Bohairic Habakkuk

Coptic literature (Coptic SCRIPTORIUM) · 56 sections

bohairic.Habakkuk_01:1
ϯⲡⲣⲟⲫⲏⲧⲓⲁ ⲛⲧⲉⲁⲃⲃⲁⲕⲟⲩⲙ ⲡⲓⲡⲣⲟⲫⲏⲧⲏⲥ .
The burden which the prophet Ambacum saw.
bohairic.Habakkuk_03:1
ϯⲡⲣⲟⲥⲉⲩⲭⲏ ⲛⲧⲉⲁⲃⲃⲁⲕⲟⲩⲙ ⲡⲓⲡⲣⲟⲫⲏⲧⲏⲥ ⲛⲉⲙⲟⲩϩⲱⲇⲏ .
A PRAYER OF THE PROPHET AMBACUM, WITH A SONG.
bohairic.Habakkuk_02:1
ϯⲛⲁⲟϩⲓ ⲉⲣⲁⲧ ⲉϫⲉⲛⲡⲁⲙⲁ ⲛⲁⲣⲉϩ ⲟⲩⲟϩ ϯⲛⲁϣⲉ ⲛⲏⲓ ⲉϫⲉⲛⲟⲩⲡⲉⲧⲣⲁ ⲟⲩⲟϩ ϯⲛⲁϫⲟⲩϣⲧ ⲉⲑⲣⲓⲛⲁⲩ ϫⲉⲟⲩ ⲡⲉ ⲉⲧⲉϥⲛⲁⲥⲁϫⲓ ⲙⲙⲟϥ ⲛϧⲏⲧ ⲟⲩⲟϩ ϫⲉⲟⲩ ⲡⲉⲧⲓⲛⲁⲉⲣⲟⲩⲱ ⲙⲙⲟϥ ⲉϫⲉⲛⲡⲁⲥⲟϩⲓ .
I will stand upon my watch, and mount upon the rock, and watch to see what he will say by me, and what I shall answer when I am reproved.
bohairic.Habakkuk_03:2
ⲡϭⲟⲉⲓⲥ ⲁⲓⲥⲱⲧⲉⲙ ⲉⲡⲉⲕϧⲣⲱⲟⲩ ⲟⲩⲟϩ ⲁⲓⲉⲣϩⲟϯ ⲁⲓϯ ⲛⲓⲁⲧ ⲛⲛⲉⲕϩⲃⲏⲟⲩⲓ ⲟⲩⲟϩ ⲁⲓⲧⲱⲙⲧ ⲉⲩⲉⲉⲙⲓ ⲉⲣⲟⲕ ϧⲉⲛⲑⲙⲏϯ ⲛⲍⲱⲟⲛ ⲃ ϧⲉⲛⲡϫⲓⲛⲑⲣⲟⲩϧⲱⲛⲧ ⲉϧⲟⲩⲛ ⲛϫⲉⲛⲓⲣⲟⲙⲡⲓ ⲉⲩⲉⲥⲟⲩⲱⲛⲕ ϧⲉⲛⲡϫⲓⲛⲑⲣⲉϥⲓ ⲛϫⲉⲡⲓⲥⲏⲟⲩ ⲉⲕⲉϭⲱⲣⲡ ⲉⲃⲟⲗ ϧⲉⲛⲡϫⲓⲛⲑⲣⲉⲥϣⲑⲟⲣⲧⲉⲣ ⲛϫⲉⲧⲁⲯⲩⲭⲏ ϧⲉⲛⲟⲩⲙⲃⲟⲛ ⲭⲛⲁⲉⲣⲫⲙⲉⲩⲓ ⲙⲫⲛⲁⲓ .
O Lord, I have heard thy report, and was afraid: I considered thy works, and was amazed: thou shalt be known between the two living creatures, thou shalt be acknowledged when the years draw nigh; thou shalt be manifested when the time is come; when my soul is troubled, thou wilt in wrath remember mercy.
bohairic.Habakkuk_01:2
ϣⲁⲑⲛⲁⲩ ϫⲉⲡϭⲟⲉⲓⲥ ϯⲛⲁⲱϣ ⲉⲃⲟⲗ ⲟⲩⲟϩ ⲛⲭⲛⲁⲥⲱⲧⲉⲙ ⲉⲣⲟⲓ ⲁⲛ ϯⲛⲁⲱϣ ⲉⲡϣⲱⲓ ⲟⲩⲃⲏⲕ ⲉⲓϭⲏⲟⲩ ⲛϫⲟⲛⲥ ⲟⲩⲟϩ ⲭⲛⲁⲛⲁϩⲙⲉⲧ ⲁⲛ .
How long, O Lord, shall I cry out, and thou wilt not hearken? how long shall I cry out to thee being injured, and thou wilt not save?
bohairic.Habakkuk_02:2
ⲟⲩⲟϩ ⲁϥⲉⲣⲟⲩⲱ ⲛϫⲉⲡϭⲟⲉⲓⲥ ⲟⲩⲟϩ ⲡⲉϫⲁϥ ϫⲉⲥϧⲁⲓ ⲛⲟⲩϩⲟⲣⲁⲥⲓⲥ ϧⲉⲛⲟⲩⲱⲛϩ ⲉⲃⲟⲗ ⲉϫⲉⲛⲟⲩⲡⲓⲝⲓⲟⲛ ϩⲟⲡⲱⲥ ⲛⲧⲉϥⲓⲱⲥ ⲛϫⲉⲫⲏ ⲉⲧⲟϣ ⲙⲙⲱⲟⲩ .
And the Lord answered me and said, Write the vision, and that plainly on a tablet, that he that reads it may run.
bohairic.Habakkuk_03:3
ϥⲛⲏⲟⲩ ⲛϫⲉⲫⲛⲟⲩϯ ⲉⲃⲟⲗ ϧⲉⲛⲑⲱⲉⲙⲁⲛ ⲟⲩⲟϩ ⲡⲉⲑⲟⲩⲁⲃ ⲉⲃⲟⲗ ϧⲉⲛⲡⲧⲱⲟⲩ ⲙⲫⲁⲣⲣⲁⲛ ⲉϥⲟⲓ ⲛϧⲏⲓⲃⲓ ⲉϥⲟϣ ⲛϣϣⲏⲛ ⲇⲓⲁⲯⲁⲗⲙⲁ ⲁⲥϩⲱⲃⲥ ⲛⲧⲫⲉ ⲛϫⲉⲧⲉϥⲁⲣⲉⲧⲏ ⲟⲩⲟϩ ϥⲙⲉϩ ⲛϫⲉⲡⲕⲁϩⲓ ⲉⲃⲟⲗ ϧⲉⲛⲥⲙⲟⲩ .
