De Vita Sancti Martini
- pr.1
DOMINO SANCTO AC BEATISSIMO, SPECIALI APUD DEUM PATRONO ET CUM OMNI CULTU ET ADMIRATIONE UENERABILI UEREQVE APOSTOLICO IN OMNI RELIGIONE DOCTORI PERPETUO EPISCOPO PAULINUS.
- pr.2
Studio caritatis et dilectionis affectu obliuisci nos pudoris iubetis, cum modestiam et uerecundiam suadeatis, ne grauetur praeuaricatione iudicium. falli uos non intellegitis fauorabilius sentiendo quam uerius: bonum creditis quod bonum uultis et in consortium uestrae deuotionis adsciscitis etiam quos de desipientibus legeritis. de sancti atque apostolici doctoris et domini meritis atque uirtutibus tam splendidam ad nos misistis historiam, ut rectissime, si ita iussisset uestra benedictio, ad totius orbis notitiam perueniret. uerum his me inhaerere uestigiis et posse aliquid adicere quasi expolitius censuistis, cum multo maius sit conperta promere quam prolata transcribere. adquie- scamus tamen oboedientiam subdere, non conscientiam incautius aestimare, quia puto discerni non debere quid iubeat, cui in omnibus obsequendi uota se subdant. domine sancte ac beatissime uereque perpetue religionis et gratiae patrone, uenerabilis doctrinae speculum, perfectionis exemplum: sectare quem diligis, imitare quem sequeris, honore successor, humilitate uenerator.
- pr.3
utamur uestri definitione mandati. usurpate quod uestrum est, qui me, ut scitis, obnoxium hac electione perfecistis. cum in manus uestras charta peruenerit, fouete quod sumitis, excusate inperitiam, exorate clementiam: ignoscat usurpationi, opituletur peccanti, succurrat errori. indignum fuit ut gesta tam grandia auderemus attingere, sed adrogantius fuerat mandata con- temnere. ferat murmura per patientiam suscepta per gratiam, non irascatur audaciae per gaudia fortiori. deus noster, quae per ipsum dignatur operari, uult quolibet nuntiante cognosci. uos patrocinio fouete susceptum, quem per illos thesauros caritatis adsumpsistis incognitum.
- 1.1
Sparserat in toto lumen uenerabile mundo
- 1.2
Christus, euangelici reserans mysteria regni.
- 1.3
sed quia non omnes uirtutum operatio gentes
- 1.4
mouerat, et fragili dubitabant credere sensu
- 1.5
quidquid ab externis uulgasset nuntius oris
- 1.6
(nam uerbis conperta mouent, praesentia rebus:
- 1.7
suadentur non uisa quidem, sed uisa probantur),
- 1.8
ille ergo, in totum cui par miseratio mundum,
- 1.9
seuit et in nostris miracula plurima terris,
- 1.10
donans extremis Martini insignia Gallis.
- 1.11
quem procul in nostram misit fecunda salutem
- 1.12
Pannonia, haut humili generatum stirpe tribuni.
- 1.13
nam genitor clarus meritorum laude: sed iste
- 1.14
nobilior patribus tam claris, qui patre Christo
- 1.15
spreuit sacrilegos bene degener in patre ritus.
- 1.16
Uix etenim decimo, senior iam moribus, anno
- 1.17
transiit ad sacram. constanti pectore legem
- 1.18
signauitque crucis sanctam munimine frontem.
- 1.19
non illi in tenero mens lubrica pectore: tota
- 1.20
praeceptum seruare dei uel nosse uoluntas,
- 1.21
conuentus uitare hominum, secreta beati
- 1.22
scire heremi spretoque deum cognoscere mundo,
- 1.23
linquere terrenas sublimi pectore curas.
- 1.24
Haec uix bis senis cum moliretur in annis,
- 1.25
praeclusa est tanti sublimis gloria facti,
- 1.26
sed meritum numerante deo, qui uelle probauit.
- 1.27
praecipit Augustus dilectu ad bella parando
- 1.28
accingi cunctam ueterano e germine prolem.
- 1.29
quid non liuor agat? prodit pater armaque nato
- 1.30
ingerit. heu tanti pietas oblita pericli!
- 1.31
quin potius, si quem recipit mens saxea sensum,
- 1.32
cresce tuis titulis: mage laus est nam tua uinci.
