙⲉ ⲧⲏⲣⲥ · ⲉⲥⲥⲟⲛϩ ⲛⲧⲟⲟⲧϥ ⲙⲡⲇⲓⲁⲃⲟⲗⲟⲥ · ⲁⲣⲙⲉⲥⲧⲉ ⲡⲃⲓⲟⲥ ⲙⲡⲅⲁⲙⲟⲥ · ⲁⲣⲉⲣⲙⲁⲁⲩ ⲙⲡⲡⲁⲧϣⲉⲗⲉⲉⲧ ⲙⲙⲉ ·
- pscyril.alexandria.mary:50
ⲡⲟⲩⲥⲱⲙⲁ ⲁϥϭⲃⲃⲉ ϩⲛⲛⲁⲥⲕⲏⲥⲓⲥ · ⲡⲟⲩⲡⲛⲉⲩⲙⲁ ⲇⲉ ⲁϥⲧⲉⲗⲏⲗ · ϫⲉⲡⲛⲟⲩⲧⲉ ϣⲟⲟⲡ ⲛⲙⲙⲉ · ⲉϣϫⲉ ⲁⲡⲉⲧⲥⲟⲩⲧⲱⲛ ⲙⲉⲣⲓⲧⲉ · ⲉⲓⲉ ⲙⲛⲗⲁⲁⲩ ⲛⲁϭⲱ ⲉⲓ ⲙⲏ ⲧⲉⲓ ⲛⲥⲉϩⲩⲡⲟⲧⲁⲥⲥⲉ ⲛⲉ .
- pscyril.alexandria.mary:51
ⲉϣϫⲉ ⲁⲛⲟⲩⲉⲣⲏⲧⲉ ⲧⲱⲟⲩⲛ ϩⲁⲡⲛⲟⲩⲧⲉ · ⲉϥϩⲛⲧⲟⲩⲕⲁⲗⲁϩⲏ ⲉⲧⲧⲃⲃⲏⲩ · ⲉⲓⲉ ⲟⲛⲧⲱⲥ · ⲥⲉϣⲟⲟⲡ ⲛⲥⲧⲩⲗⲗⲟⲥ ϩⲛⲧⲙⲏⲧⲉ ⲛⲧϩⲓⲉⲣⲟⲩⲥⲁⲗⲏⲙ ⲛⲧⲡⲉ ·
- pscyril.alexandria.mary:52
ⲉϣϫⲉ ⲁⲛⲟⲩⲉⲣⲏⲧⲉ ⲧⲱⲟⲩⲛ ϩⲁⲡⲛⲟⲩⲧⲉ ⲉϥⲟ ⲛⲕⲟⲩⲓ · ⲉⲓⲉ ⲟⲛⲧⲱⲥ ⲧⲉ ⲁϩⲉⲣⲁⲧⲉ ⲧⲉⲛⲟⲩ ϩⲁⲧⲙ ⲡⲉⲑⲩⲥⲓⲁⲥⲧⲏⲣⲓⲟⲛ ⲙⲡⲟⲩϣⲏⲣⲉ ·
- pscyril.alexandria.mary:53
ⲉϣϫⲉ ⲁⲣϩⲱⲃⲥ ⲙⲡⲉϥϩⲟ · ϩⲛⲛⲟⲩϩⲟⲓⲧⲉ ⲉⲧⲃⲉⲡⲁⲏⲣ · ⲏ ⲡϫⲁϥ ⲉⲧⲛⲃⲟⲗ · ⲉⲓⲉ ⲟⲛⲧⲱⲥ ⲛⲉⲭⲉⲣⲟⲩⲃⲓⲛ · ⲙⲛⲛⲉⲍⲉⲣⲁⲫⲓⲛ ⲁϩⲉⲣⲁⲧⲟⲩ ϩⲓϫⲙⲡⲉⲑⲩⲥⲓⲁⲥⲧⲏⲣⲓⲟⲛ ⲉⲩϩⲱⲃⲥ ⲙⲡⲟⲩϩⲟ ϩⲙⲡⲧⲁⲁⲧⲉ ⲛⲛⲉⲩⲧⲛϩ ·
- pscyril.alexandria.mary:54