God shall come from Thaeman, and the Holy One from the dark shady mount Pharan. Pause. His excellence covered the heavens, and the earth was full of his praise.
bohairic.Habakkuk_01:3
ⲉⲑⲃⲉⲟⲩ ⲁⲕⲧⲁⲙⲟⲓ ⲉϩⲁⲛϧⲓⲥⲓ ⲛⲉⲙϩⲁⲛⲙⲕⲁⲩϩ ⲉⲑⲣⲓϫⲟⲩϣⲧ ⲉϫⲉⲛⲟⲩⲧⲁⲗⲉⲡⲱⲣⲓⲁ ⲛⲉⲙⲟⲩⲙⲉⲧⲁⲥⲉⲃⲏⲥ ⲁϥϣⲱⲡⲓ ⲛϫⲉⲟⲩϩⲁⲡ ⲙⲡⲁⲙⲑⲟ ⲟⲩⲟϩ ⲡⲓⲣⲉϥϯϩⲁⲡ ϥϭⲓϩⲟ .
Wherefore hast thou shown me troubles and griefs to look upon, misery and ungodliness? judgment is before me, and the judge receives a reward.
bohairic.Habakkuk_02:3
ⲉⲑⲃⲉⲟⲩ ϫⲉⲟⲩϩⲟⲣⲁⲥⲓⲥ ⲧⲉ ⲛⲧⲉⲟⲩⲥⲏⲟⲩ ⲟⲩⲟϩ ⲉⲥⲉⲉⲣⲟⲩⲱⲓⲛⲓ ⲉⲩϧⲁⲉ ⲟⲩⲟϩ ⲡⲉⲧϣⲟⲩⲓⲧ ⲁⲛ ⲉϣⲱⲡ ⲁϥϣⲁⲛϭⲓϩⲟ ϫⲟⲩϣⲧ ϧⲁϫⲱϥ ϫⲉϧⲉⲛⲟⲩⲓ ϥⲛⲁⲓ ⲟⲩⲟϩ ⲛⲛⲉϥⲱⲥⲕ .
For the vision is yet for a time, and it shall shoot forth at the end, and not in vain: though he should tarry, wait for him; for he will surely come, and will not tarry.
bohairic.Habakkuk_03:4
ⲟⲩⲟϩ ⲡⲉϥⲙⲟⲩⲉ ⲉϥⲉⲉⲣ ⲙⲫⲣⲏϯ ⲙⲡⲓⲟⲩⲱⲓⲛⲓ ⲟⲩⲟϩ ϩⲁⲛⲧⲁⲡ ⲥⲉ ⲛϩⲣⲏⲓ ϧⲉⲛⲛⲉϥϫⲓϫ ⲟⲩⲟϩ ⲁϥⲭⲱ ⲛϯⲁⲅⲁⲁⲡⲏ ⲛⲧⲉⲧⲉϥϫⲟⲙ ⲉⲥⲧⲁϫⲣⲏⲟⲩⲧ .
And his brightness shall be as light; there were horns in his hands, and he caused a mighty love of his strength.
bohairic.Habakkuk_01:4
ⲉⲑⲃⲉⲫⲁⲓ ⲁϥϫⲱⲣ ⲉⲃⲟⲗ ⲛϫⲉⲟⲩⲛⲟⲙⲟⲥ ⲟⲩⲟϩ ⲛⲛoⲩⲓⲛⲓ ⲉⲃⲟⲗ ⲛⲟⲩϩⲁⲡ ϣⲁⲉⲃⲟⲗ ϫⲉⲡⲓⲁⲥⲉⲃⲏⲥ ϥϭⲉⲡϫⲱⲣⲓ ⲉϫⲉⲛⲡⲓⲑⲙⲏⲓ ⲉⲑⲃⲉⲫⲁⲓ ⲉϥⲉⲓ ⲉⲃⲟⲗ ⲛϫⲉⲡⲓϩⲁⲡ ⲉϥⲫⲟⲛϩ .
Therefore the law is frustrated, and judgment proceeds not effectually, for the ungodly man prevails over the just; therefore perverse judgment will proceed.
bohairic.Habakkuk_02:4
ⲉϣⲱⲡ ⲁϥϣⲁⲛϩⲉⲛϥ ⲛⲁϥ ⲛⲛⲉⲧⲁⲯⲩⲭⲏ ϯⲙⲁϯ ⲛϧⲏⲧϥ ⲡⲓⲑⲙⲏⲓ ⲇⲉ ⲉϥⲉⲱⲛϧ ⲉⲃⲟⲗ ϧⲉⲛⲫⲛⲁϩϯ .
If he should draw back, my soul has no pleasure in him: but the just shall live by my faith.
bohairic.Habakkuk_02:5
ⲡⲓⲕⲁⲧⲁⲫⲣⲟⲛⲓⲧⲏⲥ ⲇⲉ ⲡⲣⲱⲙⲓ ⲛϭⲁⲥⲓϩⲏⲧ ⲉⲛⲁϣⲉⲡⲉϥⲟⲩⲟⲓ ⲛⲛⲉϥϫⲉⲕϩⲗⲓ ⲉⲃⲟⲗ ⲙⲫⲁⲓ ⲉⲧⲁϥⲟⲩⲟⲥⲑⲉⲛ ⲛⲧⲉϥⲯⲩⲭⲏ ⲉⲃⲟⲗ ⲙⲫⲣⲏϯ ⲛⲁⲙⲉⲛϯ ⲟⲩⲟϩ ⲛⲑⲟϥ ⲙⲡⲁϥⲥⲓ ⲙⲫⲣⲏϯ ⲙⲫⲙⲟⲩ ⲟⲩⲟϩ ⲉϥⲉⲑⲱⲟⲩϯ ϩⲁⲣⲟϥ ⲛⲛⲓⲉⲑⲛⲟⲥ ⲧⲏⲣⲟⲩ ⲟⲩⲟϩ ⲉϥⲉϣⲱⲡ ⲉⲣⲟϥ ⲛⲛⲓⲗⲁⲟⲥ ⲧⲏⲣⲟⲩ .
But the arrogant man and the scorner, the boastful man, shall not finish anything; who has enlarged his desire as the grave, and like death he is never satisfied, and he will gather to himself all the nations, and will receive to himself all the peoples.
bohairic.Habakkuk_01:5
ⲁⲛⲁⲩ ⲛⲓⲕⲁⲧⲁⲫⲣⲟⲛⲓⲧⲏⲥ ⲟⲩⲟϩ ϫⲟⲩϣⲧ ⲟⲩⲟϩ ⲁⲣⲓϣⲫⲏⲣⲓ ϧⲉⲛϩⲁⲛϣⲫⲏⲣⲓ ⲟⲩⲟϩ ⲛⲧⲉⲧⲉⲛⲧⲁⲕⲟ ϫⲉⲟⲩⲏⲓ ϯⲛⲁⲓⲣⲓ ⲛⲟⲩϩⲱⲃ ϧⲉⲛⲛⲉⲧⲉⲛⲉϩⲟⲟⲩ ⲫⲁⲓ ⲉⲧⲉⲧⲉⲛⲛⲁⲛⲁϩϯ ⲉⲣⲟϥ ⲁⲛ ⲁⲣⲉϣⲁⲛⲟⲩⲁⲓ ⲥⲁϫⲓ ⲙⲙⲟϥ .
