Cistellaria
- 1.1.89
quó is homo insinuavit pacto se ad te?
- 1.1.89b
Per Dionysia
- 1.1.90
mater pompam me spectatum duxit. dum redeo domum,
- 1.1.91
conspicillo consecutust clanculum me usque ad fores.
- 1.1.92
inde in amicitiam insinuavit cum matre et mecum simul
- 1.1.93
blanditiis, muneribus, donis.
- 1.1.93b
Mihi istunc vellem hominem dari,
- 1.1.94
ut ego illum vorsarem!
- 1.1.94b
Quid opust verbis? consuetudine
- 1.1.95
coepi amare contra ego illum, et ille me.
- 1.1.95b
O mea Selenium,
- 1.1.96
adsimulare amare oportet. nam si ames, extempulo
- 1.1.97
melius illi multo, quém ames, consulas quam rei tuae.
- 1.1.98
At ille conceptis iuravit verbis apud matrem meam,
- 1.1.99
me uxorem ducturum esse: ei nunc alia ducendast domum,
- 1.1.100
sua cognata Lemniensis, quae habitat hic in proxumo.
- 1.1.101
nam eúm pater eius subégit. nunc mea mater iratast mihi,
- 1.1.102
quia non redierim domum ad se, postquam hanc rem resciverim,
- 1.1.103
eum uxorem ducturum esse aliam.
- 1.1.103b
Nihil amori iniuriumst.
- 1.1.104
Nunc te amabo ut hanc hic unum triduom hoc solum sinas
- 1.1.105
esse et hic servare apud me. nam ad matrem accersita sum.
- 1.1.106
Quamquam istud mihi erit molestum triduom, et damnum dabis,
- 1.1.107
faciam.
- 1.1.107b
Facis benigne et amice. sed tu, Gymnasium mea,
- 1.1.108
si me absente Alcesimarchus veniet, nolito acriter
- 1.1.109
eum inclámare (utut erga me est meritus, mihi cordi est tamen),
- 1.1.110
sed, amabo, tranquille: ne quid, quod illi doleat, dixeris.
- 1.1.111
accipias clavis: si quid opus tibi erit prompto, promito.
- 1.1.112
ego volo ire.
- 1.1.112b
Vt mi excivisti lacrimas.
- 1.1.112c
Gymnasium mea,
- 1.1.113
bene vale.
- 1.1.113b
Cura te, amabo. sicine immunda, obsecro,
- 1.1.114
ibis?
- 1.1.114b
Immundas fortunas aequom est squalorem sequi.
- 1.1.115
Amiculum hoc sustolle saltem.
- 1.1.115b
Sine trahi, cum egomet trahor.
- 1.1.116
Quando ita tibi lubet, vale atque salve.
- 1.1.116b
Si possim, velim.—
- 1.1.117
Numquid me vis, mater, intro quin eam? ecastor mihi
- 1.1.118
visa amare.
- 1.1.118b
Istoc ergo auris graviter obtundo tuas,
- 1.1.119
ne quem ames. abi intro.
- 1.1.119b
Numquid me vis?
- 1.1.119c
Vt valeas.
- 1.1.119d
Vale.—
- 1.2.120
Idem míhi magnae quod parti est vitium mulierum
- 1.2.121
quae hunc quaestum facimus: quae ubi saburratae sumus,
- 1.2.122
largiloquae extemplo sumus, plus loquimur quam sat est.
- 1.2.123
nam ego illanc olim, quae hinc flens abiit, parvolam
- 1.2.124
puellám proiectam ex angiportu sustuli.
- 1.2.125
adulescens quidam hic est adprime nobilis
- 1.2.126
quin ego nunc quia sum onusta mea ex sententia
- 1.2.127
quiaque adeo me complevi flore Liberi,
- 1.2.128
magis líbera uti lingua conlibitum est mihi,
- 1.2.129
tacere nequeo misera quod tacito usus est.
- 1.2.130
Sicyone, summo genere; ei vivit pater.
- 1.2.131
is amore misere hanc deperit mulierculam,
- 1.2.132
quae hinc modo flens abiit. contra amore eum haec deperit.
- 1.2.133
eam meae ego amicae dono huic meretrici dedi,
- 1.2.134
quae saepe mecum mentionem fecerat,
- 1.2.135
puerum aut puellam alicunde ut reperirem sibi,
- 1.2.136
recens natum, eapse quod sibi supponeret.
- 1.2.137
ubi mihi potestas primum evenit, ilico
- 1.2.138
feci eius ei quod me oravit copiam.
- 1.2.139
postquam eam puellam á me accepit, ilico
- 1.2.140
eandem puellam peperit quam a me acceperat,
- 1.2.141
sine obstetricis opera et sine doloribus,
- 1.2.142
item ut aliae pariunt, quae malum quaerunt sibi.
- 1.2.143
nam amatorem aibat esse peregrinum sibi
- 1.2.144
suppositionemque eius facere gratia.
- 1.2.145
id duae nos solae scimus: ego quae illi dedi
- 1.2.146
et illa quae a me accepit, praeter vos quidem.
- 1.2.147
haec sic res gesta est. si quid usus venerit,
- 1.2.148
meminisse ego hanc rem vos volo. ego abeo domum.—
- 1.3.149
Vtrumque haec, et multiloqua et multibiba, est anus.
- 1.3.150
satin víx reliquit deo quod loqueretur loci,
- 1.3.151
itá properavit de puellae proloqui
- 1.3.152
suppositione. quod si tacuisset, tamen
- 1.3.153
ego eram dicturus, deus, qui poteram planius.
- 1.3.154
nam mihi Auxilio est nomen. nunc operam date,
- 1.3.155
ut ego argumentum hoc vobis plane perputem.
- 1.3.156
fuere Sicyoni iam diu Dionysia.
- 1.3.157
mercator venit huc ad ludos Lemnius,
- 1.3.158
isque hic compressit virginem, adulescentulus,
- 1.3.159
vi, vinulentus multa nocte in via.
- 1.3.160
is ubi malam rem scit se meruisse, ilico
- 1.3.161
pedibus perfugium peperit, in Lemnum aufugit,
- 1.3.162
ubi habitabat tum. ílla quam compresserat
- 1.3.163
decumo post mense exacto hic peperit filiam.
- 1.3.164
quoniam reum eius facti nescit qui siet,
- 1.3.165
paternum servom sui participat consili,
- 1.3.166
dat eam puellam ei servo exponendam ad necem.
- 1.3.167
is eam proiecit. haec puellam sustulit.
- 1.3.168
ille clam óbservavit servos qui eam proiecerat
- 1.3.169
quo aut quas in aedis haec puellam deferat.
- 1.3.170
ut eampse vos audistis confiterier,
- 1.3.171
dat eam puellam meretrici Melaenidi,
- 1.3.172
eaque educavit eam sibi pro filia
← Previous · Next → — showing 101–200 of 831
Perseus Latin. CTS URN phi0119.phi007.perseus-lat2. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.