Ps John Chyrsostom
- pschrysostom.raphael:1
ⲓⲏⲥⲟⲩⲥ ⁘ ⲭⲣⲓⲥⲧⲟⲥ ⁘ ⲁ ⁘ ⲱ ⁘ ⲟⲩⲗⲟⲅⲟⲥ ⲉⲁϥⲧⲁⲩⲟϥ ⲛϭⲓⲡϩⲁⲅⲓⲟⲥ ⲓⲱϩⲁⲛⲛⲏⲥ ⲡⲁⲣⲭⲓⲉⲡⲓⲥⲕⲟⲡⲟⲥ ⲛⲕⲱⲛⲥⲧⲁⲛⲧⲓⲛⲟⲩⲡⲟⲗⲓⲥ · ⲁⲩⲱ ⲡⲉⲭⲣⲩⲥⲟⲥⲧⲟⲙⲟⲥ ⲁⲩⲱ ⲡⲁⲡⲗⲁⲥ ⲛⲛⲟⲩⲃ · ⲛⲧⲁϥⲧⲁⲩⲟϥ ⲇⲉ ⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ϩⲣⲁⲫⲁⲏⲗ · ϩⲙⲡⲉϩⲟⲟⲩ ⲙⲡⲉϥⲣⲡⲙⲉⲉⲩⲉ ⲉⲧⲟⲩⲁⲁⲃ ⲉⲧⲉⲥⲟⲩϥⲧⲟⲟⲩ ⲡⲉ ⲛⲁⲡⲁⲅⲟⲩⲙⲉⲛⲟⲛ ·
- pschrysostom.raphael:2
ⲛⲧⲁϥⲧⲁⲩⲉⲡⲉⲓⲗⲟⲅⲟⲥ ⲇⲉ ϩⲙⲡⲧⲟⲡⲟⲥ ⲛⲧⲁⲩⲕⲟⲧϥ ⲛⲁϥ ⲛⲃⲣⲣⲉ · ⲡⲁⲓ ⲛⲧⲁⲡⲣⲣⲟ ⲙⲙⲁⲓⲛⲟⲩⲧⲉ ⲁⲣⲕⲁⲇⲓⲟⲥ · ⲕⲟⲧϥ ⲉⲡⲣⲁⲛ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ϩⲣⲁⲫⲁⲏⲗ · ⲙⲡⲣⲏⲥ ⲛⲧⲡⲟⲗⲓⲥ ·
- pschrysostom.raphael:3
ⲙⲛⲛⲥⲁⲡϫⲓⲁⲉⲓⲕ ⲛⲧⲕⲉⲣⲟⲙⲡⲉ ⲉⲧⲛⲏⲩ · ⲛⲉ ⲁϥⲉⲓ ⲡⲉ ⲛϭⲓⲡⲙⲁⲓⲛⲟⲩⲧⲉ ⲛⲣⲣⲟ ⲉϣⲗⲏⲗ · ⲁⲩⲱ ⲡⲣⲟⲥⲕⲩⲛⲉⲓ · ϩⲙⲡⲧⲟⲡⲟⲥ ⲛⲃⲣⲣⲉ ⲛⲧⲁⲡⲉϥⲥⲟⲛ ⲕⲟⲧϥⲁⲩⲱ ⲁϥϩⲁⲅⲓⲁⲝⲉ ⲙⲙⲟϥ · ⲁⲩⲱ ⲁⲩⲣⲟⲩϩⲟⲙⲟⲛⲓⲁ ⲛⲟⲩⲱⲧ ⲛϭⲓⲛⲉⲩⲥⲉⲃⲏⲥ ⲛⲣⲣⲟ ⲟⲛⲛⲱⲣⲓⲟⲥ ⲙⲛⲛⲁⲣⲕⲁⲇⲓⲟⲥ ·
- pschrysostom.raphael:4
ⲉⲁⲩⲡⲁⲣⲁⲕⲁⲗⲉⲓ ⲙⲡⲛⲟϭ ⲓⲱϩⲁⲛⲛⲏⲥ ⲡⲉⲭⲣⲩⲥⲟⲥⲧⲱⲙⲟⲥ · ⲉⲧⲁⲩⲉϩⲉⲛⲕⲟⲩⲓ ⲛⲁⲓⲡⲉⲛⲟⲥ ⲉⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ϩⲣⲁⲫⲁⲏⲗ · ⲛⲧⲟϥ ⲇⲉ ϩⲱⲱϥ ⲡⲉⲭⲣⲩⲥⲟⲥⲧⲱⲙⲟⲥ ⲉⲧⲟⲩⲁⲁⲃ ·
- pschrysostom.raphael:5
ⲙⲁⲗⲗⲟⲛ ⲇⲉ ⲡⲡⲁⲛⲧⲟⲭⲓⲟⲛ ⲙⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ⲁϥⲇⲓⲁⲗⲉⲅⲉ ⲙⲡⲉⲓⲗⲟⲅⲟⲥ ⲉⲧⲟⲩⲁⲁⲃ · ⲉⲁϥⲧⲁⲩⲉϩⲉⲛⲕⲟⲩⲓ ⲙⲛⲛϭⲟⲙ ⲙⲛⲙⲙⲁⲉⲓⲛ ⲙⲛⲛⲉϣⲡⲏⲣⲉ ⲛⲧⲁⲩϣⲱⲡⲉ ⲉⲃⲟⲗ ϩⲓⲧⲟⲟⲧϥ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ϩⲣⲁⲫⲁⲏⲗ · ⲁⲩⲱ ⲉⲧⲃⲉⲧϩⲉ ⲛⲧⲁⲩⲙⲟⲩⲧⲉ ⲉⲣⲟϥ ⲛⲧⲟϥ · ϫⲉⲡⲕⲁϣ ⲙⲡⲉⲡⲛⲉⲩⲙⲁ ϩⲛⲟⲩⲉⲓⲣⲏⲛⲏ ⲛⲧⲉⲡⲛⲟⲩⲧⲉ · ⲉⲣⲉⲛⲉϥⲥⲙⲟⲩ ⲉⲧⲟⲩⲁⲁⲃ · ⲛⲁⲉⲓ ⲉϩⲣⲁⲓ ⲉϫⲱⲛ · ⲛⲧⲛⲟⲩϫⲁⲓ ⲧⲏⲣⲛ ϩⲓⲟⲩⲥⲟⲡ · ⲥⲙⲟⲩ ⲉⲣⲟⲛ · ϩⲁⲙⲏⲛ .