Behold, ye despisers, and look, and wonder marvelously, and vanish: for I work a work in your days, which ye will in no wise believe, though a man declare it to you.
bohairic.Habakkuk_03:5
ⲉϥⲉⲙⲟϣⲓ ϧⲁϫⲱϥ ⲛϫⲉⲟⲩⲥⲁϫⲓ ⲟⲩⲟϩ ⲉⲩⲉⲓ ⲉⲃⲟⲗ ⲛϫⲉⲛⲉϥϭⲁⲗⲁⲩϫ ⲉϩⲁⲛⲙⲉϣϣⲟϯ ⲁϥⲟϩⲓ ⲉⲣⲁⲧϥ ⲟⲩⲟϩ ⲁϥⲕⲓⲙ ⲛϫⲉⲡⲕⲁϩⲓ .
Before his face shall go a report, and it shall go forth into the plains,
bohairic.Habakkuk_03:6
ⲁϥϫⲟⲩϣⲧ ⲟⲩⲟϩ ⲁⲩⲃⲱⲗ ⲉⲃⲟⲗ ⲛϫⲉϩⲁⲛⲉⲑⲛⲟⲥ ⲟⲩⲟϩ ⲁⲩϧⲟⲙϧⲉⲙ ⲛϫⲟⲛⲥ ⲛϫⲉⲛⲓⲧⲱⲟⲩ ⲟⲩⲟϩ ⲁⲩⲃⲱⲗ ⲉⲃⲟⲗ ⲛϫⲉⲛⲓⲕⲁⲗⲁⲙⲫⲟ ⲛⲉⲛⲉϩ .
the earth stood at his feet and trembled: he beheld, and the nations melted away: the mountains were violently burst through, the everlasting hills melted at his everlasting going forth.
bohairic.Habakkuk_01:6
ϫⲉⲟⲩⲏⲓ ϩⲏⲡⲡⲉ ⲁⲛⲟⲕ ϯⲛⲁⲧⲟⲩⲛⲟⲥ ⲛⲓⲭⲁⲗⲇⲉⲟⲥ ⲛⲏ ⲉⲧⲟⲓ ⲛⲣⲉϥϯ ⲡⲓⲉⲑⲛⲟⲥ ⲉⲧⲁⲥⲓⲱⲟⲩ ⲟⲩⲟϩ ⲉⲧⲉⲛϣⲁϣⲓ ⲫⲏ ⲉⲑⲙⲟϣⲓ ϩⲓϫⲉⲛⲛⲓⲟⲩⲏϣⲥⲓ ⲛⲧⲉⲡⲕⲁϩⲓ ⲉⲑⲣⲉϥⲉⲣⲕⲗⲏⲣⲟⲛⲟⲙⲓⲛ ⲛϩⲁⲛⲙⲁ ⲛϣⲱⲡⲓ ⲉⲛⲟⲩϥ ⲁⲛ ⲡⲉ .
Wherefore, behold, I stir up the Chaldeans, the bitter and hasty nation, that walks upon the breadth of the earth, to inherit tabernacles not his own.
bohairic.Habakkuk_02:6
ⲙⲏ ⲛⲁⲓ ⲧⲏⲣⲟⲩ ⲁⲛ ⲉⲩⲉϭⲓⲧⲟⲩ ϧⲁⲣⲟϥ ϧⲉⲛⲟⲩⲡⲁⲣⲁⲃⲟⲗⲏ ⲛⲉⲙⲟⲩⲡⲣⲟⲃⲗⲏⲙⲁ ⲉⲑⲣⲟⲩⲥⲁϫⲓ ⲉⲣⲟϥ ⲟⲩⲟϩ ⲉⲩⲉϫⲟⲥ ϫⲉⲟⲩⲟⲓ ⲙⲫⲏ ⲉⲧⲑⲣⲟ ⲛⲛⲏ ⲉⲧⲉⲛⲟⲩϥ ⲁⲛ ⲛⲉ ⲁϣⲁⲓ ⲛⲁϥ ϣⲁⲑⲛⲁⲩ ϫⲉ ⲟⲩⲟϩ ⲉϥⲑⲣⲟ ⲙⲡⲉϥⲭⲗⲁⲗ ϩⲣⲟϣ ϧⲉⲛⲟⲩⲉⲛϣⲟⲧ .
Shall not all these take up a parable against him? and a proverb to tell against him? and they shall say, Woe to him that multiplies to himself the possessions which are not his! how long? and who heavily loads his yoke.
bohairic.Habakkuk_02:7
ϫⲉⲉⲩⲉⲧⲱⲟⲩⲛⲟⲩ ⲛⲟⲩϩⲟϯ ϧⲉⲛⲟⲩϩⲟϯ ⲉⲩⲉϭⲓⲗⲁⲡⲥⲓ ⲙⲙⲟϥ ⲟⲩⲟϩ ⲉⲩⲉⲉⲣⲛⲏⲫⲓⲛ ⲛϫⲉⲛⲉⲕⲉⲡⲓⲃⲟⲩⲗⲟⲥ ⲟⲩⲟϩ ⲉⲕⲉϣⲱⲡⲓ ⲛⲱⲟⲩ ⲛⲟⲩϩⲱⲗⲉⲙ .
For suddenly there shall arise up those that bite him, and they that plot against thee shall awake, and thou shalt be a plunder to them.
bohairic.Habakkuk_03:7
ⲛⲧϣⲉⲃⲓⲱ ⲛϩⲁⲛϧⲓⲥⲓ ⲉⲩⲉⲛⲁⲩ ⲉⲛⲉⲕⲙⲁ ⲛⲙⲟϣⲓ ⲛⲉⲛⲉϩ ⲉⲩⲉⲛⲟⲩϣⲡ ⲛϫⲉⲛⲓⲙⲁ ⲛϣⲱⲡⲓ ⲛⲧⲉⲛⲓⲉⲑⲁⲩϣ ⲛⲉⲙⲛⲓⲥⲕⲩⲛⲏ ⲛⲧⲉⲡⲕⲁϩⲓ ⲙⲙⲁⲇⲓⲁⲙ .
