← All works

Life Chrysostom

Coptic literature (Coptic SCRIPTORIUM) · 39 sections

1. life.chrysostom_giron:1

   ........ ⲡⲛⲟⲩⲧⲉ ϩⲱⲛ ⲉⲧⲟⲟⲧ ϫⲉⲧⲁⲗⲟ ⲙⲡⲉⲕϣⲏⲣⲉ ⲛⲁⲓ ⲛⲑⲩⲥⲓⲁ .

2. life.chrysostom_giron:2

   ϯⲟⲩⲉϣⲕ ⲱ ⲡⲁϣⲏⲣⲉ ⲁⲗⲗⲁ ϯⲟⲩⲉϣ ⲡⲛⲟⲩⲧⲉ ⲙⲡⲁⲣⲁⲣⲟⲕ .

3. life.chrysostom_giron:3

   ⲡⲉϫⲉⲉⲓⲥⲁⲁⲕ ϫⲉⲉⲧⲃⲉⲟⲩ ⲛⲧⲟⲟⲩⲛ ⲙⲡⲉⲕϫⲓ ⲛⲓⲥⲙⲁⲏⲗ ⲁⲗⲗⲁ ⲁⲣⲏⲩ ⲉⲕⲟⲩⲉϣ ⲙⲟⲟⲩⲧ ⲉⲧⲃⲉⲡⲛⲁⲩ ⲛⲧⲁⲧⲙⲁⲁⲩ ⲙⲓϣⲉ ⲛⲙⲙⲁⲕ ϫⲉⲛⲟⲩϫⲛⲧⲉⲓϩⲙϩⲁⲗ ⲉⲃⲟⲗ ⲙⲛⲡⲉⲥϣⲏⲣⲉ ⲉϣⲱⲡⲉ ⲉϩⲉ ⲱ ⲡⲁⲉⲓⲱⲧ ϯⲡⲁⲣⲁⲕⲁⲗⲉⲓ ⲙⲙⲟⲕ ⲙⲡⲣⲙⲟⲩⲟⲩⲧ ⲙⲙⲟⲓ .

4. life.chrysostom_giron:4

   ⲙⲙⲟⲛ ⲛⲧⲁⲕⲉⲣⲡⲙⲉⲉⲩⲉ ⲙⲡⲛⲁⲩ ⲛⲧⲁⲁⲃⲓⲙⲉⲗⲉⲕ ϥⲓ ⲛⲧⲁⲙⲁⲁⲩ ⲛⲧⲟⲟⲧⲕ ⲛⲧⲁⲕϫⲉⲟⲩϣⲁϫⲉ ⲙⲛⲥⲁⲣⲣⲁ . ⲉⲕⲟⲩⲱϣ ⲉϩⲟⲩⲣⲱⲱⲥ ⲙⲡⲕⲁⲣⲡⲟⲥ ⲛϩⲉⲧⲥ .

5. life.chrysostom_giron:5

   ⲛⲁϣ ⲛϩⲉ ⲉⲣⲉⲧⲁϭⲣⲏⲛ ⲉⲧⲙⲡⲉⲥⲙⲓⲥⲉ ⲉⲛⲉϩ ⲛⲥⲁⲟⲩϣⲏⲣⲉ ⲛⲟⲩⲱⲧ ⲛⲁⲥⲟⲗⲥⲉⲗ ⲉⲩϣⲁⲛϫⲓ ⲡⲟⲩⲱ ⲛⲁⲥ ϫⲉⲁⲩⲙⲟⲩⲟⲩⲧ ⲙⲡⲟⲩϣⲏⲣⲉ ϩⲓϫⲛⲛⲧⲟⲟⲩ ⲡⲁⲓ ⲛⲧⲁⲣϫⲡⲟϥ ϩⲛⲧⲟⲩⲙⲛⲧϩⲗⲗⲱ .