ⲉϣϫⲉ ⲁⲣⲧⲱⲟⲩⲛ ϩⲁⲣⲟϥ ϩⲙⲡⲟⲩϩⲁⲙⲏⲣ ⲙⲛⲛⲟⲩⲡⲁⲧ · ⲉⲓⲉ ⲟⲛⲧⲱⲥ ⲧⲉϩⲙⲟⲟⲥ ⲧⲉⲛⲟⲩ ϩⲓϫⲛⲟⲩⲑⲣⲟⲛⲟⲥ ⲛⲉⲟⲟⲩ · ⲉⲣⲉⲛⲉⲭⲉⲣⲟⲩⲃⲓⲛ ⲙⲛⲛⲉⲍⲉⲣⲁⲫⲓⲛ ⲁϩⲉⲣⲁⲧⲟⲩ ⲉⲣⲟ ⲉⲩϩⲩⲙⲛⲉⲩⲉ ⲉⲡⲉⲛⲧⲁⲣϫⲡⲟϥ ·
- pscyril.alexandria.mary:55
ⲉϣϫⲉ ⲁⲣⲧⲙⲙⲟϥ ⲛⲉⲣⲱⲧⲉ ϩⲛⲛⲟⲩⲉⲕⲓⲃⲉ ⲙⲡⲁⲣⲑⲉⲛⲓⲕⲟⲛ · ⲉⲓⲉ ⲟⲛⲧⲱⲥ ⲡⲉϥⲥⲱⲙⲁ ⲛⲛⲟⲩⲧⲉ · ⲙⲛⲡⲉϥⲥⲛⲟϥ ⲉⲧⲧⲁⲉⲓⲏⲩ · ⲥⲉϯ ⲙⲙⲟϥ ⲉⲧⲟⲩⲧⲁⲡⲣⲟ · ⲟⲩ ⲡⲉ ⲡⲧⲁⲉⲓⲟ ⲉⲧⲟⲩⲛⲁϣⲉⲛⲧϥ ⲛⲛⲁϩⲣⲉ ·
- pscyril.alexandria.mary:56
ⲱ ⲧⲉ ⲥϩⲓⲙⲉ ⲛⲧⲁⲧⲡⲉ ⲙⲛⲡⲕⲁϩ · ⲙⲛⲛⲉⲫⲱⲥⲧⲏⲣ ⲙⲛⲛⲁⲅⲅⲉⲗⲟⲥ ⲉⲧϩⲙⲡϫⲓⲥⲉ ϩⲩⲡⲟⲧⲁⲥⲥⲉ ⲛⲁⲥ · ⲉⲧⲃⲉⲡⲉⲧⲟⲩⲏϩ ⲛϩⲏⲧⲥ ·
- pscyril.alexandria.mary:57
ⲥⲱⲧⲙ ⲉⲡⲉⲧϩⲓⲟⲩⲛⲁⲙ ⲙⲡⲉϥⲉⲓⲱⲧ ϩⲛⲙⲡⲏⲩⲉ ⲉϥⲙⲟⲩⲧⲉ ⲉⲙⲁⲣⲓⲁ ϫⲉⲧⲁⲙⲁⲁⲩ · ⲉϥⲥⲱⲧⲙ ⲛⲥⲁⲓⲱⲥⲏⲫ ϩⲙⲙⲛⲧⲥⲧⲙⲏⲧ ⲛⲓⲙ · ⲛⲧϩⲉ ⲛⲟⲩⲉⲓⲱⲧ · ⲛⲁⲅⲅⲉⲗⲟⲥ ϩⲩⲡⲉⲣⲏⲧⲉⲓ ⲙⲙⲟϥ · ⲛⲧⲟϥ ϩⲱⲱϥ ϥϩⲩⲡⲟⲧⲁⲥⲥⲉ ⲛⲧⲉϥⲙⲁⲁⲩ ⲕⲁⲧⲁⲥⲁⲣⲝ ·
- pscyril.alexandria.mary:58
ⲛⲁⲓ ⲇⲉ ⲧⲏⲣⲟⲩ ⲁⲩϣⲱⲡⲉ ⲙⲙⲟ ⲱ ⲙⲁⲣⲓⲁ ⲧⲡⲁⲣⲑⲉⲛⲟⲥ ⲉⲧϫⲏⲕ ⲉⲃⲟⲗ ·
- pscyril.alexandria.mary:59