Because of troubles I looked upon the tents of the Ethiopians: the tabernacles also of the land of Madiam shall be dismayed.
bohairic.Habakkuk_01:7
ϥⲟⲓ ⲛϩⲟϯ ⲟⲩⲟϩ ϥⲟⲩⲟⲛϩ ⲉⲃⲟⲗ ⲡⲉϥϩⲁⲡ ⲉϥⲉϣⲱⲡⲓ ⲉⲃⲟⲗ ⲛϧⲏⲧϥ .
He is terrible and famous; his judgment shall proceed of himself, and his dignity shall come out of himself.
bohairic.Habakkuk_01:8
ⲟⲩⲟϩ ⲉⲩⲉϭⲓⲫⲉⲓ ⲛϫⲉⲛⲉϥϩⲑⲱⲣ ⲉϩⲟⲧⲉ ⲛⲓⲡⲁⲣⲇⲁⲗⲓⲥ ⲥⲉⲁⲥⲓⲱⲟⲩ ⲉϩⲟⲧⲉ ⲛⲓⲟⲩⲱⲛϣ ⲛⲧⲉϯⲁⲣⲁⲃⲓⲁ ⲟⲩⲟϩ ⲉⲩⲉⲫⲱⲧ ⲛϫⲉⲛⲓϭⲁⲥⲓϩⲑⲟ ϩⲓϫⲉⲛⲛⲓϩⲑⲱⲣ ⲟⲩⲟϩ ⲉⲩⲉϯ ⲙⲡⲟⲩⲟⲩⲟⲓ ϩⲓⲫⲟⲩⲉⲓ ⲟⲩⲟϩ ⲉⲩⲉϩⲁⲗⲁⲓ ⲙⲫⲣⲏϯ ⲛⲟⲩⲁϧⲱⲙ ⲉϥⲥⲉⲃⲧⲱⲧ ⲉⲟⲩⲱⲙ .
And his horses shall bound more swiftly than leopards, and they are fiercer than the wolves of Arabia: and his horsemen shall ride forth, and shall rush from far; and they shall fly as an eagle hasting to eat.
bohairic.Habakkuk_03:8
ⲙⲏ ⲭⲛⲁϫⲱⲛⲧ ⲡϭⲟⲉⲓⲥ ϧⲉⲛϩⲁⲛⲓⲁⲣⲱⲟⲩ ⲓⲉ ⲁⲣⲉⲡⲉⲕⲙⲃⲟⲛ ϧⲉⲛϩⲁⲛⲓⲁⲣⲱⲟⲩ ⲓⲉ ⲁⲣⲉⲡⲉⲕⲟⲩⲟⲓ ϧⲉⲛⲫⲓⲟⲙ ϫⲉⲭⲛⲁⲁⲗⲏⲓ ⲉϫⲉⲛⲛⲉⲕϩⲑⲱⲣ ⲟⲩⲟϩ ⲫⲟⲩⲟⲓ ⲙⲫⲱⲧ ⲛⲧⲉⲛⲉⲕϩⲑⲱⲣ ⲟⲩⲟϩ ⲟⲩⲟⲩϫⲁⲓ ⲡⲉ .
Wast thou angry, O Lord, with the rivers? or was thy wrath against the rivers, or thine anger against the sea? for thou wilt mount on thine horses, and thy chariots are salvation.
bohairic.Habakkuk_02:8
ϫⲉⲟⲩⲏⲓ ⲛⲑⲟⲕ ⲁⲕϣⲉⲗⲟⲩⲙⲏϣ ⲛⲉⲑⲛⲟⲥ ⲉⲩⲉϣⲟⲗⲕ ⲛϫⲉⲛⲓⲗⲁⲟⲥ ⲧⲏⲣⲟⲩ ⲉⲧⲁⲩⲥⲉⲡⲓ ⲉⲑⲃⲉϩⲁⲛⲥⲛⲟϥ ⲛⲧⲉϩⲁⲛⲣⲱⲙⲓ ⲛⲉⲙϯⲙⲉⲧⲁⲥⲉⲃⲏⲥ ⲛⲧⲉⲡⲕⲁϩⲓ ⲛⲧⲉϯⲃⲁⲕⲓ ⲛⲉⲙⲛⲏ ⲧⲏⲣⲟⲩ ⲉⲧϣⲟⲡ ⲛϧⲏⲧϥ .
Because thou hast spoiled many nations, all the nations that are left shall spoil thee, because of the blood of men, and the sins of the land and city, and of all that dwell in it.
bohairic.Habakkuk_01:9
ⲟⲩϧⲁⲉ ⲉⲥⲉⲓ ⲉϫⲉⲛⲛⲓⲁⲥⲉⲃⲏⲥ ⲉⲩⲉϯ ⲛⲉⲙⲁϥ ϧⲉⲛⲟⲩϩⲟ ⲛⲉⲙⲟⲩⲙⲉⲧϫⲁϫⲓ ⲟⲩⲟϩ ⲉϥⲉⲑⲱⲟⲩϯ ⲉϧⲟⲩⲛ ⲛⲟⲩⲭⲙⲁⲗⲱⲥⲓⲁ ⲙⲫⲣⲏϯ ⲛⲟⲩϣⲟ .
Destruction shall come upon ungodly men, resisting with their adverse front, and he shall gather the captivity as the sand.
bohairic.Habakkuk_02:9
ⲱ ⲫⲏ ⲉⲧϭⲓ ⲛϫⲟⲛⲥ ⲛⲟⲩϭⲓⲛϫⲟⲛⲥ ⲉϥϩⲱⲟⲩ ⲙⲡⲉϥⲏⲓ ⲉⲑⲣⲉϥⲑⲱϣ ⲙⲡⲉϥⲙⲟϩ ϧⲉⲛⲡϭⲓⲥⲓ ⲛⲡϫⲓⲛⲥⲁϧⲙⲉϥ ⲉⲃⲟⲗ ϧⲉⲛⲧϫⲓϫ ⲛϩⲁⲛⲡⲉⲧϩⲱⲟⲩ .
Woe to him that covets an evil covetousness to his house, that he may set his nest on high, that he may be delivered from the power of evils.
bohairic.Habakkuk_03:9
ϧⲉⲛⲟⲩϭⲱⲗⲕ ⲕⲛⲁϭⲱⲗⲕ ⲛⲧⲉⲕⲫⲓϯ ϩⲓϫⲉⲛⲛⲓϭⲏⲡⲓ ⲇⲓⲁⲯⲁⲗⲙⲁ ⲉϥⲉⲫⲱϫⲓ ⲛϫⲉⲡⲕⲁϩⲓ ⲉⲃⲟⲗ ϧⲉⲛϩⲁⲛⲓⲁⲣⲱⲟⲩ .