6. life.chrysostom_giron:6

   ⲛⲓⲙ ⲡⲉⲧⲛⲁϫⲓ ⲡⲟⲩⲱ ⲛⲥⲁⲣⲣⲁ ϩⲛⲧⲉⲥⲕⲩⲛⲏ ϫⲉⲧⲱⲟⲩⲛ ⲉⲁⲙⲏ ⲛⲧⲉⲣⲛⲁⲩ ⲉⲡⲕⲁⲣⲡⲟⲥ ⲛϩⲏⲧⲉ ⲉⲣⲉⲧϭⲟⲣⲧⲉ ⲕⲏ ϩⲓϫⲙⲡⲉϥⲙⲟⲕϩ ϩⲛⲧϭⲓϫ ⲛⲟⲩϣⲙⲙⲟ ⲁⲛ .

7. life.chrysostom_giron:7

   ⲁⲗⲗⲁ ϩⲛⲧϭⲓϫ ⲙⲡⲉϥⲉⲓⲱⲧ ⲙⲙⲓⲛ ⲙⲙⲟϥ .

8. life.chrysostom_giron:8

   ⲙⲉⲛ ⲟⲩϩⲁⲗⲏⲧ ϩⲙⲡⲉⲓⲙⲁ ⲙⲡϩⲟⲟⲩ ⲛϥϫⲓ ⲡⲟⲩⲱ ⲛⲓⲥⲁⲁⲕ ⲛⲥⲁⲣⲣⲁ ⲧⲉϥⲙⲁⲁⲩ ⲛϥϫⲟⲟⲥ ⲛⲁⲥ ϫⲉⲁⲙⲏⲓ

9. life.chrysostom_giron:9

   ⲛⲧⲉⲣⲛⲁⲩ ⲉⲡⲧⲁⲡⲣⲟ ⲛⲧⲁⲣⲥⲱ ϩⲛⲟⲩⲉⲕⲓⲃⲉ ⲛⲧⲁⲥⲱϣ ⲉⲃⲟⲗ ⲙⲡⲟⲩⲥⲱⲧⲙ ⲉⲣⲟⲥ ϩⲛⲧⲉⲥⲁⲛⲁⲅⲕⲏ .

10. life.chrysostom_giron:10

    ⲛⲓⲙ ⲡⲉⲧⲛⲁϫⲓⲡⲟⲩⲱ ϣⲁⲧⲁⲙⲁⲁⲩ ⲛϥϫⲟⲟⲥ ⲛⲁⲥ ϫⲉⲓⲥⲁⲁⲕ ⲡⲉⲛⲧⲁϥⲉⲣⲯⲓⲥ ⲛⲉⲃⲟⲧ ϩⲛⲧⲟⲩⲕⲁⲗⲁϩⲏ ϣⲓⲛⲉ ⲉⲣⲟ ϫⲉⲡⲉϥϩⲁⲉ ⲛⲥⲟⲡ ⲡⲉ ⲡⲁⲓ ⲉⲛⲁⲩ ⲉⲣⲟ .

11. life.chrysostom_giron:11

    ⲙⲏⲛⲟⲩⲉⲙⲕⲁϩⲛϩⲏⲧ ⲁⲛ ⲡⲉ ⲡⲁⲓ ⲱ ⲡⲁⲉⲓⲱⲧ ⲛⲧⲉⲧⲁⲙⲁⲁⲩ ⲉⲛⲉϣⲏⲣⲉ ⲛⲧϩⲙϩϩⲁⲗ ⲙⲛⲛⲁⲭⲓⲧⲧⲟⲩⲣⲁ ϩⲙⲡⲉⲥⲏⲓ ⲉⲣⲉⲉⲓⲥⲁⲁⲕ ⲡⲉⲥϣⲏⲣⲉ ⲱ ⲛⲕⲱⲛⲥ ϩⲓϫⲛⲛⲧⲟⲟⲩ .

12. life.chrysostom_giron:12

    ⲙⲏⲛ ⲟⲩϫⲡⲟ ⲁⲛ ⲛϩⲏⲧⲕ ⲡⲉ ⲉⲓⲥⲙⲁⲏⲗ ⲙⲛⲛϣⲏⲣⲉ ⲛⲭⲓⲧⲧⲟⲩⲣⲁ .