- pschrysostom.raphael:6
ⲛⲁⲙⲉⲣⲁⲧⲉ ⲛⲉⲣⲉⲡⲁⲅⲅⲉⲗⲟⲥ ⲙⲡϫⲟⲉⲓⲥ ⲕⲱⲧⲉ ⲉⲛⲉⲧⲣϩⲟⲧⲉ ϩⲏⲧϥ ⲛϥⲛⲁϩⲙⲟⲩ · ⲟⲛⲧⲱⲥ ⲁⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ⲙⲡϫⲟⲉⲓⲥ ϩⲣⲁⲫⲁⲏⲗ ⲕⲱⲧⲉ ⲉⲛⲉⲧⲣϩⲟⲧⲉ ϩⲏⲧϥ ⲧⲱⲃⲏⲇ ⲁϥⲛⲁϩⲙⲉϥ ·
- pschrysostom.raphael:7
ⲁⲩⲱ ⲟⲛ ⲁϥϫⲟⲟⲥ · ϫⲉϥⲛⲁϩⲱⲛ ⲉⲧⲟⲟⲧⲟⲩ ⲛⲛⲉϥⲁⲅⲅⲉⲗⲟⲥ · ⲉⲧⲃⲏⲏⲧⲕ · ⲉⲧⲣⲉⲩϩⲁⲣⲉϩ ⲉⲣⲟⲕ · ⲁⲩⲱ ⲛⲥⲉϥⲓⲧⲕ ϩⲓϫⲛⲛⲉⲩϭⲓϫ · ⲙⲏⲡⲟⲧⲉ ⲛⲅϫⲱⲣⲡ ⲉⲩⲱⲛⲉ ⲛⲧⲉⲕⲟⲩⲣⲏⲏⲧⲉ ·
- pschrysostom.raphael:8
ϩⲛⲟⲩⲙⲉ ⲅⲁⲣ ⲁⲡϫⲟⲉⲓⲥ ϩⲱⲛ ⲉⲧⲟⲟⲧϥ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ϩⲣⲁⲫⲁⲏⲗ · ⲉⲧⲣⲉϥϩⲁⲣⲉϩ ⲉⲇⲱⲃⲓⲁⲥ ⲡϣⲏⲣⲉ ⲛⲧⲱⲃⲓⲇ ϩⲛⲛⲉϥϩⲓⲟⲟⲩⲉ ⲧⲏⲣⲟⲩ · ⲙⲏⲡⲟⲧⲉ ⲛⲅϫⲱⲣⲡ ⲉⲩⲱⲛⲉ ⲛⲧⲉⲕⲟⲩⲣⲏⲏⲧⲉ · ⲛⲧⲁⲛϩⲁⲓ ⲛⲥⲁⲣⲣⲁ ϫⲱⲣⲡ ⲉⲩⲱⲛⲉ ⲁⲩⲱ ⲁⲩϩⲉ · ⲁϥϫⲟⲟⲩ ⲙⲡϥϣⲁϫⲉ ⲁⲩⲱ ⲁϥⲧⲁⲗϭⲟⲟⲩ · ⲁⲩⲱ ⲁϥⲧⲟⲩϫⲟⲟⲩ ⲉⲃⲟⲗ ϩⲛⲛⲉⲩⲑⲗⲓⲯⲓⲥ ⲧⲏⲣⲟⲩ ·
- pschrysostom.raphael:9
ⲡⲉϫⲁϥ ⲛϭⲓⲡⲣⲉϥⲯⲁⲗⲗⲉⲓ ⲇⲁⲩⲉⲓⲇ · ⲁⲗⲏⲑⲱⲥ ⲁⲡⲛⲟⲩⲧⲉ ϫⲟⲟⲩ ⲙⲡⲉϥϣⲁϫⲉ · ⲉⲧⲉⲡⲉϥⲛⲟϭ ⲛⲁⲣⲭⲁⲅⲅⲉⲗⲟⲥ ϩⲣⲁⲫⲁⲏⲗ ⲡⲉ ·
- pschrysostom.raphael:10
ⲁϥⲧⲁⲗϭⲉⲥⲁⲣⲣⲁ ⲧϣⲉⲉⲣⲉ ⲛϩⲣⲁⲅⲟⲩⲏⲗ ϩⲙⲡϣⲱⲛⲉ ⲉⲧⲛⲁϣⲧⲛ ⲧⲙⲛⲧⲁϭⲣⲏⲛ · ⲁⲩⲱ ⲁϥⲧⲟⲩϫⲟⲥ ⲉⲛⲛⲟϭⲛⲉϭ ⲛⲛϩⲙϩⲁⲗ ⲙⲡⲉⲥⲉⲓⲱⲧ ⲕⲁⲧⲁⲡϣⲁϫⲉ ⲙⲡϩⲓⲉⲣⲟⲥ ⲛⲁⲡⲟⲥⲧⲟⲗⲟⲥ ⲡⲁⲩⲗⲟⲥ ϫⲉⲙⲏ ⲛϩⲉⲛⲗⲩⲧⲟⲩⲣⲅⲓⲕⲟⲛ ⲁⲛ ⲛⲉ ⲙⲡⲛⲉⲩⲙⲁ ⲧⲏⲣⲟⲩ ⲛⲉ · ⲉⲩⲧⲛⲛⲟⲟⲩ ⲙⲙⲟⲟⲩ ⲉϩⲉⲛⲇⲓⲁⲕⲟⲛⲓⲁ · ⲉⲧⲃⲉⲛⲉⲧⲛⲁⲕⲗⲏⲣⲟⲛⲟⲙⲉⲓ ⲛⲟⲩⲟⲩϫⲁⲓ .
- pschrysostom.raphael:11
ⲛⲁⲙⲉⲣⲁⲁⲧⲉ ⲉⲓϣⲁⲛⲙⲉⲉⲩⲉ ⲉⲃⲟⲗ ⲉⲧⲙⲛⲧⲙⲁⲓⲣⲱⲙⲉ ⲉⲧⲟϣ ⲙⲡⲛⲟⲩⲧⲉ ⲉϩⲟⲩⲛ ⲉⲛⲣⲱⲙⲉ · ⲙⲁⲗⲗⲟⲛ ⲇⲉ ⲉϩⲟⲩⲛ ⲉⲛⲇⲓⲕⲁⲓⲟⲥ · ϣⲁⲓⲣϣⲡⲏⲣⲉ ⲉⲙⲁⲧⲉ ·
- pschrysostom.raphael:12
ⲡϫⲟⲉⲓⲥ ⲙⲉⲛ ⲛⲇⲓⲕⲁⲓⲟⲥ ⲕⲁⲧⲁⲡⲉⲧⲥⲏϩ · ⲛⲣⲉϥⲣⲛⲟⲃⲉ ϣⲁϥⲕⲁⲛⲉⲩⲛⲟⲃⲉ ⲛⲁⲩ ⲉⲃⲟⲗ · ⲕⲁⲧⲁⲧϩⲉ ⲛⲧⲁϥϫⲟⲟⲥ ϩⲛⲧⲉϥⲧⲁⲡⲣⲟ ⲛⲛⲟⲩⲧⲉ ⲛⲁⲧϭⲟⲗ ϫⲉϣⲁⲣⲉⲟⲩⲣⲁϣⲉ ϣⲱⲡⲉ ϩⲛⲧⲡⲉ . ⲙⲡⲙⲧⲟ ⲉⲃⲟⲗ ⲙⲡⲛⲟⲩⲧⲉ ⲙⲛⲛⲉϥⲁⲅⲅⲉⲗⲟⲥ · ⲉϫⲛⲟⲩⲣⲉϥⲣⲛⲟⲃⲉ ⲉϥϣⲁⲛⲙⲉⲧⲁⲛⲟⲉⲓ ·
- pschrysostom.raphael:13
ϩⲛⲟⲩⲙⲉ ⲥⲉⲙⲡϣⲁ ϩⲟⲩⲧⲁⲓⲟ ⲛϭⲓⲛⲁⲅⲅⲉⲗⲟⲥ ⲉⲧⲟⲩⲁⲁⲃ · ⲙⲁⲗⲗⲟⲛ ⲇⲉ ϣϣⲉ ⲉⲣⲟⲛ ⲉⲧⲣⲉⲛⲣⲁϣⲉ ⲛⲙⲙⲁⲩ : ϫⲉⲛⲇⲓⲕⲁⲓⲟⲥ ⲙⲉⲛ ⲛⲧⲟⲟⲩ ⲛⲉⲧⲉϣⲁⲩⲇⲓⲁⲕⲟⲛⲉⲓ ⲛⲁⲩ · ϩⲓⲧⲛⲧⲕⲉⲗⲉⲩⲥⲓⲥ ⲙⲡⲇⲓⲙⲓⲟⲩⲣⲅⲟⲥ ⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ · ϩⲛⲟⲩⲡⲣⲟϩⲁⲓⲣⲉⲥⲓⲥ ⲙⲛⲟⲩⲥⲧⲱⲧ ·
- pschrysostom.raphael:14
ⲥⲉⲣⲁϣⲉ ⲇⲉ ⲉϫⲛⲧϭⲓⲛ ⲕⲧⲟ ⲛⲣⲉϥⲣⲛⲟⲃⲉ · ⲛϭⲓⲛⲁⲅⲅⲉⲗⲟⲥ ⲉⲧⲥⲙⲁⲙⲁⲁⲧ ⲁⲩⲱ ⲟⲛ ϫⲉⲥⲉⲣϩⲟⲩⲟ ⲣⲟⲟⲩⲧ ⲉⲇⲓⲁⲕⲟⲛⲉⲓ ⲛⲇⲓⲕⲁⲓⲟⲥ · ⲛⲧϩⲉ ⲛⲟⲩⲣⲣⲟ ⲛⲧⲉⲡⲕⲁϩ ·
- pschrysostom.raphael:15
ⲉⲉⲣϣⲁⲛⲟⲩⲧⲩⲣⲁⲛⲛⲟⲥ ⲏ ⲟⲩⲉⲛⲇⲣⲁⲧⲏⲥ ⲛⲣⲱⲙⲉ ⲧⲱⲟⲩⲛ ϩⲛⲛⲉϥⲉⲡⲁⲣⲭⲓⲁ ⲛϥⲉⲓⲣⲉ ⲛϩⲉⲛⲁⲧⲁⲝⲓⲁ · ⲙⲛϩⲉⲛⲙⲛⲧⲁⲩⲑⲁⲇⲏⲥ · ⲗⲟⲓⲡⲟⲛ ϣⲁⲣⲉⲡⲣⲣⲟ ⲙⲉⲉⲩⲉ ϩⲙⲡⲉϥϩⲏⲧ ϫⲉⲛⲁϣ ⲛϩⲉ ⲉⲓⲛⲁϫⲣⲟ ⲉⲡⲉⲓⲇⲩⲣⲁⲛⲏ .