Surely thou didst bend they bow at scepters, saith the Lord. Pause. The land of rivers shall be torn asunder.
bohairic.Habakkuk_01:10
ⲟⲩⲟϩ ⲛⲑⲟϥ ⲉϥⲉⲟⲩⲛⲟϥ ϧⲉⲛϩⲁⲛⲟⲩⲣⲱⲟⲩ ⲟⲩⲟϩ ⲛⲓⲧⲩⲣⲁⲛⲛⲟⲥ ϩⲁⲛⲥⲱⲃⲓ ⲛⲁϥ ⲛⲉ ⲟⲩⲟϩ ⲉϥⲉⲥⲱⲃⲓ ϧⲉⲛⲛⲓⲙⲁ ⲧⲏⲣⲟⲩ ⲉⲧⲧⲁϫⲣⲏⲟⲩⲧ ⲟⲩⲟϩ ⲉϥⲉϩⲓⲟⲩⲓ ⲛⲟⲩⲟⲩⲁⲛ ⲟⲩⲟϩ ⲉϥⲉⲁⲙⲟⲛⲓ ⲙⲙⲟϥ .
And he shall be at his ease with kings, and princes are his toys, and he shall mock at every strong-hold, and shall cast a mound, and take possession of it.
bohairic.Habakkuk_03:10
ⲉⲩⲉⲛⲁⲩ ⲉⲣⲟⲕ ⲉⲩⲉϯⲛⲁⲕϩⲓ ⲛϫⲉϩⲁⲛⲗⲁⲟⲥ ⲉϥⲉϫⲱⲣ ⲉⲃⲟⲗ ⲛⲛⲓⲙⲱⲟⲩ ⲛⲧⲉⲡⲉϥⲙⲱⲓⲧ ⲙⲙⲟϣⲓ ⲫⲛⲟⲩⲛ ⲁϥϯ ⲛⲧⲉϥⲥⲙⲏ ⲉⲡϭⲓⲥⲓ ⲛⲧⲉⲡⲉϥϩⲟⲣⲧϥ .
The nations shall see thee and be in pain, as thou dost divide the moving waters: the deep uttered her voice, and raised her form on high.
bohairic.Habakkuk_02:10
ⲁⲕⲥⲟϭⲛⲓ ⲉⲩϣⲓⲡⲓ ⲙⲡⲉⲕⲏⲓ ⲁⲕϫⲟⲩϣⲧ ⲉϫⲉⲛϩⲁⲛⲗⲁⲟⲥ ⲉⲩⲟϣ ⲟⲩⲟϩ ⲁⲥⲉⲣⲛⲟⲃⲓ ⲛϫⲉⲧⲉⲕⲯⲩⲭⲏ .
Thou hast devised shame to thy house, thou hast utterly destroyed many nations, and thy soul has sinned.
bohairic.Habakkuk_02:11
ϫⲉⲟⲩⲏⲓ ⲟⲩⲱⲛⲓ ⲉϥⲉⲱϣ ⲉⲃⲟⲗ ϧⲉⲛⲟⲩϫⲱ ⲟⲩⲟϩ ⲟⲩⲕⲁⲛⲑⲁⲣⲟⲥ ⲉϥⲉⲉⲣⲟⲩⲱ ⲙⲙⲱⲟⲩ ⲉⲃⲟⲗ ϧⲉⲛⲟⲩϣⲉ .
For the stone shall cry out of the wall, and the beetle out of the timber shall speak.
bohairic.Habakkuk_03:11
ⲁϥϭⲓⲥⲓ ⲛϫⲉⲫⲣⲏ ⲟⲩⲟϩ ⲡⲓⲓⲟϩ ⲁϥⲟϩⲓ ⲉⲣⲁⲧϥ ⲉⲧⲉϥⲧⲁⲝⲓⲥ ⲉⲩⲟⲩⲱⲓⲛⲓ ⲉⲩⲉⲙⲟϣⲓ ⲛϫⲉⲛⲉⲕⲥⲟⲑⲛⲉϥ ⲉⲩⲙⲟⲩⲉ ⲛⲧⲉⲛⲉⲕⲥⲉⲧⲉⲃⲣⲏϫ ⲛⲧⲉⲛⲉⲕϩⲟⲡⲗⲟⲛ .
The sun was exalted, and the moon stood still in her course: thy darts shall go forth at the light, at the brightness of the gleaming of thine arms.
bohairic.Habakkuk_01:11
ⲧⲟⲧⲉ ⲉϥⲉⲟⲩⲱⲧⲉⲃ ⲛϫⲉⲡⲓⲡⲛⲉⲩⲙⲁ ⲟⲩⲟϩ ⲉϥⲉⲥⲓⲛⲓ ⲟⲩⲟϩ ⲉϥⲉⲭⲱ ⲉⲃⲟⲗ ⲑⲁⲓ ⲡⲉ ϯϫⲟⲙ ⲛⲧⲉⲡⲁⲛⲟⲩϯ .
Then shall he change his spirit, and he shall pass through, and make an atonement, saying, This strength belongs to my god.
bohairic.Habakkuk_03:12
ϧⲉⲛⲡⲉⲕϫⲱⲛⲧ ⲉⲕⲉⲑⲣⲉⲡⲕⲁϩⲓ ⲉⲣⲕⲟⲩϫⲓ ⲟⲩⲟϩ ϧⲉⲛⲡⲉⲕⲙⲃⲟⲛ ⲉⲕⲉⲃⲱⲗ ⲛϩⲁⲛⲉⲑⲛⲟⲥ ⲉⲃⲟⲗ .
Thou wilt bring low the land with threatening, and in wrath thou wilt break down the nations.
bohairic.Habakkuk_01:12
ⲙⲏ ⲛⲑⲟⲕ ⲁⲛ ⲡⲉ ⲡϭⲟⲉⲓⲥ ⲡⲁⲛⲟⲩϯ ⲫⲏ ⲉⲑⲟⲩⲁⲃ ⲛⲧⲏⲓ ⲓⲥϫⲉⲛϩⲏ ⲟⲩⲟϩ ⲛⲛⲉⲛⲙⲟⲩ ⲡϭⲟⲉⲓⲥ ⲁⲕⲑⲁϣϥ ⲉⲩϩⲁⲡ ⲟⲩⲟϩ ⲁϥⲙⲟⲛⲕⲧ ⲉⲥⲟϩⲓ ϧⲉⲛⲧⲉϥⲥⲃⲱ .
