Andria

Perseus Latin · Perseus Latin · 1,454 sections

1.1.86c
Phaedrum, aut Cliniam
1.1.87
Dicebant, aut Niceratum; nam hi tres tum simul
1.1.88
Amabant. Eho, quid Pamphilus? Quid? symbolam
1.1.89
Dedit, coenavit. Gaudebam. Item alio die
1.1.90
Quaerebam: comperiebam nihil ad Pamphilum
1.1.91
Quidquam attinere. Enimvero spectatum satis
1.1.92
Putabam, et magnum exemplum continentiae.
1.1.93
Nam qui cum ingeniis conflictatur eiusmodi,
1.1.94
Neque commovetur animus in ea re tamen,
1.1.95
Scias posse habere iam ipsum suae vitae modum.
1.1.96
Cum id mihi placebat tum uno ore omnes omnia
1.1.97
Bona dicere, et laudare fortunas meas
1.1.98
Qui gnatum haberem tali ingenio praeditum.
1.1.99
Quid verbis opus est? hac fama impulsus Chremes,
1.1.100
Ultro ad me venit unicam gnatam suam
1.1.101
Cum dote summa filio uxorem ut daret.
1.1.102
Placuit; despondi. Hic nuptiis dictus est dies.
1.1.103
Quid obstat cur non verae fiant?
1.1.103b
Audies.
1.1.104
Fere in diebus paucis quibus haec acta sunt
1.1.105
Chrysis vicina haec moritur.
1.1.105b
O factum bene!
1.1.106
Beasti; metui a Chryside.
1.1.106b
Ibi tum filius
1.1.107
Cum illis qui amabant Chrysidem una aderat frequens;
1.1.108
Curabat una funus, tristis interim,
1.1.109
Nonnunquam collacrumabat: placuit tum id mihi.
1.1.110
Sic cogitabam; Hic, parvae consuetudinis
1.1.111
Causa, mortem huius tam fert familiariter:
1.1.112
Quid si ipse amasset? quid mihi hic faciet patri?
1.1.113
Haec ego putabam esse omnia humani ingeni
1.1.114
Mansuetique animi officia. Quid multis moror?
1.1.115
Egomet quoque eius causa in funus prodeo,
1.1.116
Nihil suspicans etiam mali.
1.1.116b
Hem, quid est?
1.1.116c
Scies.
1.1.117
Effertur: imus. Interea inter mulieres
1.1.118
Quae ibi aderant forte unam adspicio adolescentulam,
1.1.119
Forma.
1.1.119b
Bona fortasse.
1.1.119c
Et vultu, Sosia,
1.1.120
Adeo modesto, adeo venusto, ut nihil supra.
1.1.121
Quia tum mihi lamentari praeter caeteras
1.1.122
Visa est, et quia erat forma praeter caeteras
1.1.123
Honesta et liberali, accedo ad pedisequas;
1.1.124
Quae sit rogo. Sororem esse aiunt Chrysidis.
1.1.125
Percussit illico animum: at at! hoc illud est,
1.1.126
Hinc illae lacrumae; haec illa est misericordia.
1.1.127
Quam timeo, quorsum evadas.
1.1.127b
Funus interim
1.1.128
Procedit: sequimur: ad sepulcrum venimus:
1.1.129
In ignem posita est: fletur. Interea haec soror
1.1.130
Quam dixi ad flammam accessit imprudentius,
1.1.131
Satis cum periclo. Ibi tum exanimatus Pamphilus
1.1.132
Bene dissimulatum amorem et celatum indicat.
1.1.133
Accurrit: mediam mulierem complectitur:
1.1.134
Mea Glycerium, inquit, quid agis? cur te is perditum?
1.1.135
Tum illa, ut consuetum facile amorem cerneres,
1.1.136
Reiecit se in eum flens quam familiariter.
1.1.137
Quid ais?
1.1.137b
Redeo inde iratus atque aegre ferens.
1.1.138
Nec satis ad obiurgandum causae. Diceret,
1.1.139
Quid feci? quid commerui aut peccavi pater?
1.1.140
Quae sese in ignem iniicere voluit, prohibui,
1.1.141
Servavi. Honesta oratio est.
1.1.141b
Recte putas.
1.1.142
Nam si illum obiurges vitae qui auxilium tulit,
1.1.143
Quid facias illi qui dederit damnum aut malum?
1.1.144
Venit Chremes postridie ad me clamitans,
1.1.145
Indignum facinus; comperisse Pamphilum
1.1.146
Pro uxore habere hanc peregrinam. Ego illud sedulo
1.1.147
Negare factum; ille instat factum: denique
1.1.148
Ita tum discedo ab illo, ut qui se filiam
1.1.149
Neget daturum.
1.1.149b
Non tu ibi gnatum?
1.1.149c
Ne haec quidem
1.1.150
Satis vehemens causa ad obiurgandum.
1.1.150b
Qui cedo?
1.1.151
Tute ipse his rebus finem praescripsti pater.
1.1.152
Prope adest cum alieno more vivendum est mihi:
1.1.153
Sine nunc meo me vivere interea modo.
1.1.154
Qui igitur relictus est obiurgandi locus?
1.1.155
Si propter amorem uxorem nolit ducere,
1.1.156
Ea primum ab illo animadvertenda iniuria est.
1.1.157
Et nunc id operam do ut per falsas nuptias
1.1.158
Vera obiurgandi causa sit si deneget:
1.1.159
Simul sceleratus Davus siquid consili
1.1.160
Habet ut consumat nunc cum nihil obsint doli;
1.1.161
Quem ego credo manibus pedibus obnixe omnia
1.1.162
Facturum; magis id adeo mihi ut incommodet
1.1.163
Quam ut obsequatur gnato.
1.1.163b
Quapropter?
1.1.163c
Rogas?
1.1.164
Mala mens, malus animus. Quem quidem ego si sensero—
1.1.165
Sed quid opus est verbis? Sin eveniat quod volo,
1.1.166
In Pamphilo ut nil sit morae, restat Chremes,
1.1.167
Qui mi exorandus est: et spero confore.
1.1.168
Nunc tuum est officium has bene ut adsimules nuptias:
1.1.169
Perterrefacias Davum: observes filium,
1.1.170
Quid agat, quid cum illo consili captet.

Perseus Latin. CTS URN phi0134.phi001.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.