- pschrysostom.raphael:16
ⲧⲟⲧⲉ ϣⲁϥⲙⲟⲩⲧⲉ ⲉⲟⲩⲁ ⲛⲛⲉϥⲙⲉⲅⲓⲥⲧⲁⲛⲟⲥ ⲉⲧϥⲑⲁⲣⲉⲓ ⲉϫⲱⲟⲩ · ⲉⲧⲣⲉϥⲃⲱⲕ ⲉⲃⲟⲗ ⲛϥϭⲱⲧⲡ ⲙⲡⲁⲛⲧⲓⲇⲓⲕⲟⲥ ⲙⲙⲡⲣⲣⲟ · ϩⲟⲧⲁⲛ ⲉϥϣⲁⲛϫⲣⲟ ⲉⲣⲟϥ ϣⲁϥⲕⲟⲧϥ ϣⲁⲡⲉϥϫⲟⲉⲓⲥ ϩⲛⲟⲩⲣⲁϣⲉ ⲙⲛⲟⲩⲧⲉⲗⲏⲗ · ⲉⲣⲉⲡⲉⲧⲟ ⲛⲧⲩⲣⲁⲛⲛⲟⲥ ⲛⲥⲁϥϭⲟⲧⲡ ⲉϥⲙⲏⲣ ⲛⲥⲁⲡⲉϥϩⲧⲟ ·
- pschrysostom.raphael:17
ⲧⲟⲧⲉ ϣⲁⲣⲉⲡⲣⲣⲟ ϫⲓⲥⲉ ⲛϥⲣⲁϣⲉ · ϫⲉⲁⲡⲉϥϫⲁϫⲉ ϩⲉ ϩⲁⲡⲉϥⲥⲧⲣⲁⲧⲏⲅⲟⲥ · ⲁⲩⲱ ϣⲁϥⲭⲁⲣⲓⲍⲉⲛϩⲉⲛⲕⲉⲛⲟϭ ⲛⲧⲁⲉⲓⲟ · ⲙⲛϩⲉⲛⲕⲉⲟⲩⲥⲓⲁ ⲛⲛϥⲥⲧⲣⲁⲧⲱⲡⲉⲧⲁⲣⲭⲏⲥ · ⲡⲁⲣⲁⲛⲉⲧⲉⲟⲩⲛⲧⲁϥⲥⲟⲩ ⲧⲏⲣⲟⲩ ⲛϣⲟⲣⲡ · ⲧⲁⲓ ⲟⲩⲛⲧⲉ ⲧϩⲉ ⲛⲧⲁⲡϫⲟⲉⲓⲥ ⲁⲁⲥ ⲡⲙⲁⲓⲣⲱⲙⲉ ⲙⲡⲉⲓⲙⲁ ·
- pschrysostom.raphael:18
ⲉⲡⲉⲓⲇⲏ ⲙⲓⲭⲁⲏⲗ ⲙⲛⲅⲁⲃⲣⲓⲏⲗ ⲙⲛϩⲣⲁⲫⲁⲏⲗ · ⲛⲧⲟⲟⲩ ⲛⲉⲧⲟ ⲛⲛⲟϭ ϩⲛⲧⲧⲁⲝⲓⲥ ⲛⲧⲁⲛⲕⲉⲗⲓⲕⲏ ⲧⲏⲣⲥ ·
- pschrysostom.raphael:19
ⲉⲧⲃⲉⲡⲁⲓ ⲙⲓⲭⲁⲏⲗ ⲙⲉⲛ · ⲁϥⲧⲛⲛⲟⲟⲩϥ ⲙⲡϣⲟⲣⲡ ⲛⲥⲟⲡ · ⲁϥⲡⲁⲧⲁⲥⲥⲉⲓ ⲙⲡϩⲟϥ ⲛⲁⲣⲭⲁⲓⲟⲛ · ⲉⲧⲉⲥⲁⲧⲁⲛⲁⲏⲗ ⲡⲉ · ⲁⲩⲱ ⲁϥϫⲣⲟ ⲉⲣⲟϥ · ⲁϥⲙⲟⲣϥ ⲛϣⲟ ⲛⲣⲟⲙⲡⲉ · ⲉⲧⲃⲉⲡⲁⲓ ⲁⲡϫⲟⲉⲓⲥ ⲭⲁⲣⲓⲍⲉ ⲛⲁϥ ⲙⲡⲉⲓⲛⲟϭ ⲛⲁⲝⲓⲱⲙⲁ ⲛⲧⲉⲓϭⲟⲧ ·
- pschrysostom.raphael:20
ⲅⲁⲃⲣⲓⲏⲗ ϩⲱⲱϥ ⲁⲧⲉϥⲙⲛⲧⲡⲣⲟⲅⲛⲱⲥⲧⲏⲥ · ⲙⲟϣⲧϥ ⲙⲛⲡⲉϥⲉⲓⲱⲧ ⲛⲁⲅⲁⲑⲟⲥ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ϫⲉϥⲛⲁⲃⲱⲕ ϣⲁⲧⲡⲁⲣⲑⲉⲛⲟⲥ ⲙⲛⲡϣⲙⲛⲟⲩϥⲉ .
- pschrysostom.raphael:21
ϩⲣⲁⲫⲁⲏⲗ ϩⲱⲱϥ ϩⲱⲱϥ ⲉⲣⲁⲧⲟⲩ ⲛⲛⲣⲱⲙⲉ ⲛⲛⲇⲓⲕⲁⲓⲟⲥ ⲛϥⲇⲓⲁⲕⲟⲛⲉⲓ ⲛⲁⲩ ⲁⲩⲱ ⲛϥϫⲓ ⲙⲟⲉⲓⲧ ϩⲏⲧⲟⲩ · ⲁⲩⲱ ⲛϥⲧⲁⲗϭⲟⲟⲩ : ⲁⲩⲱ ⲉⲙⲟⲩⲣ ⲛⲁⲥⲙⲟⲇⲁⲓⲟⲥ ⲡⲇⲁⲙⲟⲛⲓⲟⲛ ⲉⲧϩⲟⲟⲩ ·
- pschrysostom.raphael:22
ⲁⲡⲛⲟⲩⲧⲉ ⲅⲁⲣ ⲧⲱϣ ⲙⲡⲟⲩⲁ ⲡⲟⲩⲁ ⲛⲛⲁⲅⲅⲉⲗⲟⲥ ⲕⲁⲧⲁⲡϩⲱⲃ ⲉⲧⲧⲟⲟⲙⲉ ⲉⲧⲟⲛⲟⲙⲁⲥⲓⲁ ⲛⲛⲉⲩⲣⲁⲛ ·
- pschrysostom.raphael:23
ⲙⲓⲭⲁⲏⲗ ⲙⲉⲛ ⲁϥⲧⲟϣϥ ⲉⲧⲣⲉϥⲡⲣⲉⲥⲃⲉⲩⲉ ϩⲁⲛⲣⲱⲙⲉ ⲙⲡⲉⲛ ⲉⲧⲃⲉⲧⲉϥⲡⲣⲟⲥⲉⲓⲅⲱⲣⲓⲁ ⲉⲧⲧⲟⲙⲉ · ⲙⲓⲭⲁⲏⲗ ⲉⲕϣⲁⲛϩⲉⲣⲙⲏⲛⲉⲩⲉ ⲙⲙⲟϥ ϫⲉⲧⲙⲛⲧϣⲁⲛϩⲧⲏϥ ⲙⲡⲛⲟⲩⲧⲉ ⲡⲉⲡⲁⲛⲧⲟⲕⲣⲁⲧⲱⲣ ·
- pschrysostom.raphael:24
ⲅⲁⲃⲣⲓⲏⲗ ϩⲱⲱϥ ϫⲉⲛⲟⲩⲧⲉ ϩⲓⲣⲱⲙⲉ · ⲉⲧⲃⲉⲡⲁⲓ ⲁϥⲧⲟϣϥ ⲛⲇⲓⲁⲕⲟⲛⲓⲧⲏⲥ · ⲁⲩⲱⲛϥⲁⲓ ϣⲙⲛⲟⲩϥⲉ ⲙⲡⲛⲟⲩⲧⲉ ⲉⲧⲛⲁⲛⲣⲱⲙⲉ ·
- pschrysostom.raphael:25
ⲧϩⲉⲣⲙⲏⲛⲉⲓⲁ ⲅⲁⲣ ⲛϩⲣⲁⲫⲁⲏⲗ ⲡⲉ ⲡⲛⲟⲩⲧⲉ ⲉⲧϫⲓⲙⲟⲉⲓⲧ ϩⲏⲧⲟⲩ ⲛⲛⲣⲱⲙⲉ ·
- pschrysostom.raphael:26
ⲛϯϩⲉ ⲇⲉ ⲁⲡⲛⲟⲩⲧⲉ ϣⲉⲣⲡⲟⲛⲟⲙⲁⲍⲉ ⲙⲙⲟⲟⲩ ϩⲓⲧⲛⲧⲉϥϭⲓⲛ ϣⲉⲣⲡⲥⲟⲟⲩⲛ ⲛⲛⲉⲧⲛⲁϣⲱⲡⲉ ϩⲁⲧϩⲏ ⲙⲡⲁⲧⲟⲩϣⲱⲡⲉ ·
- pschrysostom.raphael:27