Art not thou from the beginning, O Lord God, my Holy One? and surely we shall not die. O Lord, thou hast established it for judgment, and he has formed me to chasten with his correction.
bohairic.Habakkuk_02:12
ⲟⲩⲟⲓ ⲙⲫⲏ ⲉⲧⲕⲱⲧ ⲛⲟⲩⲃⲁⲕⲓ ϧⲉⲛϩⲁⲛⲥⲛⲟϥ ⲟⲩⲟϩ ⲉϥⲥⲟⲃϯ ⲛϩⲁⲛⲃⲁⲕⲓ ϧⲉⲛϩⲁⲛϭⲓⲛϫⲟⲛⲥ .
Woe to him that builds a city with blood, and establishes a city by unrighteousness.
bohairic.Habakkuk_01:13
ϥⲟⲩⲁⲃ ⲛϫⲉⲡⲁⲃⲁⲗ ⲉϣⲧⲉⲙⲛⲁⲩ ⲉϩⲁⲛⲡⲉⲧϩⲱⲟⲩ ⲟⲩⲟϩ ⲉϫⲟⲩϣⲧ ⲉϫⲉⲛϩⲁⲛϧⲓⲥⲓ ⲛⲉⲙϩⲁⲛⲙⲕⲁϩ ⲛϩⲏⲧ ⲉⲑⲃⲉⲟⲩ ⲕϫⲟⲩϣⲧ ⲉϫⲉⲛⲛⲏ ⲉⲧⲕⲁⲧⲁⲫⲣⲟⲛⲓⲛ ⲭⲛⲁⲭⲁⲣⲱⲕ ϧⲉⲛⲡϫⲓⲛⲑⲣⲉⲡⲓⲁⲥⲉⲃⲏⲥ ⲱⲙⲕ ⲙⲡⲓⲑⲙⲏⲓ .
His eye is too pure to behold evil doings, and to look upon grievous afflictions: wherefore dost thou look upon despisers? wilt thou be silent when the ungodly swallows up the just?
bohairic.Habakkuk_02:13
ⲙⲏ ϩⲁⲛⲉⲃⲟⲗ ϩⲓⲧⲉⲛⲡϭⲟⲉⲓⲥ ⲡⲓⲡⲁⲛⲧⲟⲕⲣⲁⲧⲱⲣ ⲛⲉ ⲛⲁⲓ ⲟⲩⲟϩ ⲁⲩⲙⲟⲩⲛⲕ ϧⲉⲛⲟⲩⲭⲣⲱⲙ ⲛϫⲉϩⲁⲛⲗⲁⲟⲥ ⲉⲩⲟϣ ⲟⲩⲟϩ ϩⲁⲛⲙⲏϣ ⲛⲉⲑⲛⲟⲥ ⲁⲩⲉⲣⲕⲟⲩϫⲓ ⲛϩⲏⲧ .
Are not these things of the Lord Almighty? surely many people have been exhausted in the fire, and many nations have fainted.
bohairic.Habakkuk_03:13
ⲁⲕⲓ ⲉⲃⲟⲗ ⲉⲩⲟⲩϫⲁⲓ ⲙⲡⲉⲕⲗⲁⲟⲥ ⲉⲑⲣⲉⲕⲧⲟⲩϫⲟ ⲛⲛⲏ ⲉⲧⲁⲕⲑⲁϩⲥⲟⲩ ⲁⲕϩⲓⲟⲩⲓ ⲛⲟⲩⲙⲟⲩ ⲉϫⲉⲛⲧⲁⲫⲉ ⲛⲛⲓⲁⲛⲟⲙⲟⲥ ⲁⲕⲭⲱ ⲛϯⲥⲉⲛϯ ⲉⲥϣⲟⲩⲓⲧ ⲁⲕⲧⲟⲩⲛⲟⲥⲛⲉⲕⲥⲛⲁⲩϩ ϣⲁⲛⲙⲟϯ ⲇⲓⲁⲯⲁⲗⲙⲁ .
Thou wentest forth for the salvation of thy people, to save thine anointed: thou shalt bring death on the heads of transgressors; thou has brought bands upon their neck. Pause.
bohairic.Habakkuk_01:14
ⲟⲩⲟϩ ⲭⲛⲁⲓⲣⲓ ⲛⲛⲓⲣⲱⲙⲓ ⲙⲫⲣⲏϯ ⲛⲛⲓⲧⲉⲃⲛⲱⲟⲩⲓ ⲫⲓⲟⲙ ⲛⲉⲙⲙⲫⲣⲏϯ ⲛⲛⲓϭⲁⲧϥⲓ ⲉⲧⲉⲙⲙⲟⲛⲧⲟⲩϩⲩⲅⲟⲩⲙⲉⲛⲟⲥ .
And wilt thou make men as the fishes of the sea, and as the reptiles which have no guide?
bohairic.Habakkuk_03:14
ⲁⲕϣⲱⲧ ⲛⲛⲓⲁⲫⲏⲟⲩⲓ ⲛⲧⲉⲛⲓⲁⲛⲟⲙⲟⲥ ⲛⲉⲙⲛⲓϫⲱⲣⲓ ϧⲉⲛⲟⲩⲧⲱⲙⲧ ⲉⲩⲉⲙⲟⲛⲙⲉⲛ ⲛϧⲣⲏⲓ ⲛϧⲏⲧⲥ ⲉⲩⲉⲁⲟⲩⲱⲛⲛⲟⲩⲭⲁⲗⲓⲛⲟⲩⲥ ⲙⲫⲣⲏϯ ⲛⲟⲩϩⲏⲕⲓ ⲉϥⲟⲩⲱⲙ ⲛⲭⲱⲡ .
Thou didst cut asunder the heads of princes with amazement, they shall tremble in it; they shall burst their bridles, they shall be as a poor man devouring in secret.
bohairic.Habakkuk_02:14
ϫⲉⲁϥⲙⲟϩ ⲛϫⲉⲙⲁⲓ ⲛⲓⲃⲉⲛ ⲉⲥⲟⲩⲉⲛⲡⲱⲟⲩ ⲙⲡϭⲟⲉⲓⲥ ⲙⲫⲣⲏϯ ⲛⲟⲩⲙⲱⲟⲩ ⲉϥⲟϣ ⲉϥⲉϩⲟⲃⲥⲟⲩ .
For the earth shall be filled with the knowledge of the glory of the Lord; it shall cover them as water.
bohairic.Habakkuk_03:15
ⲟⲩⲟϩ ⲁⲕⲧⲁⲗⲟ ⲛⲛⲉⲕϩⲑⲱⲣ ⲉϩⲣⲏⲓ ⲉϫⲉⲛⲫⲓⲟⲙ ⲉⲩⲉⲑⲱϩ ⲛⲟⲩⲙⲱⲟⲩ ⲉϥⲟϣ .