ⲁⲙⲏⲓⲧⲛ ⲱ ⲛⲉϩⲓⲟⲙⲉ ⲧⲏⲣⲟⲩ · ⲉⲧⲉⲡⲓⲑⲩⲙⲉⲓ ⲉⲧⲙⲛⲧⲡⲁⲣⲑⲉⲛⲟⲥ · ⲛⲧⲉⲧⲛⲕⲱϩ ⲉⲡⲉⲥⲙⲟⲧ ⲙⲙⲁⲣⲓⲁ ⲧⲙⲁⲁⲩ ⲙⲡⲁϫⲟⲉⲓⲥ · ⲛⲧⲉⲧⲛⲑⲉⲱⲣⲉⲓ ⲛⲧⲉⲥϭⲓⲛⲟⲩⲱⲙ ⲉⲧϫⲁϫⲱ · ⲙⲛⲧⲉⲥϭⲓⲛⲉⲛⲕⲟⲧⲕ ϩⲓⲡⲉⲥⲏⲧ ·
- pscyril.alexandria.mary:60
ⲙⲡⲉⲥⲉⲡⲓⲑⲩⲙⲉⲓ ⲉⲗⲁⲁⲩ ⲉⲡⲁⲡⲉⲓⲕⲟⲥⲙⲟⲥ ⲡⲉ · ⲛⲉⲣⲉⲡⲉⲥⲣ ⲡⲙⲉⲉⲩⲉ ϣⲟⲟⲡ ⲛⲛⲁⲩ ⲛⲓⲙ ϩⲛⲧⲧⲁⲡⲣⲟ · ⲛⲛⲉⲟⲩⲏⲏⲃ ·
- pscyril.alexandria.mary:61
ⲙⲡⲉⲥϫⲱⲕⲙ ϩⲛⲟⲩⲥⲓⲟⲟⲩⲛ ⲉⲛⲉϩ :
- pscyril.alexandria.mary:62
ⲙⲡⲉⲥϯ ⲛⲟⲩⲕⲟⲥⲙⲏⲥⲓⲥ ⲉⲣⲟⲥ ⲉⲛⲉϩ ·
- pscyril.alexandria.mary:63
ⲙⲡⲉⲥϣⲟⲩϣⲟⲩ ⲙⲙⲟⲥ ⲉⲛⲉϩ ϩⲛⲟⲩϩⲃⲥⲱ ⲛϩⲟⲉⲓⲧⲉ ⲛⲧϩⲉ ⲛⲛⲉϩⲓⲟⲙⲉ ⲧⲏⲣⲟⲩ · ⲙⲙⲁⲓ ϣⲟⲩϣⲟⲩ :
- pscyril.alexandria.mary:64
ⲙⲡⲉⲥϫⲓ ϯⲡⲉ ⲛⲏⲣⲡ ⲉⲛⲉϩ · ⲉⲛⲉⲥϩⲙⲟⲟⲥ ⲛⲛⲁⲩ ⲛⲓⲙ · ⲉⲣⲉⲡⲉⲥϩⲟ ⲕⲧⲏⲩ ⲉⲡⲥⲁ ⲛⲧⲁⲛⲁⲧⲟⲗⲏ · ⲉⲥϭⲱϣⲧ ⲉⲡⲉⲥⲇⲩⲙⲓⲟⲩⲣⲅⲟⲥ ⲛⲛⲁⲩ ⲛⲓⲙ ·
- pscyril.alexandria.mary:65
ⲙⲡⲉⲥⲁⲡⲁⲛⲧⲁ ⲉϩⲟⲟⲩⲧ ⲉⲛⲉϩ · ⲉⲓ ⲙⲏ ⲧⲉⲓ ⲡⲉⲥⲉⲓⲱⲧ · ⲙⲛⲧⲉⲥⲙⲁⲁⲩ ⲙⲛⲛⲉⲥⲥⲛⲏⲩ ·
- pscyril.alexandria.mary:66