ⲙⲁⲣⲛⲕⲧⲟⲛ ⲗⲟⲓⲡⲟⲛ ⲉϫⲛⲧϩⲩⲡⲟⲑⲉⲥⲓⲥ ⲙⲡϣⲁϫⲉ : ⲛⲧⲛϣⲁϫⲉ ⲉⲧⲱⲃⲏⲇ ⲡϣⲏⲣⲉ ⲛⲧⲱⲃⲓⲏⲗ ·
- pschrysostom.raphael:28
ⲡⲉϫⲁϥ ⲅⲁⲣ ⲛⲧⲟϥ ⲧⲱⲃⲏⲇ · ϫⲉⲁⲛⲟⲕ ⲧⲱⲃⲏⲇ ⲛⲉⲓⲙⲟⲟϣⲉ ϩⲓⲛⲉϩⲓⲟⲩⲉ ⲛⲧⲙⲉⲉⲣⲉ ⲧⲇⲓⲕⲁⲓⲟⲥⲩⲛⲏ ϩⲛⲛⲁϭⲓϫ ⲛⲟⲩⲟⲉⲓϣ ⲛⲓⲙ ⲛⲛⲉϩⲟⲟⲩ ⲧⲏⲣⲟⲩ ⲙⲡⲁⲱⲛϩ ·
- pschrysostom.raphael:29
ⲁⲗⲏⲑⲱⲥ ⲟⲩⲣⲉϥⲙⲟⲟϣⲉ ϩⲓⲛⲉϩⲓⲟⲟⲩⲉ ⲛⲧⲙⲉ ⲡⲉ ⲧⲱⲃⲓⲇ · ⲁⲩⲱ ⲟⲩⲣⲉϥⲧⲙⲛⲧⲛⲁⲡⲉ ϩⲛⲟⲩⲛⲟϭ ⲛⲉⲩⲙⲉⲛⲓⲁ · ⲁⲩⲱ ⲛⲉⲟⲩⲣⲉϥϯⲁⲡⲁⲣⲭⲏ ⲡⲉ ϩⲓⲣⲉⲙⲏⲧ ⲉⲡⲏⲓ ⲙⲡⲛⲟⲩⲧⲉ · ⲡⲉ ⲡϣⲏⲣⲉ ⲛⲧⲱⲃⲓⲏⲗ ·
- pschrysostom.raphael:30
ⲉⲧⲃⲉⲛⲁⲓ ⲁⲛ ⲇⲓⲁⲃⲟⲗⲟⲥ ⲫⲑⲟⲛⲉⲓ ⲉⲣⲟϥ ⲁϥⲁⲁϥ ⲛⲃⲗⲗⲉ · ⲡⲛⲟⲩⲧⲉ ϩⲱⲱϥ ⲁϥϫⲟⲟⲥ ϩⲛⲧⲉϥⲧⲁⲡⲣⲟ ⲙⲡⲉⲡⲣⲟⲫⲏⲧⲏⲥ ⲉⲧⲟⲩⲁⲁⲃ ⲇⲁⲩⲉⲓⲇ ϫⲉⲉⲓⲥ ϩⲏⲏⲧⲉ ⲁⲓⲣϩⲗⲗⲟ ⲙⲡⲓⲛⲁⲩ ⲉⲩⲇⲓⲕⲁⲓⲟⲥ ⲉⲁⲡϫⲟⲉⲓⲥ ⲕⲁⲁϥ ⲛⲥⲱϥ ·
- pschrysostom.raphael:31
ⲗⲟⲓⲡⲟⲛ ⲁϥⲧⲛⲛⲟⲟⲩ ⲙⲡⲉϥⲁⲅⲅⲉⲗⲟⲥ ⲉⲧⲟⲩⲁⲁⲃ ϩⲣⲁⲫⲁⲏⲗ · ⲁϥⲭⲁⲣⲓⲍⲉ ⲛⲁϥ ⲙⲡⲟⲩⲟⲉⲓⲛ ⲛⲛⲉϥⲃⲁⲗ · ϩⲙⲡⲧⲣϥⲟⲩⲱϣ ⲇⲉ ⲟⲛ ⲉϫⲟⲟⲩ ⲙⲡⲉϥϣⲏⲣⲉ ⲧⲱⲃⲓⲁⲥ ⲉⲩⲁⲡⲟⲇⲩⲙⲓⲁⲉⲥⲟⲩⲏⲩ ·
- pschrysostom.raphael:32
ⲁϥⲧⲣⲉⲡⲁⲅⲅⲉⲗⲟⲥ ⲛⲁⲅⲁⲑⲟⲥ ϫⲓⲙⲟⲉⲓⲧ ϩⲏⲧϥ
- pschrysostom.raphael:33
ⲁⲩⲱ ⲡⲙⲁ ⲟⲛ ⲛⲧⲁϥⲃⲱⲕ ⲉⲣⲟϥ ⲁϥⲧⲁⲗϭⲉⲥⲁⲣⲣⲁ ⲧϣⲉⲉⲣⲉ ⲛϩⲣⲁⲅⲟⲩⲏⲗ · ⲁϥⲙⲟⲩⲣ ⲛⲁⲥⲙⲟⲇⲁⲓⲟⲥ ⲡⲣⲉϥϣⲟⲟⲣ ·
- pschrysostom.raphael:34
ⲛⲧⲉⲓϩⲉ ⲟⲛ ⲡⲏⲓ ⲙⲡϩⲏⲕⲉ ⲁϥⲙⲁϩϥ ⲛⲧⲉⲗⲏⲗ ⲡⲏⲓ ⲙⲡⲣⲙⲙⲁϥ ⲙⲁϩϥ ⲛⲣⲁϣⲉ · ⲡⲏⲓ ⲙⲡⲛⲟϭⲛⲉϭ ⲁϥⲙⲟϩϥ ⲛⲭⲟⲣⲁⲩⲗⲏⲥ · ⲁϥⲧⲣⲉⲧⲗⲩⲡⲏⲓ ⲙⲛⲡⲁϣⲁϩⲟⲙ ⲛϩⲣⲁⲅⲟⲩⲏⲗⲡⲱⲧⲉⲡⲟⲩⲉ :
- pschrysostom.raphael:35
ⲁⲩⲱ ⲟⲛ ⲁϥϥⲱⲧⲉ ⲉⲃⲟⲗ ⲛⲛⲣⲙⲉⲓⲟⲟⲩⲉ ϩⲛⲛⲉⲥⲃⲁⲗ · ⲁⲩⲱ ⲁϥϫⲓ ⲛⲛⲉϣⲗⲏⲗ ⲛⲥⲁⲣⲣⲁ ϣⲁⲧⲙⲉϩⲥⲁϣϥⲉ ⲙⲡⲉ · ϣⲁⲡⲛⲟⲩⲧⲉ ⲡⲡⲁⲛⲧⲟⲕⲣⲁⲧⲱⲣ ·
- pschrysostom.raphael:36
ⲡⲉⲓⲁⲅⲅⲉⲗⲟⲥ ⲅⲁⲣ ⲱ ⲛⲁⲙⲉⲣⲁⲁⲧⲉ ⲟⲩⲁⲅⲅⲉⲗⲟⲥ ⲛⲁⲅⲁⲑⲟⲥ ⲡⲉ ·
- pschrysostom.raphael:37
ⲟⲩⲗⲩⲧⲟⲩⲣⲅⲟⲥ ⲡⲉ · ⲟⲩϣⲁϩ ⲛⲥⲁⲧⲉ ⲡⲉ · ⲁⲩⲱ ⲉⲩⲡⲛⲉⲩⲙⲁ ⲡⲉ · ⲟⲩⲣⲙⲛϩⲓⲏ ⲉϥⲛϩⲟⲧ ⲡⲉ · ⲟⲩⲁⲥⲱⲙⲁⲧⲟⲥ ⲡⲉ · ⲟⲩⲁⲣⲭⲁⲅⲅⲉⲗⲟⲥ ⲟⲛ ⲡⲉ · ⲟⲩⲣⲙⲛⲇⲓⲁⲕⲟⲛⲉⲓ ⲕⲁⲗⲱⲥ ⲡⲉ · ⲟⲩⲁⲅⲉⲣⲁⲣⲭⲏⲥ ⲡⲉ ⲟⲩⲣⲉϥⲣϩⲱⲃ ⲡⲉ ⲛⲟⲙⲓⲥⲑⲟⲥ · ⲟⲩⲥⲁⲉⲓⲛ ⲡⲉ ⲛⲣⲉϥⲧⲁⲗϭⲟ ⲙⲉϥϫⲓⲃⲉⲕⲉ ·
- pschrysostom.raphael:38
ⲛⲁⲓ ⲇⲉ ⲧⲏⲣⲟⲩⲛⲧⲁⲓϫⲟⲟⲩ ⲛⲧⲁⲡⲉⲓⲁⲣⲭⲁⲅⲅⲉⲗⲟⲥ ⲛϩⲁⲣϣϩⲏⲧ ⲁⲁⲩ · ϩⲓⲧⲛⲧⲕⲉⲗⲉⲩⲥⲓⲥ ⲙⲡⲉϥⲧⲉⲭⲛⲓⲧⲏⲥ ⲡⲛⲟⲩⲧⲉ ·
- pschrysostom.raphael:39