And thou dost cause thine horses to enter the sea, disturbing much water.
bohairic.Habakkuk_01:15
ⲟⲩⲥⲩⲛⲧⲉⲗⲓⲁ ⲁϥⲥⲟⲕⲥ ⲉⲡϣⲱⲓ ϧⲉⲛⲧⲉϥⲱⲓⲙⲓ ⲟⲩⲟϩ ⲁϥⲱϣϯ ⲙⲙⲟϥ ϧⲉⲛⲡⲉϥϣⲛⲉϩⲓⲟⲩⲓ ⲟⲩⲟϩ ⲁϥⲑⲟⲩⲱⲧϥ ϧⲉⲛⲧⲉϥⲁⲃⲱ ⲉⲑⲃⲉⲫⲁⲓ ⲉϥⲉⲟⲩⲛⲟϥ ⲟⲩⲟϩ ⲉϥⲉⲣⲁϣⲓ ⲛϫⲉⲡⲉϥϩⲏⲧ .
He has brought up destruction with a hook, and drawn one with a casting net, and caught another in his drags: therefore shall his heart rejoice and be glad.
bohairic.Habakkuk_02:15
ⲟⲩⲟⲓ ⲙⲫⲏ ⲉⲧⲧⲥⲟ ⲙⲡⲉϥϣⲫⲏⲣ ϧⲉⲛⲟⲩϩⲉⲓ ⲛϣⲑⲟⲣⲧⲉⲣ ⲟⲩⲟϩ ⲉϥⲑⲣⲟ ⲙⲙⲟϥ ⲉⲑⲓϧⲓ ϩⲟⲡⲱⲥ ⲛⲧⲉϥϫⲟⲩϣⲧ ⲉϫⲉⲛⲟⲩⲥⲡⲉⲗⲉⲟⲛ .
Woe to him that gives his neighbour to drink the thick lees of wine, and intoxicates him, that he may look upon their secret parts.
bohairic.Habakkuk_03:16
ⲁⲓⲁⲣⲉϩ ⲉⲣⲟⲓ ⲟⲩⲟϩ ⲁⲥϣⲑⲟⲣⲧⲉⲣ ⲛϫⲉⲧⲁⲛⲉϫⲓ ⲉⲃⲟⲗ ϧⲉⲛⲧⲥⲙⲏ ⲛⲧⲡⲣⲟⲥⲉⲩⲭⲏ ⲛⲧⲉⲛⲁⲥⲫⲟⲧⲟⲩ ⲟⲩⲟϩ ⲁϥⲓ ⲉϧⲟⲩⲛ ⲉⲛⲁⲕⲁⲥ ⲛϫⲉⲟⲩⲥⲑⲉⲣⲧⲉⲣ ⲟⲩⲟϩ ⲁⲥϣⲑⲟⲣⲧⲉⲣ ⲥⲁⲡⲉⲥⲏⲧ ⲙⲙⲟⲓ ⲛϫⲉⲧⲁϩⲉⲝⲓⲥ ϯⲛⲁⲙⲧⲟⲛ ⲙⲙⲟⲓ ϧⲉⲛⲡⲉϩⲟⲟⲩ ⲛⲟⲩϩⲟϫϩⲉϫ ⲉⲑⲣⲓϣⲉ ⲛⲏⲓ ⲉϩⲣⲏⲓ ⲉⲫⲗⲁⲟⲥ ⲛⲧⲉⲡⲁⲙⲁ ⲛϫⲱⲓⲗⲓ .
I watched, and my belly trembled at the sound of the prayer of my lips, and trembling entered into my bones, and my frame was troubled within me; I will rest in the day of affliction, from going up to the people of my sojourning.
bohairic.Habakkuk_02:16
ⲥⲱ ⲛⲟⲩϣⲱϣ ⲉϥⲟϣ ⲉⲃⲟⲗ ϧⲉⲛⲟⲩⲙⲱⲟⲩ ⲟⲩⲟϩ ⲛⲑⲟⲕ ϩⲱⲕ ⲡⲓϩⲏⲧ ⲕⲓⲙ ⲟⲩⲟϩ ⲙⲟⲛⲙⲉⲛ ϫⲉⲁϥⲕⲱϯ ⲉⲣⲟⲕ ⲛϫⲉⲡⲓⲁⲫⲟⲧ ⲛⲧⲉⲑⲟⲩⲓⲛⲁⲙ ⲙⲡϭⲟⲉⲓⲥ ⲟⲩⲟϩ ⲁϥⲑⲱⲟⲩϯ ⲛϫⲉⲟⲩϣⲱϣ ⲉϫⲉⲛⲡⲉⲕⲱⲟⲩ .
Drink thou also thy fill of disgrace instead of glory: shake, O heart, and quake, the cup of the right hand of the Lord has come round upon thee, and dishonour has gathered upon thy glory.
bohairic.Habakkuk_01:16
ⲉⲑⲃⲉⲫⲁⲓ ⲉϥⲉⲉⲣϣⲟⲩϣⲱⲟⲩϣⲓ ⲙⲡⲉϥϣⲛⲉϩⲓⲟⲩⲓ ⲟⲩⲟϩ ⲉϥⲉⲉⲛⲥⲑⲟⲓⲛⲟⲩϥⲓ ⲉϩⲣⲏⲓ ⲛⲧⲉϥⲁⲃⲱ ϫⲉⲛϧⲣⲏⲓ ⲛϧⲏⲧⲟⲩ ⲁⲥⲕⲉⲛⲓ ⲛϫⲉⲧⲉϥⲧⲟⲓ ⲟⲩⲟϩ ⲥⲉⲥⲱⲧⲡ ⲛϫⲉⲛⲉϥϧⲣⲏⲟⲩⲓ .
Therefore will he sacrifice to his drag, and burn incense to his casting-net, because by them he has made his portion fat, and his meats choice.
bohairic.Habakkuk_01:17
ⲉⲑⲃⲉⲫⲁⲓ ⲉϥⲉⲃⲱϣ ⲛⲧⲉϥⲥⲏϥⲓ ⲟⲩⲟϩ ⲉϥⲉϧⲱⲧⲉⲃ ⲛϩⲁⲛⲉⲑⲛⲟⲥ ⲛⲥⲏⲟⲩ ⲛⲓⲃⲉⲛ ⲛⲛⲉϥϯⲁⲥⲟ .
