← Library

Kathāvatthu — Mahāpaṇṇāsaka — Pannarasamavagga

Early Buddhist texts (SuttaCentral): Abhidhamma · abhidhamma · 51 sections

1. kv15.9:0.1

   Kathāvatthu

2. kv15.9:0.2

   Mahāpaṇṇāsaka

3. kv15.9:0.3

   Pannarasamavagga

4. kv15.9:0.4

   Tatiyasaññāvedayitakathā

5. kv15.9:1.1

   Saññāvedayitanirodhaṁ samāpanno kālaṁ kareyyāti?

6. kv15.9:1.2

   Āmantā.

7. kv15.9:1.3

   Atthi saññāvedayitanirodhaṁ samāpannassa māraṇantiyo phasso, māraṇantiyā vedanā, māraṇantiyā saññā, māraṇantiyā cetanā, māraṇantiyaṁ cittanti?

8. kv15.9:1.4

   Na hevaṁ vattabbe …pe…

9. kv15.9:1.5

   natthi saññāvedayitanirodhaṁ samāpannassa māraṇantiyo phasso, māraṇantiyā vedanā, māraṇantiyā saññā, māraṇantiyā cetanā, māraṇantiyaṁ cittanti?

10. kv15.9:1.6

    Āmantā.

11. kv15.9:1.7

    Hañci natthi saññāvedayitanirodhaṁ samāpannassa māraṇantiyo phasso, māraṇantiyā vedanā, māraṇantiyā saññā, māraṇantiyā cetanā, māraṇantiyaṁ cittaṁ, no ca vata re vattabbe—

12. kv15.9:1.8

    “saññāvedayitanirodhaṁ samāpanno kālaṁ kareyyā”ti.

13. kv15.9:2.1

    Saññāvedayitanirodhaṁ samāpanno kālaṁ kareyyāti?

14. kv15.9:2.2

    Āmantā.

15. kv15.9:2.3

    Atthi saññāvedayitanirodhaṁ samāpannassa phasso vedanā saññā cetanā cittanti?

16. kv15.9:2.4

    Na hevaṁ vattabbe …pe…

17. kv15.9:2.5

    natthi saññāvedayitanirodhaṁ samāpannassa phasso vedanā saññā cetanā cittanti?

18. kv15.9:2.6

    Āmantā.

19. kv15.9:2.7

    Aphassakassa kālaṅkiriyā, avedanakassa kālaṅkiriyā …pe… acittakassa kālaṅkiriyāti?

20. kv15.9:2.8

    Na hevaṁ vattabbe …pe…

21. kv15.9:2.9

    nanu saphassakassa kālaṅkiriyā …pe… sacittakassa kālaṅkiriyāti?

22. kv15.9:2.10

    Āmantā.

23. kv15.9:2.11

    Hañci saphassakassa kālaṅkiriyā …pe… sacittakassa kālaṅkiriyā, no ca vata re vattabbe—

24. kv15.9:2.12

    “saññāvedayitanirodhaṁ samāpanno kālaṁ kareyyā”ti.

25. kv15.9:3.1

    Saññāvedayitanirodhaṁ samāpanno kālaṁ kareyyāti?

26. kv15.9:3.2

    Āmantā.

27. kv15.9:3.3

    Saññāvedayitanirodhaṁ samāpannassa kāye visaṁ kameyya, satthaṁ kameyya, aggi kameyyāti?

28. kv15.9:3.4

    Na hevaṁ vattabbe …pe…

29. kv15.9:3.5

    saññāvedayitanirodhaṁ samāpannassa kāye visaṁ na kameyya, satthaṁ na kameyya, aggi na kameyyāti?

30. kv15.9:3.6

    Āmantā.

31. kv15.9:3.7

    Hañci saññāvedayitanirodhaṁ samāpannassa kāye visaṁ na kameyya, satthaṁ na kameyya, aggi na kameyya, no ca vata re vattabbe—

32. kv15.9:3.8

    “saññāvedayitanirodhaṁ samāpanno kālaṁ kareyyā”ti.

33. kv15.9:4.1

    Saññāvedayitanirodhaṁ samāpanno kālaṁ kareyyāti?

34. kv15.9:4.2

    Āmantā.

35. kv15.9:4.3

    Saññāvedayitanirodhaṁ samāpannassa kāye visaṁ kameyya, satthaṁ kameyya, aggi kameyyāti?

36. kv15.9:4.4

    Āmantā.

37. kv15.9:4.5

    Na nirodhaṁ samāpannoti?

38. kv15.9:4.6

    Na hevaṁ vattabbe …pe….

39. kv15.9:5.1

    Saññāvedayitanirodhaṁ samāpanno na kālaṁ kareyyāti?

40. kv15.9:5.2

    Āmantā.

41. kv15.9:5.3

    Atthi so niyāmo yena niyāmena niyato saññāvedayitanirodhaṁ samāpanno na kālaṁ kareyyāti?

42. kv15.9:5.4

    Natthi.

43. kv15.9:5.5

    Hañci natthi so niyāmo yena niyāmena niyato saññāvedayitanirodhaṁ samāpanno na kālaṁ kareyya, no ca vata re vattabbe—

44. kv15.9:5.6

    “saññāvedayitanirodhaṁ samāpanno na kālaṁ kareyyā”ti.

45. kv15.9:6.1

    Cakkhuviññāṇasamaṅgī na kālaṁ kareyyāti?

46. kv15.9:6.2

    Āmantā.

47. kv15.9:6.3

    Atthi so niyāmo yena niyāmena niyato cakkhuviññāṇasamaṅgī na kālaṁ kareyyāti?

48. kv15.9:6.4

    Natthi.

49. kv15.9:6.5

    Hañci natthi so niyāmo yena niyāmena niyato cakkhuviññāṇasamaṅgī na kālaṁ kareyya, no ca vata re vattabbe—

50. kv15.9:6.6

    “cakkhuviññāṇasamaṅgī na kālaṁ kareyyā”ti.

51. kv15.9:6.7

    Tatiyasaññāvedayitakathā niṭṭhitā.

SuttaCentral (suttacentral.net), from the bilara-data and sc-data repositories. Licence: Public Domain. Source.