13. life.chrysostom_giron:13

    ⲁϩⲣⲟⲓ ⲁⲛⲟⲕ ⲡⲁⲣⲁⲣⲟⲟⲩ. ⲉⲕⲟⲩⲱϣ ⲉⲉⲓⲛⲉ ⲛⲟⲩⲙⲛⲧϩⲗⲗⲱ ⲉⲥϩⲏϣ ⲛⲧⲁⲙⲁⲁⲩ .

14. life.chrysostom_giron:14

    ⲙⲛⲛⲥⲁⲛⲁⲓ ⲇⲉ ⲧⲏⲣⲟⲩ ⲉϥϫⲱ ⲙⲙⲟⲟⲩ ⲙⲡⲉϥⲉⲓⲱⲧ ⲉⲣⲉⲧⲉϥⲟⲩⲛⲁⲙ ϩⲉⲛⲕⲟⲩⲟⲩⲛⲧϥ ⲉϥⲟⲩⲱϣ ⲉⲡⲟⲗϫϥ ⲉⲃⲟⲗ .

15. life.chrysostom_giron:15

    ⲡⲉϫⲁϥ ⲛϭⲓⲁⲃⲣⲁϩⲁⲙ ϫⲉⲉⲓϣⲁⲛϫⲓ ⲛⲓⲥⲙⲁⲏⲗ ⲡⲛⲟⲩⲧⲉ ........ ⲡⲉⲕⲟⲩⲱϣ ⲡⲉ ⲡⲁⲓ ⲙⲛⲥⲁ ⲉⲧⲣⲉⲕϫⲓ ⲙⲡϣⲏⲣⲉ ⲛⲧϩⲙϩⲁⲗ ϩⲁⲧϩⲉ ⲙⲡⲁⲧⲁϫⲛⲟⲩⲕ ⲉⲓϣⲁⲛϫⲓ ⲙⲡϣⲏⲣⲉ ⲛⲭⲉⲧⲧⲟⲩⲣⲁ ϯⲉⲣϩⲟⲧⲉ ϫⲛⲛⲉϥϫⲟⲟⲥ ⲛⲁⲓ ⲛϭⲓⲡⲛⲟⲩⲧⲉ ϫⲉⲁⲕⲕⲁ ⲡϣⲏⲣⲉ ⲛⲧⲉⲕⲕⲗⲏⲣⲟⲛⲟⲙⲓⲁ ⲉⲃⲟⲗ ⲁⲕⲕⲱⲛⲥ ⲙⲡⲉⲧⲙⲡⲓϩⲱⲛ ⲉⲧⲟⲟⲧⲕ ϫⲉⲕⲟⲛⲥϥ .

16. life.chrysostom_giron:16

    ⲛⲁⲓ ⲇⲉ ⲛⲧⲉⲣⲉϥϫⲟⲟⲩ ⲛϭⲓⲁⲃⲣⲁϩⲁⲙ ⲁϥⲛⲧⲟⲟⲧϥ ⲉϫⲙⲡⲙⲟⲕϩ ⲛⲓⲥⲁⲁⲕ ⲉϥⲟⲩⲱϣ ⲉⲕⲟⲛⲥⲉϥ.

17. life.chrysostom_giron:17

    ⲉⲓⲥⲁⲁⲕ ⲇⲉ ⲛⲧⲉⲣⲉϥⲛⲁⲩ ⲉⲧϭⲟⲣⲧⲉ ⲉⲥⲕⲏ ⲉϫⲱϥ ⲁϥϣⲧⲁⲙ ⲛⲛⲉϥⲃⲁⲗ ⲉⲧⲃⲉⲧⲁⲛⲁⲅⲕⲏ ⲙⲡⲙⲟⲩ .

18. life.chrysostom_giron:18

    ⲛⲧⲉⲩⲛⲟⲩ ⲛⲧⲁⲧϭⲟⲣⲧⲉ ⲧⲁϩⲟϥ ⲁⲥⲃⲱⲗ ⲉⲃⲟⲗ ⲛⲧϩⲉ ⲛⲟⲩⲙⲟⲩⲗϩ ⲛⲁϩⲣⲉⲛ ⲛⲟⲩⲕⲱϩⲧ ........ ⲛϩⲏⲧ .