ⲉⲧⲃⲉⲡⲁⲓ ⲛⲧⲉⲣⲉⲅⲁⲃⲣⲓⲏⲗ ϣⲁϫⲉ ⲛⲙⲙⲁⲥ ⲁⲥϣⲧⲟⲣⲧⲣ ⲉϫⲙⲡϣⲁϫⲉ ϫⲉⲛⲁϣ ⲛϩⲉ · ⲡⲁⲓ ⲛⲁϣⲱⲡⲉ ⲙⲙⲟⲓ ⲙⲡⲓⲥⲟⲩⲛ ϩⲟⲟⲩⲧ ⲉⲛⲉϩ ·
- pscyril.alexandria.mary:67
ⲡⲉϫⲁϥ ⲛⲁⲥ ⲛϭⲓⲅⲁⲃⲣⲓⲏⲗ · ϫⲉⲟⲩⲡⲛⲉⲩⲙⲁ ⲉϥⲟⲩⲁⲁⲃ ⲡⲉⲧⲛⲏⲩ ⲉϩⲣⲁⲓ ⲉϫⲱ · ⲁⲩⲱ ⲧϭⲟⲙ ⲙⲡⲉⲧϫⲟⲥⲉ ⲧⲉⲧⲛ ⲛⲁⲣ ϩⲁⲓⲃⲉⲥ ⲉⲣⲟ ·
- pscyril.alexandria.mary:68
ⲉⲧⲃⲉⲡⲁⲓ ⲡⲉⲧⲉⲛⲁϫⲡⲟϥ ⲱ ⲙⲁⲣⲓⲁ ⲛⲧⲟϥ ⲡⲉⲧⲉϣⲁϥⲉⲗⲉⲩⲑⲉⲣⲟⲩ ⲙⲡⲅⲉⲛⲟⲥ ⲛⲁⲇⲁⲙ · ϩⲓⲧⲙⲡⲉϥⲥⲱⲙⲁ ⲛⲛⲟⲩⲧⲉ · ⲙⲛⲡⲉϥⲥⲛⲟϥ ⲉⲧⲧⲁⲉⲓⲏⲩ ·
- pscyril.alexandria.mary:69
ⲡⲉⲧⲉⲣⲛⲁϫⲡⲟϥ ⲱ ⲙⲁⲣⲓⲁ ⲧⲡⲁⲣⲑⲉⲛⲟⲥ · ⲛⲧⲟϥ ⲡⲉⲛⲧⲁϥⲡⲗⲁⲥⲥⲉ ⲛⲟⲩⲟⲛ ⲛⲓⲙ ϩⲛⲛⲉϥϭⲓϫ ⲛⲛⲟⲩⲧⲉ ·
- pscyril.alexandria.mary:70
ⲉⲣⲉⲡⲟⲩⲣ ⲡⲙⲉⲉⲩⲉ ⲛⲁϣⲱⲡⲉ ⲉϥϩⲏⲡ ⲛⲁϣ ⲛϩⲉ · ⲏ ⲉⲩⲛⲁⲣ ⲡⲟⲩⲟⲃϣ ⲛⲁϣ ⲛϩⲉ ⲱ ⲧⲡⲁⲣⲑⲉⲛⲟⲥ ⲛⲥⲁⲃⲉ · ⲉⲩⲧⲁⲩⲟ ⲙⲡⲟⲩⲣⲁⲛ ϩⲛⲧⲟⲓⲕⲟⲩⲙⲉⲛⲏ ⲧⲏⲣⲥ · ϩⲓϫⲛⲧⲉ ⲧⲣⲁⲡⲉⲍⲁ ⲉⲧⲟⲩⲁⲁⲃ · ϩⲓⲧⲛⲛⲉⲉⲡⲓⲥⲕⲟⲡⲟⲥ ⲙⲛⲛⲉⲡⲣⲉⲥⲃⲩⲧⲉⲣⲟⲥ · ⲉⲩϫⲱ ⲙⲙⲟⲥ · ⲛⲧⲉⲓϩⲉ
- pscyril.alexandria.mary:71
ϫⲉⲉⲛⲉⲓⲣⲉ ⲙⲡⲙⲉⲉⲩⲉ ⲙⲡⲉⲕϫⲡⲟ ⲉⲧⲟⲩⲁⲁⲃ · ϩⲙⲙⲁⲣⲓⲁ ⲧⲡⲁⲣⲑⲉⲛⲟⲥ ·
- pscyril.alexandria.mary:72
