← Library

Celtis.odes

Latin Library (medieval and later) · The Latin Library · 7 sections

1. 1

   Conrad Celtis: Odes CONRADUS CELTIS: ODES

2. 2

   Ode 3,8

3. 3

   Exsecrat Germanum inventorem Bombardae, cuius pila paene traiectus fuisset.

4. 4

   Primus per auras saxa volantia Ardente torquens concita pulvere Quique igne sternaci sonoro Aera commovefecit ictu, Is regis olim ficta tonitrua Et vera struxit cum Iove fulmina, Dum mille momento per unam Corpora comminuit ruinam. Uno tumulto fortia moenia Molitur urbes celsa culmina Cum turribus casura, tristes Machina dum iaculatur orbes. Nostro sub axe indignus erat mori Germana nullis nomina saeculis Laturus, indignus scelestam Carminibus meruisse vitam, Riphaea dignus frigora perpeti Et saxa semper ferre natantia Symplegadum vel distrahendus Caucasiis scopulis sub Arcto Aut Sisypheum impellere montibus Saxum relabens impetuosius Aut Siculis urenda flammis Corpora contumulare in aevum. Traiectus essem quam prope plumbea Pila, furentum nuper ut agmina Suevorum inarmatus viderem Vindelicis recubare campis, Fatalis olim qui fuerat locus Varo perempto cum legionibus Hunisque torvis, quos cruento Karolus edomuit triumpho. Quam laeta prisco tempore saecula Ignara belli, cum neque vulnera Norant viri nec saevus ensis Pendiderat lateri minaci! Tunc nulla stabant moenia machinis Oppleta nec tormenta furentibus Funesta longis explicabant Cornibus ignivomum foramen, Felix sed agris turba novalibus Errabat aptans vimina vitibus, Muris nec ullis implicati Pervigiles timuere noctes. Sed praeda postquam mentibus impiis Incessit, arces mox sibi condidit Et montium praerupta scandens Insidias struit et rapinas. Hinc nostra cernens saecula Iuppiter, Quod tela tractent iam sua caelica, Nostram deus vitam perosus Proelia continuata versat Et bella saevis Martia regibus Inspirat, orbem qui rabidum movent, Nullamque servant inde sanctam Saecula deteriora pacem.

5. 5

   Ode 3,9

6. 6

   Laudat Germanum inventorem artis impressoriae.

7. 7

   Quid tantis strepidat Graecia laudibus Invenisse suis ingeniis canens, Qua natura potens lege coerceat Caeli fulgida sidera? Non est inferior, credite, Daedalo Aut, qui Cecropias protulerat notas, Ex Monguntiacis civibus editus, Nostri gloria nominis, Qui sculpsit solidos aere characteres Et versis docuit scribere litteris, Quo nasci utilius non potuerat magis Cunctis, credite, saeculis. Iam tandem Italici non poterunt viri Germanos stolida carpere inertia, Cum nostris videant crescere ab artibus Romanis saecula litteris. Quae tand(em) Aemilio gratia Maximo Solvenda (e)st, genitus qui patre Caesare, Sub quorum imperio creverat inclito Nostris ingenium viris. Neo-Latin The Latin Library The Classics Homepage

The Latin Library (thelatinlibrary.com), via CLTK's latin_text_latin_library mirror. Public Domain Mark 1.0: no copyright. Licence: Public Domain Mark 1.0. Source.