19. life.chrysostom_giron:19

    ϫⲉⲁⲣⲏⲩ ⲛⲧⲁⲡⲛⲟⲩⲧⲉ ϭⲱⲛⲧ ⲉⲣⲟⲓ ϫⲉⲁⲓⲕⲁⲧⲉⲭⲉⲓ ϣⲁⲛⲧⲉⲛⲁⲓ ⲧⲏⲣⲟⲩ ϣⲱⲡⲉ .

20. life.chrysostom_giron:20

    ⲁⲗⲗⲁ ⲁϥⲥⲱⲧⲙ ⲉⲡⲛⲟⲩⲧⲉ ⲉϥϫⲱ ⲙⲙⲟⲥ ⲛⲁϥ ϫⲉⲁⲃⲣⲁϩⲁⲙ ⲁⲃⲣⲁϩⲁⲙ ⲁⲓⲉⲓⲙⲉ ⲉⲡⲉⲕⲟⲩⲱϣ ⲉϩⲟⲩⲛ ⲉⲣⲟⲓ ⲙⲡϩⲟⲟⲩ .

21. life.chrysostom_giron:21

    ⲁⲗⲗⲁ ⲉⲡⲙⲁ ⲛⲓⲥⲁⲁⲕ ⲡⲉⲕϣⲏⲣⲉ ⲉⲓⲥⲟⲩⲉⲥⲟⲟⲩ ⲛⲁⲧⲙⲓⲥⲉ ⲙⲙⲟϥ ϩⲛⲟⲩⲙⲁⲁⲩ ⲉϥⲙⲉⲣ ⲉϩⲟⲩⲛ ⲉⲩϣⲏⲛ ϫⲉⲥⲁⲃⲉⲕ .

22. life.chrysostom_giron:22

    ⲙⲙⲟⲛ ⲛϫⲓⲛⲧⲉⲩⲛⲟⲩ ⲛⲧⲁⲕⲕⲁⲧⲉⲕⲟⲩⲉⲣⲏⲧⲉ ϩⲓϫⲙⲡⲧⲟⲟⲩ ⲙⲛⲡⲉⲕϣⲏⲣⲉ ⲁⲧⲉⲕⲑⲩⲥⲓⲁ ⲉⲓ ⲉϩⲣⲁⲓ ϣⲁⲣⲟⲓ .

23. life.chrysostom_giron:23

    ⲁⲗⲗⲁ ⲁⲓⲟⲩⲱϣ ⲉⲇⲟⲕⲓⲙⲁⲍⲉ ⲙⲙⲟⲕ ϫⲉⲕⲛⲁⲧⲁⲗⲟϥ ϫⲓⲛⲉ ⲙⲙⲟⲛ .

24. life.chrysostom_giron:24

    ⲛⲁⲓ ⲇⲉ ⲛⲧⲉⲣⲉⲁⲃⲣⲁϩⲁⲙ ⲥⲱⲧⲙ ⲉⲣⲟⲟⲩ ⲁϥⲕⲁⲡϣⲏⲣⲉ ϣⲏⲙ ⲉⲃⲟⲗ ⲟ ⲛⲧϩⲉ ⲛⲛⲉⲙⲟⲟⲩⲧ

25. life.chrysostom_giron:25

    ⲁⲩⲱ ⲁϥⲡⲱⲧ ⲉⲡⲙⲁ ⲙⲡⲉⲥⲟⲟⲩ .

26. life.chrysostom_giron:26

    ⲡⲉϫⲉⲡϫⲟⲉⲓⲥ ⲛⲓⲥⲁⲁⲕ ϫⲉⲧⲱⲟⲩⲛ ⲧⲁϭⲟⲙ ⲛⲙⲙⲁⲕ ⲛⲅⲁⲙⲁϩⲧⲉ ⲙⲛⲡⲉⲕⲉⲓⲱⲧ ⲙⲡⲉⲥⲟⲟⲩ .