ⲛⲁⲓⲁⲧⲉ ⲛⲧⲟ ⲱ ⲙⲁⲣⲓⲁ ⲡϣⲟⲩϣⲟⲩ ⲛⲛⲁⲅⲅⲉⲗⲟⲥ · ⲧⲗⲁⲗⲓⲁ ⲛⲛⲁⲣⲭⲁⲅⲅⲉⲗⲟⲥ · ⲡϩⲩⲙⲛⲟⲥ ⲛⲛⲉⲭⲁⲓⲣⲟⲩⲃⲓⲛ · ⲙⲛⲛⲉⲍⲉⲣⲁⲫⲓⲛ · ⲧϭⲓ ⲛϩⲱⲥ ⲛⲛⲉⲧⲟⲩⲁⲁⲃ ⲧⲏⲣⲟⲩ ·
- pscyril.alexandria.mary:73
ϩⲙⲡⲉϩⲟⲟⲩ ⲛⲧⲁⲣϫⲡⲟ ⲙⲡϣⲏⲣⲉ ⲙⲡⲛⲟⲩⲧⲉ ⲡⲉⲧϣⲟⲟⲡ ϫⲓ ⲛⲉⲛⲉϩ · ⲡⲉⲧⲉⲙⲛⲧⲉϥⲁⲣⲭⲏ ⲟⲩⲇⲉ ϫⲱⲕ ·
- pscyril.alexandria.mary:74
ⲁⲩⲱ ⲁⲛⲥⲱⲧⲙ ⲉϩⲉⲛϩⲩⲙⲛⲟⲥ ⲛⲣⲁϣⲉ · ϩⲓⲥⲙⲟⲩ · ϩⲛⲧⲉⲥⲧⲣⲁⲧⲓⲁ ⲛⲧⲡⲉ ϫⲉ · ⲡⲉⲟⲟⲩ ⲙⲡⲛⲟⲩⲧⲉ ϩⲛⲛⲉⲧϫⲟⲥⲉ · ⲧⲉϥⲉⲓⲣⲏⲛⲏ ϩⲓϫⲙⲡⲕⲁϩ · ϩⲛⲛⲣⲱⲙⲉ ⲙⲡⲉϥⲟⲩⲱϣ ·
- pscyril.alexandria.mary:75
ⲁⲛⲗⲁⲟⲥ ⲧⲏⲣⲟⲩ ⲛⲁⲩ ⲉⲡⲉⲟⲟⲩ ⲙⲡⲛⲟⲩⲧⲉ ⲡⲉⲛⲧⲁⲣϫⲡⲟϥ · ⲉⲧⲃⲉⲡⲁⲓ ⲧⲉⲥⲙⲁⲙⲁⲁⲧ ⲛⲧⲟ ϩⲛⲛⲉϩⲓⲟⲙⲉ · ⲁⲩⲱ ϥⲥⲙⲁⲙⲁⲁⲧ ⲛϭⲓⲡⲕⲁⲣⲡⲟⲥ ⲛϩⲏⲧⲉ ·
- pscyril.alexandria.mary:76
ⲱ ⲧⲛⲧⲁ ⲧⲉⲥⲕⲁⲗⲁϩⲏ ϣⲱⲡ ⲉⲣⲟⲥ ⲙⲡⲉⲓⲉⲓⲁⲧ ϣⲟⲡϥ ·
- pscyril.alexandria.mary:77
ⲛⲁⲓⲁⲧⲉ ⲛⲧⲟ ⲱ ⲧⲡⲁⲣⲑⲉⲛⲟⲥ · ϫⲉⲁⲧⲟⲩⲙⲏⲧⲣⲁ ⲉϣⲧⲱⲟⲩⲛ ⲉϩⲣⲁⲓ · ϩⲁⲡⲉⲧⲉⲣⲉⲧⲡⲉ ⲟ ⲛⲁϥ ⲛⲑⲣⲟⲛⲟⲥ · ⲉⲣⲉⲡⲕⲁϩ ⲟ ⲛⲁϥ ⲛϩⲩⲡⲟⲡⲟⲇⲓⲟⲛ · ⲕⲁⲧⲁⲧϩⲉ ⲛⲧⲁϥϫⲟⲟⲥ ϫⲉⲧⲡⲉ ⲡⲉ ⲡⲁⲑⲣⲟⲛⲟⲥ · ⲁⲩⲱ ⲡⲕⲁϩ ⲡⲉ ⲡϩⲩⲡⲟⲡⲟⲇⲓⲟⲛ ⲛⲛⲁⲟⲩⲉⲣⲏⲧⲉ ·