- 1.33
cerne pio tantum quae gesserit omnia uoto:
- 1.34
si bona sunt, imitare libens: sin ardua, gaude.
- 1.35
uincitur Christi miles pro milite saecli,
- 1.36
sed mens non trahitur nec cor cum carne ligatur.
- 1.37
uana tyrocinii sunt nomina: militat olim,
- 1.38
qui captus proprii per proelia plurima regis
- 1.39
uicit auaritiam debellauitque superbam
- 1.40
luxuriem: prostrata iacet iam uiribus huius
- 1.41
ambitio, et firmam fugit furor iraque mentem
- 1.42
excedensque omnes funesta superbia culpas.
- 1.43
unum progressus socium sibi uix sinit ire
- 1.44
non opere adstrictum, sed solum nomine seruum.
- 1.45
o felix, cui tale iugum tam grata parauit
- 1.46
condicio, ut de sorte tua contendere tecum
- 1.47
nobilium possint certantia uota uirorum,
- 1.48
si liceat seruire tamen. sed tu quoque duram
- 1.49
cogeris ad legem nascendi lege solutus:
- 1.50
nam tibi subiecti seruit deuotio sancti.
- 1.51
idem habitus, parcae conmunis copia mensae,
- 1.52
hic prior obsequiis, ne saltim noscere possit
- 1.53
praelatum domino quaeuis sollertia seruum.
- 1.54
Hic iam cum paribus quae gratia, quamque modeste
- 1.55
ipsos subdiderat dilectio uera priores:
- 1.56
tum sumendorum districtio quanta ciborum,
- 1.57
ne distenta citum uitiarent uiscera sensum -
- 1.58
nec premeret uigilem membrorum sarcina mentem,
- 1.59
ut diuisa inopi praeberet copia partem
- 1.60
quaeque unum obrueret, melius refoueret utrumque.
- 1.61
nam sic supplicibus diuiserat omnia egenis,
- 1.62
ut sola exesis superessent tegmina membris:
- 1.63
cum subito horrentis glaciali frigore brumae
- 1.64
nudus in occursum properat, uix uerba frementi
- 1.65
dimidians praefracta sono: sed causa loquellam
- 1.66
■ expedit et linguae partes proclamat erumna.
- 1.67
praetereunt cuncti, fastiditamque querellam
- 1.68
despexit misero locupletum insania risu.
- 1.69
substitit incertus confuso pectore sanctus
- 1.70
quid faceret: nam uotum aderat, substantia derat.
- 1.71
si tegeret, nudandus erat. nec sic quoque clarum
- 1.72
suspendit saltim cunctantis uel mora factum.
- 1.73
sola superfuerat corpus tectura beatum,
- 1.74
ut semper, duplicata clamis, quae frigus et imbrem
- 1.75
uentorum et rabiem geminato arceret amictu.
- 1.76
nam sic truncatam conpensat pendula partem,
- 1.77
si, quod defuerit capiti, creuisse calori
- 1.78
sentiat adiecto tepefactum uellere corpus.
- 1.79
uerum haec districti felix sententia uoti
- 1.80
amouet et tamquam cordis dispendia damnat,
- 1.81
quod sic maluerit trepidae cautella fidei
- 1.82
adiectam membris duplicato tegmine partem
- 1.83
concessisse uni quam diuisisse duobus.
- 1.84
nec mora tardat opus, sed transit dextera uotum:
- 1.85
expediit factum, quidquid mens uidit agendum.
- 1.86
stringitur inuictus sine crimine uulneris ensis
- 1.87
et mediam resecat miseratio prodiga partem,
- 1.88
peiorem sibi credo legens. tum membra trementis
- 1.89
obtegit, et tradens aliquem de ueste teporem
- 1.90
iam leuiore habitu recipit de frigore partem.
- 1.91
o felix, uirtute tua miracula uincens
- 1.92
omnia et excedens domini praecepta iubentis.
- 1.93
ille etenim modico contentos nos iubet esse
- 1.94
nec seruare duas uestes: tu diuidis unam.
- 1.95
95 aspiciunt omnes. alii deformia rident
- 1.96
tegmina nec cernunt mage uerum in corde decorem.
- 1.97
ast alii secum conpuncto corde queruntur
Next → — showing 1–100 of 3,625
Corpus Scriptorum Ecclesiasticorum Latinorum. CTS URN stoa0224b.stoa001.opp-lat1. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.