27. life.chrysostom_giron:27

    ⲛⲧⲉⲩⲛⲟⲩ ⲁϥⲧⲱⲟⲩⲛ ϩⲛⲟⲩⲣⲁϣⲉ ⲁϥϫⲉⲕϩⲱⲃ ⲛⲓⲙ ⲉⲃⲟⲗ ⲛⲧⲉⲑⲩⲥⲓⲁ .

28. life.chrysostom_giron:28

    ⲁⲡⲛⲟⲩⲧⲉ ⲥⲙⲟⲩ ⲉⲁⲃⲣⲁϩⲁⲙ ⲁϥⲁⲁϥ ⲛⲉⲓⲱⲧⲛⲛϩⲉⲑⲛⲟⲥ ⲧⲏⲣⲟⲩ .

29. life.chrysostom_giron:29

    ⲁⲗⲗⲁ ϯⲡⲁⲣⲁⲕⲁⲗⲉⲓ ⲙⲙⲱⲧⲛ ⲱ ⲡⲗⲁⲟⲥ ⲙⲙⲁⲓⲛⲟⲩⲧⲉ ⲙⲡⲣϫⲉⲟⲩϣⲁϫⲉ ⲛⲛⲟⲩϭⲥ ϩⲛⲧⲉⲧⲛⲧⲁⲡⲣⲟ ⲉϩⲟⲩⲛ ⲉⲡⲡⲁⲧⲣⲓⲁⲣⲭⲏⲥ ϫⲉⲛⲟⲩⲙⲁⲓϣⲏⲣⲉ ⲁⲛ ⲡⲉ ⲉϩⲉⲁⲗⲏⲑⲱⲥ ⲟⲩⲙⲁⲓ‐ϣⲏⲣⲉ ⲡⲉ ⲉⲡⲉϩⲟⲩⲟ ⲁⲗⲗⲁ ⲉϥⲙⲉ ⲙⲡⲛⲟⲩⲧⲉ ⲛϩⲟⲩⲟ ⲉϣⲏⲣⲉ ϩⲓϣⲉⲉⲣⲉ .......

30. life.chrysostom_giron:30

    ⲛⲧⲉⲣⲟⲩϫⲱⲕ ⲉⲃⲟⲗ ⲛⲧⲉⲑⲩⲥⲓⲁ ⲁⲩⲙⲟⲟϣⲉ ⲡⲉⲥⲛⲁⲩ ⲉⲙⲛⲙⲛⲧⲟⲩϫⲁϫⲉ ϩⲛⲧⲉⲩⲙⲏⲧⲉ .

31. life.chrysostom_giron:31

    ⲛⲧⲛϩⲉ ⲁⲛⲟⲛ ⲛϣⲁⲣⲉ ⲛⲉⲛⲉⲓⲟⲧⲉ ϯⲟⲩⲕⲟⲩⲓ ⲛϣⲥⲛⲁⲁⲥ ⲛⲁⲛ ⲧⲉⲛϭⲱⲛⲧ ⲉⲣⲟⲟⲩ ⲉⲡⲙⲟⲩ ⲏ ⲧⲟⲩϯⲟⲩⲕⲟⲩⲓ ⲛϣⲁϫⲉ ⲛⲥⲃⲱ ⲛⲁⲛ ⲧⲉⲛⲉⲣⲟⲩⲱ ϩⲁⲣⲱⲟⲩ ⲕⲁⲕⲱⲥ .

32. life.chrysostom_giron:32

    ⲛⲧⲉⲣⲟⲩⲉⲓ ⲇⲉ ⲉⲧⲉⲥⲕⲩⲛⲏ ⲁⲥⲁⲣⲣⲁ ⲛⲁⲩ ⲉⲡⲁⲩⲁⲛ ⲛⲓⲥⲁⲁⲕ ⲛⲧⲁϥⲡⲱⲱⲛⲉ ⲡⲁⲣⲁⲧϩⲉ ⲙⲙⲏⲛⲉ .

33. life.chrysostom_giron:33

    ⲡⲉϫⲁⲥ ⲛⲁϥ ϫⲉⲟⲩ ⲡⲉⲧϣⲟⲟⲡ ⲙⲙⲟⲕ ⲡⲁϣⲏⲣⲉ ⲙⲙⲉⲣⲓⲧ .