- pscyril.alexandria.mary:78
ⲛⲧⲟ ⲇⲉ ⲁⲧⲟⲩⲕⲁⲗⲁϩⲏ ϣⲱⲡⲉ ⲙⲡⲉ · ⲁⲩⲱ ⲛⲕⲁϩ · ϫⲉⲁⲧⲟⲩⲙⲏⲧⲣⲁ ϣⲱⲡ ⲉⲣⲟⲥ ⲙⲡⲉⲧⲙⲟⲩϩ ⲛⲧⲡⲉ ⲙⲛⲡⲕⲁϩ ·
- pscyril.alexandria.mary:79
ⲉⲣⲉⲛⲓⲙ ⲧⲛⲧⲱⲛ ⲉⲣⲟ · ⲱ ⲧⲡⲁⲣⲑⲉⲛⲟⲥ ⲛⲥⲁⲃⲏ · ⲱ ⲧⲉⲓ ⲛⲟϭ ⲛϣⲡⲏⲣⲉ · ⲙⲛⲡⲉⲓⲛⲟϭ ⲛⲑⲁⲩⲙⲁ ·
- pscyril.alexandria.mary:80
ϩⲛⲧⲡⲉ ⲙⲉⲛ ⲟⲩ ⲉⲓⲁⲧ ⲙⲁⲁⲩ ⲡⲉ ϩⲙⲡⲕⲁϩ ⲇⲉ · ⲟⲩⲁⲧⲉⲓⲱⲧ ⲡⲉ · ⲟⲩϫⲟⲉⲓⲥ ⲡⲉ ϩⲛⲧⲡⲉ · ⲟⲩⲙⲟⲛⲟⲅⲉⲛⲏⲥ ⲡⲉ ϩⲓϫⲙⲡⲕⲁϩ ·
- pscyril.alexandria.mary:81
ⲛϯⲛⲁϩⲱ ⲁⲛ ⲉⲣⲟⲓ ⲱ ⲧⲡⲁⲣⲑⲉⲛⲟⲥ ⲉⲧⲟⲩⲁⲁⲃ · ⲉⲓⲙⲁⲕⲁⲣⲓⲍⲉ ⲙⲙⲟ · ⲙⲡⲁϩⲏⲧ ⲛⲁⲉϣⲛⲟⲉⲓ ⲁⲛ ⲙⲡⲁⲛⲟϭ ⲛϫⲓⲥⲉ · ⲱ ⲧⲉⲛⲧ ⲁⲥϩⲗⲟⲟⲗⲉ ⲙⲡⲉⲧⲉⲣⲉⲛⲍⲉⲣⲁⲫⲓⲛ ⲁϩⲉ ⲣⲁⲧⲟⲩ ⲉⲣⲟϥ ·
- pscyril.alexandria.mary:82
ⲉⲣⲉⲁϣ ⲛⲗⲁⲥ ⲛⲥⲁⲣⲝ ⲛⲁϣϣⲁϫⲉ · ⲉⲡⲟⲩⲛⲟϭ ⲛϫⲓⲥⲉ ·
- pscyril.alexandria.mary:83
ⲱ ⲡϩⲓⲗⲁⲥⲧⲏⲣⲓⲟⲛ ⲉⲣⲉⲡⲕⲱϩⲧ ⲙⲟⲩϩ · ϩⲓϫⲱϥ · ⲁⲩⲱ ⲉⲛϥⲣⲟⲕϩ ⲁⲛ ·
- pscyril.alexandria.mary:84
ⲱ ⲡⲙⲁ ⲛⲟⲩⲱϩ ⲙⲡⲛⲟⲩⲧⲉ · ⲁⲩⲱ ⲡⲉϥⲙⲁ ⲛϣⲱⲡⲉ .