Therefore will he cast his net, and will not spare to slay the nations continually.
bohairic.Habakkuk_02:17
ϫⲉⲟⲩⲏⲓ ϯⲙⲉⲧⲁⲥⲉⲃⲏⲥ ⲛⲧⲉⲡⲓⲗⲓⲃⲁⲛⲟⲥ ⲉⲥⲉϩⲟⲃⲥⲕ ⲟⲩⲟϩ ϯⲧⲁⲗⲉⲡⲱⲣⲓⲁ ⲛⲧⲉⲛⲓⲑⲏⲣⲓⲟⲛ ⲉⲥⲉⲑⲣⲉⲕⲛⲟⲩϣⲡ ⲉⲑⲃⲉϩⲁⲛⲥⲛⲟϥ ⲛⲧⲉϩⲁⲛⲣⲱⲙⲓ ⲛⲉⲙϯⲙⲉⲧⲁⲥⲉⲃⲏⲥ ⲛⲧⲉⲡⲕⲁϩⲓ ⲛⲧⲉϯⲃⲁⲕⲓ ⲛⲉⲙⲛⲏ ⲧⲏⲣⲟⲩ ⲉⲧϣⲟⲡ ⲛϧⲏⲧⲥ .
For the ungodliness of Libanus shall cover thee, and distress because of wild beasts shall dismay thee, because of the blood of men, and the sins of the land and city, and of all that dwell in it.
bohairic.Habakkuk_03:17
ϫⲉⲟⲩⲏⲓ ϯⲃⲱ ⲛⲕⲉⲛⲧⲉ ⲥⲛⲁϯⲟⲩⲧⲁϩ ⲁⲛ ⲟⲩⲟϩ ⲛⲛⲉⲟⲩⲧⲁϩ ϣⲱⲡⲓ ϧⲉⲛϯⲃⲱ ⲛⲁⲗⲟⲗⲓ ⲉϥⲉϫⲉⲙⲉⲑⲛⲟⲩϫ ⲛϫⲉⲡϩⲱⲃ ⲛϯⲃⲱ ⲛϫⲱⲓⲧ ⲟⲩⲟϩ ⲛⲓⲙⲉϣϣⲟϯ ⲛⲛⲟⲩⲉⲣϧⲣⲉ ⲁⲩⲙⲟⲩⲛⲕ ⲛϫⲉⲛⲓⲉⲥⲱⲟⲩ ϫⲉⲙⲙⲟⲛϧⲣⲉ ⲛⲧⲱⲟⲩ ⲟⲩⲟϩ ⲙⲙⲟⲛⲉϩⲉ ϣⲟⲡ ϧⲉⲛⲡⲓⲟⲩⲛϩϥ ⲛⲧⲉⲡⲟⲩⲭⲱ ⲉⲃⲟⲗ .
For though the fig-tree shall bear no fruit, and there shall be no produce on the vines; the labour of the olive shall fail, and the fields shall produce no food: the sheep have failed from the pasture, and there are no oxen at the cribs;
bohairic.Habakkuk_02:18
ⲟⲩ ⲡϩⲏⲟⲩ ⲡⲉ ⲉⲧⲉϥϯ ⲙⲙⲟϥ ⲛϫⲉⲡⲓⲫⲱⲧϩ ⲁⲩⲙⲟⲛⲕϥ ⲛⲟⲩⲫⲱⲧϩ ⲛϩⲟⲣⲧϥ ⲙⲙⲉⲑⲛⲟⲩϫ ϫⲉⲁϥⲭⲁϩⲑⲏϥ ⲉϫⲉⲛⲡⲉϥⲙⲟⲛⲕ ⲉⲑⲣⲉϥⲑⲁⲙⲓⲟ ⲛϩⲁⲛⲓⲇⲱⲗⲟⲛ ⲛⲕⲟⲩⲣ .
What profit it the graven image, that they have graven it? one has made it a molten work, a false image; for the maker has trusted in his work, to make dumb idols.
bohairic.Habakkuk_03:18
ⲁⲛⲟⲕ ⲇⲉ ϯⲛⲁⲑⲉⲗⲏⲗ ϧⲉⲛⲡϭⲟⲉⲓⲥ ϯⲛⲁⲣⲁϣⲓ ⲉϫⲉⲛⲫⲛⲟⲩϯ ⲡⲁⲥⲱⲧⲏⲣ .
yet I will exult in the Lord, I will joy in God my Saviour.
bohairic.Habakkuk_03:19
ⲡϭⲟⲉⲓⲥ ⲫⲛⲟⲩϯ ⲡⲉ ⲧⲁϫⲟⲙ ⲟⲩⲟϩ ⲉϥⲉⲑⲱϣ ⲛⲛⲁϭⲁⲗⲁⲩϫ ⲉⲟⲩⲥⲩⲛⲧⲉⲗⲓⲁ ϥⲛⲁⲧⲁⲗⲟⲓ ⲉϫⲉⲛⲛⲓϭⲓⲥⲓ ⲉⲑⲣⲓϭⲣⲟ ϧⲉⲛⲧⲉϥϩⲱⲇⲏ .
The Lord God is my strength, and he will perfectly strengthen my feet; he mounts me upon high places, that I may conquer by his song.
bohairic.Habakkuk_02:19
ⲟⲩⲟⲓ ⲙⲫⲏ ⲉⲧϫⲱ ⲙⲙⲟⲥ ⲉⲡⲓϣⲉ ϫⲉⲁⲣⲓⲛⲏⲫⲓⲛ ⲟⲩⲟϩ ⲡⲓⲱⲛⲓ ⲧⲱⲛⲕ ϫⲉϭⲓⲥⲓ ⲟⲩⲟϩ ⲛⲑⲟϥ ⲟⲩϩⲟⲣⲧϥ ⲡⲉ ⲫⲁⲓ ⲇⲉ ⲟⲩϫⲁϫϩ ⲛⲛⲟⲩⲃ ⲛⲉⲙϩⲁⲧ ⲡⲉ ⲟⲩⲟϩ ⲙⲙⲟⲛϩⲗⲓ ⲙⲡⲛⲉⲩⲙⲁ ⲛϧⲣⲏⲓ ⲛϧⲏⲧϥ .
Woe to him that says to the wood, Awake, arise; and to the stone, Be thou exalted! whereas it is an image, and this is a casting of gold and silver, and there is no breath in it.
bohairic.Habakkuk_02:20
ⲡϭⲟⲉⲓⲥ ⲇⲉ ⲉϥⲭⲏ ϧⲉⲛⲡⲉϥⲉⲣⲫⲉⲓ ⲉⲑⲟⲩⲁⲃ ⲙⲁⲣⲉϥⲉⲣϩⲟϯ ϧⲁⲧϩⲏ ⲙⲡⲉϥϩⲟ ⲛϫⲉⲡⲕⲁϩⲓ ⲧⲏⲣϥ .
But the Lord is in his holy temple: let all the earth fear before him.

Coptic SCRIPTORIUM, corpus bohairic.habakkuk (github.com/CopticScriptorium/corpora). Licence as stated per document in the project's own meta.json and checked there at parse time. English, where present, is Coptic SCRIPTORIUM's aligned translation. Licence: public domain text, CC-BY annotation. Source.