34. life.chrysostom_giron:34

    ⲡⲉϫⲁϥ ϫⲉⲛⲧⲁⲡⲁⲉⲓⲱⲧ ϫⲓⲧ ⲉϫⲛⲛⲧⲟⲟⲩ ⲉⲧⲁⲗⲉⲑⲩⲥⲓⲁ ⲉϩⲣⲁⲓ .

35. life.chrysostom_giron:35

    ⲁⲓⲛⲁⲩ ⲉⲩⲉⲥⲟⲟⲩ ⲛⲁⲧⲙⲓⲥⲉ ⲙⲙⲟϥ ⲉϥⲙⲏⲣ ⲉϩⲟⲩⲛ ⲉⲩϣⲏⲛ ⲉϥⲟ ⲛⲛⲟϭ ⲡⲁⲣⲁⲛⲉⲥⲟⲟⲩ ⲧⲏⲣⲟⲩ .

36. life.chrysostom_giron:36

    ⲉⲧⲃⲉϩ....... ⲱϣⲧ..

37. life.chrysostom_giron:37

    ⲱ ⲛⲁⲙⲉⲣⲁⲧⲉ ⲛⲧⲉⲧⲛ ⲉⲡⲉⲛⲟⲩ ⲙⲡⲉⲓϣⲏⲣⲉ ϣⲏⲙ ⲉⲧⲛⲁⲛⲟⲩϥ ⲛⲧⲁϥϩⲱⲡ ⲙⲡϣⲁϫⲉ ⲙⲡⲉϥϫⲟⲟϥ ϫⲉⲛⲛⲉⲩϯⲧⲱⲛ ϣⲱⲡⲉ ϩⲛⲧⲙⲏⲧⲉ ⲛⲥⲁⲣⲣⲁ ⲙⲛⲁⲃⲣⲁϩⲁⲙ ⲉⲧⲃⲉϫⲉⲉⲕⲟⲩⲱϣ ⲉⲙⲟⲩⲟⲩⲧ ⲙⲡⲁϣⲏⲣⲉ ⲛⲧⲟⲟⲧ .

38. life.chrysostom_giron:38

    ⲛϩⲟⲩⲥ ⲇⲉ ⲛⲧⲉⲣⲟⲩⲥⲱⲧⲙ ⲉⲛⲁⲓ ⲛϭⲓⲛⲁⲛⲑⲣⲁⲕⲏ ⲁⲩⲣⲓⲙⲉ .

39. life.chrysostom_giron:39

    ⲡⲉⲭⲁⲗⲭⲓⲩⲱⲛ ⲇⲉ ⲁϥϯ ⲙⲡⲉϥϩⲟ ⲉⲡⲉⲥⲏⲧ ⲉⲡⲉϥⲫⲁⲕⲓⲁⲣⲓⲟⲛ ⲛⲟⲩⲛⲟϭ ⲛⲛⲁⲩ ⲁϥⲣⲓⲙⲉ ⲉϥϫⲱⲙⲙⲟⲥ ϫⲉⲁⲗⲏⲑⲱⲥ ⲉⲡⲙⲁ ⲛⲟⲩⲗⲁⲥ ⲛⲛⲟⲩⲃ ⲉⲧⲉⲕⲧⲁⲡⲣⲟ ⲕⲙⲡϣⲁ ⲛⲟⲩⲗⲁⲥ ⲛⲱⲛⲉ ⲙⲙⲉ ⲉϥⲧⲁⲉⲓⲏⲩ ⲡⲁⲣⲁⲡⲛⲟⲩⲃ ⲛⲟⲩⲙⲏⲏϣⲉ ⲛⲕⲱⲃ ⲛⲥⲟⲡ ϫⲉⲛⲧⲟⲕ ⲟⲩϣⲟⲩ ϯⲙⲁⲛⲛⲁ .......

Coptic SCRIPTORIUM, corpus life.chrysostom (github.com/CopticScriptorium/corpora). Licence as stated per document in the project's own meta.json and checked there at parse time. English, where present, is Coptic SCRIPTORIUM's aligned translation. Licence: CC-BY 4.0. Source.