- pscyril.alexandria.mary:85
ⲱ ⲡⲉⲧⲉⲣⲉⲡⲉⲡⲣⲟⲫⲏⲧⲏⲥ ⲱϣ ⲉⲃⲟⲗ ⲉⲧⲃⲏⲏⲧⲥ ·
- pscyril.alexandria.mary:86
ϫⲉⲧⲁⲓ ⲧⲉ ⲧⲡⲩⲗⲏ ⲙⲡϫⲟⲉⲓⲥ · ⲉⲣⲉⲛⲇⲓⲕⲁⲓⲟⲥ ⲛⲏⲩ · ⲉϩⲟⲩⲛ ⲛϩⲏⲧⲥ ·
- pscyril.alexandria.mary:87
ⲁⲡϫⲟⲉⲓⲥ ϭⲱϣⲧ ⲉⲃⲟⲗ ϩⲛⲧⲡⲉ ⲉϫⲛⲧⲟⲓⲕⲟⲩⲙⲉⲛⲏ ⲙⲡⲉϥϩⲉ ⲉⲡⲉⲧⲧⲛⲧⲱⲛ ⲉⲣⲟ ϩⲙⲡⲅⲉⲛⲟⲥ ⲧⲏⲣϥ · ⲛⲛⲉϩⲓⲟⲙⲉ · ⲉⲧⲃⲉⲡⲁⲓ ⲁϥϭⲟⲓⲗⲉ ⲉⲣⲟⲙⲡⲉϥⲙⲟⲛⲟⲅⲉⲛⲏⲥ ⲛϣⲏⲣⲉ :
- pscyril.alexandria.mary:88
ⲭⲁⲓⲣⲉ ⲧⲙⲁⲁⲩ ⲙⲡϫⲟⲉⲓⲥ · ⲧⲉⲛⲧ ⲁⲥϭⲛ ϩⲙⲟⲧ ⲛⲛⲁϩⲣⲙⲡⲛⲟⲩⲧⲉ ·
- pscyril.alexandria.mary:89
ⲭⲁⲓⲣⲉ ⲡⲉⲥⲙⲟⲩ ⲙⲛⲡⲣⲁϣⲉ · ⲙⲛⲡⲟⲩⲛⲟϥ ·
- pscyril.alexandria.mary:90
ⲭⲁⲓⲣⲉ ⲡⲡⲁⲗⲗⲁⲇⲓⲟⲛ ⲙⲡⲣⲣⲟ ⲙⲙⲉ :
- pscyril.alexandria.mary:91
ⲭⲁⲓⲣⲉ ⲡⲉⲣⲅⲁⲥⲧⲏⲣⲓⲟⲛ ⲙⲡⲥⲁⲉⲓⲛ ⲙⲙⲉ ·
- pscyril.alexandria.mary:92
ⲭⲁⲓⲣⲉ ⲧⲉⲛⲧ ⲁⲥⲙⲓⲥⲉ ⲛⲁⲛ ⲙⲡⲱⲛϩ · ⲉⲥⲟ ⲙⲡⲁⲣⲑⲉⲛⲟⲥ ·
- pscyril.alexandria.mary:93
ⲱ ⲡⲉⲓⲙⲩⲥⲧⲏⲣⲓⲟⲛ ⲉⲧϩⲏⲡ ⲛⲁⲙⲉⲣⲁⲧⲉ ⲉⲧⲟⲩⲟⲛϩ ⲉⲃⲟⲗ ϩⲛⲧⲡⲉ .