ⲧⲉⲧⲛⲟⲩⲱϣ ⲇⲉ ⲉⲉⲓⲙⲉ ⲱ ⲛⲉⲥⲛⲏⲩ ⲙⲙⲉⲣⲓⲧ · ϫⲉⲛⲉⲣⲁⲛ ⲧⲏⲣⲟⲩ ⲧⲟⲟⲙⲉ ⲉⲡⲉⲓⲁⲣⲭⲁⲅⲅⲉⲗⲟⲥ ⲛϣⲁⲛϩⲧⲏϥ · ϯⲛⲁⲟⲩⲉⲛϩⲡϩⲱⲃ ⲛⲏⲧⲛ ⲉⲃⲟⲗ ·
- pschrysostom.raphael:40
ⲉⲡⲉⲓⲇⲏ ⲁⲓϫⲟⲟⲥ ϫⲉⲟⲩⲁⲅⲅⲉⲗⲟⲥ ⲛⲁⲅⲁⲑⲟⲥ ⲡⲉ ·
- pschrysostom.raphael:41
ⲉⲓⲥ ⲧⲉϥⲙⲛⲧϩⲁⲣϣϩⲏⲧ ⲁⲥⲟⲩⲱⲛϩ ⲙⲙⲟϥ ⲉⲃⲟⲗ · ⲉⲃⲟⲗ ϫⲉⲟⲩⲁⲅⲅⲉⲗⲟⲥ ⲉϥⲇⲓⲁⲕⲟⲛⲉⲓ ⲙⲙⲟϥ ϩⲱⲟⲩ ⲙⲛⲧⲥⲙⲏⲧ ϣⲁϩⲣⲁⲓ ⲉⲥⲙⲛⲧϭⲓⲛⲟⲩⲱⲙ ⲛⲁϥ ·
- pschrysostom.raphael:42
ⲟⲩⲣⲱⲙⲉ ⲡⲉ · ⲟⲩⲗⲩⲧⲟⲩⲣⲅⲟⲥ ⲡⲉ ⲉϥⲁⲁϩ ⲉⲣⲁⲧϥ ⲉⲡⲣⲣⲟ ⲛⲁⲧⲙⲟⲩ ⲡⲉⲭⲣⲓⲥⲧⲟⲥ
- pschrysostom.raphael:43
ⲉϥⲗⲩⲧⲟⲩⲣⲅⲉⲓ ⲉⲡⲉϥⲟⲩⲉϩⲥⲁϩⲛⲉ · ⲕⲁⲧⲁⲡϣⲁϫⲉ ⲙⲡⲗⲁⲥ ⲙⲡⲉⲥϯⲛⲟⲩϥⲉ ⲡⲁⲩⲗⲟⲥ · ϫⲉⲙⲏ ⲛϩⲉⲛⲗⲩⲧⲟⲩⲣⲅⲓⲕⲟⲛ ⲁⲛ ⲛⲉ ⲙⲡⲛⲁⲙⲁ ⲧⲏⲣⲟⲩ ⲛⲉ · ⲉⲩⲧⲛⲛⲟⲟⲩ ⲙⲙⲟⲟⲩ ⲉϩⲉⲛⲇⲓⲁⲕⲟⲛⲓⲁ ⲉⲧⲃⲉⲛⲉⲧⲛⲁⲕⲗⲏⲣⲟⲛⲟⲙⲉⲓ ⲛⲟⲩⲟⲩϫⲁⲓ · ⲕⲛⲁⲩ ⲉⲧⲙⲛⲧⲙⲛⲧⲣⲉ ⲉⲧⲛϩⲟⲧ :
- pschrysostom.raphael:44
ⲟⲩⲡⲛⲉⲩⲙⲁ ⲡⲉ ⲕⲁⲧⲁⲧⲉⲡⲣⲟⲫⲏϯⲁ ⲛⲇⲁⲩⲉⲓⲇ · ϫⲉⲡⲉⲧⲧⲁⲙⲓⲟ ⲛⲛⲉϥⲁⲅⲅⲉⲗⲟⲥ ⲙⲡⲛⲉⲩⲙⲁ ⲟⲩϣⲁϩ ⲛⲥⲁⲁⲧⲉ ⲡⲉ ⲕⲁⲧⲁⲡⲉⲧⲥⲏϩ · ϫⲉⲛⲉϥⲗⲉⲓⲧⲟⲩⲣⲅⲟⲥ ⲛϣⲁϩ ⲛⲥⲁⲧⲉ ·
- pschrysostom.raphael:45
ⲟⲩⲣⲙⲛϩⲓⲏ ⲡⲉ · ⲉⲧⲃⲉϫⲉⲁϥϫⲓⲙⲟⲉⲓⲧ ϩⲏⲧϥ ⲛⲧⲱⲃⲓⲁⲥ ⲉⲩⲕⲁϩ ⲛϣⲙⲙⲟ · ⲉϫⲛ ⲉⲡⲗⲁⲡⲧⲉⲓ ⲗⲁⲁⲩ .
- pschrysostom.raphael:46
ⲟⲩⲁⲣⲭⲏⲙⲁⲅⲉⲣⲟⲥ ⲅⲁⲣ ⲡⲉ · ϫⲉⲁϥⲥⲙⲛⲡⲧⲃ ⲙⲡϣⲏⲣⲉ ϣⲏⲙ ·
- pschrysostom.raphael:47
ⲟⲩⲁⲅⲅⲉⲗⲟⲥ ⲣⲱ ⲡⲉ ·
- pschrysostom.raphael:48
ⲟⲩⲛⲩⲙⲫⲁⲅⲱⲅⲟⲥ ⲟⲛ ⲡⲉ ϫⲉⲛⲧⲟϥ ⲁϥϣⲁϫⲉ ϩⲁⲧⲱⲃⲓⲁⲥ · ⲁϥⲉⲓⲣⲉ ⲛⲧϣⲉⲗⲉⲉⲧ ·
- pschrysostom.raphael:49
ⲟⲩⲁⲥⲱⲙⲁⲧⲟⲥ ϫⲉⲙⲡⲉϥⲧⲉⲡⲗⲁⲁⲩ ⲛⲛⲉϩⲟⲟⲩ ⲧⲏⲣⲟⲩ ⲛⲧⲁϥⲙⲟⲟϣⲉ ⲛⲙⲙⲁϥ ·
- pschrysostom.raphael:50
ⲟⲩⲡⲣⲉⲥⲃⲉⲩⲧⲏⲥ ⲡⲉ ⲉⲧⲃⲉϫⲉⲛⲧⲟϥ ⲁϥⲥⲟⲡⲥⲡ ⲙⲡⲁⲛⲁϩⲱⲣ ⲛⲧⲙⲛⲧϣⲁ ⲛϩⲧⲏϥ ⲡⲉⲭⲣⲓⲥⲧⲟⲥ ϩⲁⲧⲱⲃⲓⲇ ⲙⲛⲧⲱⲃⲓⲁⲥ · ⲡⲉϥϣⲏⲣⲉ ⲙⲛⲥⲁⲣⲣⲁ
- pschrysostom.raphael:51
ⲟⲩⲁⲕⲉⲣⲁⲣⲭⲏⲥ ⲡⲉ ϫⲉⲉⲣⲉⲧⲱⲃⲓⲁⲥ ϩⲙⲡⲙⲁ ⲛϣⲉⲗⲉⲉⲧ :
- pschrysostom.raphael:52
ⲁϥϫⲓ ⲛⲟⲩϭⲁⲙⲟⲩⲗ ⲉⲉⲕⲃⲁⲧⲁⲛⲟⲥ ⲁϥⲉⲓⲛⲉ ⲛⲛϩⲁⲧ ·
- pschrysostom.raphael:53
ⲟⲩϩⲓⲁⲧⲣⲟⲥ ⲡⲉ ⲉⲧⲃⲉϫⲉ ⲁϥⲑⲉⲣⲁⲡⲉⲩⲉ ⲛⲛⲃⲁⲗ ⲛⲧⲱⲃⲏⲇ ⲡⲣⲱⲙⲉ ⲛⲛⲁⲏⲧ ⲡⲉ ⲛⲧⲁϥϫⲟⲟⲥ ⲙⲡⲉϥϣⲏⲣⲉ · ϫⲉⲛⲧϩⲉ ⲉⲧⲉⲟⲩⲛⲧⲁⲕ · ⲕⲁⲧⲁⲡⲉⲕϩⲟⲩⲟ ⲁⲣⲓⲙⲛⲧⲛⲁ · ⲡⲛⲉⲩⲙⲁ ⲅⲁⲣ ϣⲁϥⲛⲉϩ ⲙⲡⲣⲱⲙⲉ ⲉⲡⲙⲟⲩ ·
- pschrysostom.raphael:54
ⲟⲩⲁⲣⲭⲏⲥⲧⲣⲁⲧⲏⲅⲟⲥ ⲡⲉ ϫⲉⲁϥⲙⲟⲩⲣ ⲛⲁⲥⲙⲟⲇⲁⲓⲟⲥ ·
- pschrysostom.raphael:55
ⲟⲩⲁⲙⲓⲥⲑⲩⲥⲧⲟⲥ ⲡⲉ ϫⲉⲙⲡⲉϥϫⲓⲡⲃⲉⲕⲉ ⲛⲧⲁⲩⲥⲙⲛⲧϥ ⲛⲙⲙⲁϥ ·