- pscyril.alexandria.mary:94
ϫⲓⲛⲧⲉϩⲟⲩⲉⲓⲧⲉ ⲛⲧⲁⲡⲛⲟⲩⲧⲉ ⲧⲁⲙⲓⲟ ⲛⲧⲡⲉ ⲙⲛⲡⲕⲁϩ ⲛⲥⲟⲟⲩ ⲛϩⲟⲟⲩ ·
- pscyril.alexandria.mary:95
ⲁⲩⲱ ⲁϥⲙⲧⲟⲛ ⲙⲙⲟϥ ⲉⲃⲟⲗ ϩⲛⲛⲉϥϩⲃⲏⲩⲉ ⲧⲏⲣⲟⲩ · ϩⲙⲡⲙⲉϩ ⲥⲁϣϥ ⲛϩⲟⲟⲩ ·
- pscyril.alexandria.mary:96
ϩⲣⲁⲓ ⲇⲉ ⲟⲛ ϩⲛⲥⲟⲩ ⲥⲁϣϥ ⲙⲡⲉⲃⲟⲧ ⲛⲃⲣⲣⲉ · ⲕⲁⲧⲁⲡⲛⲟⲙⲟⲥ ⲛⲛⲉϩⲣⲱⲙⲁⲓⲟⲥ · ⲉⲧⲉⲥⲟⲩ ⲥⲁϣϥ ⲡⲉ ⲙⲡⲉⲃⲟⲧ ⲡⲁⲣⲙⲟⲩⲧⲉ ⲛⲧⲁⲡⲉⲛϫⲟⲉⲓⲥ ⲉⲓ ⲉⲡⲉⲥⲏⲧ ⲉⲃⲟⲗ ϩⲛⲧⲡⲉ · ⲁϥϫⲓ ⲥⲁⲣⲝ ϩⲛⲧⲉⲓ ⲡⲁⲣⲑⲉⲛⲟⲥ .
- pscyril.alexandria.mary:97
ⲱ ⲧⲡⲁⲣⲑⲉⲛⲟⲥ ⲛⲥⲁⲃⲏ · ϯⲡⲁⲣⲁⲕⲁⲗⲉⲓ ⲙⲙⲟϫⲓ ⲡⲉϩⲙⲟⲧ ⲙⲡⲛⲟⲩⲧⲉ · ⲉⲧⲉⲡⲟⲩϣⲏⲣⲉ ⲡⲉ ⲉϩⲣⲁⲓ ⲉϫⲱⲛ · ⲛⲉϥⲕⲁ ⲛⲉⲛⲛⲟⲃⲉ ⲛⲁⲛ ⲉⲃⲟⲗ · ⲁⲩⲱ ⲛϥⲛⲁϩⲙⲉⲛ ⲉⲛⲉⲡⲓⲃⲟⲩⲗⲏ ⲧⲏⲣⲟⲩ ⲙⲡⲁⲛⲧⲓⲕⲉⲓⲙⲉⲛⲟⲥ · ⲡⲇⲓⲁⲃⲟⲗⲟⲥ .
- pscyril.alexandria.mary:98
ⲁⲓⲟϣⲟⲡⲛ ⲉⲣⲟⲕ ⲧⲏⲣⲛ · ⲙⲏ ⲡⲟⲧⲉ ⲛⲧⲉⲡⲇⲓⲁⲃⲟⲗⲟⲥ ⲣⲁϣⲉ ⲙⲙⲟⲛ · ⲛϥⲥⲟⲕⲛ ⲛⲙⲙⲁϥ ⲉⲡⲉⲥⲏⲧ ⲉⲧⲅⲉϩⲉⲛⲛⲁ ⲛⲥⲁⲧⲉ .
- pscyril.alexandria.mary:99
ⲱ ⲙⲁⲣⲓⲁ ⲧⲉⲣϩⲏⲛ ⲉϩⲟⲩⲛ ⲉⲡⲣⲣⲟ ⲡⲉⲭⲣⲓⲥⲧⲟⲥ ⲁⲩⲱ ϥⲛⲁϫⲓ ⲛⲛⲟⲩⲥⲟⲡⲥ ⲉϫⲱⲛ · ϫⲉⲡⲟⲩϣⲏⲣⲉ ⲡⲉ · ⲁⲩⲱ ⲡⲟⲩⲙⲉⲣⲓⲧ ⲡⲉ .
- pscyril.alexandria.mary:100
ⲛⲧⲟ ⲅⲁⲣ ⲁⲣϫⲡⲟϥ ⲁϥⲙⲟⲩⲧⲉ ⲉⲣⲟ ϫⲉⲧⲁⲙⲁⲁⲩ ·
Next → — showing 1–100 of 103
Coptic SCRIPTORIUM, corpus pseudo.cyril.alexandria (github.com/CopticScriptorium/corpora). Licence as stated per document in the project's own meta.json and checked there at parse time. English, where present, is Coptic SCRIPTORIUM's aligned translation. Licence: CC-BY 4.0. Source.