- pschrysostom.raphael:56
ⲟⲩϩⲩⲡⲉⲣⲉⲧⲏⲥ ⲡⲉ ⲉⲛⲁⲛⲟⲩϥ · ϫⲉⲁϥϩⲩⲡⲉⲣⲉⲧⲏ ⲛⲛⲉⲧϥⲣⲭⲣⲉⲓⲁ ⲙⲙⲟⲟⲩⲧⲏⲣⲟⲩ
- pschrysostom.raphael:57
ⲟⲩⲣⲉϥⲇⲓⲁⲕⲟⲛⲉⲓ ⲡⲉ ϫⲉⲁϥⲁϩⲉⲣⲁⲧϥ ϩⲓϫⲱϥ ⲁϥⲇⲓⲁⲕⲟⲛⲉⲓ ⲛⲧϩⲉ ⲛⲟⲩϩⲙϩⲁⲗ ⲙⲡⲓⲥⲧⲟⲥ ·
- pschrysostom.raphael:58
ⲱ ⲡⲡⲉⲗⲁⲅⲟⲥ ⲛⲧⲙⲛⲧϣⲁⲛϩⲧⲏϥ ⲙⲡⲛⲟⲩⲧⲉ · ⲱ ⲧⲙⲛⲧⲥⲙⲏⲧ ⲙⲡⲉⲓⲁⲣⲭⲁⲅⲅⲉⲗⲟⲥ · ⲡⲁⲓ ⲉⲧⲁϩⲉⲣⲁⲧϥ ⲉⲡϫⲟⲉⲓⲥ ⲥⲁⲃⲁⲱⲑ · ⲁϥⲁϩⲉⲣⲁⲧϥ ⲉϫⲛⲟⲩⲣⲱⲙⲉ ⲉⲇⲓⲁⲕⲟⲛⲉⲓ :
- pschrysostom.raphael:59
ⲁⲩⲉⲓⲥ ϭⲉ ⲟⲩⲛ ⲱ ⲛⲁⲙⲉⲣⲁⲧⲉ · ⲛⲧⲛⲉⲓ ⲛⲉⲧⲙⲏⲏⲧⲉ · ⲛⲧⲛϫⲱ ⲉⲣⲱⲧⲛ · ⲛϩⲉⲛⲕⲟⲩⲓ ⲉⲧⲃⲉ : ⲡⲉⲙⲁⲣⲧⲏⲣⲓⲟⲛ ⲡⲁⲓ ⲉⲧⲛⲥⲟⲟⲩϩ ⲉⲣⲟϥ ⲉⲡⲣⲁⲛ ⲙⲡⲁⲣⲭⲁⲅⲅⲉⲗⲟⲥ ·
- pschrysostom.raphael:60
ⲁⲥϣⲱⲡⲉ ⲇⲉ ⲙⲙⲟⲓ ⲛⲟⲩϩⲟⲟⲩ ⲁⲛⲟⲕ ⲓⲱϩⲁⲛⲛⲏⲥ ⲉⲓⲉⲓⲣⲉ ⲛⲧⲁⲥⲩⲛⲁⲝⲓⲥ ⲙⲡⲛⲁⲩ ⲛϫⲡⲥⲟ ⲁⲩⲛⲟϭ ⲛⲟⲩⲟⲉⲓⲛ ϣⲁ ϩⲙⲡⲏⲓ ⲉⲛⲉⲓ ⲛϩⲏⲧϥ · ⲉⲓⲥ ⲟⲩϩⲣϣⲓⲣⲉ ⲉⲛⲉⲥⲉϩⲣⲁϥ ⲉⲙⲁⲧⲉ ·
- pschrysostom.raphael:61
ⲁϥⲉⲓ ⲉϩⲟⲩⲛ ⲛϣⲁⲣⲟⲓ ⲉⲣⲉⲟⲩⲛⲟϭ ⲛⲉⲟⲟⲩ ⲕⲱⲧⲉ ⲉⲣⲟϥ · ⲉⲣⲉⲟⲩϭⲉⲣⲱⲃ ⲛⲛⲟⲩⲃ ϩⲛⲧⲉϥϭⲓϫ ⲛⲟⲩⲛⲁⲙ · ⲉⲟⲩⲛⲟⲩⲥⲧⲁⲩⲣⲟⲥ ϩⲓϫⲱϥ · ⲁϥⲙⲟⲩⲧⲉ ⲉⲣⲟⲓ ⲛϣⲟⲙⲛⲧ ⲛⲥⲟⲡ ⲉϥϫⲱ ⲙⲙⲟⲥ ϫⲉⲓⲱϩⲁⲛⲛⲏⲥ ⲡⲕⲁϣ ⲙⲡⲉⲡⲛⲉⲩⲙⲁ ⲉⲧⲟⲩⲁⲁⲃ · ⲓⲱϩⲁⲛⲛⲏⲥ ⲡⲗⲁⲥ ⲛⲣⲉϥⲑⲉⲣⲁⲡⲉⲩⲉ ⲛⲛⲉⲯⲩⲭⲏ ⲛⲧⲁⲩⲟⲩⲱϣϥ ϩⲙⲡⲛⲟⲃⲉ · ⲓⲱϩⲁⲛⲛⲏⲥ ⲡⲗⲁⲥ ⲛⲣⲉϥϣⲁϫⲉ ϩⲓϫⲙⲡⲕⲁϩ · ⲉⲧⲣⲉϥⲡⲉⲓⲑⲉ ⲙⲡⲛⲟⲩⲧⲉ ϩⲛⲧⲙⲉϩⲥⲁϣϥⲉ ⲙⲡⲉ ·
- pschrysostom.raphael:62
ⲁⲛⲟⲕ ⲇⲉ ⲛⲧⲉⲣⲓⲥⲱⲧⲙ ⲉⲛⲁⲓ · ⲁⲓϣⲧⲟⲣⲧⲣ ⲁⲩⲱ ⲁⲓϩⲉ ϩⲁⲛⲉϥⲟⲩⲣⲏⲏⲧⲉ · ⲉⲧⲣⲁⲟⲩⲱϣⲧ ⲛⲁϥ · ⲁϥⲁⲙⲁϩⲧⲉ ⲛⲧⲁϭⲓϫ ⲁϥⲧⲟⲩⲛⲟⲥⲧ ⲡⲉϫⲁϥ ⲛⲁⲓ ϫⲉⲙⲡⲣⲣϩⲟⲧⲉ · ⲙⲡⲱⲣ ⲁⲛⲅⲡⲉⲕϣⲃⲏⲣ ϩⲙϩⲁⲗ · ⲟⲩⲱϣⲧ ⲙⲡⲛⲟⲩⲧⲉ ·
- pschrysostom.raphael:63
ⲡⲉϫⲁⲓ ⲛⲁϥ ϩⲛⲟⲩⲥⲧⲱⲧ ϫⲉⲛⲧⲕ ⲛⲓⲙ · ⲛⲧⲉⲓϩⲉ ⲡⲁϫⲟⲉⲓⲥ · ⲉⲣⲉⲡⲉⲓⲛⲟϭ ⲛⲉⲟⲟⲩ ⲕⲱⲧⲉ ⲉⲣⲟⲕ · ⲙⲡⲓⲛⲁⲩ ⲉⲟⲩⲟⲛ ⲛⲧⲉⲕϩⲉ ⲉⲛⲉϩ
- pschrysostom.raphael:64
ⲛⲧⲟϥ ⲇⲉ ⲁϥϥⲓ ⲛⲧϩⲟⲧⲉ ⲛⲥⲁⲃⲟⲗ ⲙⲙⲟⲓ · ⲡⲉϫⲁϥ ⲛⲁⲓ ϫⲉⲁⲛⲟⲕ ⲡⲉϩⲣⲁⲫⲁⲏⲗ · ⲟⲩⲁ ⲉⲃⲟⲗ ϩⲙⲡⲥⲁϣϥ ⲛⲁⲣⲭⲁⲅⲅⲉⲗⲟⲥ ·
- pschrysostom.raphael:65
ⲁⲛⲟⲕ ⲡⲉ ϩⲣⲁⲫⲁⲏⲗ ⲡⲉⲛⲧⲁⲡⲁⲇⲉⲥⲡⲟⲧⲏⲥ ϩⲟⲧⲣⲉϥ ⲙⲛⲫⲓⲗⲟⲑⲉⲟⲥ ⲁⲓⲡⲣⲟⲥⲉⲛⲉⲅⲕⲉ ⲙⲙⲟϥ ⲙⲡⲉϥⲉⲓⲱⲧ ⲙⲛⲧⲉϥⲙⲁⲁⲩ ⲙⲡⲉⲭⲣⲓⲥⲧⲟⲥ ⲓⲏⲥⲟⲩⲥ ·
- pschrysostom.raphael:66
ⲁⲛⲟⲕ ⲡⲉ ϩⲣⲁⲫⲁⲏⲗ ⲡⲁⲣⲭⲁⲅⲅⲉⲗⲟⲥ ⲉⲁⲡⲉⲭⲣⲓⲥⲧⲟⲥ ⲧⲁⲁⲕ ⲉⲧⲟⲟⲧ ϫⲓⲛⲉⲕⲟ ⲛⲕⲟⲩⲓ ·
- pschrysostom.raphael:67
ⲁⲩⲱ ⲟⲛ ϫⲓⲛⲙⲡⲉϩⲟⲟⲩ ⲛⲧⲁⲩϫⲡⲟⲕ ϣⲁϩⲣⲁⲓ ⲉⲡϩⲟⲟⲩ ⲛϩⲟⲟⲩ ⲉⲙⲉⲓⲥⲛⲧⲉⲕ ⲉⲃⲟⲗ ⲛⲟⲩⲟⲩⲛⲟⲩ ⲛⲟⲩⲱⲧ : ⲏ ⲧⲡⲁϣⲉ ⲛⲟⲩⲟⲩⲛⲟⲩ ϣⲁⲡⲣⲓⲕⲉ ⲛⲟⲩⲃⲁⲗ ·
- pschrysostom.raphael:68
ⲁⲩⲱ ⲟⲛ ⲛϯⲛⲁⲥⲛⲧⲕ ⲉⲃⲟⲗ ⲁⲛ ϣⲁⲡⲉϩⲟⲟⲩ ⲉϯⲛⲁϫⲓⲧⲕ ϣⲁⲡⲣⲣⲟ ⲡⲉⲭⲣⲓⲥⲧⲟⲥ ⲛⲧⲉϥⲧⲁⲁⲕ ⲉⲧⲟⲟⲧ ⲉⲕⲟ ⲛⲁⲧⲧⲱⲗⲙ · ϣⲁϩⲣⲁⲓ ⲉⲡⲏⲓ ⲙⲡⲥⲁϩ ⲛⲧⲁϥⲧⲥⲁⲃⲟⲕ ⲉⲥϩⲁⲓ ·
- pschrysostom.raphael:69
ⲁⲩⲱ ⲟⲛ ϣⲁϩⲣⲁⲓ ⲉⲧⲉⲕϭⲓⲛϫⲓⲟⲟⲣ ⲛⲧⲑⲁⲗⲁⲥⲥⲁ · ϣⲁⲁⲑⲉⲛⲛⲁⲓⲥ ⲙⲛⲃⲉⲣⲏⲧⲟⲥ · ⲛⲉⲛⲧⲁⲕⲃⲱⲕ ⲉⲣⲟⲟⲩ .
- pschrysostom.raphael:70
ⲛⲉⲓⲙⲟⲟϣⲉ ⲛⲙⲙⲁⲕ ⲡⲉ ⲉⲓⲥⲟⲃⲧⲉ ⲛⲛⲉⲕⲙⲁ ⲙⲙⲟⲟϣⲉ · ⲁⲩⲱ ⲉⲓϩⲓϯⲙⲁⲍⲉⲛⲙⲙⲁⲑⲏⲙⲁ ⲙⲡⲉⲕⲛⲟⲩⲥ · ⲙⲛⲡⲉⲕϩⲏⲧ · ⲛⲧϩⲉ ⲙⲡⲟⲩⲟⲉⲉⲓ ⲉⲧϣⲉⲣⲡⲥⲟⲃⲧⲉ ⲛⲛⲉϥⲉⲃⲣⲁ · ⲁⲩⲱ ⲉⲧϭⲱϫⲉ ⲙⲡⲙⲟⲟⲩ ⲉⲛⲉⲧⲗⲟⲙ · ⲧⲉⲛⲟⲩ ϭⲉ ϫⲣⲟ ⲛⲅϭⲙϭⲟⲙ ·
- pschrysostom.raphael:71
ⲙⲡⲣⲣϩⲟⲧⲉ ⲱ ⲡϩⲟⲙⲟⲗⲟⲅⲓⲧⲏⲥ ⲛϣⲡⲏⲣⲉ · ⲉⲃⲟⲗ ϫⲉⲁⲛⲅⲟⲩⲣⲉϥϯϩⲟⲧⲉ ⲁⲛ ⲛⲛⲉⲯⲩⲭⲏ · ⲁⲗⲗⲁ ⲁⲛⲅⲟⲩⲣⲉϥϯϭⲛⲛⲉ ⲛⲛⲉⲯⲩⲭⲏ . ⲥⲉⲙⲟⲩⲧⲉ ⲅⲁⲣ ⲉⲣⲟⲓ ϩⲓⲧⲛⲛⲁϣⲃⲏⲣ ⲁⲅⲅⲉⲗⲟⲥ · ϫⲉⲡⲁⲅⲅⲉⲗⲟⲥ ⲙⲙⲁⲧⲛϩⲏⲧ ·
- pschrysostom.raphael:72
ϫⲣⲟ ⲁⲩⲱ ⲙⲁⲣⲉⲡⲉⲕϩⲏⲧ ⲧⲱⲕ · ⲙⲡⲣⲣϩⲟⲧⲉ ϫⲉⲁⲛⲟⲕ ⲡⲁⲡⲉ ϣⲧⲟⲣⲧⲣ ⲁⲛ · ⲁⲗⲗⲁ ⲁⲛⲟⲕ ⲡⲁⲧⲉⲓⲣⲏⲛⲏ :
- pschrysostom.raphael:73
ⲧⲉⲛⲟⲩ ϭⲉ ⲱ ⲓⲱϩⲁⲛⲛⲏⲥ · ⲉⲓⲥ ⲡⲣⲣⲟ ⲁⲣⲕⲁⲇⲏⲥ ⲛⲁϫⲛⲟⲩⲕ ⲉⲩϣⲁϫⲉ ⲛⲣⲁⲧⲉ · ϫⲉϥⲛⲁⲕⲱ ⲛⲁⲓ ⲛⲟⲩⲙⲁⲣⲧⲏⲣⲓⲟⲛ ϩⲙⲡⲁⲣⲁⲛ ·
- pschrysostom.raphael:74
ⲡⲣⲟⲧⲣⲉⲡⲉ ⲙⲙⲟϥ ϩⲛⲛⲉⲕϣⲁϫⲉ ⲉⲧϭⲏⲛ · ⲉⲃⲟⲗ ϫⲉϥⲥⲏϩ · ϫⲉⲡⲗⲁⲥ ⲙⲡⲇⲓⲕⲁⲓⲟⲥ ⲥⲟⲧⲡ ⲉϩⲟⲩⲉ ⲡⲛⲟⲩⲃ ⲙⲛⲡϩⲁⲧ · ⲁⲩⲱ ⲛⲅϯⲟⲩⲣⲟⲧ ⲛⲁϥ ⲉⲧⲟⲓⲕⲟⲇⲟⲙⲏ ⲙⲡⲁⲧⲟⲡⲟⲥ ·
- pschrysostom.raphael:75
ⲉⲕϣⲁⲛϩⲁⲅⲓⲁⲍⲉ ⲙⲡⲁⲧⲟⲡⲟⲥ ϩⲛⲛⲧⲁⲉⲓⲟ ⲙⲛⲛϯⲙⲏ ⲉⲧⲉⲣⲉⲡⲣⲣⲟ ⲙⲙⲁⲓⲛⲟⲩⲧⲉ ⲛⲁⲧⲁⲛⲁ...ⲧⲁⲧⲟϩⲓⲟⲩ ·
- pschrysostom.raphael:76
ⲧⲁⲩⲉⲛⲉⲓϣⲁϫⲉ ⲉⲡⲣⲣⲟ ⲛⲉⲩⲥⲉⲃⲏⲥ · ...ⲧⲙⲉⲣⲟⲑⲏⲕⲏ .. ⲉⲭⲣⲓⲥⲧⲟⲥ · ⲡⲉⲧⲉⲣⲉ..ⲟϭ ⲛⲙⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲉⲧⲟ ⲛⲥϯⲛⲟⲩϥⲉ · ⲉϥϣⲟⲩⲟ ⲉⲃⲟⲗ ϩⲛⲧⲉϥⲧⲁⲡⲣⲟ ·
- pschrysostom.raphael:77
ⲧⲱⲕ ⲛϩⲏⲧ ⲧⲉⲓⲣⲏⲛⲏ ⲙⲡⲉⲓⲱⲧ ⲙⲛⲡϣⲏⲣⲉ ⲙⲛⲡⲉⲡⲛⲉⲩⲙⲁ ⲉⲧⲟⲩⲁⲁⲃ ⲉⲥⲉϣⲱⲡⲉ ⲛⲙⲙⲁⲕ ·
- pschrysostom.raphael:78
ⲛⲧⲉⲣϥϫⲉⲛⲁⲓ ⲛϭⲓⲡⲁⲣⲭⲁⲅⲅⲉⲗⲟⲥ · ⲁϥⲃⲱⲕ ⲉϩⲣⲁⲓ ⲉⲙⲡⲏⲩⲉ ϩⲛⲟⲩⲛⲟϭ ⲛⲉⲟⲟⲩ ·
- pschrysostom.raphael:79
ⲁⲛⲟⲕ ⲇⲉ ⲓⲱϩⲁⲛⲛⲏⲥ ⲙⲡⲓⲟⲩⲱⲙ ⲟⲩⲇⲉ ⲙⲡⲓⲥⲱ ⲙⲡⲉϩⲟⲟⲩ ⲉⲧⲙⲙⲁⲩ · ⲉⲧⲃⲉⲡⲧⲉⲗⲏⲗ ⲉⲧϩⲙⲡⲁϩⲏⲧ ϩⲓⲧⲛⲧϭⲓⲛϣⲁϫⲉ ⲛⲙⲙⲁⲓ ⲙⲡⲁⲣⲭⲁⲅⲅⲉⲗⲟⲥ ·
- pschrysostom.raphael:80
ⲁϥϣⲱⲡⲉ ⲇⲉ ⲙⲡⲉϥⲣⲁⲥⲧⲉ ⲁⲡⲣⲣⲟ ⲛⲉⲩⲥⲉⲃⲏⲥ ⲁⲣⲕⲁⲇⲓⲟⲥ · ⲉⲓ ϣⲁⲧⲁⲙⲛⲧⲉⲗⲁⲭⲓⲥⲧⲟⲥ ⲉⲡⲡⲁⲧⲣⲓⲁⲣⲭⲓⲟⲛ · ⲁϥϫⲓⲥⲙⲟⲩ ⲉⲃⲟⲗ ϩⲓⲧⲟⲟⲧ ·
- pschrysostom.raphael:81
ⲁⲩⲱ ⲡⲉϫⲁⲓ ⲛⲁϥ ϫⲉϩⲙⲟⲟⲥ ⲛⲁⲕ ⲱ ⲡⲙⲁⲓⲡⲉⲭⲣⲓⲥⲧⲟⲥ · ⲱ ⲡⲉⲛⲧⲁϥϩⲟϫϩϫ ⲙⲡⲉϥⲡⲛⲉⲩⲙⲁ · ⲉⲧⲃⲉⲧⲟⲓⲕⲟⲇⲟⲙⲏ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ϩⲣⲁⲫⲁⲏⲗ · ⲱ ⲡⲉⲛⲧⲁⲡⲉϥⲣⲡⲙⲉⲉⲩⲉ ⲉⲧⲛⲁⲛⲟⲩϥ ⲧⲣⲉϥⲥⲁϩⲉⲡϩⲓⲛⲏⲃ ⲛⲥⲁⲃⲟⲗ ⲙⲙⲟϥ · ⲱ ⲡⲉⲛⲧⲁⲡⲣ ⲡⲙⲉⲉⲩⲉ ⲛⲧⲇⲓⲁⲕⲟⲛⲓⲁ ⲛⲛⲉⲧⲟⲩⲁⲁⲃ ⲧⲣⲉϥⲣⲡⲱⲃϣ ⲛⲧⲁⲡⲟⲗⲁⲩⲥⲓⲥ ⲛⲧⲙⲛⲧⲣⲣⲟ . ⲛⲁⲓⲁ...ⲱ ⲡⲉⲧⲛⲁⲛⲟⲩϥ ⲛⲁⲛⲟⲩϥ ⲛⲁϣⲱⲡⲉ ⲙⲙⲟⲕ ·
- pschrysostom.raphael:82
ⲟⲛⲧⲱⲥ ⲁϥϫⲱⲕ ⲉⲃⲟⲗ ⲉϫⲱⲕ · ⲛϭⲓⲡϣⲁϫⲉ ⲙⲡⲑⲉⲥⲡⲉⲥⲓⲟⲥ ⲡⲁⲩⲗⲟⲥ · ϫⲉⲁⲧⲉⲧⲛⲇⲓⲁⲕⲟⲛⲉⲓ ⲉⲛⲉⲧⲟⲩⲁⲁⲃ · ⲁⲩⲱ ⲟⲛ ϫⲉⲛⲟⲩⲁⲇⲓⲕⲟⲥ ⲁⲛ ⲡⲉ ⲡⲛⲟⲩⲧⲉ ⲉⲣⲡⲱⲃϣ ⲙⲡⲉⲧⲛϩⲱⲃ · ⲙⲛⲧⲁⲅⲁⲡⲏ ⲛⲧⲁⲧⲉⲧⲛⲟⲩⲟⲛϩⲥ ⲉⲃⲟⲗ ⲉⲡⲉϥⲣⲁⲛ ·
- pschrysostom.raphael:83
ⲛⲧⲉⲣⲉⲓ ϫⲉⲛⲁⲓ ⲇⲉ ⲛⲁϥ ⲁϥⲟⲩⲱⲛ.. ⲉⲃⲟⲗ ⲛϭⲓⲡⲣⲣⲟ ⲉⲧⲥⲙⲁⲙⲁⲁⲧ ⲛⲟⲩⲛⲟϭ ⲛⲛⲁⲩ ·
- pschrysostom.raphael:84
ⲁϥⲟⲩⲱϣⲃ ⲡⲉϫⲁϥ ⲛⲁⲓ ϫⲉⲛⲁⲓⲁⲧⲛ ⲁⲛⲟⲛ ⲡⲓⲥⲣⲁⲏⲗ · ϫⲉⲛⲉⲧⲣⲁ ⲛⲁϥ ⲙⲡⲛⲟⲩⲧⲉ ⲥⲉⲟⲩⲟⲛϩ ⲛⲁⲛ ⲉⲃⲟⲗ ⲛⲁⲓⲁⲧⲛ ⲟⲛ ϫⲉⲁⲡⲛⲟⲩⲧⲉ ⲧⲟⲩⲛⲟⲥ ⲛⲁⲛ ⲛⲟⲩⲉⲓⲱⲧ · ⲛⲧⲉⲓⲙⲓⲛⲉ ⲙⲡⲛⲉⲩⲙⲁⲧⲓⲕⲟⲛ ·
- pschrysostom.raphael:85
ϩⲛⲟⲩⲙⲉ ⲅⲁⲣ ⲛⲧⲟⲕ ⲟⲩⲁⲅⲅⲉⲗⲟⲥ ⲉⲕⲙⲟⲟϣⲉ ϩⲓϫⲙⲡⲕⲁϩ ⲙⲛⲛⲣⲱⲙⲉ ·
- pschrysostom.raphael:86
ⲗⲟⲓⲡⲟⲛ ⲁϥϫⲱⲕ ⲉⲃⲟⲗ ⲉϫⲱⲕ ⲛϭⲓⲡϣⲁϫⲉ ⲙⲡϩⲩⲙⲛⲟⲇⲟⲥ ⲉⲧⲟⲩⲁⲁⲃ ⲇⲇ ϫⲉⲧⲅⲉⲛⲉⲁ · ⲛⲛⲉⲧⲥⲟⲩⲧⲱⲛ ⲛⲁϫⲓⲥⲙⲟⲩ ·
- pschrysostom.raphael:87
ⲗⲟⲓⲡⲟⲛ ⲱ ⲡⲁⲉⲓⲱⲧ ⲉⲧⲟⲩⲁⲁⲃ · ⲉⲓⲥⲟⲩⲙⲏⲏϣⲉ ⲛϩⲟⲟⲩ ⲡⲁϩⲏⲧ ⲟϫⲓⲃⲉ ⲙⲙⲟⲓ · ⲉⲧⲃⲉⲧⲟⲓⲕⲟⲇⲟⲙⲏ ⲙⲡⲧⲟⲡⲟⲥ ⲙⲡⲁⲣⲭⲁⲅⲅⲉⲗⲟⲥ ⲉⲧⲟⲩⲁⲁⲃ ϩⲣⲁⲫⲁⲏⲗ ·
- pschrysostom.raphael:88
ϣⲉⲛⲉⲕϣⲗⲏⲗ ⲉⲧⲟⲩⲁⲁⲃ · ⲙⲡⲉⲓϫⲓⲟⲩ ⲣⲕⲣⲓⲕⲉ ϩⲱⲗⲱⲥ ⲛⲧⲉⲓⲟⲩϣⲏ · ⲉⲧⲃⲉⲡⲉⲓϩⲱⲃ ⲡⲁⲓ ·
- pschrysostom.raphael:89
ⲉⲓⲥϩⲏⲏⲧⲉ ⲉⲓⲥ ⲡⲉⲡⲛⲉⲩⲙⲁ
Coptic SCRIPTORIUM, corpus ps.john.chyrsostom (github.com/CopticScriptorium/corpora). Licence as stated per document in the project's own meta.json and checked there at parse time. English, where present, is Coptic SCRIPTORIUM's aligned translation. Licence: CC-BY 4.0. Source.